1. Batho ba bantši ba dira’ng go bontšha gore ba nyaka go hlankela Jehofa ka mo go oketšegilego?

 RE NA le mošomo o montši woo re swanetšego go o dira mehleng ye ya bofelo. (Mat. 24:14; Luka 10:2; 1 Pet. 5:2) Ka moka ga rena re nyaka go dira sohle se re ka se kgonago gore re hlankele Jehofa. Batho ba bantši ba oketša nako yeo ba e fetšago ba hlankela Jehofa. Ba bangwe ba kganyoga go ba babulamadibogo mola ba bangwe ba kganyoga go šoma Bethele goba modirong wa go aga. Bana babo rena ba bantši ba leka ka thata gore ba swanelege go ba bahlanka ba bodiredi goba bagolo. (1 Tim. 3:1, 8) Ruri Jehofa o a thaba ge a bona gore batho ba gagwe ba ikemišeditše go mo hlankela!—Ps. 110:3; Jes. 6:8.

2. Re ka ikwa bjang ge re sa kgone go fihlelela tše dingwe tša dipakane tšeo re ipeetšego tšona?

² Re ka ikwa re nyamile ge go ka feta nako re sa kgone go fihlelela dipakane tšeo re nyakago go di fihlelela ge re hlankela Jehofa. Goba re ka nyamišwa ke gore ga re kgone go fihlelela dipakane tša rena ka baka la mengwaga ya rena goba maemo a mangwe. (Die. 13:12) Se ke seo se ilego sa diragalela Melissa. * O be a ka rata go hlankela Bethele goba go ya Sekolong sa Baebangedi ba Mmušo, eupša o re: “Ke tšofetše. Gona bjale dipakane tšeo e no ba ditoro feela. Ka dinako tše dingwe ke ikwa ke nyamile.”

3. Ke dilo dife tšeo ba bangwe ba ka swanelwago ke go di dira gore ba swanelege go hwetša ditokelo tše itšego?

³ Bafsa ba bangwe bao ba phetšego gabotse ba ka swanelwa ke go bontšha dika tše itšego tšeo di kgahlišago Modimo pele ba ka swanelega go hwetša ditokelo tše itšego. Ka mohlala, ba bangwe ba ka ba ba le bohlale, ba kgona go dira diphetho kapejana e bile ba ikemišeditše go šoma. Eupša ba ka ba ba sa swanelwa ke go  ithuta go se fele pelo, go dira mošomo wa bona gabotse le go ithuta go hlompha ba bangwe. Ge e ba o šoma ka thata go ba le dika tšeo o swanetšego go šomela go tšona, o ka hwetša ditokelo ka nako yeo o sa e letelago. Nagana ka mohlala wa Nick. Ge a be a na le mengwaga e 20, o ile a nyama kudu ge a be a sa kgethwe go ba mohlanka wa bodiredi. O re: “Ke ile ka nagana gore go swanetše go ba go na le seo se sa sepelego gabotse ka nna.” Eupša Nick ga se a ka a fela matla. O ile a dira sohle seo a ka se kgonago ka phuthegong le modirong wa go bolela ditaba tše dibotse. Lehono o hlankela Komiting ya Lekala.

4. Re tlo ithuta ka’ng sehlogong se?

⁴ Na o nyamišitšwe ke gore ga se wa tšwa o fihlelela pakane ya gago ya gore o hlankele Jehofa ka mo go oketšegilego? Ge e ba go le bjalo, botša Jehofa kamoo o ikwago ka gona. (Ps. 37:5-7) Le gona o ka kgopela bana babo rena bao e lego kgale ba le ka phuthegong gore ba go fe ditšhišinyo tša kamoo o ka kaonefatšago tsela yeo o hlankelago Jehofa ka yona, ke moka o leke go di diriša. Go dira bjalo go ka go thuša gore o fihlelele pakane ya gago. Go no swana le Melissa yoo re boletšego ka yena, mohlomongwe gona bjale ga go kgonege gore o fihlelele pakane ya gago. Bjale o ka dira’ng gore o dule o thabile le ge o se wa fihlelela pakane ya gago? Gore re hwetše karabo ya potšišo ye, mo sehlogong se re tlo boledišana ka seo o ka se dirago gore o thabe, seo o ka se dirago gore o oketše lethabo la gago le gore o ka ipeela dipakane dife gore o oketše lethabo la gago.

