“BAFSA ba bantši Bethele ba mpitša “tate,” “papa” goba “malome.” Ga ke na bothata le seo ka gobane ke na le mengwaga e 89. Ge ba mpitša ka tsela ye ke bona ba ntlhompha e bile Jehofa a ntšhegofaditše ka ge ke mo hlanketše tirelong ya nako e tletšego ka mengwaga e 72. Ka ge ke bona kamoo Modimo a ntlhokometšego ka gona, ke kgona go botša bafsa ba ke kgodišegile gore: ‘Modiro wa lena o tla putswa ge e ba le sa hlephiše diatla tša lena’ goba le sa fele matla.​—2 Dikor. 15:7.

Batswadi ba ka ba ile ba hudugela Canada ba etšwa Ukraine. Ba ile ba dula toropong ya Rossburn profenseng ya Manitoba. Mma o be a na le bana ba 8 ba bašemane le ba 8 ba banenyana, eupša ga go na bao e lego mafahla gomme nna ke ngwana wa bo-14. Tate o be a rata Beibele gomme a re balela yona mesong e mengwe le e mengwe ya Sontaga, eupša o be a bona baruti ba se na taba le go thuša batho ba no nyaka go ba jela ditšhelete. Ka gona gantši o be a fela a dira metlae a re: “Ke ipotšiša gore ke mang yo a bego a patela Jesu ge a be a bolela ditaba tše dibotse le go ruta batho?”

Mafelelong bana ba gešo ba seswai, bašemane ba bane le banenyana ba bane, e ile ya ba Dihlatse tša Jehofa. Sesi Rose, e bile mmulamadibogo go fihlela a hlokofala. Pejana ga ge a ka hlokofala o be a kgothatša ba bangwe gore ba theetše seo Lentšu la Modimo le se bolelago. O be a fela a re: “Ke nyaka go le bona lefaseng le lefsa.” Mathomong buti Ted e be e le moruti. Mesong ya Sontaga se sengwe le se sengwe o be a rera radiong, a botša batheetši ba gagwe gore badiradibe ba tlo fišwa ka mo go sa felego mollong wa dihele. Lega go le bjalo, ka morago o ile a hlankela Jehofa ka potego.

Ka letšatši le lengwe ge ke be ke etšwa sekolong, ke ile ka hwetša pukwana yeo e rego The Coming World Regeneration * e le godimo ga tafola ka phapošing ya go jela. Seo se diragetše ka June 1944. Ke ile ka bala letlakala la mathomo le la bobedi, ke ge ke se sa nyaka go tlogela. Ka morago ga gore ke bale pukwana yeo ka moka, ke be ke kgodišegile gore ke nyaka go ekiša Jesu gomme ke hlankele Jehofa.

Go tlile bjang gore pukwana ye e fihle ka gae? Buti Steve o ile a mpotša gore banna ba babedi bao ba bego ba rekiša dipuku le dipukwana ba be ba tlile ka gae. O itše: “Ke ile ka no reka yeo ka gobane e be e le soka.” Banna bao ba ile ba boa Sontaga se se latelago. Ba ile ba re botša gore ke Dihlatse tša Jehofa gomme  ba tšama ba araba dipotšišo tšeo batho ba nago le tšona ba diriša Beibele. Re ile ra rata seo ba bego ba re botša sona ka gobane batswadi ba rena ba re rutile gore re hlomphe Lentšu la Modimo. Banna bao ba ile ba re botša gore Dihlatse tša Jehofa di kgauswi le go ba le kopano ya selete toropong ya Winnipeg, e lego moo sesi Elsie a bego a dula gona. Ke ile ka ya kopanong yeo.

Ke ile ka sepela ka paesekele leeto la dikhilomithara tše e ka bago tše 320 go ya Winnipeg eupša ka ema toropong ya Kelwood, moo Dihlatse tšela tše pedi tšeo di kilego tša re etela di bego di dula gona. Ge ke be ke le moo ke ile ka ya dibokeng gomme ka thoma go tseba gore phuthego ke selo sa mohuta mang. Le gona ke ile ka ithuta gore monna, mosadi goba mofsa yo mongwe le yo mongwe o swanetše go ruta batho Beibele ka ntlo le ntlo, go swana le ge Jesu a be a dira bjalo.

