1. Re na le tokelo efe?

RURI ke tokelo e kgolo go ba karolo ya phuthego ya Jehofa! Re thabela go hlankela Jehofa re na le bana babo rena le dikgaetšedi ka phuthegong re na le khutšo. Wena o kgatha tema efe ka phuthegong?

2. Moapostola Paulo o ile a diriša papišo efe mangwalong a mmalwa ao a a ngwadilego?

² Re ka ithuta dilo tše dintši tabeng ya gore re kgatha tema efe ka phuthegong papišong yeo e lego mangwalong ao moapostola Paulo a ilego a a ngwala. Mangwalong ao ka moka, Paulo o ile a swantšha phuthego ya Bokriste le mmele wa motho. Le gona o ile a swantšha ditho tša phuthego le ditho tše di fapafapanego tša mmele.—Baroma 12:4-8; 1 Bakor. 12:12-27; Baef. 4:16.

3. Re tlo ithuta dilo dife tše tharo sehlogong se?

³ Yo mongwe le yo mongwe wa rena o bohlokwa ka phuthegong ya Jehofa. Ka moka ga rena re ka kgona go matlafatša batho ba bangwe ka phuthegong go sa šetšwe gore re ba morafo ofe, re tšwa setšhabeng sefe, re humile goba re a diila, maemo a rena ke afe setšhabeng, setšo sa rena ke sefe, re rutegile goba ga se ra rutega. Sehlogong se re tlo bolela ka dilo tše tharo tše bohlokwa tšeo re ka ithutago tšona papišong ya Paulo. Sa pele, re tlo ithuta gore yo mongwe le yo mongwe wa rena o bohlokwa ka phuthegong ya Jehofa. Sa bobedi, re tlo bolela gore re ka dira eng ge e ba re thatafalelwa ke go ipona re le bohlokwa ka phuthegong. Sa boraro, re tlo bolela gore ke ka baka la eng go  le bohlokwa gore re dule re kgatha tema ya rena ka phuthegong.

4. Baroma 12:4, 5 e re ruta eng?

⁴ Selo sa pele seo re ithutago sona papišong ya Paulo ke gore yo mongwe le yo mongwe wa rena o bohlokwa ka phuthegong ya Jehofa. Paulo o thomile papišo ya gagwe ka gore: “Go etša ge mmeleng o tee re na le ditho tše dintši, eupša ditho tšohle di se na modiro o swanago, ka gona, rena gaešita le ge re le ba bantši, re mmele o tee boteeng le Kriste, eupša re ditho tšeo di kopantšwego.” (Baroma 12:4, 5) Paulo o be a era go re’ng? O be a era gore le ge yo mongwe le yo mongwe wa rena a na le mošomo o itšego ka phuthegong, eupša ka moka ga rena re bohlokwa.

5. Ke “dimpho” dife tšeo Jehofa a re neilego tšona ka phuthegong?

⁵ Ge o nagana ka batho bao ba lego bohlokwa ka phuthegong, gantši o ka thoma ka go nagana ka bao ba re etelelago pele. (1 Bathes. 5:12; Baheb. 13:17) Ke nnete gore Jehofa o neile phuthego ya gagwe “dimpho tšeo e lego banna” a diriša Jesu Kriste. (Baef. 4:8) “Dimpho tšeo e lego banna” di akaretša bana babo rena ba Sehlopha se Bušago, bathuši ba bona, ditho tša Dikomiti tša Makala, balebeledi ba tikologo, bana babo rena bao ba rutago dikolong tša mokgatlo, bagolo le bahlanka ba bodiredi. Bana babo rena ba ka moka ba kgethilwe ke moya o mokgethwa gore ba hlokomele mohlape wa Jehofa le go o matlafatša.—1 Pet. 5:2, 3.

6. Go ya ka Bathesalonika ba Pele 2:6-8, bana babo rena bao ba kgethilwego ke moya o mokgethwa ba leka go dira eng?

⁶ Moya o mokgethwa o kgetha bana babo rena gore ba dire mešomo e fapafapanego ka phuthegong. Go swana le ge ditho tše di fapafapanego tša mmele tša go swana le matsogo le maoto di šoma gore di hole mmele, le bana babo rena bao ba kgethilwego ke moya o mokgethwa ka phuthegong ba šoma ka thata gore ba matlafatše phuthego ka moka. Ga ba šome ka thata e le gore ba retwe le go tuma ka mokgatlong. Go e na le moo, ba leka ka thata gore ba matlafatše bana babo bona le dikgaetšedi ka phuthegong. (Bala 1 Bathesalonika 2:6-8.) Re leboga Jehofa gore o re file bana babo rena ba bao ba hlokomelago dinyakwa tša rena go feta tša bona!

