1. Ke’ng seo ka moka ga rena re nyakago gore se direge ka batho ba gabo rena?

KGAETŠEDI yo mongwe yo a bitšwago Pauline * o re: “Ga e sa le go tloga ke tseba therešo ya Beibele, ke be ke nyaka gore yo mongwe le yo mongwe ka lapeng la ka a tle a phele Paradeiseng le nna. Ke be ke tloga ke nyaka gore monna wa ka e lego Wayne le morwa wa rena ba hlankele Jehofa gotee le nna.” Na o na le ba leloko bao ba sego ba tšwa ba ithuta ka Jehofa le go mo rata? Go no swana le Pauline, le wena o nyaka gore batho ba geno ba hlankele Jehofa gotee le wena.

2. Re tlo araba dipotšišo dife sehlogong se?

² Re ka se gapeletše batho ba gabo rena go amogela ditaba tše dibotse, eupša re ka ba dira gore ba nagane gabotse le go amogela molaetša wa Beibele. (2 Tim. 3:14, 15) Sehlogong se re tlo araba dipotšišo tše di latelago: Ke ka baka la’ng re swanetše go botša batho ba gabo rena ditaba tše dibotse? Ke ka baka la’ng re swanetše go leka go kwešiša tsela yeo ba ikwago ka yona? Re ka dira’ng gore re thuše batho ba gabo rena go rata Jehofa go swana le rena? Le gona, bana babo rena le dikgaetšedi ka phuthegong ba ka thuša bjang?

3. Go ya ka Petro wa Bobedi 3:9, ke ka baka la’ng re swanetše go botša batho ba gabo rena ditaba tše dibotse?

³ Kgauswinyane Jehofa o tlo fediša lefase le. Go tlo phologa feela bao ba “nago le tshekamelo e swanetšego ka bophelo bjo bo sa  felego.” (Dit. 13:48) Re dula re fetša nako e ntši re botša batho bao re sa ba tsebego ditaba tše dibotse moo re dulago gona, ka gona ke ga tlhago go ikwa re nyaka go botša batho ba gabo rena ditaba tše dibotse e le gore le bona ba tle ba hlankele Jehofa gotee le rena. Ka ge Tatago rena wa legodimong a re rata kudu, ga a nyake “gore go fedišwe le ge e le mang, eupša o rata gore bohle ba fihlelele boitsholo.”—Bala 2 Petro 3:9.

4. Ke phošo efe yeo re ka e dirago ge re botša batho ba gabo rena ditaba tše dibotse?

⁴ Re swanetše go dula re gopola gore go na le tsela e lokilego le yeo e sa lokago ya go botša batho molaetša wo o tlago go ba phološa. Ka mohlala, ge re bolela le batho ba re sa ba tsebego re ka ba šedi gore re se ke ra ba kgopiša, eupša ge re bolela le batho ba gabo rena re ka no se be šedi.

5. Re swanetše go gopola’ng pele re ka botša batho ba gabo rena ditaba tše dibotse?

⁵ Ba bantši ba rena re ka no ba re itsholela tsela yeo re ilego ra bolela ka yona le batho ba gabo rena ge re be re thoma go ba botša ditaba tše dibotse, ra ikwa eka nkabe re dirile se se fapanego. Moapostola Paulo o ile a eletša Bakriste gore: “Anke mantšu a lena ka mehla e be a kgahlišago, a nokilwego ka letswai, e le gore le tsebe kamoo le swanetšego go araba yo mongwe le yo mongwe ka gona.” (Bakol. 4:5, 6) Ke mo gobotse go dula re gopola keletšo ye pele re ka botša batho ba gabo rena ditaba tše dibotse. Go sego bjalo, re ka ba kgopiša gomme ba se nyake go theetša molaetša wa rena.

6-7. Nea mohlala wo o bontšhago kamoo go lego bohlokwa gore Bakriste ba bontšhe gore ba kwešiša balekane ba bona bao ba sa hlankelego Jehofa.

⁶ Leka go ba kwešiša. Pauline yo re boletšego ka yena pejana o re: “Mathomong ge ke bolela le monna wa ka ke be ke no nyaka go bolela feela ka Modimo le Beibele. Re be re sa fele re swara magang.” Eupša Wayne e lego monna wa Pauline, o be a sa tsebe selo ka Beibele e bile a sa kwešiše  gore ge e le gabotse Pauline o bolela ka eng. Wayne o be a nagana gore Pauline o be a no dula a naganne feela ka bodumedi bja gagwe. O be a tshwenyegile ka gore mosadi wa gagwe e be e le setho sa sehlotswana se kotsi e bile a forwa.

