NA GO na le kabelo yeo o ka ratago go e dira ka phuthegong gona bjale eupša seo se sa kgonege? Mohlomongwe ke kabelo yeo e hweditšwego ke motho yo mongwe. Goba mohlomongwe ke yeo o kilego wa e dira nakong e fetilego eupša gona bjale o se sa e dira. Go ka direga gore botšofadi, go babja, maemo a tša ikonomi goba maikarabelo a ka lapeng di go thibela gore o hwetše kabelo yeo. Goba o ile wa swanelwa ke go tlogela kabelo yeo e bego e le kgale o e dira ka baka la diphetogo tšeo di lego ka mokgatlong. Go sa šetšwe gore lebaka ke lefe, o ka ikwa eka ga o direle Jehofa wa go tlala seatla. Maemong a bjalo, go ka direga gore ka dinako tše dingwe motho a ikwe a nyamile. Lega go le bjalo, o ka thušwa ke eng gore o se dule o nyamile goba o galefile? O ka dira’ng gore o dule o thabile?

Re ka ithuta selo sa bohlokwa go Johane Mokolobetši seo se ka re thušago gore re dule re thabile. Johane o bile le dikabelo tše di kgahlišago kudu tirelong ya Jehofa, eupša go ka direga gore dilo ga se tša ka tša sepela ka tsela yeo a bego a e letetše. Johane a ka no ba a se a ka a nagana gore o be a tla fetša nako e ntši a le kgolegong go feta yeo a e feditšego bodireding bja gagwe. Lega go le bjalo, Johane o ile a no dula a thabile bophelong bja gagwe ka moka. O thušitšwe ke’ng? Le gona, rena re ka dira’ng gore re dule re thabile le ge dilo di sa re sepelele gabotse?

Mo e ka bago ka April 29 C.E., Johane o ile a thoma go phetha kabelo yeo Jehofa a bego a mo neile yona ya go botša batho gore Mesia o be a le kgauswi le go tla. O be a ba botša gore: “Itsholeng, gobane Mmušo wa magodimo o batametše.” (Mat. 3:2; Luka 1:12-17) Batho ba bantši ba ile ba mo kwa. Ge e le gabotse, mašaba ao a tšwago kgole le kgauswi a ile a tla go tlo theetša molaetša wa gagwe, gomme batho ba bantši ba ile ba itshola ke moka ba kolobetšwa. Johane o ile a lemoša le baetapele ba bodumedi ba baikaketši gore ba be ba tlo ahlolwa ge e ba ba sa fetoge. (Mat. 3:5-12) Johane o ile a phetha karolo ya bohlokwa kudu kabelong ya gagwe ge a be a kolobetša Jesu mo e ka bago ka October 29 C.E. Go tloga ka nako yeo go ya pele, Johane o ile a botša batho gore ba latele Jesu e lego Mesia yo a holofeditšwego.—Joh. 1:32-37.

Ge Jesu a be a bolela ka tema e kgethegilego yeo Johane a e kgathilego o itše: “Gare ga bao ba belegwego ke basadi ga se gwa ka gwa tsoga yo mogolo go feta Johane Mokolobetši.” (Mat. 11:11) Ga go pelaelo gore Johane o ile a thabela ditšhegofatšo  tšeo a ilego a di hwetša. Go swana le Johane, batho ba bantši lehono ba bone ge Jehofa a ba šegofatša. Se ke seo se ilego sa diragalela ngwanabo rena yo a bitšwago Terry. Yena le mosadi wa gagwe Sandra ba feditše mengwaga ya ka godimo ga e 50 ba le tirelong ya nako e tletšego. Terry o re: “Ke bile le ditokelo tše dintši tše di kgahlišago. Ke ile ka ba mmulamadibogo, ka hlankela Bethele, ka ba mmulamadibogo yo a kgethegilego, ka ba molebeledi wa tikologo, ka ba molebeledi wa selete gomme gona bjale ke boetše ke hlankela ke le mmulamadibogo yo a kgethegilego.” Go thabiša kudu go hwetša ditokelo tše di kgethegilego ka phuthegong ya Modimo, eupša go etša ge re tlo ithuta mohlaleng wa Johane, re swanetše go šoma ka thata e le gore re dule re thabile le ge maemo a rena a fetoga.

