1. Josefa o ile a kopana le teko efe, gona o ile a arabela bjang?

 MORWA wa Jakobo e lego Josefa o ile a kopana le teko e boima. Mosadi yo mongwe o ile a re go yena, “robala le nna.” E be e le mosadi wa mong wa gagwe Potifaro. Josefa o ile a gana. Motho yo mongwe a ka ipotšiša gore ke ka baka la’ng Josefa a ile a gana? Potifaro o be a se gona, le gona Josefa e be e le lekgoba ka lapeng leo. Ge a be a ka gana, mosadi yoo o be a ka thatafiša bophelo bja gagwe. Eupša Josefa o ile a dula a gana ge mosadi yoo a mo phegelela gore a robale le yena. Ka baka la’ng? O itše: “Nka dira bjang bobe bjo bjo bogolo gakaakaa gomme ka direla Modimo sebe?”—Gen. 39:7-12.

2. Josefa o be a tseba bjang gore bohlotlolo ke sebe go Modimo?

² Josefa o be a tseba bjang gore bohlotlolo e be e le “sebe se segolo”? Molao wa Moshe wo o rego, “O se ke wa hlotlola” o be o tlo ba gona ka morago ga mengwaga e 200. (Ek. 20:14) Eupša Josefa o be a tseba Jehofa gabotse le gore o tlo ikwa bjang ge a ka dira bohlotlolo. Ka mohlala, Josefa o be a tseba gore Modimo o dirile gore lenyalo e be la monna o tee le mosadi o tee. Le gona a ka ba a ile a kwa ka makga a mabedi moo Jehofa a ilego a tsena ditaba gare gore makgolokhukhu wa gagwe Sara a dule a botegela monna wa gagwe le go šireletša lenyalo la bona. Le gona Jehofa o ile a tsena ditaba gare gore a šireletše lenyalo la mosadi wa Isaka e lego Rebeka. (Gen. 2:24; 12:14-20; 20:2-7; 26:6-11) Ge Josefa a dutše a nagana ka ditiragalo tše, o ile a lemoga gore  Jehofa o rata eng le gore ga a rate eng. Le gona ka ge Josefa a be a rata Jehofa o be a ikemišeditše go dira dilo tšeo Jehofa a bego a nyaka gore a di dire.

3. Re tlo ithuta ka’ng?

³ Ke therešo gore le wena o rata toko. Eupša ga se ra phethagala. Ge re ka se hlokomele, re ka lebelela toko ka tsela yeo lefase le e lebelelago ka yona. (Jes. 5:20; Baroma 12:2) A re boneng gore toko ke eng le gore re holega bjang ge re e rata. Re boneng le megato e meraro yeo e tlago go re thuša gore re rate melao ya Jehofa.

4. Batho ba bantši ba hlalosa bjang motho wa go ba le toko?

⁴ Ge batho ba nagana ka motho wa go ba le toko, ba ka ba ba nagana ka motho yo a ikgogomošago, yo a ratago go ahlola goba yo a iponago a le bohlokwa go feta batho ba bangwe. Eupša Jehofa ga a rate dika tše ka mo go feletšego. Ge Jesu a be a le mo lefaseng, o ile a kgalemela baetapele ba bodumedi kudu ka go ipeela melao ya bona ya toko. (Mmo. 7:16; Luka 16:15) Motho yo a lokilego ga a nagane gore o phala batho ba bangwe ka selo.

5. Go ya ka Beibele toko ke eng? Nea mehlala.

⁵ Toko ke seka se sebotse. Toko e no ra gore go dira dilo tšeo Jehofa a di bonago di lokile. Ka Beibeleng lentšu toko le ra gore go phela ka melao ya Jehofa. Ka mohlala, Jehofa o ile a botša batho bao ba rekišago gore ba diriše “seroto sa tekanyo e nepagetšego.” (Doit. 25:15) Lentšu la Segerika leo le fetoletšwego e le go “nepagala” le ka fetolelwa gape e le “go loka.” Le gona Mokriste yo a nyakago gore Modimo a mo lebelele a lokile, o tlo dula a botega ge a dirišana le ba bangwe ka tša kgwebo. Monna yo a lokilego o hloile go bona motho yo mongwe a sa swarwe gabotse. Le gona motho yo a nyakago go ‘kgahliša Jehofa ka mo go tletšego,’ o lebelela diphetho tšeo a di dirago.—Bakol. 1:10.

