1. Ke ka baka la eng Jesu a ile a kgopela Jehofa gore a hlokomele balatedi ba gagwe?

 BOŠEGONG bja pele ga ge Jesu a ka hwa, o ile a kgopela Jehofa gore a šireletše balatedi ba gagwe. (Joh. 17:15, 20) Ke therešo gore Jehofa o be a dutše a hlokomela le go šireletša bahlanka ba gagwe. Eupša Jesu o be a tseba gore Sathane o be a tla tlaiša balatedi ba gagwe. Jesu o be a tseba le gore ba hloka thušo ya Jehofa gore ba kgone go fenya diteko tša Sathane.

2. Go ya ka Psalme 33:18-20, ke ka baka la’ng re sa swanela go boifa mathata ao a re welago?

² Lefase le leo le laolwago ke Sathane lehono le tlišetša Bakriste mathata a mantši. Re kopana le mathata ao a ka re nyamišago le ao a lekago tumelo ya rena go Jehofa. Eupša sehlogong se re tlo bona gore ga se ra swanela go boifa selo. Jehofa o bona diteko tšeo re kopanago le tšona e bile o dula a ikemišeditše go re thuša go lebeletšana le tšona. A re boneng mehlala e mebedi ya ka Beibeleng yeo e re bontšhago kamoo Jehofa a ‘lebeletšego bao ba mmoifago.’—Bala Psalme 33:18-20.

3. Ke neng mo re ka ikwago re le nnoši?

³ Le ge re le karolo ya lapa le legolo la bahlanka ba Jehofa, ka dinako tše dingwe re ka ikwa re le noši. Ka mohlala, bafsa ba ka ikwa ba le noši ge ba swanetše go hlalosetša bao ba tsenago le bona sekolo ka ditumelo tša bona goba ge ba hudugela phuthegong e mpsha. Ba bangwe ba rena re ka ikwa re nyamile e bile re ka ikwa eka re swanetše go kgotlelela maikwelo a bjalo re le noši. Re ka dikadika go botša batho kamoo re ikwago ka gona ka gobane re nagana gore ba ka se re kwešiše. Le gona ka dinako tše dingwe, re ka ipotšiša ge eba go na le motho yo a  nago le taba le rena. Go sa šetšwe gore ke ka baka la’ng re ikwa ka tsela yeo re ka fela matla. Jehofa ga a nyake re ikwa ka tsela yeo. Ke ka baka la’ng re realo?

4. Ke ka baka la’ng Eliya a ile a re ke yena moporofeta yo šetšego a nnoši?

⁴ Nagana ka mohlala wa monna yo a botegago e lego Eliya. O ile a tšhaba ka matšatši ao a fetago a 40 ka gobane Isebele o be a ile a re o tlo mmolaya. (1 Dikg. 19:1-9) Mafelelong ge a be a le noši ka leweng o ile a llela Jehofa a re: “Ke nna [moporofeta] yo a šetšego a nnoši.” (1 Dikg. 19:10) Go be go sa na le baporofeta ba bangwe nageng yeo. Ka mohlala, Obadia o ile a phološa baporofeta ba 100 go re Isebele a se ke a ba bolaya. (1 Dikg. 18:7, 13) Bjale ke ka baka la’ng Eliya a ile a ikwa a le noši? Na o be a nagana gore baporofeta bao Obadia a ilego a ba phološa ba be ba hwile ka moka? Na a ka ba a ile a ikwa a le noši ka gobane ga go na motho yo a ilego a nyaka go hlankela Jehofa le ge Jehofa a ile a ipontšha gore ke yena Modimo wa therešo a nnoši kua thabeng ya Karamele? Goba na o be a ikwa okare ga go na motho yo a tsebago gore manaba a gagwe a nyaka go mmolaya le gore ba be ba se na taba le yena? Pego ye ga e hlalose ka botlalo gore Eliya o be a ikwa bjang, eupša seo re se tsebago ke gore Jehofa o be a kwešiša gore ke ka baka la’ng Eliya a be a ikwa a le noši le gore o be a tseba gore o tla mo thuša bjang.

