1, 2. Ke ka baka la’ng re swanetše go tlwaetša ba bangwe gore ba tle ba swanelege go phetha mešomo ya Modimo?

MOŠOMO wa Jesu o mogolo ge a be a le mo lefaseng e be e le go bolela ditaba tše dibotse tša Mmušo wa Modimo. Lega go le bjalo, o be a ipha nako ya go tlwaetša ba bangwe gore e tle e be badiši le barutiši. (Mat. 10:5-7) Gaešita le ge Filipi a be a swaregile ka go bolela ditaba tše dibotse, ga go pelaelo gore o ile a thuša barwedi ba gagwe ba bane go ba le bokgoni bja go botša ba bangwe ka Modimo. (Dit. 21:8, 9) Go tlwaetša ba bangwe ka tsela e bjalo go bohlokwa gakaaka’ng lehono?

² Lefaseng ka moka, batho bao ba amogelago ditaba tše dibotse ba oketšega ka lebelo. Bao ba sa tšwago go kopanela eupša ba se ba hlwa ba kolobetšwa ba swanetše go kwešiša bohlokwa bja go ba le thuto ya Beibele ya motho ka noši. Le gona ba swanetše go rutwa go botša batho ditaba tše dibotse le go ba ruta therešo. Diphuthegong tša rena, bana babo rena ba swanetše go kgothaletšwa gore ba šome ka thata e le gore ba tle ba kgethwe go hlankela e le bahlanka ba bodiredi goba bagolo. Bakriste bao ba godilego tsebong ba  ka diriša “thuto e botse” go thuša bao ba sa tšwago go kopanela go gatela pele moyeng.—Die. 4:2.

3, 4. (a) Paulo o bontšhitše bjang gore go ithuta Mangwalo go dira gore re atlege tšhemong? (b) Pele re kgothaletša barutwana ba rena go ithuta Beibele ka noši, ke’ng seo rena re swanetšego go ba re šetše re se dira?

³ Thuto ya Beibele ya motho ka noši e bohlokwa gakaaka’ng? Re hwetša karabo mantšung ao moapostola Paulo a a boditšego Bakristegotee le yena ba kua Kolose. O ba ngwaletše gore: “[Ga se ra ka] ra kgaotša go le rapelela le go kgopela gore le tlale tsebo e nepagetšego ya thato ya [Modimo] ka bohlale bjohle le tlhaologanyo ya moya, e le gore le sepele ka mo go swanetšego Jehofa gore le mo kgahliše ka mo go tletšego ge le dutše le tšwela pele le enywa dienywa modirong o mongwe le o mongwe o mobotse gomme le gola tsebong e nepagetšego ya Modimo.” (Bakol. 1:9, 10) Tsebo yeo e nepagetšego ya Modimo e be e tla thuša Bakriste ba Kolose gore ba kgone go ‘sepela ka mo go swanetšego Jehofa gore ba mo kgahliše ka mo go tletšego.’ Seo se be se tla ba thuša go tšwela pele ba “enywa dienywa modirong o mongwe le o mongwe o mobotse,” kudukudu modirong wa go bolela ditaba tše dibotse. E le gore motho a hlankele Jehofa gabotse, o swanetše go ba le lenaneo la ka mehla la go ithuta Beibele. Re swanetše go thuša barutwana ba rena ba Beibele gore ba kwešiše seo.

⁴ Pele re ka thuša ba bangwe gore ba be le thuto ya Beibele ya motho ka noši, rena ka borena re swanetše go ba re tseba bohlokwa bja yona. Ge e le gabotse, rena ka noši re swanetše go ba le lenaneo le lebotse la go ithuta Beibele. Ka gona ipotšiše gore: ‘Ge beng ba dintlo ba bolela dilo tšeo di sa dumelelanego le Mangwalo goba ba mpotšiša dipotšišo tše thata, na ke kgona go ba araba ka Beibele? Ge ke bala mabapi le kamoo Jesu, Paulo le ba bangwe ba ilego ba kgotlelela bodireding, na ke naganišiša kamoo nna nka kgotlelelago ka gona tirelong ya Jehofa?’ Ka moka ga rena re swanetše go tseba Lentšu la Modimo le go amogela keletšo ya lona. Le gona ge e ba re botša ba bangwe kamoo thuto ya rena ya motho ka noši e re hotšego ka gona, re ka ba thuša gore le bona ba hwetše mehola e swanago ka go ithuta Mangwalo ka mafolofolo.