6. Ke ka baka la’ng re swanetše go tshepa melao ya Jehofa ya se se lokilego le se se sa lokago? (Jesaya 55:8, 9)

⁶ Beibele e hlalosa Jehofa e le mothopo wa toko. E mmitša gore ke “bodulo bja toko.” (Jer. 50:7) Ka ge Jehofa e le Mmopi wa rena, ke yena a swanelwago ke go re beela melao ya se se lokilego le se se sa lokago. Ka ge re sa phethagala, ga re tsebe seo se lokilego le seo se sa lokago. Eupša ka gobane Jehofa o phethagetše, ke yena a tsebago seo se lokilego le seo se sa lokago. (Die. 14:12; bala Jesaya 55:8, 9.) Ka ge re bopilwe ka seswantšho sa Modimo, re kgona go dira dilo tšeo a rego di lokile. (Gen. 1:27) Le gona re rata go di dira. Lerato leo re ratago Tatago rena wa legodimong ka lona le dira gore re nyake go mo ekiša ka mokgwa wo re ka kgonago.—Baef. 5:1

7. Ke ka baka la’ng re hloka melao yeo re swanetšego go e latela? Hlalosa.

⁷ Re a holega ge re latela melao ya Modimo ya se se lokilego le se se sa lokago. Ke ka baka la’ng re realo? Nagana gore go be go tlo direga eng ge nkabe ka pankeng e nngwe le e nngwe ba na le melao ya bona ya go kala tšhelete. Go be go ka se be le ditlamorago tše dibotse. Ge e ba dingaka le baoki ba ka se latele melao ya tša maphelo, balwetši ba bangwe ba ka feleletša ba hlokofetše. Ge batho ba bea melao yeo ba swanetšego go e latela, e tlo ba šireletša. Ka tsela e swanago, melao ya Modimo ya se se lokilego le se se sa lokago e a re šireletša.

8. Bao ba dirago se se lokilego ba tlo hwetša ditšhegofatšo dife?

 ⁸ Jehofa o šegofatša bao ba lekago go phela ka melao ya gagwe. O tshepiša gore: “Baloki bona e tla ba beng ba lefase, Ba tla dula mo go lona ka mo go sa felego.” (Ps. 37:29) Ge motho yo mongwe le yo mongwe a phela ka melao ya Jehofa, re tlo ba batee, ra ba le khutšo e bile ra thaba. Jehofa o nyaka gore o thabela bophelo ka tsela yeo. Ka moka ga rena re na le mabaka a mabotse a go rata seo Jehofa a rego se lokile! Re ka dira’ng gore re rate seka se kudu? A re boneng megato e meraro yeo re ka e dirišago.

9. Re tlo thušwa ke eng gore re rate toko?

⁹ Mogato 1: Rata Motho yo a re beelago melao. E le gore re rate toko re swanetše go thoma pele ka go rata Yo a re beetšego melao ya se se lokilego le se se sa lokago. Ge re dutše re rata Jehofa re tlo nyaka go phela ka melao ya gagwe ya go loka. Re ka nea mohlala ka Adama le Efa. Ge nkabe ba be ba rata Jehofa ba be ba ka se nyake go tshela melao ya gagwe.—Gen. 3:1-6, 16-19.