Ge ke fihla Winnipeg ke ile ka kopana le buti Jack, yoo a bego a tlile kopanong ya selete a etšwa ka leboa la Ontario. Letšatšing la pele la kopano, ngwanabo rena yo mongwe o ile a tsebiša gore go tlo ba le kolobetšo. Nna le Jack re ile ra kolobetšwa kopanong yeo. Re be re ikemišetše go thoma go bula madibogo kapejana ka mo go ka kgonegago ka morago ga gore re kolobetšwe. Jack o ile a thoma go bula madibogo gateetee ge re boa kopanong yeo. Ke be ke na le mengwaga e 16 gomme ka swanelwa ke go boela sekolong eupša ngwageng o latetšego le nna ke ile ka ba mmulamadibogo wa ka mehla.

Nna le Stan Nicolson, re ile ra thoma go bula madibogo toropong ya Souris yeo e lego profenseng ya Manitoba. Go se go ye kae ke ile ka bona gore ga se ka mehla bobulamadibogo bo lego bonolo. Tšhelete ya rena e be e fela ganyenyane-ganyenyane, eupša re ile ra no tšwela pele ka bobulamadibogo. Ka letšatši le lengwe, ka morago ga gore re hlwe tšhemong letšatši ka moka, re ile ra boela gae re swere ke tlala kudu e bile re se na le ka sente. Re ile ra makala kudu ge re fihla gae re hwetša lesaka le legolo la dijo mo mojako! Go fihla le lehono le ga re tsebe gore lesaka leo le be le tlišitšwe ke mang. Bošegong bjoo re ile ra ipshina kudu. Ruri re ile ra hwetša moputso ka ge re ile ra se fele matla! Ge e le gabotse, mafelelong a kgwedi yeo ke ile ka nonanyana.

Dikgwedi tše sego kae ka morago, re ile ra abelwa go yo ba babulamadibogo toropong ya Gilbert Plains yeo e lego dikhilomithara tše e ka bago tše 240 ka leboa la Souris. Mehleng yeo phuthego e nngwe le e nngwe e be e na le tšhate e kgolo letlapeng la ditsebišo yeo e bego e bontšha kamoo phuthego e šomilego ka gona tšhemong kgwedi e nngwe le e nngwe. Kgweding e nngwe ge diiri tša bagoeledi di be di theogile, ke ile ka nea polelo yeo e bego e gatelela gore bana babo rena le dikgaetšedi ba swanetše go kaonefatša. Ka morago ga seboka seo, kgaetšedi yo mongwe yo a tšofetšego wa mmulamadibogo yoo monna wa gagwe e bego e se Hlatse ya Jehofa o ile a tla go nna a lla a re, “Ke lekile, eupša seo ke se begilego ke sona seo ke kgonnego go se dira.” Ka morago ga moo gwa lla nna gomme ka mo kgopela tshwarelo.

Go no swana le nna, bana babo rena ba bangwe ba bafsa bao ba fišegago kudu ba dira diphošo gomme ba itshola ka morago. Eupša ke ithutile gore go e na le gore ke fele matla, ke swanetše go ithuta diphošong tša ka. Ge e ba motho a botega o tla hwetša moputso.

Ke bile le tokelo e kgolo kudu ya go ya Sekolong sa Gilead ge ke be ke na le mengwaga e 21! Klase ya rena ya bo-14 e alogile ka February 1950. Mo e ka bago kotara ya barutwana ba klase ya rena ba ile ba abelwa profenseng yeo go bolelwago Sefora ya Quebec kua Canada, moo Dihlatse tša Jehofa di bego di tlaišwa o šoro. Ke ile ka abelwa go ba mmulamadibogo toropong ya Val-d’Or, e lego toropo ya Canada moo go nago le mebaene ya gauta. Ka letšatši le lengwe re ile ra sepela re le sehlopha ra yo bolela ditaba tše dibotse motseng wa kgauswi le moo wa Val-Senneville. Moruti wa moo o ile a re tšhošetša ka gore ge e ba re ka se tloge motseng woo kapelapela, re tlo hlaselwa. Tsela yeo a ilego a re tšhošetša ka yona e ile ya dira gore ke yo bula molato kgorong ya tsheko gomme moruti yoo o ile a faenwa. *