5. Re swanetše go dira’ng gore re thabe? (Mmoledi 6:9)

⁵ Mmoledi 6:9 e re thuša go bona gore re ka hwetša kae lethabo. (Bala.) Motho yo a thabelago ‘seo a kgonago go se bona ka mahlo’ o kgotsofalela seo a nago le sona, go swana le maemo a gagwe. Eupša motho yo a kganyogago dilo tšeo a ka se kgonego go di hwetša, a ka se tsoge a kgotsofetše. Re ithuta’ng go se? E le gore re thabe, re swanetše go kgotsofalela ditokelo tšeo re nago le tšona gomme re se ke ra tshwenyega ka dipakane tšeo re ka se kgonego go di fihlelela.

6. Ga bjale re tlo boledišana ka papišo efe, gona re tlo ithuta’ng go yona?

⁶ Na ruri go a kgonega gore motho a kgotsofalele seo a šetšego a na le sona? Batho ba bantši ba nagana gore ga go kgonege ka gobane ge nako e dutše e eya re nyaka go ithuta dilo tšeo re sa kago ra di dira. Eupša go a kgonega gore re kgotsofale. Re ka kgona go thabela ditokelo tšeo gona bjale re nago le tšona. Re ka dira seo bjang? E le gore re hwetše karabo, a re boledišaneng ka papišo ya Jesu ya ditalente yeo e lego go Mateo 25:14-30. Papišong yeo, re tlo ithuta gore re ka dira eng gore re be le lethabo le gore re ka dira eng gore re le oketše.

7. Hlalosa ka bokopana papišo ya Jesu ya mabapi le ditalente.

⁷ Papišong yeo ya Jesu, monna yo mongwe o be a le kgauswi le go tšea leeto. Pele monna yoo a sepela, o ile a bitša bahlanka ba gagwe gomme a fa yo mongwe le yo mongwe wa bona ditalente gore ba dire kgwebo ka tšona. * Ka ge a be a tseba gore bahlanka bao ba be ba se na bokgoni bja go swana, o ile a fa mohlanka yo mongwe ditalente tše hlano, yo mongwe a mo fa tše pedi gomme yo mongwe a mo fa e tee. Bahlanka ba babedi ba mathomo ba ile ba šoma ka thata gore ba oketše tšhelete ya mong wa bona. Eupša mohlanka wa boraro ga se a oketša tšhelete yeo mong wa gagwe a bego a mo file yona gomme mong wa gagwe o ile a mo raka.

8. Ke ka baka la’ng mohlanka wa mathomo papišong ye a swanetše go ba a ile a thaba?

 ⁸ Mohlanka wa mathomo o swanetše go ba a ile a thaba kudu ka ge mong wa gagwe a ile a mo tshepa ka go mo nea ditalente tše hlano. Yeo e be e le tšhelete e ntši kudu, le gona e be e bontšha gore mong wa gagwe o tloga a mo tshepa. Eupša mohlanka ba bobedi o ile a ikwa bjang? Mohlomongwe o be a ka nyamišwa ke gore ga se a hwetša ditalente tše dintši go swana le mohlanka wa mathomo. Eupša o ile a dira’ng?

9. Ke’ng seo Jesu a sego a se bolela ka mohlanka wa bobedi? (Mateo 25:22, 23)

⁹ Bala Mateo 25:22, 23. Jesu ga se a ka a re mohlanka wa bobedi o ile a galefa ka ge a be a hweditše ditalente tše pedi feela. Le gona Jesu ga se a ka a re mohlanka yoo o ile a belaela ka gore: ‘Mong wa ka o mpha tšona tše feela? Le nna ke kgona go šoma ka thata go swana le mohlanka yoo a hweditšego ditalente tše hlano! Ge e ba o bona ke se bohlokwa, gona nka no epela ditalente tše tše pedi gomme ka tšwela pele ka mešomo e mengwe ya bohlokwa bophelong.’

10. Mohlanka wa bobedi o ile a dira’ng ka ditalente tša gagwe?

¹⁰ Go no swana le mohlanka wa mathomo, mohlanka wa bobedi le yena o ile a tšea mošomo woo mong wa gagwe a mo filego wona e le o bohlokwa kudu gomme a mo šomela ka thata. Mafelelong o ile a oketša ditalente tšeo a bego a na le tšona gore e be tše nne. Ka ge mohlanka yo a be a šoma ka thata, mong wa gagwe o ile a mo nea moputso. Le gona o ile a thaba a ba a mo fa le maikarabelo a mangwe!