10. Aborahama o ile a dira’ng gore a kwešiše seo Jehofa a se naganago?

¹⁰ Ga re nyake go dira phošo yeo Adama le Efa ba e dirilego. Re ka phema go dira phošo yeo ka go ithuta ka Jehofa, go leboga dika tša gagwe le go leka go kwešiša ka tsela yeo a naganago ka yona. Ge re dira bjalo re tlo rata Jehofa kudu. Nagana ka Aborahama. O be a rata Jehofa kudu. Le ge a be a thatafalelwa ke go kwešiša diphetho tša Jehofa ga se a ka a tlogela go di latela. Go e na le moo o ile a leka go tseba Jehofa gakaone. Ka mohlala, ge Aborahama a be a ekwa gore Jehofa o tlo fediša Sodoma le Gomora, mathomong o be a tšhogile gore “Moahlodi wa lefase ka moka” o tlo fediša ba ba lokilego le ba ba sa lokago. Eupša Aborahama a ka be a be a tseba gore Jehofa a ka se dire selo sa mohuta woo, ke moka a thoma go mmotšiša dipotšišo. Jehofa o ile a mo araba a sa fele pelo. Mafelelong Aborahama o ile a bona gore Jehofa o hlahloba pelo ya motho yo mongwe le yo mongwe le gore a ka se otle bao ba se nago molato.—Gen. 18:20-32.

11. Aborahama o ile a bontšha bjang gore o rata Jehofa e bile o a mo tshepa?

¹¹ Aborahama o be a kgomilwe kudu ke poledišano ya gagwe le Jehofa ya go fediša motse wa Sodoma le Gomora. O ile a rata Jehofa e bile a mo hlompha go fetiša le mathomong. Eupša ka morago ga mengwaga, Jehofa o ile a leka Aborahama. O ile a mo kgopela gore a dire sehlabelo ka ngwana wa gagwe yo a mo ratago kudu e lego Isaka. Eupša ga bjale Aborahama o be a tshepa Jehofa kudu e bile ga se a mmotšiša dipotšišo. Nagana gore Aborahama o be a kwele bohloko kudu bjang ge a dutše a dira seo Jehofa a mo laetšego sona! Aborahama o swanetše go ba a ile a nagana kudu ka seo a ithutilego sona ka Jehofa. O be a dutše a tseba gore Jehofa a ka se dire selo seo se sa lokago. Go ya ka moapostola Paulo, Aborahama o be a tseba gore Jehofa a ka kgona go tsoša morwa wa gagwe Isaka bahung. (Baheb. 11:17-19) Le gona Jehofa o be a tshepišitše Aborahama gore Isaka e tla ba tatago ditšhaba. Eupša ka nako yeo Isaka o be a se na bana. Aborahama o be a rata Jehofa, o be a tshepa gore Jehofa o tlo dira se se lokilego. Tumelo ya Aborahama e ile ya  mo thuša go theetša le ge go be go se bonolo.—Gen. 22:1-12.

12. Re ka ekiša Aborahama bjang? (Psalme 73:28)

¹² Re ka ekiša Aborahama bjang? Go swana le Aborahama re swanetše go dula re ithuta ka Jehofa. Ge re dira bjalo re tlo mmatamela kudu ra ba ra mo rata kudu. (Bala Psalme 73:28.) Re tlo tlwaetša matswalo a rena go ekiša tsela yeo a naganago ka yona. (Baheb. 5:14) Ke moka ge motho yo mongwe a re leka gore re dire selo se sebe, re tlo gana. Re tlo gana go dira selo se sengwe le se sengwe seo se tlago go kweša Tatago rena wa legodimong bohloko le go senya segwera sa rena le yena. Ke’ng se sengwe seo re ka se dirago go bontšha gore re rata toko?