5. Re botše kamoo bao ba sa tšwago go kopanela ba ka thušwago go ba le thuto ya ka mehla ya motho ka noši.

⁵ O ka ipotšiša gore: ‘Nka tlwaetša bjang morutwana wa ka gore a ithute Beibele ka mehla?’ Mogato wa pele ke gore o mo rute go lokišeletša thuto yeo o e swarago le yena. O ka šišinya gore a bale dikarolo tšeo di lego ka mafelelong a puku ya Ke Eng Seo ge e le Gabotse Beibele e se Rutago? gomme a bale le mangwalo ao a lego moo. Mo thuše go lokišetša diboka ka morero wa gore a tle a arabe. Mo kgothaletše go bala tokollo e nngwe le e nngwe ya Morokami le Phafoga! Ge e ba Watchtower Library le BOKGOBAPUKU  BJA INTHANETENG di le gona ka segagabo, o ka mmontšha kamoo a ka di dirišago go araba dipotšišo tša mabapi le Beibele. Ge o ka thuša morutwana wa gago wa Beibele go dira dilo tše, go se go ye kae o tla ipshina ka thuto ya gagwe ya motho ka noši.

6. (a) O ka thuša bjang morutwana wa gago gore a rate go ithuta Beibele? (b) Ke’ng seo morutwana a ka se dirago ge a ka rata go ithuta Beibele?

⁶ Ke therešo gore ga se ra swanela go gapeletša motho go bala le go ithuta Beibele. Go e na le moo, a re dirišeng ditlabakelo tšeo re di newago ke mokgatlo wa Jehofa go thuša barutwana ba rena gore ba rate go ithuta Beibele. Ge nako e dutše e eya, morutwana yo a ikemišeditšego o tla ikwa go swana le mopsalme yo a opetšego ka gore: “Nna ke kgahlwa ke go batamela Modimo. Ke tšhabetše go Mmuši Morena Jehofa.” (Ps. 73:28) Moya wa Jehofa o tla šoma morutwaneng yo bjalo yo a ratago go ithuta Beibele.

7. Jesu o ile a tlwaetša ba bangwe bjang gore ba bolele ditaba tše dibotse? (Bona seswantšho seo se lego mathomong a sehlogo.)

⁷ Go Mateo kgaolo 10, re bala ka ditaelo tšeo Jesu a ilego a di nea baapostola ba gagwe ba 12. Go e na le gore a no ba botša ditaba tše dintši, o ile a ba botša dilo tše di lebanyago tšeo ba bego ba swanetše go di dira. ^[1]Baapostola ba ile ba theetša Jesu ge a dutše a ba ruta kamoo ba ka botšago batho ditaba tše dibotse ka katlego. Ka morago ga moo ba ile ba ya tšhemong. Ka ge ba be ba bone mekgwa ya Jesu ya go ruta, go se go ye kae e ile ya ba barutiši ba nago le bokgoni ba Lentšu la Modimo. (Mat. 11:1) Re ka tlwaetša barutwana ba rena ba Beibele gore e be bagoeledi bao ba nago le bokgoni ba ditaba tše dibotse. Anke ga bjale re ahlaahleng ditsela tše pedi tšeo re ka ba thušago ka tšona.

8, 9. (a) Jesu o be a bolela le batho bjang bodireding? (b) Re ka thuša bjang bao e sa tšwago go ba bagoeledi gore ba bolele le batho go swana le Jesu?

⁸ Bolela le batho. Gantši Jesu o be a bolela le motho ka go lebanya ge a be a bolela ditaba tše dibotse tša Mmušo. Ka mohlala, o ile a ba le poledišano e botse kudu le mosadi yo mongwe sedibeng sa Jakobo kgauswi le motse wa Sikara. (Joh. 4:5-30) Le gona o ile a boledišana le Mateo yo gape a bitšwago Lefi, yo e bego e le molekgetho. Diebangedi ga di re botše mo gontši ka poledišano yeo, eupša Mateo o ile a amogela taletšo ya Jesu ya gore e be molatedi wa gagwe. Mateo le ba bangwe ba ile ba kwa Jesu a ruta ka nako e teletšana monyanyeng wo o bego o diretšwe legaeng la Mateo.​—Mat. 9:9; Luka 5:27-39.

⁹ Lebakeng le lengwe, Jesu o ile a bolela ka tsela ya bogwera le Nathaniele, yoo a bego a lebelela Banatsaretha gampe. Ka baka leo, Nathaniele o ile a tutueletšega go fetoša pono ya gagwe. O ile a ithuta mo go oketšegilego ka seo Jesu wa Monatsaretha a bego a se ruta. (Joh. 1:46-51) Ka gona go bohlokwa gore re rute bao e sa tšwago go ba bagoeledi gore ba bolele le batho ka tsela ya bogwera le ka bolokologi. ^[2]Bao re ba thušago ka tsela ye ba tla thabela go bona kamoo batho ba dipelo tše dibotse ba arabelago ka gona ge re ba bontšha lerato e bile re bolela le bona gabotse.

