1. Bakriste ba swanetše go dira’ng gore ba kitime go fihla bofelong?

BAKRISTE ka moka ba kitima lebelo la gore ba tle ba hwetše bophelo bjo bo sa felego. Go sa šetšwe gore re sa tšwa go thoma go kitima lebelong le, goba re na le mengwaga e mentši re kitima, re swanetše go kitima go fihla bofelong. Keletšo yeo moapostola Paulo a ilego a nea Bakriste ba kua Filipi, e ka re kgothaletša gore re kitime go fihla bofelong. Ba bangwe ka phuthegong yeo ya Filipi ba be ba na le mengwaga e mentši ba hlankela Jehofa ge ba hwetša lengwalo leo la Paulo. Ba be ba šetše ba hlankela Jehofa gabotse, eupša Paulo o ile a ba bontšha bohlokwa bja go tšwela pele ba kitima ka kgotlelelo. O be a nyaka gore ba latele mohlala wa gagwe wa go “phegelela pakaneng” goba go šoma ka thata e le gore ba hwetše moputso.—Bafil. 3:14.

2. Ke ka baka la’ng keletšo yeo Paulo a ilego a e nea Bafilipi e be e tlile ka nako?

² Keletšo yeo Paulo a ilego a e nea Bafilipi e be e tlile ka nako. Batho ba kua Filipi ba ile ba tlaiša kudu Bakriste ba moo ga e sa le go tloga phuthego e hlongwa. Mathata a ka moka a thomile moo e ka bago ka 50 C.E. ge Paulo le Silase ba be ba fihla Filipi ka ge ba kwele taelo ya Jehofa ya gore ba ‘tshelele Matsedonia.’ (Dit. 16:9) Ge ba be ba le moo, ba ile ba kopana le mosadi yo a bitšwago Lidia yoo a ilego a ba ‘theetša gomme Jehofa a bula pelo ya gagwe’ gore a amogele ditaba tše dibotse. (Dit. 16:14) Go se go ye kae mosadi yoo o ile a kolobetšwa le bohle bao a bego a dula le bona ka ntlong ya gagwe. Eupša gateetee Diabolo o ile a thoma go galefa. Banna ba motseng woo ba ile ba gogela Paulo le Silase go babuši gomme ba ba latofatša ka maaka a gore ba baka mathata setšhabeng. Ka baka leo Paulo le Silase ba ile ba itiwa, ba golegwa, gomme ka morago ba laelwa gore ba tloge motseng woo. (Dit. 16:16-40) Na ba ile ba fela matla? Aowa! Bakriste ba phuthegong yeo e bego e sa tšwa go hlongwa ya kua Filipi bona ba ile ba dira’ng? Ba ile ba bea mohlala o mobotse kudu ka gore le bona ba ile ba kgotlelela. Ga go pelaelo  gore ba be ba kgothaditšwe ke mohlala o mobotse woo Paulo le Silase ba ba beetšego ona.

3. Ke’ng seo Paulo a ilego a se lemoga, gona re tlo araba dipotšišo dife sehlogong se?

³ Paulo o be a ikemišeditše go kgotlelela. (2 Bakor. 4:16) Eupša o be a tseba gore e le gore a kitime go fihla bofelong, o be a swanetše go dula a naganne ka moputso woo a tlago go o hwetša. Re ka ithuta’ng mohlaleng wa Paulo? Lehono re na le mehlala efe ya batho bao ba ilego ba botega yeo e bontšhago gore re ka kgotlelela le ge re na le mathata? Gona kholofelo yeo re nago le yona ka bokamoso e ka re thuša bjang gore re se ke ra fela matla?

4. Paulo o ile a dira’ng gore a tšwele pele a hlankela Jehofa go sa šetšwe maemo ao a bego a le go ona?

⁴ Nagana ka dilo ka moka tšeo Paulo a bego a swaregile ka tšona ge a be a ngwalela Bakriste ba kua Filipi. O be a golegilwe ka ntlong kua Roma. O be a ka se kgone go tšwa ka ntlong yeo gore a yo botša batho ditaba tše dibotse. Eupša o ile a dula a swaregile ka go botša baeng bao ba bego ba tlo mmona ditaba tše dibotse le go ngwalela diphuthego tša kgole mangwalo. Ka mo go swanago, lehono Bakriste ba bantši bao ba sa kgonego go tšwa ka ntlong ba diriša sebaka se sengwe le se sengwe go botša batho bao ba ba etelago ditaba tše dibotse. Le gona ba ngwalela batho bao re sa kgonego go kopana le bona mangwalo a kgothatšago.