Johane Mokolobetši o ile a dula a thabile ka gobane o be a tšeela godimo ditokelo tšeo Jehofa a mo neilego tšona. Ka mohlala, ka morago ga gore Jesu a kolobetšwe, barutiwa ba Johane Mokolobetši ba ile ba fokotšega gomme ba Jesu ba oketšega. Barutiwa ba Johane ba ile ba thoma go tshwenyega gomme ba re go yena: “Bona, [Jesu] o a kolobetša gomme bohle ba ya go yena.” (Joh. 3:26) Johane o ile a re: “Yo a nago le monyadiwa ke monyadi. Lega go le bjalo, mogwera wa monyadi ge a ema kgauswi le yena gomme a mo kwa, o thaba kudu ka baka la lentšu la monyadi. Ka gona, lethabo le la ka le phethegile.” (Joh. 3:29) Johane ga se a ka a ipapetša le Jesu, le gona ga se a ka a nagana gore kabelo ya gagwe e be e se sa le bohlokwa ge e bapetšwa le ya Jesu. Go e na le moo, o ile a dula a thabile ka gobane o be a tšeela godimo tokelo ya go ba “mogwera wa monyadi.”

Tsela yeo Johane a bego a lebelela kabelo ya gagwe ka yona e ile ya mo thuša gore a dule a thabile le ge kabelo yeo e be e se bonolo. Ka mohlala, Johane o belegwe e le Monasari, gomme o be a se a dumelelwa go nwa beine. (Luka 1:15) Ge Jesu a be a hlalosa tsela yeo Johane a bego a phela bophelo bjo bonolo ka yona, o itše: “Johane o tlile a sa je e bile a sa nwe.” Eupša barutiwa ba Jesu bona ba be ba se na melao yeo e ba thibelago go ja le go nwa. (Mat. 11:18, 19) Le gona, le ge Johane a be a sa dire mehlolo, o be a tseba gore barutiwa ba Jesu go akaretša le ba bangwe bao mathomong e bego e le barutiwa ba gagwe, ba be ba neilwe matla a go dira mehlolo. (Mat. 10:1; Joh. 10:41) Go e na le gore Johane a nagane kudu ka gore yena ga se a newa matla a go dira mehlolo go swana le barutiwa ba Jesu, o ile a dula a swaregile ka go phetha kabelo ya gagwe.

Ge e ba le rena re tšeela godimo dikabelo tša rena, re ka dula re thabile. Terry yo re boletšego ka yena pejana o itše: “Ke be ke dira sohle seo nka se kgonago kabelong e nngwe le e nngwe yeo ke bego ke e neilwe.” Ge a nagana ka nako yeo a e feditšego a le tirelong ya nako e tletšego o re: “Ga ke itshole le gatee, ke no nagana feela ka dilo tše dibotse tšeo ke di thabetšego.”

Go tseba gore ke ka baka la eng re dira kabelo le ge e le efe yeo re e neilwego, go tla re dira gore re dule re thabile tirelong ya Jehofa. Ke ka baka la’ng re dira kabelo le ge e le efe yeo re e neilwego? Ka gobane re a tseba gore go ba “bašomigotee le Modimo” ke tokelo. (1 Bakor. 3:9) Ka mohlala, e le gore sedirišwa se itšego se bohlokwa se dule e le se sebotse, re swanetše go dula re se hlokomela. Ka mo go swanago, le rena re tlo dula re thabile ge e ba re dula re naganišiša ka tokelo e kgolo kudu yeo re nago le yona ya go šoma le Jehofa. Re ka se ipapetše le ba bangwe. Re ka se nagane gore dikabelo tša rena ga di bohlokwa ge di bapetšwa le tša ba bangwe.—Bagal. 6:4.