10-12. (a) Jesu o be a thuša bjang bao ba bego ba bontšha kgahlego molaetšeng wa gagwe? (b) Re ka thuša bjang bao e sa tšwago go ba bagoeledi gore ba oketše bokgoni bja bona bja go ruta therešo ya Beibele?

¹⁰ Thuša bao ba bontšhitšego kgahlego. Jesu o be a šaletšwe ke nako e nyenyane ya go bolela ditaba tše dibotse mo lefaseng. Lega go le bjalo, o be a ipha nako ya go thuša batho bao ba bego ba bontšha gore ba rata molaetša wa gagwe. Ka mohlala, Jesu o ile a ruta lešaba, a diriša sekepe e le sethala. Lona lebakeng leo, o ile a thuša Petro ka mohlolo go swara dihlapi tše dintši, gomme a re go yena: “Go tloga bjale  go ya pele o tla be o swara batho ba phela.” Seo Jesu a se boletšego le go se dira se ile sa ba le mafelelo afe? Petro le bašomigotee le yena ba ile “ba bušetša dikepe lešing, ba tlogela tšohle gomme ba latela [Jesu].”​—Luka 5:1-11.

¹¹ Nikodemo, yo e bego e le setho sa kgorokgolo ya Sanhedrine, o ile a kgahlwa ke dithuto tša Jesu. O be a nyaka go ithuta ka mo go oketšegilego eupša a tšhaba gore batho ba tla reng ge ba ka mmona a na le Jesu. Jesu o be a fetofetoga le maemo e bile a diriša nako ya gagwe go thuša ba bangwe; ka gona o ile a kopana le Nikodemo ka sephiring bjona bošegong bjoo. (Joh. 3:1, 2) Re ithuta’ng dipegong tše? Re ithuta gore Morwa wa Modimo o be a ipha nako ya go matlafatša tumelo ya motho ka go lebanya. Ka gona le rena re swanetše go fišegela go dira maeto a go boela le go swara dithuto tša Beibele.

¹² Bao e sa tšwago go ba bagoeledi ba tla oketša bokgoni bja bona bja go ruta therešo ya Beibele ge re ka šoma le bona tšhemong. Re ka ba thuša go dira maeto a go boela gaešita le bathong bao ba bontšhitšego kgahlego e nyenyane. Re ka ba kgopela gore ba ye le rena maetong a rena a go boela le ge re yo swara dithuto tša Beibele. Ka go ba nea tlwaetšo e bjalo le go ba kgothatša, ga go pelaelo gore ba tla rata go thuša batho bao ba bontšhitšego kgahlego le go swara dithuto tša Beibele. Le gona ba tla ithuta go kgotlelela le go se fele pelo bodireding.​—Bagal. 5:22; bala lepokisi leo le rego “ Go Phegelela go Bohlokwa.”

13, 14. (a) O nagana’ng ka mehlala ya batho ba ka Beibeleng bao ba ilego ba ikgafa kudu gore ba thuše ba bangwe? (b) O ka dira dilo dife go tlwaetša bafsa le bao e sa tšwago go ba bagoeledi gore ba rate bana babo rena le dikgaetšedi?

¹³ Dipego tša Beibele di gatelela tokelo yeo re nago le yona ya go bontšhana “lerato la borwarre” le go hlankelana. (Bala 1 Petro 1:22; Luka 22:24-27.) Morwa wa Modimo o fane ka dilo tšohle go hlankela ba bangwe, go akaretša le bophelo bja gagwe. (Mat. 20:28) Dorokase “o be a tletše ditiro tše dibotse le dimpho tša kgaugelo tšeo a bego a di nea.” (Dit. 9:36, 39) Maria, e lego kgaetšedi yo a bego a dula Roma, o ile a ‘itapiša kudu’ go thuša phuthego. (Baroma 16:6) Re ka thuša bjang bao ba sa tšwago go kopanela gore ba kwešiše bohlokwa bja go thuša bana babo rena le dikgaetšedi?

¹⁴ Dihlatse tšeo di godilego tsebong di ka laletša bao ba sa tšwago go kopanela ge di etela balwetši le batšofadi. Ge go swanetše, batswadi ba ka dira seo le bana ba bona. Bagolo ba ka swarišana le ba bangwe go kgonthišetša gore batšofadi ba rena ba rategago ba na le dijo tša phepo le gore mo ba dulago gona go hlwekile le go šireletšega. Ge re dira dilo tše, bana ba rena le bao ba sa tšwago go kopanela ba ithuta go thuša batho ba bangwe. Ge mogolo yo mongwe a le tšhemong, o be a feta a hlola Dihlatse tše di dulago tikologong yeo go bona ge e ba di sa phetše gabotse. Ka go re’alo, mofsa yo a bego a sepela le yena diketelong tše bjalo o ile a ithuta gore re swanetše go rata ditho ka moka tša phuthego.​—Baroma 12:10.