5. Go ya ka Bafilipi 3:12-14, ke’ng seo se thušitšego Paulo gore a tšwele pele a hlankela Jehofa?

⁵ Paulo ga se a ka a nyaka gore selo le ge e le sefe se mo šitiše. Ga se a ka a dumelela diphošo tša gagwe tša nakong e fetilego goba dilo tše dibotse tšeo a bego a di fihleletše di mo šitiša go hlankela Jehofa. Ge e le gabotse o boletše gore o ile a swanelwa ke go “lebala dilo tša morago” e le gore a ‘obelele dilo tša pele,’ ke gore, a kgone go kitima go fihla bofelong. (Bala Bafilipi 3:12-14.) Tše dingwe tša dilo tšeo di ka bago di ile tša šitiša Paulo ke dife? Sa pele, Paulo o be a atlegile kudu pele e ka ba Mokriste. Eupša ka morago o ile a lebelela dilo tšeo a bego a na le tšona e le “maudi.” (Bafil. 3:3-8) Sa bobedi, le ge a ka ba ile a kwešwa bohloko ke gore o be a kile a tlaiša Bakriste, ga se a ka a dumelela maikwelo a go ikwa a le molato a mo šitiša go hlankela Jehofa. Sa boraro, ga se a ka a nagana gore o be a hlanketše Jehofa ka mo go lekanego moo e lego gore a ka khutšanyana. Paulo o ile a tšwela pele a hlankela Jehofa le ge a ile a golegwa, a itiwa, a kgatlwa ka maswika, a robegelwa ke sekepe gotee le ge a be a hloka dijo le diaparo. (2 Bakor. 11:23-27) Eupša go sa šetšwe dilo tšeo a bego a šetše a di fihleletše le mathata ao a bego a fetile go ona, Paulo o be a tseba gore o swanetše go tšwela pele a kgotleletše. Le rena re swanetše go mo ekiša.

6. Tše dingwe tša “dilo tša morago” tšeo re ka swanelwago ke go di lebala ke dife?

⁶ Re ka dira’ng gore re ekiše mohlala wa Paulo wa “[go] lebala dilo tša morago”? Mohlomongwe ba bangwe ba rena re lwantšha maikwelo a go ikwa re le molato ka baka la dibe tšeo re di dirilego nakong e fetilego. Ge e ba go le bjalo, gore’ng o sa ipeele pakane ya go ithuta ka sehlabelo sa topollo sa Kriste? Ge e ba o ka ithuta ka taba ye yeo e kgothatšago, wa naganišiša ka yona le go rapela ka yona, seo se ka go thuša gore o se sa ikwa o le molato ka gobane o tla be o tseba gore Jehofa o šetše a go lebaletše dibe tša gago. Nagana ka selo se sengwe gape seo re ka ithutago sona go Paulo. Ba bangwe ba rena re ka ba re tlogetše mešomo e lefago kudu e le gore re hlankele Jehofa ka mo go oketšegilego. Ge e ba o le yo mongwe wa batho ba, na o ka lebala dilo tša morago ka go se nagane ka dilo tšeo o ka bago o bile le tšona ge nkabe o tšwetše pele ka mošomo woo? (Num. 11:4-6; Mmo. 7:10) “Dilo tša morago” di ka akaretša le dilo tšeo re di fihleletšego ge re dutše re hlankela Jehofa, goba diteko tšeo re kilego ra di kgotlelela. Ke therešo gore ge re ka nagana ka tsela yeo Jehofa a ilego a re šegofatša le go re thekga ka yona nakong e fetilego, seo se tla dira gore re batamele kgauswi kudu le yena. Eupša le ka mohla ga se ra swanela  go nagana gore re hlanketše Jehofa ka mo go lekanego, ka gona ra nagana gore re swanetše go tšwa re khuditšenyana.—1 Bakor. 15:58.

7. Go ya ka Bakorinthe ba Pele 9:24-27, re swanetše go dira’ng e le gore re thope lebelong la rena la Bokriste? Nea mohlala.