11. Re ka oketša lethabo la rena bjang?

 ¹¹ Le rena re ka oketša lethabo la rena ka go dira sohle seo re ka se kgonago le go šoma ka thata dikabelong le ge e le dife ka mokgatlong wa Jehofa. Dula o ‘swaregile kudu’ ka modiro wa go bolela ditaba tše dibotse e bile o šome ka thata ka phuthegong. (Dit. 18:5; Baheb. 10:24, 25) Lokišetša gabotse ge o eya dibokeng gore o kgone go yo araba ka tsela e kgothatšago. Tšea kabelo e nngwe le e nngwe yeo o e newago sebokeng sa gare ga beke e le bohlokwa. Ge bana babo rena ba go kgopetše gore o dire mošomo o mongwe ka phuthegong, o se ke wa ja nako e bile o tshepege. O se ke wa nagana gore kabelo yeo ba go filego yona ga e bohlokwa le gore ga go hlokagale gore o iphe nako ya go e dira. Šoma ka thata go kaonefatša bokgoni bja gago. (Die. 22:29) Ge o dutše o šomela Jehofa ka thata, segwera sa gago le yena se tlo tia e bile o tlo thaba kudu. (Bagal. 6:4) Le gona go tlo ba bonolo gore o thabe le batho ba bangwe ge ba hwetša ditokelo tšeo o bego o ka rata go di hwetša.—Baroma 12:15; Bagal. 5:26.

12. Ke’ng seo se thušitšego Melissa le Nick gore ba oketše lethabo la bona?

¹² Na o sa gopola Melissa yo re boletšego ka yena pejana yo a bego a nyaka go ya Bethele goba Sekolong sa Baebangedi ba Mmušo? Le ge a se a ka a kgona go fihlelela dipakane tšeo o re: “Ka ge ke le mmulamadibogo, ke leka go dira sohle seo nka se kgonago tšhemong le go tšea karolo mekgweng e fapafapanego ya go bolela ditaba tše dibotse. Se se dirile gore ke thabe kudu.” Nick yena o ile a dira’ng ge a be a nyamišitšwe ke gore ga se a kgethwa go ba mohlanka wa bodiredi? O re: “Ke ile ka dira sohle seo nka se kgonago medirong yeo ke bego nka kgona go e dira, go swana le go bolela ditaba tše dibotse le go nea dikarabo tše di kgothatšago dibokeng. Le gona ke ile ka tlatša fomo ya go ya Bethele gomme ba mpitša ngwageng o latelago.”

13. O tlo hwetša eng ge e ba o ka dira sohle seo o ka se kgonago kabelong ya gago? (Mmoledi 2:24)

¹³ Ge o ka dira sohle seo o ka se kgonago kabelong ya gago, ka letšatši le lengwe o tlo hwetša maikarabelo a mangwe go swana le Nick. Eupša le ge o ka se hwetše maikarabelo a mangwe, lethabo la gago le tlo oketšega go swana le la Melissa, gomme wa kgotsofalela seo o se direlago Jehofa. (Bala Mmoledi 2:24.) Le gona o tlo thaba kudu ge o tseba gore Mong wa rena Jesu Kriste o thabišwa ke maiteko a gago.

14. Ke dipakane dife tše dingwe tšeo re swanetšego go ipeela tšona ge re dutše re hlankela Jehofa?

¹⁴ Na ge re dira sohle seo re ka se kgonago ge re hlankela Jehofa go bolela gore ga se ra swanela go ipeela dipakane tše dingwe? Aowa! Re ka ipeela dipakane tšeo di tlago go re thuša gore re kaonefatše bokgoni bja rena bja go bolela ditaba tše dibotse le go thuša bana babo rena le dikgaetšedi. Re tlo kgona go fihlelela dipakane tše ge ka bohlale re ka tshwenyega ka batho ba bangwe, e sego go tshwenyega ka rena kudu.—Die. 11:2; Dit. 20:35.

15. Tše dingwe tša dipakane tšeo di ka go thušago go oketša lethabo la gago ke dife?

¹⁵ Ke dipakane dife tšeo o ka ipeelago tšona? Kgopela Jehofa gore a go thuše go tseba gore ke dipakane dife tšeo o ka kgonago go di fihlelela. (Die. 16:3; Jak. 1:5) Na o ka leka go fihlelela e nngwe ya dipakane tšeo re boletšego ka tšona  serapeng sa pele tša go swana le go tšea bobulamadibogo bja go thuša goba bja ka mehla, go hlankela Bethele goba go thuša medirong ya go aga? Goba mohlomongwe o ka ithuta leleme le lengwe goba wa ya go bolela ditaba tše dibotse tikologong e nngwe. O ka ithuta ka mo go oketšegilego ka dipakane tše go kgaolo 10 ka pukung ya Go Rulaganyetšwa go Dira Thato ya Jehofa le ka go bolela le bagolo ba  phuthegong ya geno. * Le gona ge o leka go fihlelela dipakane tšeo, batho ba bangwe ba tla bona gore o dira tšwelopele gomme lethabo la gago le tla oketšega.