13. Re ka kaonefatša bjang seka sa toko? (Diema 15:9)

¹³ Mogato 2: Leka go kaonefatša go rata toko letšatši le lengwe le le lengwe. Ge e ba re nyaka gore mešifa ya rena e tie, re swanetše go šoma ka thata le go e šidulla letšatši le lengwe le le lengwe. Ka mo go swanago, re swanetše go šoma ka thata letšatši le lengwe le le lengwe go dira seo Jehofa a rego se lokile. Re ka kgona go dira se ka mehla. Jehofa o a re kwešiša e bile ga se a letela gore re dire dilo tšeo re ka palelwago ke go di dira. (Ps. 103:14) O re kgonthišetša gore o rata motho “yo a phegelelago go loka.” (Bala Diema 15:9.) Ge re nyaka go fihlelela se sengwe ka mokgatlong wa Jehofa re šoma ka thata gore re se fihlelele. Re dira se se swanago ge re nyaka go ba le seka sa toko. E bile Jehofa o tlo re thuša a sa fele pelo gore re kaonefatše seka se.—Ps. 84:5, 7.

14. “Sephemela sefega sa toko,” ke eng? Gona ke ka baka la’ng re se hloka?

¹⁴ Jehofa o dula a re gopotša ka lerato gore go dira se se lokilego ga go boima. (1 Joh. 5:3) Eupša go re šireletša letšatši le lengwe le le lengwe. Na o sa gopola ditlhamo tše di feletšego tša moya tšeo Paulo a ilego a bolela ka tšona? (Baef. 6:14-18) Ke eng seo se bego se šireletša pelo ya lešole? E be e le “sephemela sefega sa toko,” seo se bego se emela melao ya Jehofa ya go loka. Go swana  le ge sephemela sefega se šireletša pelo, le melao ya Jehofa ya go loka e šireletša pelo ya seswantšhetšo, e lego motho yo o lego yena ka gare. Ka gona go bohlokwa gore o kgonthišetše gore gare ga ditlhamo tša gago tša moya go na le sephemela sefega sa toko!—Die. 4:23.

15. O ka apara bjang “sephemela sefega sa toko”?

¹⁵ O ka apara bjang “sephemela sefega sa toko?” O ka se apara ka go nagana ka dilo tšeo Modimo a nyakago o di dira ge o dira diphetho letšatši le lengwe le le lengwe. Ge o dira phetho ya gore na o tlo bolela ka eng, o tlo theetša mmino wa mohuta ofe, ke boithabišo bofe bjo o bo bogelago, goba o bala dipuku dife, thoma ka go ipotšiša gore: ‘Na ke tsentšha eng ka pelong ya ka? Na ke dilo tšeo Jehofa a di amogelago? Goba na di kgothaletša boitshwaro bjo bo gobogilego, ntwa, megabaru goba go inaganela o nnoši e lego dilo tšeo Modimo a di hloilego?’ (Bafil. 4:8) Ge e ba o kgetha dilo tšeo Jehofa a di amogelago o tla be o šireletša pelo ya gago.

16-17. Jesaya 48:18 e re kgothaletša bjang gore re ka kgona go phela ka melao ya Jehofa yeo e lokilego letšatši le lengwe le le lengwe?

¹⁶ Na o fela o tshwenyega ka ge e ba o tlo kgona go phela ka melao ya Jehofa ya go loka letšatši le lengwe le le lengwe go ba ngwaga o mongwe le o mongwe? Nagana ka mohlala wo Jehofa a o dirišitšego woo o lego go Jesaya 48:18. (Bala.) Jehofa o re tshepiša gore go loka ga rena go ka swantšhwa le “maphoto a lewatle.” Nagana o le kgauswi le lewatle, o lebeletše maphoto ao a sa emego. Na o tlo tshwenyega ka ge e ba ka letšatši le lengwe maphoto ao a ka ema? Aowa! O a tseba gore maphoto ao a na le mengwaga e diketekete a le gona le gore a tla no tšwela pele a le gona.

¹⁷ Go loka ga gago go ka swana le le maphoto ao! Bjang? Ge e ba o swanelwa ke go dira phetho, thoma pele ka go nagana gore Jehofa o nyaka o dira eng, ke moka o dire seo a nyakago o se dira. Go sa šetšwe gore go tlo ba thata gakaakang, Jehofa o tlo dula a na le wena le go go nea matla a go go thuša go dira se se lokilego letšatši le lengwe le le lengwe.—Jes. 40:29-31.