Tiragalo yeo le tše dingwe tše dintši tše di swanago le yona di ile tša ba karolo ya ntwa yeo re ilego ra e bitša  Ntwa ya Quebec. Profense ya Quebec e be e na le mengwaga ya ka godimo ga e 300 e laolwa ke Kereke ya Roma Katholika. Baruti le batho bao ba bego ba dirišana le bona dipolitiking ba be ba tlaiša Dihlatse tša Jehofa. Maemo a be a le thata e bile re be re se ba bantši, eupša ga se ra ka ra fela matla. Batho bao ba bego ba nyaka go ithuta therešo kua Quebec ba ile ba arabela gabotse. Ke ile ka ithuta le batho ba mmalwa bao ba ilego ba amogela therešo. Ba bangwe ba bona e be e le lapa leo le bego le na le ditho tše lesome. Lapa leo ka moka le ile la thoma go hlankela Jehofa. Tsela yeo ba ilego ba bontšha sebete e ile ya dira gore ba bangwe le bona ba se sa tsena Kereke ya Katholika. Re ile ra tšwela pele re bolela ditaba tše dibotse gomme mafelelong ra fenya ntweng!

Ka 1956 ke ile ka abelwa gore ke yo hlankela Haiti. Baromiwa ba bantši bao ba bego ba sa tšwa go fihla moo ba be ba sa tsebe Sefora, eupša batho ba be ba ba theetša. Moromiwa yo a bitšwago Stanley Boggus o itše: “Se se makatšago ke gore batho ba be ba dira sohle seo ba ka se kgonago go re thuša go hlalosa seo re bego re nyaka go se bolela.” Mathomong ke be ke sa swane le baromiwa ba bangwe ka gobane nna ke be ke ithutile Sefora ge ke be ke sa le Quebec. Eupša go se go ye kae re ile ra lemoga gore bana babo rena ba bantši moo ba be ba bolela feela se-Creole sa Haiti. Ka gona e le gore re atlege, re be re swanetše go ithuta leleme leo le bolelwago moo. Re ile ra ithuta lona gomme ra hwetša ditšhegofatšo ka ge re ile ra dira maiteko.

E le gore re thuše bana babo rena ba moo kudu, Sehlopha se Bušago se ile sa re dumelela gore re fetolele Morokami le dikgatišo tše dingwe ka se-Creole sa Haiti. Palo ya batho bao ba bego ba e tla dibokeng e ile ya oketšega ka lebelo nageng ka moka. Ka 1950 go be go na le bagoeledi ba 99 kua Haiti, eupša ka 1960, palo yeo e ile ya oketšega go fihla go bagoeledi ba ka godimo ga ba 800! Ka nako yeo, ke be ke abetšwe go hlankela Bethele. Ka 1961, ke ile ka thabela go tšea karolo ya go ruta Sekolong sa Bodiredi sa Mmušo. Re ile ra kgona go tlwaetša bagolo le babulamadibogo ba kgethegilego ba 40. Ge re be re le kopanong ya selete ka January 1962, re ile ra kgothaletša bana babo rena ba moo go oketša tirelo ya bona gomme ba bangwe ba bona ba ile ba kgethwa go ba babulamadibogo ba kgethegilego. Kgothatšo yeo e be e tlile ka nako ka gobane re be re le kgauswi le go tlo ganetšwa.