5. Jehofa o kgonthišeditše Eliya bjang gore ga a nnoši?

⁵ Jehofa o thušitše Eliya ka ditsela tše di fapafapanego. O mo kgothaleditše gore a bolele. O botšišitše Eliya gabedi gore: “O nyaka eng mo?” (1 Dikg. 19:9, 13) Ka mehla ge Eliya a be a ntšha seo se lego pelong ya gagwe, Jehofa o be a mo theetša. Jehofa o ile a araba Eliya ka go mmontšha gore o gona e bile ke yo matla. O ile a mo kgonthišetša gape gore go na le bahlankagotee ba bangwe ba bantši. (1 Dikg. 19:11, 12, 18) Ga go pelaelo gore Eliya o ile a ikwa a imologile ka morago ga gore a ntšhetše Jehofa seo se lego pelong ya gagwe le go bona ka tsela yeo Jehofa a mo thušitšego ka gona. Jehofa o ile a nea Eliya dikabelo tše mmalwa tše bohlokwa. O ile a mo kgetha gore a tlotše Hasaele gore e be kgoši ya Siria,  Jehu gore e be kgoši ya Isiraele le Elisha gore e be moporofeta. (1 Dikg. 19:15, 16) Jehofa o ile a mo nea dikabelo tše gore a dule a swaregile ka dilo tše bohlokwa. Modimo o ile a mo nea le mogwera wa kgauswi e lego Elisha. O ka hwetša thušo ya Jehofa bjang ge o ikwa o le noši?

6. O swanetše go rapela ka’ng ge o ikwa o le nnoši? (Psalme 62:8)

⁶ Jehofa o nyaka gore o mo rapele. O bona mathata ao o nago le ona e bile o go kgothaletša gore o tlo go theetša nako e nngwe le e nngwe ge o mo rapela. (1 Bathes. 5:17) O thabišwa ke go theetša bahlanka ba gagwe. (Die. 15:8) O swanetše go rapela ka’ng ge o ikwa o le noši? Tšhollela Jehofa seo se lego pelong ya gago go swana le Eliya. (Bala Psalme 62:8.) Mmotše dilo tšeo di go swenyago le gore o ikwa bjang. Mo kgopele gore a go thuše gore o tsebe seo o swanetšego go se dira ge o ikwa o le noši. Ka mohlala, ge o ikwa o le noši e bile o tšhogile ka ge o swanetše go botša bana bao o tsenago le bona sekolo ka ditumelo tša gago, kgopela Jehofa gore a go nee sebete gore o kgone go bolela. O ka mo kgopela le bohlale gore o kgone go ba araba. (Luka 21:14, 15) Ge eba o ikwa o nyamile kgopela Jehofa gore a go thuše gore o kgone go bolela le Mokriste yo a nago le phihlelo. O ka kgopela Jehofa gore a thuše motho yo gore a go theetše le go kwešiša kamoo o ikwago ka gona. Botša Jehofa dilo ka moka tšeo di lego pelong ya gago, bona kamoo a arabago dithapelo tša gago ka gona, o be o amogele thušo ya bana beno, ge o dira bjalo o ka se sa ikwa o le nnoši.

7. O ithutang mohlaleng wa Mauricio?

⁷ Jehofa o re neile mošomo o bohlokwa kudu wo re swanetšego go o dira. O ka kgodišega gore Jehofa o bona dilo ka moka tšeo o di dirago phuthegong le tšhemong e bile o di tšea di le bohlokwa kudu. (Ps. 110:3) Eupša na seo se ka go thuša bjang gore o se ke wa ikwa o le nnoši? Nagana ka mohlala wa ngwanabo rena wa mofsa yo a bitšwago Mauricio. * Nakonyana ka morago ga gore Mauricio a kolobetšwe, yo mongwe wa bagwera ba gagwe ba bagolo o ile a tlogela ditherešo. Mauricio o re: “Ge ke be ke mmona a tlogela ditherešo seo se ile sa mphetša matla. Ke be ke dula ke ipotšiša ge e ba ke tla kgona go phethagatša keno ya ka ya go hlankela Jehofa le go dula ke le karolo ya lapa la gagwe. Ke be ke dula ke ikwa ke le nnoši e bile ke nagana gore a go na motho yo a ka kwešišago kamoo ke ikwago ka gona.” Mauricio o thušitšwe ke eng? O re: “Ke ile ka thoma go ya tšhemong gantši. Se se ile sa nthuša gore ke tlogele go nagana ka nna le kamoo ke bego ke ikwa ka gona. Ke be ke ikwa ke thabile e bile ke se noši ge ke šoma le batho ba  bangwe tšhemong.” Ke therešo gore le ge re sa kgone go ya ka ntlo le ntlo le go bonana le bana babo rena eupša re kgona go bolela ditaba tše dibotse ka go ngwala mangwalo le go diriša di founo. Mauricio o ile a thušwa ke eng gape? O oketša ka gore: “Ke be ke dira le mešomo ye mengwe ka phuthegong. Ke ile ka šoma ka thata gore ke lokišetše le go nea dipolelo dibokeng. Dikabelo tše di nthušitše gore ke ikwe ke le bohlokwa go Jehofa le go batho ba bangwe.”