7. Ke ditšhegofatšo dife tšeo bao ba lego tirelong ya nako e tletšego ba di thabelago?

⁷ Ba bangwe ka phuthegong ba ka kgethwa go hlankela e le baromiwa, babulamadibogo ba kgethegilego goba babulamadibogo ba ka mehla. Ge e le gabotse, bana babo rena le dikgaetšedi ba bantši ba kgethile go dira gore go bolela ditaba tše dibotse e be mošomo wa bona wa ka mehla. Ka go dira bjalo, ba thušitše batho ba bantši gore e be barutiwa ba Jesu Kriste. Le ge bana babo rena bao ba se na dilo tše dintši, eupša Jehofa o ba šegofaditše kudu. (Mar. 10:29, 30) Re tloga re ba rata kudu, e bile re leboga gore ke karolo ya phuthego ya Bokriste!

8. Ke ka baka la’ng mogoeledi yo mongwe le yo mongwe wa ditaba tše dibotse a le bohlokwa go Jehofa?

⁸ Na bana babo rena bao ba etelelago pele ka phuthegong le ba bangwe bao ba lego tirelong ya nako e tletšego ke bona feela ba lego bohlokwa ka phuthegong? Aowa! Mogoeledi yo mongwe le yo mongwe wa ditaba tše dibotse o bohlokwa go Modimo e bile o bohlokwa ka phuthegong. (Baroma 10:15; 1 Bakor. 3:6-9) Ge e le gabotse, mošomo o bohlokwa kudu wa phuthego ya Bokriste ke go dira batho barutiwa. (Mat. 28:19, 20; 1 Tim. 2:4) Bagoeledi ka moka bao ba kolobeditšwego le bao ba sa kolobetšwago, ba leka go etiša pele modiro wo.—Mat. 24:14.

9. Ke ka baka la’ng re rata dikgaetšedi tša ka phuthegong?

 ⁹ Jehofa o bontšha gore o rata dikgaetšedi ka go di nea mošomo o bohlokwa ka phuthegong. O rata dikgaetšedi ka moka tšeo di mo hlankelago ka go botega, go akaretša dikgaetšedi tšeo di nyetšwego, tšeo di sa nyalwago, bomma le bahlologadi. Gantši Mangwalo a bolela ka basadi bao ba ilego ba bea mohlala o mobotse kudu wa go hlankela Jehofa. Mangwalo a bolela gore basadi bao ba be ba na le dika tše dibotse tša go swana le bohlale, tumelo, ba botega, ba na le sebete, ba rata go fa e bile ba dira mediro e mebotse. (Luka 8:2, 3; Dit. 16:14, 15; Baroma 16:3, 6; Bafil. 4:3; Baheb. 11:11, 31, 35) Re leboga Jehofa gore ka phuthegong ya Bokriste go na le dikgaetšedi tšeo di nago le dika tše bjalo tše dibotse!

10. Ke ka baka la’ng re rata batšofadi bao re nago le bona ka phuthegong?

¹⁰ Jehofa o re šegofaditše kudu ka go re nea batšofadi ba bantši ka phuthegong. Diphuthegong tše dingwe go na le batšofadi bao ba feditšego mengwaga e mentši ba hlankela Jehofa. Eupša go ka direga gore batšofadi ba bangwe ga se kgale ba ithutile therešo. Go sa šetšwe gore batšofadi ba ke kgale ba ithutile therešo goba ba sa tšwa go ithuta therešo, ba na le mathata ao a tlišwago ke botšofadi. Mathata ao a ka dira gore ba se ke ba kgona go dira mo gontši ka phuthegong le tšhemong. Eupša batšofadi bao ba dira sohle seo ba ka se kgonago tšhemong le go kgothatša ba bangwe! Go phela le bona go re hola kudu. Ruri Jehofa o a ba rata, gomme le rena re a ba rata.—Die. 16:31.

11-12. Bafsa ba ka phuthegong ya geno ba go kgothaditše bjang?

¹¹ Nagana le ka bafsa ba ka phuthegong. Ba lebeletšana le mathata a mantši lefaseng le leo le laolwago ke Sathane Diabolo. (1 Joh. 5:19) Eupša ka moka ga rena re a kgothatšega ge re bona bafsa ba ka phuthegong ba araba dibokeng, ba eya tšhemong e bile ba emela tumelo ya bona. Lena bafsa, le bohlokwa ka phuthegong ya Jehofa!—Ps. 8:2.

¹² Eupša bana babo rena ba bangwe le dikgaetšedi ba ipona ba se na mohola ka phuthegong.  Ga bjale, anke re boneng seo se ka thušago yo mongwe le yo mongwe wa rena gore a ipone a le bohlokwa ka phuthegong.