Ka di-23 tša January 1962, ka moragonyana ga kopano ya selete, maphodisa a ile a golega nna le moromiwa yo mongwe e lego Andrew D’Amico ge re be re  le ofising ya lekala, gomme a tšea setoko ka moka sa Phafoga! (ya Sefora) ya January 8, 1962. Phafoga! yeo e be e tsopotše dikuranta tše dingwe tša Sefora tšeo di bego di boletše gore go na le batho bao tsenago kereke ya boloi Haiti. Batho ba bangwe ba ile ba se kwane le seo se boletšwego ka makasineng woo gomme ba re sehlogo seo ga se tšwe kuranteng eupša se ngwadilwe ke rena. Dibeke tše sego kae ka morago, baromiwa ba ile ba rakwa nageng yeo. * Eupša bana babo rena ba moo bao ba bego ba tlwaeditšwe gabotse ba ile ba tšwela pele ka mošomo ntle le mathata. Ke thabela gore ba ile ba kgotlelela gomme ba tšwela pele ba gola moyeng go fihla lehono. Gona bjale ba na le Phetolelo ya Lefase le Lefsa ya Mangwalo a Makgethwa ka se-Creole sa Haiti, e lego selo seo re bego re sa nka ra se lora ge re be re sa hlankela moo.

Ka morago ga gore ke tloge Haiti, ke ile ka hwetša kabelo ya go yo hlankela ke le moromiwa Repabliking ya Bogare bja Afrika. Ka morago ke bile le tokelo ya go hlankela moo ke le molebeledi wa tikologo gomme ka morago ka ba molebeledi wa lekala.

Mehleng yeo, Diholo tša Mmušo tše dintši e be e le tša maemo a tlasana. Ke ile ka ithuta go kga bjang le go rulela ka bjona. Batho bao ba iphetelago ka tsela ba be ba makala ge ba bona ke katana le go sega bjang. Le gona seo se ile sa dira gore bana babo rena ba leke go tšea karolo modirong wa go aga Diholo tša bona tša Mmušo le go di hlokomela. Baruti ba be ba re sega ka gobane dikereke tša bona di be di na le masenke gomme tša rena di ruletšwe ka bjang. Re ile ra se fele matla gomme ra tšwela pele re diriša Diholo tša rena tša Mmušo tšeo di ruletšwego ka bjang. Re ile ra tla ra ikhutša ka morago ga gore ledimo le matla le hlasele toropo ya Bangui. Le ile la hlahlamolla masenke a kereke gomme la a lahlela kua seterateng. Marulelo a rena a bjang a ile a se tšewe ke ledimo. E le gore modiro wa go bolela ditaba tše dibotse o hlokomelwe gakaone, re ile ra aga ofisi ya lekala e mpsha le legae la baromiwa ka dikgwedi tše hlano feela. *

Ka 1976 modiro wa rena o be o thibetšwe kua Repabliking ya Bogare bja Afrika, gomme ke ile ka abelwa go yo hlankela toropong ya N’Djamena, kua Chad. Ge ke be ke le moo, ke ile ka kopana le kgaetšedi Happy, e lego mmulamadibogo yo a kgethegilego, yo a fišegago yoo a tšwago Cameroon. Re ile ra nyalana ka di-1 tša April 1978. Yona kgweding yeo ntwa e ile ya thoma gomme go swana le batho ba bangwe ba bantši, re ile ra tšhabela ka borwa bja Chad. Ge ntwa e fedile re ile ra boa gomme ra hwetša ntlong ya rena go dula mašole. A be a se a tšea dipuku feela, eupša a be a tšere le lešira la Happy le dimpho tšeo re bego re di hweditše ka lenyalo la rena. Eupša ga se ra ka ra fela matla. Bobedi bja rena re be re sa phela gomme re be re sa ikemišeditše go tšwela pele re hlankela Jehofa.

Moo e ka bago ka morago ga mengwaga e mebedi, modiro wa rena kua Repabliking ya Bogare bja Afrika o ile wa se sa thibelwa. Re ile ra boela moo gomme ka hlankela ke le molebeledi wa mosepedi. Ntlo ya rena e be e le kharabane yeo e bego e na le mpete wa go phuthega, tanka yeo e bego e ka rwala dilithara tše 200 tša meetse, fridge ya kgase le setofo sa kgase. Go tšea maeto go be go se bonolo. Ka letšatši le lengwe ge re be re tšere leeto, maphodisa a ile a re emiša ka makga a 117 a re phuruphutša.