⁷ Paulo o ile a kwešiša gabotse mantšu a Jesu ao a rego: “Katanang ka matla.” (Luka 13:23, 24) Paulo o be a tseba gore o swanetše go ekiša Kriste ka gore le yena a katane goba a šome ka thata go fihla bofelong. Ke ka baka leo a ilego a swantšha bophelo bja Bokriste le lebelo. (Bala 1 Bakorinthe 9:24-27.) Motho yo a kitimago o dula a naganne ka go fihla mafelelong a lebelo gomme o phema dilo le ge e le dife tšeo di ka mo šitišago. Ka mohlala, lehono batho ba ka kitima ditseleng tšeo go nago le mabenkele gotee le dilo tše dingwe tšeo di ka ba šitišago. Na o nagana gore motho yo a kitimago a ka ema gomme a lebelela dilo tšeo di bapatšwago mafasetereng a mabenkele? Aowa, a ka se eme ge e ba a nyaka go thopa sefoka! Le rena ge re dutše re kitima lebelo la rena la Bokriste, re swanetše go phema dilo tšeo di ka re šitišago. Ge e ba re ka dula re naganne ka moputso wa rena, ra katana ka matla go etša Paulo, gona re tla fihla mafelelong.

8. Ke dilo dife tše tharo tšeo re tlago go boledišana ka tšona?

⁸ Ga bjale a re boleleng ka dilo tše tharo tšeo di ka re fetšago matla. (1) Ge dilo di sa direge ka nako yeo re letetšego gore di direge ka yona. (2) Ge re thoma go felelwa ke matla ka ge re tšofala. (3) Ge re welwa ke mathata ao a ganago go fela. Ka gona, go ithuta kamoo ba bangwe ba ilego ba lebeletšana le maemo a ka gona go tla re hola kudu.—Bafil. 3:17.

9. Re ka ikwa bjang ge dilo tšeo re di letetšego di sa direge kapejana?

⁹ Ge dilo di sa direge ka nako yeo re letetšego gore di direge ka yona. Ka tlhago re fela pelo ya gore dilo tšeo Jehofa a re tshepišitšego tšona di phethagale. Ge e le gabotse, ge moporofeta Habakuku a be a botša Jehofa gore o fela pelo ya gore Jehofa a fediše dilo tše mpe tšeo di bego di direga kua Juda, Jehofa o ile a mmotša gore a ‘dule a letile.’ (Habak. 2:3) Eupša ge re bona eka dilo tšeo re di letetšego ga di direge kapejana, re ka felelwa ke matla. Seo se ka ba sa re nola moko. (Die. 13:12) Se se ile sa diragalela bana babo rena ba bangwe ka bo-1914. Ka nako yeo, Bakriste ba  bantši bao ba tloditšwego ba be ba letetše go hwetša moputso wa bona wa go ya legodimong. Eupša ge seo se be se sa direge, batho bao ba bego ba botega ba ile ba ikwa bjang?

10. Banyalani ba bangwe ba ile ba dira’ng ge seo ba bego ba se letetše se sa direge kapela?

¹⁰ Nagana ka Bakriste ba babedi bao ba botegago bao ba bego ba letetše go hwetša moputso wa go ya legodimong ka 1914. Ngwanabo rena Royal Spatz o kolobeditšwe ka 1908 ge a be a na le mengwaga e 20. O be a kgodišegile gore kgauswinyane o be a tlo hwetša moputso wa gagwe wa go yo phela legodimong. Ge e le gabotse, ge a be a kgopela go nyalana le kgaetšedi Pearl ka 1911, o ile a re go yena: “O a tseba gore go tlo direga eng ka 1914 akere. A re dire kapela re nyalane.” Ka manyami, ga se ba ka ba hwetša moputso wa bona wa go ya legodimong ka 1914. Na banyalani ba ba Bakriste ba ile ba felelwa ke matla? Aowa, ka gobane selo seo ba bego ba tshwenyegile ka sona e be e le go tšwela pele ba hlankela Jehofa ka potego, e sego go ya legodimong. Royal le Pearl ba be ba ikemišeditše go kitima ka kgotlelelo. Ka nnete go ile gwa ba bjalo. Mengwaga e mentši ka morago ga moo, ba ile ba dula ba botega go fihlela ba fetša bophelo bja bona bja mo lefaseng. Ga go pelaelo gore o fela pelo ya go bona Jehofa a hlatswa leina la gagwe, a hlatsela gore tsela ya gagwe ya go buša e nepagetše le go phethagatša dikholofetšo tša gagwe. Kgodišega gore dilo tše ka moka di tla phethagala ka nako yeo Jehofa a e beilego. Ge re sa letile gore nako yeo e fihle, anke re duleng re swaregile ka go hlankela Modimo. Re se ke ra dumelela dilo tšeo re sa di letilego di re nola moko goba di re dira gore re goge maoto tirelong ya Jehofa.