13-14. Ke ka baka la’ng ba bangwe ba ka ipona eka ga ba bohlokwa ka phuthegong?

¹³ Selo sa bobedi seo re ithutago sona papišong ye ya Paulo ke bothata bjoo batho ba bantši ba nago le bjona lehono. Batho ba bantši ga ba ipone ba na le mohola ka phuthegong. Paulo o ngwadile gore: “Ge e ba lenao le ka re: ‘Ka ge ke se seatla, ga ke karolo ya mmele,’ seo ga se se dire gore se se be karolo ya mmele. Ge e ba tsebe e ka re: ‘Ka ge ke se leihlo, ga ke karolo ya mmele,’ seo ga se le dire gore le se be karolo ya mmele.” (1 Bakor. 12:15, 16) Paulo o be a era go re’ng?

¹⁴ Ge o ka thoma go ipapetša le batho ba bangwe ka phuthegong, o ka feleletša o ipona eka ga o bohlokwa. Ba bangwe ka phuthegong ba ka ba ba na le bokgoni bja go ruta, ba bangwe ba kgona go rulaganya dilo gomme ba bangwe e le bagolo bao ba nago le bokgoni bja go kgothatša ba bangwe le go ba homotša. Mohlomongwe wena o bona eka ga o swane le bana babo rena bao. Se se bontšha gore o ikokobeditše. (Bafil. 2:3) Eupša hlokomela gore ge o dula o ipapetša le batho bao ba nago le bokgoni ka phuthegong, o tlo nyama. E bile o tlo bona eka ga o na mohola ka phuthegong. Ke’ng seo se ka go thušago go fenya maikwelo ao?

15. Go ya ka Bakorinthe ba Pele 12:4-11, re swanetše go lemoga’ng ka dimpho tšeo re nago le tšona?

¹⁵ Nagana ka se: Ge Jehofa a be a nea Bakriste ba pele dimpho a diriša moya o mokgethwa, ga se a ba fa dimpho tše di swanago. (Bala 1 Bakorinthe 12:4-11.) Jehofa o be a ba neile bokgoni le dimpho tše di sa swanego, eupša yo mongwe le yo mongwe o be a le bohlokwa. Lehono ga go hlokagale gore re hwetše dimpho tša mohlolo tšeo Bakriste bao ba ilego ba di newa. Eupša taba yeo e sa fetogego ke gore le ge ka moka ga rena re se na bokgoni bjo bo swanago, yo mongwe le yo mongwe wa rena o bohlokwa go Jehofa.

16. Ke keletšo efe ya moapostola Paulo yeo re swanetšego go e diriša?

 ¹⁶ Go e na le gore re ipapetše le Bakriste ba bangwe, re swanetše go diriša keletšo ya moapostola Paulo yeo e rego: “Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagal. 6:4.

17. Re tlo holega bjang ge e ba re latela keletšo yeo Paulo a re neilego yona?

¹⁷ Ge e ba re diriša keletšo yeo Paulo a re neilego yona gomme re thoma go itlhahloba, le rena re tlo thoma go bona gore re na le dimpho tše itšego tšeo ba bangwe ba se nago tšona. Ka mohlala, mogolo yo a itšego a ka ba a se na bokgoni bja go nea dipolelo eupša a thušitše batho ba bantši go tla ka phuthegong. Goba a ka ba a sa kgone go rulaganya dilo gabotse eupša a rata batho, a le botho e bile ditho tše dingwe tša phuthego di kgona go ya go yena gore a di nee keletšo e botse yeo e tšwago ka Mangwalong. Goba a ka ba a tsebega ka go rata go amogela baeng. (Heb. 13:2, 16) Ge re tseba bokgoni bja rena le dimpho tšeo re nago le tšona, re tlo thaba ge re bona kamoo re ka thušago ba bangwe ka phuthegong. Le gona seo se tla re thuša gore re se ke ra jela bana babo rena mona ge ba re phala ka dilo tše dingwe.

18. Ke’ng seo se ka re thušago gore re be le bokgoni bja go ruta ba bangwe?

¹⁸ Le ge ka moka ga rena re le bohlokwa ka phuthegong, re swanetše go dira sohle se re ka se kgonago gore re kaonefatše bokgoni bja rena bja go ruta ba bangwe. Jehofa o diriša mokgatlo wa gagwe go re nea tlwaetšo yeo e tlago go re thuša gore re kaonefatše. Ka mohlala, dibokeng tša rena tša gare ga beke re rutwa kamoo re ka kgonago go atlega tšhemong. Na o diriša tlwaetšo yeo o e newago dibokeng tšeo?