Gantši go be go fiša kudu moo o bego o hwetša thempheretšha e fihla go 50°C. Ka dinako tše dingwe ge re be re le dikopanong go be go le thata go hwetša meetse a go kolobetša batho. Ka gona bana babo rena ba be ba epa dinokana tše di omilego gomme ganyenyane-ganyenyane ba hwetša meetse a lekanego go ka kolobetša batho. Gantši ba be ba kolobetšwa ka gare ga pafo.

Ka 1980 re ile ra kgopelwa gore re yo hlankela Nigeria. Ge re le moo, re ile ra thuša ka go lokišeletša go aga ofisi e mpsha ya lekala. Re dutše moo mengwaga e mebedi le seripa. Bana babo rena ba ile ba reka moago o mogolo wa mabato a mabedi woo o bego o tlo hlahlamollwa gore re tle re šomele moo. Mesong ya letšatši le lengwe ke ile ka namela godimo moagong go thuša ka go o hlahlamolla. Ke moka mosegare ke ile  ka fologa moagong woo ka tsela yeo ke bego ke nametše ka yona. Eupša ka ge re be re šetše re hlahlamolotše dikarolo tše dingwe go be go na le dilo tše di fetogilego, ka gona ke ile ka se gate gabotse gomme ka wa. Go be go bonagala ke gobetše kudu, eupša ka morago ga gore ngaka e ntlhahlobe le go ntira X-ray, e ile ya botša Happy gore: “O se ke wa tshwenyega. O no ba a ngangegile mešifa e sego kae, o tla fola ka morago ga beke goba tše pedi.”

Ka 1986 re ile ra hudugela Côte d’Ivoire, moo ke bego ke le molebeledi wa mosepedi. Re be re fihla le Burkina Faso. Ga sa nka ka nagana gore ka letšatši le lengwe re be re tla boela Burkina Faso ra dula gona ka nakwana.

Ke tlogile Canada ka 1956, eupša ka 2003, ka morago ga ge ke na le mengwaga e 47 ke se sa dula moo, nna le Happy re ile ra boela Bethele ya Canada. Re be re le badudi ba Canada ka semolao, eupša go rena gae e be e le Afrika.

Ke moka ka 2007, ge ke be ke na mengwaga e 79 re ile ra boela Afrika! Re ile ra abelwa go ya Burkina Faso moo ke bego ke le setho sa Komiti ya Naga. Ofisi ya moo ka morago e ile ya fetošwa ofisi ya bofetoledi yeo e bego e hlokometšwe ke ofisi ya lekala ya Benin gomme ka August 2013, ra abelwa go ya Bethele ya Benin.

Le ge gona bjale ke babja, ke sa rata tšhemo kudu. Mengwageng e meraro e fetilego, bagolo le mosadi wa ka yo a nthekgago kudu ba ile ba nthuša gore ke thabele go bona batho ba babedi bao ke bego ke ithuta le bona Beibele e lego Gédéon le Frégis ba kolobetšwa. Gona bjale ba hlankela Jehofa ka mafolofolo.

Ga bjale nna le mosadi wa ka re lekaleng la Afrika Borwa, moo lapa la Bethele le re hlokometšego gabotse ka tša kalafo. Afrika Borwa ke naga ya bošupa yeo ke hlanketšego go yona Afrika. Ka October 2017 re ile ra šegofatšwa kudu. Re bile le tokelo e kgolo kudu ya go ba gona ge go be go neelwa ntlokgolo ya rena kua Warwick, New York. Re ka se tsoge re lebetše tiragalo yeo!

Yearbook ya 1994, letlakala 255 e itše: “Re kgothaletša bohle bao ba kgotleletšego modirong wo ka mengwaga e mentši gore: ‘Ebang le sebete gomme le se ke la hlephiša diatla tša lena, ka gobane modiro wa lena o na le moputso.’—2 Dikor. 15:7.” Nna le Happy re ikemišeditše go latela keletšo ye le go kgothaletša ba bangwe gore le bona ba se ke ba fela matla.