⁷ Pauline o a dumela gore o be a fetša nako e ntši mantšiboa le mafelobekeng a na le bana babo le dikgaetšedi dibokeng, tšhemong le dipokanong tša bogwera. Pauline o re: “Ka dinako tše dingwe Wayne o be a etla gae a sa hwetše motho, ka gona o be a lewa ke bodutu.” Wayne o be a duma eka a ka ba le mosadi wa gagwe le morwa wa bona. O be a sa tsebe gore ba fetša nako ba na le bomang, le gona o be a ikwa eka mosadi wa gagwe o tšea bagwera ba gagwe ba le bohlokwa kudu go feta yena. Wayne o ile a thoma go tšhošetša Pauline ka gore o tla mo hlala. Na o ka nagana ka ditsela tšeo Pauline nkabego a ile a di diriša go bontšha gore o leka go kwešiša monna wa gagwe?

8. Go ya ka Petro wa Pele 3:1, 2, ke’ng seo se ka dirago gore ba gabo rena ba nyake go ithuta ka Modimo?

⁸ Bea mohlala o mobotse. Gantši batho ba gabo rena ba lemoga seo re se dirago go feta seo re se bolelago. (Bala 1 Petro 3:1, 2.) Mafelelong Pauline o ile a lemoga taba ye e bohlokwa. O re: “Ke be ke tseba gore Wayne o be a nthata e bile a rata le morwa wa rena, ga se gore o be a tloga a nyaka go ntlhala. Eupša ka morago ga gore a ntšhošetše ka gore o tla ntlhala, ke ile ka lemoga gore ke be ke swanetše go fetoša tsela yeo ke phelago ka yona gomme ke diriše seo Jehofa a se bolelago mabapi le lenyalo. Go e na le gore ke bolele kudu ka Modimo, ke ile ka bona go le bohlokwa gore ke bee mohlala o mobotse.” Pauline o ile a se sa gapeletša Wayne go boledišana le yena ka Beibele, eupša o ile a thoma go swara magang le yena. Wayne o ile a bona mosadi wa gagwe a thoma go fetoga e bile morwa wa bona le yena a thoma go se sa tshwenya gomme e eba ngwana yo a theetšago.  (Die. 31:18, 27, 28) Ge Wayne a be a bona gore ga bjale Beibele e fetošitše lapa la gagwe, o ile a nyaka go ithuta Beibele.—1 Bakor. 7:12-14, 16.

9. Ke ka baka la’ng re sa swanela go tlogela go leka go thuša batho ba gabo rena gore ba ithute ka Jehofa?

⁹ O se ke wa tlogela go leka go thuša batho ba geno. Jehofa o re beela mohlala o mobotse. Ka mehla o nea batho sebaka sa gore ba theetše ditaba tše dibotse gomme ba tle ba hwetše bophelo bjo bo sa felego. (Jer. 44:4) Le gona moapostola Paulo o ile a botša Timotheo gore a kgotlelele ge a thuša ba bangwe. Ka baka la’ng? Ka gobane ka go dira bjalo, o be a tla iphološa a ba a phološa le bao ba mo theetšago. (1 Tim. 4:16) Re rata batho ba gabo rena, ka gona re nyaka gore le bona ba tsebe ditherešo tše di lego ka Lentšung la Modimo. Mafelelong mantšu a Pauline le ditiro tša gagwe di ile tša ba le ditlamorago tše dibotse go ba lapa la gagwe. Gona bjale o thabile ka gobane o hlankela Jehofa le monna wa gagwe. Ka moka ga bona ke babulamadibogo ba ka mehla, e bile Wayne ke mogolo.