Mohlomongwe Johane o be a tseba gore modiro wo a bego a tlo o dira o be o ka se tšee nako e telele, eupša go ka direga gore o be a sa tsebe gore o be o tla fela kapejana gakaakang. (Joh. 3:30) Ka ngwaga wa 30 C.E., ka morago ga dikgwedi tše tshela Johane a kolobeditše Jesu, Kgoši Heroda o ile a golega Johane. Eupša Johane o ile a dira sohle seo a ka se kgonago go tšwela pele a ruta batho ka Modimo. (Mar. 6:17-20) Ke eng seo se ilego sa mo thuša gore a dule a thabile le ge go be go na le diphetogo? O ile a thušwa ke go dula a dira dilo tšeo di lego bohlokwa go Modimo.

Ge Johane a be a le kgolegong o ile a kwa dipego tša gore barutiwa ba Jesu ba be ba oketšega. (Mat. 11:2; Luka 7:18) Johane o be a kgodišegile gore Jesu ke Mesia, eupša a ka ba a ile a ipotšiša gore Jesu o be a tlo phethagatša bjang dilo ka moka tšeo  Mangwalo a boletšego gore Mesia o tlo di phethagatša. A ka ba a ile a ipotšiša gore: Ka ge Mesia e be e tlo ba kgoši, na o be a le kgauswi le go thoma go buša? Na seo se be se tla dira gore ke lokollwe kgolegong? Ka ge Johane a be a nyaka go tseba mo gontši mabapi le seo Jesu a bego a tlo se dira, o ile a romela barutiwa ba gagwe ba babedi gore ba yo botšiša Jesu gore: “Na ke wena Yo a Tlago goba na re swanetše go letela yo mongwe?” (Luka 7:19) Ge ba boa, Johane o swanetše go ba a ile a theetša ka kelohloko ge ba be ba mmotša gore Jesu o dirile mehlolo e mentši ya go fodiša batho, le gore Jesu o rile ba mmotše gore: “Difofu di a bona, dihlotša di a sepela, balephera ba a hlwekišwa, difoa di a kwa, bahu ba a tsošwa gomme badiidi ba botšwa ditaba tše dibotse.”—Luka 7:20-22.

Ga go pelaelo gore Johane o ile a matlafatšwa ke pego yeo. Seo se ile sa tiišetša taba ya gore Jesu o be a phethagatša diporofeto tšeo di bego di bolela ka Mesia. Le ge go tla ga Jesu go be go ka se dire gore Johane a lokollwe kgolegong, Johane o be a tseba gore bodiredi bja gagwe bo bohlokwa. Go sa šetšwe maemo ao Johane a bego a le go ona, o be a na le mabaka a go thaba.

Go swana le Johane, ge e ba re ka dula re swaregile ka go hlankela Jehofa, re tlo kgona go kgotlela mathata a rena re thabile e bile re sa fele pelo. (Bakol. 1:9-11) Go bala Beibele ka mehla le go naganišiša ka seo re se badilego go tlo re thuša go kgotlelela le go re gopotša gore selo le ge e le sefe seo re se direlago Modimo ga se sa lefeela. (1 Bakor. 15:58) Sandra o re: “Go bala kgaolo ya Beibele letšatši le letšatši go nthušitše gore ke be le segwera sa kgauswi kudu le Jehofa. Go nthuša gore ke nagane kudu ka yena e sego ka nna.” Le gona ge re ka dula re thabela go kwa ka dipego tša mabapi le modiro wa rena woo bana babo rena le dikgaetšedi ba o dirago, se se tla re thuša gore re se nagane kudu ka rena eupša re nagane kudu ka seo Jehofa a se fihlelelago. Sandra o re: “Mananeo a kgwedi le kgwedi ao re a bogelago Kgašong ya JW, a re thuša gore re ikwe re le kgauswi kudu le mokgatlo, e bile a re thuša gore re dule re thabile kabelong ya rena.”

Nako e kopana yeo Johane Mokolobetši a e feditšego a bolela ditaba tše dibotse, o be a thušwa ke “moya wa Eliya le matla a gagwe,” gomme go swana le Eliya, Johane “e be e le motho yo a nago le maikwelo a swanago le a rena.” (Luka 1:17; Jak. 5:17) Ge e ba re ekiša mohlala wa Johane wa go tšeela godimo dikabelo tša rena, le rena re ka dula re thabile tirelong ya Jehofa go sa šetšwe gore re diragalelwa ke eng maphelong a rena.