18. Ke ka baka la’ng re se ra swanela go ahlola batho ba bangwe?

¹⁸ Mogato 3: Jehofa ke yena a swanelwago ke go ahlola. Ge re dutše re leka ka thata go phela ka melao ya Jehofa ya go loka, re swanetše go phema go ahlola batho le go ipona re le bohlokwa go feta ba bangwe. Ga re na tokelo ya go ahlola. Ga se ra swanela go nyatša batho ba bangwe ka baka la dilo tšeo ba di dirago. Re swanetše go dula re gopola gore Jehofa ke ’Moahlodi wa lefase ka moka.” (Gen. 18:25) Jehofa ga se a re nea tokelo ya go ahlola. Go e na le moo Jesu o ile a re laela gore: “Tlogelang go ahlola gore le se ahlolwe.”—Mat. 7:1. *

19. Josefa o ile a bontšha bjang gore o tshepa kahlolo ya Jehofa?

¹⁹ A re boleleng gape ka mohlala wa monna yo a lokilego e lego Josefa. O ile a phema go ahlola batho ba bangwe, le bao ba ilego ba mo swara gampe. Bana babo ba ile ba bolela ka yena gampe, ba mo rekiša gore e be lekgoba, ba ba ba botša tatagwe gore o hlokofetše. Ka morago ga nako Josefa o ile a kopana le lapa la gabo. Ka ge ka nako yeo  Josefa a be a na le matla, a ka ba a ile a swara bana babo gampe goba a itefeletša. Le ge bana babo Josefa ba be ba itsholela dilo tšeo ba di dirilego, ba be ba tšhoga gore a ka itefeletša. Eupša Josefa o ile a ba botša gore: “Le se ke la tšhoga. A le ra gore nka ipea maemong a Modimo?” (Gen. 37:18-20, 27, 28, 31-35; 50:15-21) Josefa o ile a ikokobetša gomme a tlogelela Jehofa gore e be yena a ahlolago.

20-21. Re ka dira’ng gore re se ke ra ipona re le kaone go feta batho ba bangwe?

²⁰ Go swana le Josefa, re tlogelela Jehofa gore e be yena a ahlolago. Ka mohlala, ga se ra swanela go naganela bana babo rena gore ke ka baka la’ng ba dira dilo tšeo ba di dirago. Ga re kgone go bala dipelo. Ke Jehofa feela a ‘lekolago meoya.’ (Die. 16:2) Re rata batho ka moka go sa šetšwe gore ba tšwa kae. Jehofa o re kgothaletša gore re “katološeng lerato leo le lego dipelong” tša rena. (2 Bakor. 6:13) Re rata bana babo rena le dikgaetšedi, ka gona ga re nyake go ba ahlola.

²¹ Se se ra gore ga se ra swanela go ahlola le bao ba sego ka phuthegong. (1 Tim. 2:3, 4) Na o ka ahlola motho wa geno yoo e sego Mokriste gore “a ka se tsoge a tlile therešong”? Aowa, se se tla be se bontšha gore re ipona re le bohlokwa go feta batho ba bangwe. Jehofa o sa neile “batho ka moka kae le kae” sebaka sa gore ba itshole. (Dit. 17:30) Dula o gopola gore go ipona o le kaone go feta batho ba bangwe ke go se loke.

22. Ke ka baka la’ng o ikemišeditše go rata toko?

²² Eka go rata ga rena melao ya Jehofa ya go loka go ka dira gore re thabe le gore re beele batho ba bangwe mohlala o mobotse, gore ba re rate le go rata Modimo kudu. Eka le ka mohla re ka se kgaotše go “swarwa ke tlala le lenyora la toko.” (Mat. 5:6) Kgodišega gore Jehofa o bona maiteko ao o a dirago e bile o thabišwa ke ge o leka ka thata go dira se se lokilego. Ge batho ba lefase le ba dutše ba dira dilo tše di sa lokago, wena dula o gopola gore “Jehofa o rata baloki.”—Ps. 146:8.