8. Mathata ao a re welago a ka dira gore re ikwe bjang?

⁸ Re letetše go kopana le mathata mehleng ya bofelo. (2 Tim. 3:1) Mathata ao a ka re wela re sa itebetše. Re ka lebeletšana le mathata a ikonomi, bolwetše bjo šoro goba lehu la motho yo re mo ratago. Dinakong tše bjalo re ka ikwa re imetšwe kudu ge eba mathata ao a e tla ka nako e tee. Eupša gopola gore Jehofa o re lebeletše e bile a ka re thuša gore re kgone go kgotlelela mathata a.

9. Hlalosa mathata ao a ilego a wela Jobo.

⁹ Nagana kamoo Jehofa ilego a thuša mohlanka yo a botegago e lego Jobo. O ile a kopana le mathata a mantši ka nakonyana. Ka tšatši le tee feela, Jobo o ile a begelwa gore diphoofolo tša gagwe ka moka di hwile le gore bahlanka ba gagwe le bana ba gagwe ba hwile. (Jobo 1:13-19) Ge a sa dutše a llela dilo tšeo di mo lahlegetšego, o ile a swarwa ke bolwetši bjo šoro. (Jobo 2:7) Boemo bja gagwe e be e le bjo bobe kudu moo a ilego a re: “Ke ganne bophelo; nka se phele go iša mehleng ya neng le neng.”—Jobo 7:16.

10. Jehofa o dirile eng gore Jobo a kgone go kgotlelela mathata a gagwe? (Bona seswantšho sa letlakala la ka ntle.)

¹⁰ Jehofa o be a lebeletše Jobo. Ka ge Jehofa a be a rata Jobo o ile a mo nea dilo tšeo a di hlokago gore a kgone go kgotlelela mathata a gagwe le gore a dule a botega. Jehofa o ile a bolela le Jobo gomme a mo gopotša ka bohlale bja gagwe bjo bo sa lekanywego le bja batho le kamoo a ratago dibopiwa tša gagwe ka gona. O ile a bolela ka diphoofolo tše dintši tšeo di makatšago. (Jobo 38:1, 2; 39:9, 13, 19, 27; 40:15; 41:1, 2) Jehofa o ile a diriša le mohlanka wa gagwe yo a botegago wa mofsa e lego Elihu gore a matlafatše le go homotša Jobo. Elihu o ile a kgonthišetša Jobo gore Jehofa o putsa bahlanka ba gagwe bao ba kgotlelelago. Jehofa o ile a dira le gore Elihu a nee Jobo keletšo e lerato. Elihu o ile a thuša Jobo gore a se ke a nagana ka yena a nnoši ka go mo gopotša gore re ba banyenyane kudu ge re bapetšwa le Jehofa Mmopi wa lefase ka moka. (Jobo 37:14) Jehofa gape o ile a nea Jobo kabelo gore a rapelele bagwera ba gagwe ba bararo bao ba bego ba dirile dibe. (Jobo 42:8-10) Lehono Jehofa o re thekga bjang ge re kopana le mathata a mantši?

11. Beibele e re homotša bjang ge re kopana le mathata?

¹¹ Lehono Modimo ga a bolele le rena ka go lebanya go swana le ge a ile a bolela le Jobo, eupša o diriša Lentšu la gagwe Beibele. (Baroma 15:4) O re homotša ka go re nea kholofelo ya bokamoso. A re boneng dilo tše mmalwa tšeo di tšwago ka Beibeleng tšeo di ka re homotšago ge re kopana le mathata. Ka Beibeleng Jehofa o re kgothaletša gore a go na dilo le ge e le dife go akaretša le mathata a magolo tšeo “di tlago go re aroganya le lerato la gagwe.” (Baroma 8:38, 39) Le gona o re kgothaletša gore “o kgauswi le bohle bao ba mmitšago ka thapelo.” (Ps. 145:18) Jehofa o re botša gore ge eba re ithekga ka yena re tlo kgona go kgotlelela mathata le ge e le afe e bile ra thaba. (1 Bakor. 10:13; Jak. 1:2, 12) Lentšu la Modimo le re gopotša gape gore  mathata a rena ke a nakwana ge a bapetšwa le bophelo bjo bo sa felego bjo Modimo a re tshepišitšego bjona. (2 Bakor. 4:16-18) Jehofa o re nea kholofelo ya gore o tlo tloša mediro ka moka ya Sathane le bao ba mo thekgago. (Ps. 37:10) Na o tseba mangwalo a ka Beibeleng ao a tlago go go thuša go kgotlelela mathata ao a sa tlago?

12. Jehofa o nyaka gore re dire’ng gore lentšu la gagwe le re hole?

¹² Jehofa o nyaka re beela nako ka thoko ya go ithuta Beibele le go naganišiša ka seo re se balago. Ge e ba re diriša dilo tšeo re di badilego tumelo ya rena e tlo tia gomme ra ba bagwera ba Tatago rena wa legodimong. Gomme se sa dira gore re kgone go kgotlelela mathata. Jehofa o re nea moya wa gagwe o mokgethwa ge re ithekga ka Lentšu la gagwe Beibele. Le gona moya o mokgethwa o ka re “nea matla a fetago a tlwaelegilego” gore re kgotlelele mathata le ge e le a fe.—2 Bakor. 4:7-10.