10. Ke ka baka la’ng re sa swanela go fela pelo?

¹⁰ O se ke wa fela pelo. Ge re be re kgetha go kwa Jehofa, re ile ra dira diphetogo maphelong a rena le go fetoša dilo tšeo re di dumelago. Go ka ba boima go batho ba gabo rena gore ba amogele diphetogo tšeo re di dirilego. Gantši selo sa mathomo seo ba se lemogago ke gore ga re sa ba le bona ge ba keteka meletlo ya bodumedi, e bile ga re sa tšea karolo dipolotiking. Mathomong seo se ka dira gore ba bangwe ba leloko ba re galefele. (Mat. 10:35, 36) Eupša ga se ra swanela go ba felela pelo, ra nagana gore ba ka se tsoge ba fetogile. Ge e ba re kgaotša go leka go ba thuša gore ba kwešiše ditumelo tša rena, go ba bjalo ka ge eka re ba ahlotše gore ga ba swanelwe ke go hwetša bophelo bjo bo sa felego. Jehofa ga se a re nea mošomo wa go ahlola batho, eupša o o neile Jesu. (Joh. 5:22) Ge e ba re sa fele pelo, mafelelong batho ba gabo rena ba ka nyaka go theetša molaetša wa rena.—Bona lepokisi leo le rego, “ Diriša Wepesaete ya Rena go Ruta Batho.”

11-13. O ithuta’ng tseleng yeo Alice a ilego a swara batswadi ba gagwe ka yona?

¹¹ Eba yo botho eupša o se ke wa dumelela batho ba geno ba go fetoša. (Die. 15:2) Nagana ka mohlala wa Alice. O ile a ithuta ka Jehofa ge a be a dula kgole le batswadi ba gagwe bao ba bego ba sa dumele go Modimo e bile ba le ka garegare ga dipolotiki. O ile a lemoga gore o be a swanetše go botša batswadi ba gagwe ka dilo tše dibotse tšeo a bego a ithuta tšona. Alice o re: “Ge e ba o ka tšea nako go botša ba geno ka ditumelo tša gago tše difsa, seo se ka dira gore ba galefe le go feta.” O ile a leka go nyaka ditaba tšeo di ka kgahlago batswadi ba gagwe tše bjalo ka lerato, ke moka a ba ngwalela mangwalo ao a bontšhago gore Beibele e reng ka ditaba tšeo gomme a nyaka go kwa gore bona ba nagana eng. (1 Bakor. 13:1-13) O ile a leboga batswadi ba gagwe gore ba mo godišitše gabotse le go mo hlokomela, gomme a ba romela dimpho. Ge a be a etetše batswadi ba gagwe gae, o be a dira sohle seo a ka se kgonago go thuša mmagwe ka mešomo ya ka gae. Mathomong batswadi ba Alice ba be ba se ba thaba ge a ba botša ka bodumedi bja gagwe bjo bofsa.

¹² Ge Alice a be a le gae le batswadi ba gagwe, o ile a no tšwela pele ka lenaneo la gagwe la go bala Beibele ka mehla. Alice o re: “Se se ile sa thuša mma gore a bone kamoo Beibele e lego bohlokwa kudu go nna.” Ka yona nako yeo, tatago Alice o ile a thoma go ithuta Beibele e le gore a kwešiše seo se fetošitšego morwedi wa gagwe, gomme a e bala ka morero wa go nyaka diphošo. Alice o re: “Ke ile ka mo nea Beibele gomme ka mo ngwalela lengwalwana ge ke mo nea yona.” Mafelelo e bile afe? Go e na le gore tatago Alice a hwetše diphošo, o ile a kgahlwa kudu ke seo a bego a se bala.

¹³ Re swanetše go ba ba tiilego eupša re le šedi, gaešita le ge re ka swanelwa ke go kgotlelela mathata. (1 Bakor. 4:12) Ka mohlala, Alice o ile a swanelwa ke go kgotlelela ge mmagwe a be a mo ganetša. O re: “Ka morago ga gore ke kolobetšwe, mma o ile a thoma go mpitša ngwana wa go se kwe.” Alice o ile a dira’ng? O re: “Ga sa nka ka  kgaotša go bolela ka bodumedi bja ka bjo bofsa, eupša ka tlhompho ke ile ka ba hlalosetša gore ke feditše le pelo gore ke nyaka go ba yo mongwe wa Dihlatse tša Jehofa, gomme ga go na motho yo a ka fetošago phetho yeo ke e dirilego. Ke ile ka leka go kgonthišetša mma gore ke mo rata kudu. Ka moka ga rena re ile ra lla gomme ka morago ka mo apeela dijo tše monate. Go tloga ka nako yeo mma o ile a bona gore Beibele e ntira motho yo mokaone.”

14. Ke ka baka la’ng re sa swanela go dumelela batho ba gabo rena ba fetoša phetho yeo re e tšerego ya go hlankela Jehofa?