16. O ka dira’ng ge e ba o sa kgone go fihlelela pakane e itšego gona bjale?

¹⁶ O tla dira’ng ge e ba gona bjale o sa kgone go fihlelela e nngwe ya dipakane tšeo re boletšego ka tšona sehlogong se? Leka go ipeela pakane yeo o ka kgonago go e fihlelela. Ekwa tše dingwe tša dipakane tšeo o ka ipeelago tšona.

17. Go ya ka Timotheo wa Pele 4:13, 15, ngwanabo rena a ka dira’ng gore a kaonefatše bokgoni bja gagwe bja go ruta?

¹⁷ Bala 1 Timotheo 4:13, 15. Ge e ba o le ngwanabo rena yo a kolobeditšwego, o ka kaonefatša bokgoni bja gago bja go nea dipolelo le go ruta. Ka baka la’ng? Ka gobane ge e ba o leka ka thata go kaonefatša bokgoni bja gago bja go bala, bja go nea dipolelo le bja go ruta, seo se tlo hola batho bao ba go theetšago. Leka go ipeela pakane ya go ithuta le go diriša dilo ka moka tšeo re kgothaletšwago go šomela go tšona ka poroutšheng ya Ikgafele go Baleng le go Ruteng. Nako e nngwe le e nngwe ithute ntlha e tee, o itlwaetše yona ge o le ka gae ke moka o e diriše ge o nea dipolelo. Kgopela keletšo go moeletši wa ka thoko goba go bagolo ba bangwe “bao ba šomago ka thata go boleleng le go ruteng.” * (1 Tim. 5:17) Ge o diriša ntlha yeo o šomelago go yona, thuša le batheetši gore ba holego ba be ba diriše seo o se bolelago. Ge o dira bjalo, seo se tla dira gore ka moka ga lena le thabe.

18. Ke’ng seo se ka re thušago go fihlelela dipakane tša rena modirong wa go bolela ditaba tše dibotse?

 ¹⁸ Ka moka ga rena re neilwe modiro wa go bolela ditaba tše dibotse le go dira batho barutiwa. (Mat. 28:19, 20; Baroma 10:14) Na o ka rata go kaonefatša bokgoni bja gago modirong wo wa bohlokwa kudu? Ipeele dipakane tše itšego ge o dutše o ithuta le go diriša seo o ithutilego sona ka poroutšheng ya Go Bala le go Ruta. O ka hwetša ditšhišinyo tše dingwe tšeo o ka di dirišago ka pukwaneng ya Seboka sa Bophelo le Bodiredi bja Bokriste le dibidiong tša dipoledišano tša mohlala tšeo re di bogelago dibokeng tša gare ga beke. Leka mekgwa e fapafapanego gore o tsebe seo se tlago go šoma gakaone tšhemong ya gabo lena. Ge o diriša ditšhišinyo tše, o tlo kgona go kaonefatša bokgoni bja gago bja go ruta le go oketša lethabo la gago.—2 Tim. 4:5.

19. O ka dira’ng gore o be le dika tšeo di kgahlišago Modimo?

¹⁹ Ge o ipeela dipakane tša gago, o se ke wa lebala go ipeela pakane ya gore o be le dika tšeo di kgahlišago Modimo. (Bagal. 5:22, 23; Bakol. 3:12; 2 Pet. 1:5-8) O ka dira’ng gore o fihlelele pakane yeo? Ka mohlala, a re re o nyaka go ba le tumelo e tiilego. O ka bala dihlogo tšeo di lego ka dikgatišong tša rena tšeo di ka go thušago gore o be le tumelo e tiilego. Le gona o ka bogela dikarolo tšeo di lego go Kgašo ya JW tšeo di bontšhago kamoo bana babo rena le dikgaetšedi ba ilego ba bontšha tumelo e tiilego ge ba be ba lebeletšane le diteko tša go fapafapana. Ke moka o bone kamoo o ka ekišago tumelo ya bona.

20. Re ka dira’ng gore re oketše lethabo la rena le gore re se ke ra nyama kudu?

²⁰ Ga go pelaelo gore ka moka ga rena re duma eka re ka hlankela Jehofa go feta ka tsela yeo re mo hlankelago ka yona gona bjale. Lefaseng le lefsa re tlo kgona go mo hlankela ka tsela yeo re nyakago ka yona. Eupša ge re sa letile e bile re dira sohle seo re ka se kgonago dikabelong tša rena, re tlo oketša lethabo la rena gomme ra se sa nyama kudu. Sa bohlokwa le go feta re tlo dira gore Jehofa, yena ‘Modimo wa rena yo a thabilego’ a retwe le go tumišwa. (1 Tim. 1:11) Ka gona, a re thabišeng ke ditokelo tšeo re nago le tšona!