13. Dijo tša moya tšeo Jehofa a re neago tšona a diriša “mohlanka yo a botegago le wa temogo” di re thuša bjang gore re kgone go kgotlelela mathata?

¹³ Ka thušo ya Jehofa, mohlanka yo a botegago le wa temogo o tšweletša dikgatišo, dibidio le mmino wo o re thušago go tiiša tumelo ya rena le gore re dule re le kgauswi le Jehofa. (Mat. 24:45) Re swanetše go diriša gabotse dilo ka moka tšeo Jehofa a re neago tšona. Kgaetšedi yo a tšwago United States o re o thabišwa ke dilo ka moka tšeo a di newago ke mohlanka yo a botegago le wa temogo. O re: “Ke na le mengwaga e fetago e 40 ke hlankela Jehofa le gona potego ya ka e be e dutše e lekwa.” O ile a kopana le mathata a mantši. Rakgolo’agwe o ile a bolawa ke motho yo a bego a otlela a tagilwe, batswadi ba gagwe ba ile ba lwala kudu gomme ba hwa, gomme yena a swarwa ke bolwetši bja kankere gabedi. O thušitšwe ke eng go kgotlelela? O hlalosa gore: “Jehofa o be a dula a nhlokomela ka mehla. Dijo tša moya tšeo a bego a nnea tšona a diriša mohlanka yo a botegago le wa temogo di nthušitše gore ke kgotlelele. Ga bjale ke ikwa go swana le Jobo yo a ilego a re: ‘Nka se lahle potego ya ka!’”—Jobo 27:5.

14. Jehofa o diriša bjang bana babo rena le dikgaetšedi go re thuša ge re na le mathata? (1 Bathesalonika 4:9)

¹⁴ Jehofa o tlwaeditše bahlanka ba gagwe gore ba ratane le go homotšana ge ba na le mathata. (2 Bakor. 1:3, 4; bala 1 Bathesalonika 4:9.) Go swana le Elihu bana babo rena le dikgaetšedi ba ikemišeditše go re thuša go dula re botega ge re kopana le mathata. (Dit.  14:22) Ka mohlala bona kamoo phuthego yeo Diane a kopanelago go yona e ilego ya mo kgothatša le go mo thuša gore a dule a le kgauswi le Jehofa ka nako yeo monna wa gagwe a bego a lwala kudu. O re: “Go be go le boima. Eupša re ile ra bona lerato la Jehofa ka dinako tšeo tše thata. Phuthego e ile ya dira dilo še dintši go re thuša. Ge bana babo rena ba be ba re etela, ba re founela le go re gokarela, seo se ile sa re thuša gore re kgotlelele. Ka ge ke be ke se na koloi bana babo rena le dikgaetšedi ba be ba kgonthišetša gore ke ba gona dibokeng le tšhemong.” Re a thaba ka gobane re na le bana babo rena le dikgaetšedi ka phuthgong bao ba re ratago kudu!

15. Re kgodišwa ke’ng gore re ka kgona go lebeletšana le mathata?

¹⁵ Ka moka ga rena re tlo lebeletšana le mathata. Eupša ka ge re bone, re ka se tsoge re lebeletšane le mathata ao re le nnoši. Go swana le Tate yo lerato, Jehofa o dula a re lebeletše. O kgauswi le rena e bile o dula a ikemišeditše go re thuša le go re thekga. (Jes. 43:2) Re kgodišegile gore re ka kgona go lebeletšana le mohuta le ge e le ofe wa mathata ka gobane Jehofa o re file dilo ka moka tšeo re di hlokago go re thuša go kgotlelela. O re neile mpho ya thapelo, Beibele, dijo tša moya le bana babo rena le dikgaetšedi bao ba re thušago ge re na le mathata.

16. Re ka dira’ng gore Jehofa a dule a re hlokometše?

¹⁶ Re thabišwa kudu ke go bona Tatago rena wa legodimong a re hlokomela! “Dipelo tša rena di a mo thabela.” (Ps. 33:21) Re ka bontšha gore re leboga kamoo go feletšego lerato la Jehofa ka go diriša dilo ka moka tšeo a re neilego tšona go re thuša. Le rena re swanetše go dira se sengwe gore Jehofa a dule a re hlokometše. Ka mantšu a mangwe ge re dira sohle seo re se kgonago go kwa Jehofa le go dira dilo tšeo di mo thabišago o tlo dula a re hlokometše!—1 Pet. 3:12.