19. O ka dira’ng gore o tle o kgone go ya Sekolong sa Baebangedi ba Mmušo?

¹⁹ Tsela e nngwe e kgahlišago kudu yeo Jehofa a re tlwaetšago ka yona ke go diriša Sekolo sa Baebangedi ba Mmušo. Sekolong se go ka ya bana babo rena le dikgaetšedi bao ba šetšego ba le tirelong ya nako e tletšego bao ba nago le mengwaga ya magareng ga e 23 le e 65. O ka bona eka o ka se tsoge o ile sekolong se. Eupša go e na le gore o bee mabaka a gore ke ka baka la eng o ka se kgone go ya sekolong se, bea mabaka a gore ke ka baka la eng o ka kgona go ya sekolong se. Ka morago ga moo, dira sohle seo o ka se kgonago gore o tle o kgone go swanelega go ingwadiša go ya sekolong se. Ge e ba Jehofa a go thuša e bile le wena o šoma o šoma ka thata, seo se bego se bonagala se ka se kgonege se ka kgonega.

20. Re ka ithuta’ng go Baroma 12:6-8?

²⁰ Selo sa boraro seo re ithutago sona papišong ya Paulo se go Baroma 12:6-8. (Bala.) Le gona mo Paulo o bolela gape gore motho yo mongwe le yo mongwe ka phuthegong o na le mpho yeo a e neilwego. Eupša ditemaneng tše o gatelela taba ya gore re swanetše go diriša mpho le ge e le efe yeo re e neilwego go matlafatša phuthego.

21-22. Re ka ithuta’ng mohlaleng wa Robert le wa Felice?

²¹ Nagana ka mohlala wa ngwanabo rena yoo re tlago go mmitša Robert. Ge a be a hlankela nageng e nngwe, o ile a newa kabelo ya gore a yo hlankela Bethele ya nageng ya gabo. Le ge bana babo rena ba ile ba mo kgonthišetša gore ga a newe kabelo ye e mpsha ka baka la ge a se na bokgoni, o itše: “Ke ile ka fetša dikgwedi tše dintši ke ikwa ke nyamile ka ge ke be ke nagana gore ke paletšwe kabelong ya ka. Ka dinako tše dingwe ke ile ka nagana le go tlogela go  hlankela Bethele.” Robert o ile a dira’ng gore a boele a thabe? Mogologotee le yena o ile a mo kgothatša ka go mmotša gore Jehofa o re tlwaeditše dikabelong tša rena ka moka tše di fetilego, e le gore re tle re kgone go dira dikabelo tšeo a re neilego tšona gona bjale. Robert o ile a lemoga gore o swanetše go tlogela go hlwa a naganne ka dilo tša nakong e fetilego, gomme a bone seo a ka kgonago go se dira gona bjale.

²² Ngwanabo rena Felice Episcopo le yena o bile le phihlelo e swanago. Yena le mosadi wa gagwe ba alogile Sekolong sa Gilead ka 1956 gomme ba ya modirong wa tikologo kua Bolivia. Ka 1964 ba ile ba ba le ngwana. Felice o re: “Re ile ra thatafalelwa ke go tlogela kabelo ya rena yeo re bego re e rata. Go bolela nnete, ke itshenyeditše ngwaga ke nyamile e bile ke ikwela bohloko. Eupša Jehofa o ile a nthuša gore ke kgone go bona dilo gabotse gomme ke phethe boikarabelo bja ka bja go ba motswadi.” Na o ikwa go swana le Robert goba Felice? Na gona bjale o ikwa o nyamile ka gobane ga o na ditokelo tšeo o bego o na le tšona nakong e fetilego? Ge e ba go le bjalo, o tla thaba ge e ba o ka fetoša tsela yeo o naganago ka yona gomme wa bona seo o ka se dirago gona bjale go hlankela Jehofa le go matlafatša bana beno le dikgaetšedi. Ge o ka dula o swaregile go diriša bokgoni bja gago le dimpho tša gago go thuša ba bangwe, o tla thaba ge o dutše o matlafatša ba bangwe ka phuthegong.

23. Re swanetše go ipha nako ya go dira’ng, gona re tlo ithuta ka’ng sehlogong se se latelago?

²³ Yo mongwe le yo mongwe wa rena o bohlokwa go Jehofa. O nyaka gore re be karolo ya mokgatlo wa gagwe. Ge re ka ipha nako ya go naganišiša ka seo re ka se dirago go matlafatša bana babo rena le dikgaetšedi gomme ra šoma ka thata gore re fihlelele seo, re ka se ikwe eka ga re bohlokwa ka phuthegong! Eupša go thwe’ng ka tsela yeo re lebelelago ba bangwe ka phuthegong? Re ka bontšha bjang gore re leboga seo ba se dirago? Sehlogong se se latelago re tlo bolela ka taba ye ya bohlokwa.