11-12. Ke ka baka la’ng re ka tšwela pele re hlankela Jehofa ka potego gaešita le ge re se sa na matla? Nea mohlala.

¹¹ Ge re thoma go felelwa ke matla ka ge re tšofala. Motho yo a kitimago lebelo o hloka matla a mantši gore a kitime. Eupša rena ga go hlokagale gore re be le matla e le gore re tšwele pele re hlankela Jehofa ka mafolofolo. Ge e le gabotse, ba bantši bao ba feletšwego ke matla ka baka la botšofadi, ba sa tšwela pele ba dira sohle seo ba ka se kgonago go hlankela Jehofa. (2 Bakor. 4:16) Ka mohlala, ge Ngwanabo rena Arthur Secord * a be a na le mengwaga e 88, o be a šetše a hlanketše Bethele ka mengwaga e 55. Eupša ga bjale o be a se sa na matla e bile a babja. Ka letšatši le lengwe mooki yo a bego a mo hlokometše o ile a ya go yena gore a mo thuše. Mooki yoo o ile a lebelela Ngwanabo rena Secord ke moka a re go yena: “Ngwanabo rena Secord, o dirile sohle seo o ka se kgonago go hlankela Jehofa.” Eupša Ngwanabo rena Secord o be a sa dule a nagana ka dilo tšeo a di dirilego nakong e fetilego. O ile a lebelela mooki yoo ka mahlong, a myemyela gomme a re go yena: “O nepile. Eupša seo re kgonnego go se dira ga se sona e lego sa bohlokwa. Selo sa bohlokwa ke gore re dule re hlankela Jehofa ka go botega go fihla mafelelong.”

¹² Mohlomongwe o na le mengwaga e mentši o  hlankela Jehofa, gomme gona bjale bolwetši bo dira gore o se sa kgona go dira dilo tšeo o bego o kgona go di dira. Ge e ba go le bjalo, o se ke wa nyama. Kgodišega gore Jehofa a ka se tsoge a lebala dilo tšeo o kilego wa mo direla tšona nakong e fetilego. (Baheb. 6:10) Le gona, dula o gopola gore go hlankela Jehofa ka pelo ka moka ga go bolele gore re mo direla dilo tše dintši gakaakang. Go e na le moo, re bontšha gore re mo hlankela ka pelo ka moka ka go se fele matla le go dira sohle seo re ka se kgonago go mo hlankela. (Bakol. 3:23) Jehofa o kwešiša mafokodi a rena gomme ga a nyake gore re dire dilo tšeo di tlago go re palela.—Mar. 12:43, 44.

13. Phihlelo ya Anatoly le Lidiya e re thuša bjang go tšwela pele re hlankela Jehofa gaešita le ge re šetše re kgotleletše mathata a mantši?

¹³ Ge re welwa ke diteko tša go gana go fela. Ba bangwe ba bahlanka ba Jehofa ba kgotleletše diteko ka mengwaga e mentši. Ka mohlala, Ngwanabo rena Anatoly Melnik * o be a na le mengwaga e 12 feela ge tatagwe a be a swarwa le go išwa kgolegong ya kua Siberia. Kgolego yeo e be e le bokgole bja dikhilomithara tše fetago tše 7 000 ge o tloga Moldova, e lego moo lapa la gagwe le bego le dula gona. Ka morago ga ngwaga, Anatoly, mmagwe, makgolo wa gagwe le rakgolo wa gagwe le bona ba ile ba išwa Siberia. Ge nako e dutše e eya, ba ile ba kgona go ya dibokeng motseng o mongwe. Eupša ba be ba swanelwa ke go sepela dikhilomithara tše 30 lehlweng, phefong yeo e bego e tsenelela marapong. Ka morago Ngwanabo rena Melnik o ile a fetša mengwaga e meraro kgolegong, a le kgole le mosadi wa gagwe Lidiya le morwedi wa bona yoo a bego a na le ngwaga o tee. Gaešita le ge Anatoly le lapa la gagwe ba ile ba fetša mengwaga e mentši ba na le mathata, ba ile ba tšwela pele ba hlankela Jehofa ka potego. Gona bjale Anatoly o na le mengwaga e 82, gomme o hlankela e le Setho sa Komiti ya Lekala la kua Bogare bja Asia. Anke re ekišeng mohlala wa Anatoly le Lidiya gomme re tšwele pele re dira sohle seo re ka se kgonago go hlankela Jehofa le go kgotlelela re sa fele matla.—Bagal. 6:9.