¹⁴ Go ka tšea nako gore batho ba gabo rena ba kwešiše gore go hlankela Jehofa go bohlokwa kudu go rena. Ka mohlala, ge Alice a be a kgetha go bula madibogo go e na le gore a tle a šome mošomo wo batswadi ba gagwe ba bego ba mo kgethetše wona, mmagwe o ile a lla gape. Eupša Alice o ile a dula a tiile. Alice o re: “Ge e ba o ka dumelela batho ba geno ba fetoša phetho e tee yeo o e tšerego, go ka direga gore le nakong e tlago ba fetoše diphetho tše dingwe tšeo o tla bego o di dirile. Eupša ge e ba o le botho e bile o tiile, ba bangwe ba bona ba ka go theetša.” Se ke seo se ilego sa diragalela Alice. Gona bjale batswadi ba gagwe ke babulamadibogo ba ka mehla, gomme tatagwe ke mogolo ka phuthegong.

15. Go ya ka Mateo 5:14-16 le Petro wa Pele 2:12, ‘mediro e mebotse’ ya bana babo rena le dikgaetšedi e ka thuša bjang ba leloko?

¹⁵ Jehofa o diriša bana babo rena le dikgaetšedi go dira ‘mediro e mebotse’ gore ba thuše batho go batamela kgauswi le yena. (Bala Mateo 5:14-16; 1 Petro 2:12.) Ge e ba molekane wa gago e se yo mongwe wa Dihlatse tša Jehofa, na o tsebana le bana babo rena goba dikgaetšedi ka phuthegong? Pauline yo re boletšego ka yena pejana o ile a mema bana babo rena le dikgaetšedi legaeng la gagwe gore monna wa gagwe Wayne a ba tsebe.  Wayne o gopola kamoo ngwanabo rena yo mongwe a ilego a mo thuša ka gona go kwešiša gore Dihlatse tša Jehofa ke batho ba mohuta mang. O re: “Ngwanabo rena yoo o ile a tšea letšatši mošomong feela gore a bogele le nna papadi e itšego thelebišeneng. Ngwanabo rena yo o ile a mpontšha gore Dihlatse tša Jehofa le tšona di kgona go dira dilo tše dingwe ntle le mediro ya tšona ya bodumedi.”

16. Ke ka baka la’ng re swanetše go laletša ba leloko gore ba be gona dibokeng?

¹⁶ Tsela e nngwe e botse ya go thuša ba leloko ke go ba laletša gore ba be gona dibokeng tša rena. (1 Bakor. 14:24, 25) Seboka sa pele seo Wayne a ilego a ya go sona ke Segopotšo, ka gobane se be se le ka morago ga mošomo le gona e be e le se sekopana. O re: “Ga sa nka ka kwešiša gore polelo yeo e bego e newa Segopotšong e be e bolela ka eng, eupša seo ke se gopolago ke tsela yeo batho ba ilego ba ntshwara ka yona. Ba ile ba tla go nna, ba nkamogela gomme ba ntumediša ka letsogo. Ke be ke bona gore batho ba ba na le lerato la kgonthe.” Banyalani ba bangwe ba be ba šetše ba bontšha Pauline botho kudu, ka gobane ba be ba mo thuša ka morwa wa gagwe ge a le dibokeng le ge a le tšhemong. Ka gona, mafelelong ge Wayne a be a phetha ka gore o nyaka go kwešiša ka mo go oketšegilego ka bodumedi bja mosadi wa gagwe bjo bofsa, o ile a kgopela ngwanabo rena yoo gore a ithute le yena Beibele.

17. Ke ka baka la’ng re sa swanela go ipea molato ge ba leloko ba gana go re theetša, gona ke ka baka la’ng re sa swanela go nagana gore ba ka se tsoge ba fetogile?

¹⁷ Re holofela gore nakong e tlago batho ba gabo rena ka moka ba tla hlankela Jehofa gotee le rena. Eupša go sa šetšwe maiteko ao re a dirago go ba thuša gore ba hlankele Jehofa, ba ka no se nyake go ithuta ka Jehofa. Ge e ba ba sa nyake go ithuta ka Jehofa, ga se ra swanela go ipea molato. Go ba gona, re ka se gapeletše motho gore a dumele seo rena re se dumelago. Eupša ge ba leloko ba bona tsela ye o thabilego ka yona ge o dutše o hlankela Jehofa, ba ka thoma go fetoša monagano. Ba rapelele. Bolela le bona ka šedi. O se ke wa tlogela go ba thuša. (Dit. 20:20) Kgodišega gore Jehofa o tla šegofatša maiteko a gago. Le gona ge e ba batho ba geno ba kgetha go go theetša, Jehofa o tla ba phološa!