15. Ke ka baka la’ng go le bohlokwa gore bagolo ba thuše banna ka phuthegong go gatela pele?

¹⁵ Ka ge Jehofa a diriša banna go ruta phuthego, go bohlokwa gore bana babo rena ba be le bokgoni bja go ruta. Ge e ba o le mogolo, na o ka theetša mohlanka wa bodiredi ge a itlwaetša polelo ya gagwe? Ge o ka mo thuša, a ka kgona go kaonefatša bokgoni bja gagwe bja go ruta Lentšu la Modimo.​—Neh. 8:8. ^[3]

16, 17. (a) Paulo o ile a thuša Timotheo bjang gore a dire tšwelopele? (b) Bagolo ba ka dira’ng go tlwaetša badiši ba ka moso ba phuthego?

¹⁶ Go nyakega badiši ba bantši ka phuthegong ya Bokriste, gomme bao ba tlago go dira mošomo wo nakong e tlago ba swanetše go tlwaetšwa ka mehla. Paulo o boletše mokgwa wo o ka latelwago ge re tlwaetša ba bangwe. O boditše Timotheo gore: “Wena ngwanaka, dula o hwetša matla bothong bjo bogolo bja Modimo  bjo bo tlišwago ke go ba boteeng le Kriste Jesu, gomme dilo tše o di kwelego go nna tšeo di ilego tša thekgwa ke dihlatse tše dintši, dilo tšeo o di gafele banna ba botegago, bao le bona ba tlago go swanelegela gabotse go ruta ba bangwe.” (2 Tim. 2:1, 2) Timotheo o ile a kgona go ithuta dilo tše dintši ka go šoma le moapostola yo yo a bego a godile. Ka morago o ile a diriša seo a ithutilego sona go Paulo bodireding bja gagwe le dikarolong tše dingwe tša tirelo e kgethwa.​—2 Tim. 3:10-12.

¹⁷ Paulo o be a sa ipotše gore Timotheo o tla ithuta ka mohlolo. O ile a kgonthišetša gore lesogana le le sepela le yena. (Dit. 16:1-5) Bagolo ba ka ekiša mohlala wa Paulo ka go sepela le bahlanka ba bodiredi maetong a bodiši ge go swanetše. Ka go re’alo, bagolo ba nea bana babo rena bao sebaka sa go iponela ka noši bokgoni bja go ruta, tumelo, go se fele pelo le lerato tšeo di letetšwego go balebeledi ba Bakriste. Mokgwa wo o thuša go tlwaetša badiši ba ka moso ba “mohlape wa Modimo.”​—1 Pet. 5:2.

18. Ke ka baka la’ng re swanetše go lebelela go tlwaetša ba bangwe tirelong ya Jehofa go le bohlokwa?

¹⁸ Go tlwaetša ba bangwe go bohlokwa kudu ka gobane go nyakega matsogo mošomong wa Jehofa. Tsela ya Jesu le ya Paulo ya go tlwaetša ba bangwe e tla dula e šoma. Jehofa o nyaka gore bahlanka ba gagwe ba mehleng yeno ba tlwaetšwe gabotse gore ba phethe dikabelo tšeo a ba neago tšona. Modimo o re neile tokelo ya go thuša bao ba se nago phihlelo gore le bona ba be le bokgoni bja go dira mešomo ya bohlokwa ka phuthegong. Ge maemo a lefase a tšwela pele a mpefala gomme dibaka tša go bolela ditaba tše dibotse di oketšega, go ba bohlokwa le go feta gore re tlwaetše ba bangwe. E bile re swanetše go dira seo ka go akgofa.

19. Ke ka baka la’ng o swanetše go kgodišega gore Jehofa o tla šegofatša maiteko a gago a go tlwaetša ba bangwe tirelong ya gagwe?

¹⁹ Ke therešo gore go tlwaetša ba bangwe go nyaka nako le maiteko. Eupša Jehofa le Morwa wa gagwe yo a rategago ba tla re thekga gomme ba re nea bohlale bja go tlwaetša ba bangwe. Re tla thaba ge re bona bao re ba thušago ba tšwela pele ba “šoma ka thata le go katana.” (1 Tim. 4:10) Le gona anke le rena re duleng re dira tšwelopele moyeng tirelong ya Jehofa.