14. Paulo o ile a lemoga gore o be a swanetše go dira’ng e le gore a hwetše moputso wa gagwe?

¹⁴ Paulo o be a kgodišegile gore o tla kitima go fihla mafelelong gomme a hwetša moputso wa gagwe. Ka ge e be e le Mokriste yo a tloditšwego, o be a holofetše go tlo hwetša “moputso wa pitšo ya godimo ya Modimo.” Eupša e le gore a hwetše moputso woo, o ile a lemoga gore o be a swanetše go “phegelela pakaneng” goba go šoma ka thata. (Bafil. 3:14) Paulo o ile a diriša papišo e kgahlišago ge a be a bolela le Bafilipi e le go ba thuša gore ba dule ba naganne ka moputso wa bona.

15. Paulo o ile a diriša bjang papišo ya mabapi le go ba modudi go kgothaletša Bakriste ba kua Filipi gore ba tšwele pele ba šoma ka thata?

 ¹⁵ Paulo o ile a gopotša Bakriste ba kua Filipi gore mafelelong e be e tlo ba badudi ba legodimong. (Bafil. 3:20) Ke ka baka la’ng ba be ba se ba swanela go lebala taba yeo? Ka gobane mehleng yeo, go ba modudi wa Roma go be go na le mehola e mentši kudu. * Eupša Bakriste ba tloditšwego e be e le badudi ba Mmušo o kaone kudu woo o bego o tla ba nea mehola e mentši kudu go feta ya go ba modudi wa Roma. Go ba modudi wa Roma e be e se selo ge go bapetšwa le go ba modudi wa mmušo wa legodimong. Ka baka leo, Paulo o ile a kgothaletša Bafilipi gore ba “[itshware goba ba itshware bjalo ka badudi] ka mokgwa o swanelago ditaba tše dibotse ka Kriste.” (Bafil. 1:27) Lehono Bakriste ba tloditšwego ba re beela mohlala o mobotse ge ba dutše ba katana gore ba tle ba hwetše moputso wa bona wa go phela ka mo go sa felego legodimong.   

16. Go ya ka Bafilipi 4:6, 7, re swanetše go tšwela pele re dira’ng go sa šetšwe gore re holofetše go tlo phela ka mo go sa felego mo lefaseng goba legodimong?

¹⁶ Go sa šetšwe gore re holofetše go tlo hwetša moputso wa go phela ka mo go sa felego mo lefaseng goba legodimong, re swanetše go tšwela pele re šoma ka thata gore re tle re hwetše moputso woo. Le gona go sa šetšwe gore re lebeletšane le mathata afe, ga se ra swanela go lebelela dilo tša morago, e bile ga se ra swanela go dumelela selo le ge e le sefe se dira gore re tlogele go hlankela Jehofa. (Bafil. 3:16) Go ka direga gore ke kgale re letetše gore Modimo a phethagatše dilo tšeo a re holofeditšego tšona, goba mohlomongwe re feletšwe ke matla ka baka la botšofadi. Le gona re ka ba re kgotleletše mathata le go tlaišwa ka mengwaga e mentši. Go sa šetšwe gore maemo a gago ke afe, ‘o se ke wa belaela ka selo.’ Go e na le moo, rapela Modimo gomme o mo lope le go mo kgopela dilo tšeo o di hlokago. Ge o ka dira bjalo, o tla go nea khutšo ya monagano yeo o bego o se wa e letela.—Bala Bafilipi 4:6, 7.

17. Re tlo ithuta ka’ng sehlogong se se latelago?

¹⁷ Go swana le mokitimi yo a ntšhago ka ga tšhwene ge a le kgauswi le go fihla mafelelong a lebelo, anke le rena re duleng re naganne ka moputso wa rena. Seo se tla re thuša gore re kitime go fihla mafelelong. Anke re direng sohle seo re ka se kgonago go ya ka maemo a rena gore re tle re bone dilo tšeo Jehofa a re holofeditšego tšona di phethagala. Re ka dira’ng gore re tšwele pele re kgotleletše? Sehlogo se se latelago se tlo re thuša go bona gore ke dilo dife tšeo re swanetšego go di etiša pele bophelong e le gore re “kgonthišetše dilo tše bohlokwa kudu.”—Bafil. 1:9, 10.