1. Re holega bjang ge re boledišana ka gore go tlile bjang gore re be ba bangwe ba Dihlatse tša Jehofa?

 “O TSEBILE bjang therešo?” Ke nnete gore ke kgale o araba potšišo ye. Ke potšišo ya mathomo yeo re ka e botšišago ngwanabo rena goba kgaetšedi ge re nyaka go mo tseba gakaone. Re rata go kwa kamoo bana babo rena le dikgaetšedi ba ithutilego ka Jehofa le go mo rata. E bile re thabišwa ke go kwa gore ke ka baka la’ng re rata goba ba bangwe ba Dihlatse tša Jehofa. (Baroma 1:11) Dipoledišano tše di re thuša go dula re nagana gore go bohlokwa go tseba therešo. Re dula re ikemišeditše go sepela therešong ka gobane go dira ka tsela yeo go tlo dira gore Jehofa a re amogele e bile a re šegofatše.—3 Joh. 4.

2. Re tlo ithuta ka’ng sehlogong se?

² Sehlogong se re tlo bona a mangwe a mabaka ao a dirago gore re rate therešo. Le gona re tlo bona gore re ka dira’ng go tšwela pele re rata mpho ye e bohlokwa. Ga go pelaelo gore ge re ka dira bjalo re tlo leboga Jehofa kudu ka gobane o re gogetše therešong. (Joh. 6:44) Re tlo nyaka le go ruta batho ba bangwe ka Beibele gore le bona ba rate therešo.

3. Lebaka le legolo la gore re rate therešo ke lefe?

³ Ke ka baka la’ng re rata therešo. Re na le mabaka a mantši a gore re e rate. Eupša lebaka le legolo ke gore re rata  Jehofa Modimo e lego mothopo wa therešo. Ka Lentšung la gagwe e lego Beibele ga re mo tsebe feela e le Mohlodi wa legodimo le lefase, eupša re mo tseba e le Tatago rena wa legodimong yo a nago le lerato e bile a re hlokomela. (1 Pet. 5:7) Re a tseba gore Modimo wa rena ke “yo a gaugelago le yo a šokelago, yo a diegago go galefa, yo a tletšego botho le therešo.” (Ek. 34:6) O rata toka. (Jes. 61:8) O kwa bohloko ge a bona re tlaišega. E bile o tlo fediša ditlaišego ka moka ka nako yeo a e beilego. (Jer. 29:11) Le rena re fela pelo ya go tlo phela nakong yeo! Le ke le lengwe la mabaka ao a dirago gore re rate Jehofa!

4-5. Ke ka baka la’ng moapostola Paulo a ile a swantšha kholofelo ya rena le tshetledi?

⁴ Lebaka le lengwe la gore re rate therešo ke lefe? Go tseba therešo go re hola kudu. Nagana ka mohlala wo. Tše dingwe tša dilo tšeo re ithutago tšona ka Beibeleng, ke go ba le kholofelo ka bokamoso. Moapostola Paulo o ile a bolela ka kholofelo ye ge a be a ngwala gore: “Re na le kholofelo ye e le bjalo ka tshetledi ya sekepe ya maphelo a rena, e kgonthišeditšwego le e tiilego.” (Baheb. 6:19) Go no swana le ge tshetledi e thekga sekepe gore se se ke sa gogolega nakong ya ledimo, kholofelo ya Beibele le yona e a re tiiša nakong ya mathata.

⁵ Lengwalong le Paulo o be a bolela ka kholofelo ya legodimong ya Bakriste ba tloditšwego. Mantšu a Paulo a be a sa bolele ka Bakriste ba tloditšwego feela, eupša a be a akaretša le Bakriste bao ba nago le kholofelo ya go tlo phela mo lefaseng. (Joh. 3:16) Ke therešo gore ge re ithuta ka kholofelo ya bophelo bjo bo sa felego re tlo tseba gore re phelela eng.

6-7. Go ithuta therešo ka bokamoso go hotše Yvonne bjang?

⁶ Nagana ka mohlala wa kgaetšedi yo a bitšwago Yvonne. Ga se a golela ka phuthegong le gona ge e be e sa le yo monyenyane o be a tšhaba lehu. O gopola ge a be a bala ka polelwana yeo a ka se kego a e lebala yeo e rego: “Ka letšatši le lengwe re tla be re se sa le gona mo lefaseng.” O be a ipotšiša gore ke ka baka la’ng a phela mengwaga e menyenyane ke moka a hwa. Le ge a be a sa kwešiše gore ke ka baka la’ng a phela, eupša o be a sa nyake go hwa.

⁷ Ka morago ge Yvonne e be e le mofsa o ile a kopana le Dihlatse tša Jehofa. O re: “Ke ile ka thoma go dumela gore ke tlo phela ka mo go sa felego paradeiseng mo lefaseng.” Go ithuta therešo go thušitše bjang kgaetšedi Yvonne? O oketša ka gore: “Ga ke sa tshwenyega ka bokamoso e bile ga ke sa tšhaba lehu.” Ga bjale Yvonne o rata therešo e bile o thabela go botša ba bangwe kholofelo yeo a nago le yona.—1 Tim. 4:16.

8-9. (a) Papišong ya Jesu, monna yo mongwe o ile a bona letlotlo leo a le hweditšego le le bohlokwa ga kaakang? (b) Therešo e bohlokwa ga kaakang go wena?

⁸ Se sengwe seo re ithutago sona ka Beibeleng ke Mmušo wa Modimo. Jesu o ile a swantšha go tseba therešo le letlotlo le bohlokwa. Go Mateo 13:44, Jesu o itše: “Mmušo wa magodimo o swana le letlotlo le le utilwego tšhemong, leo motho a le hweditšego a le uta gape, ka baka la go thaba ga gagwe a ya a rekiša dilo tšeo a nago le tšona a reka tšhemo yeo.” Hlokomela gore monna yo o be a se a tšwa lesolo la go tsoma letlotlo leo. Eupša o ile a re go le hwetša a rekiša dilo tše dintši gore a reke tšhemo yeo le lego go yona. Ka baka la’ng. Ka gobane o be a tseba gore letlotlo leo le bohlokwa kudu. Le  be le le bohlokwa kudu go feta dilo ka moka tšeo a bego a na le tšona.

⁹ Ga go pelaelo gore le wena o ikwa ka tsela ye ka therešo! Re a tseba gore ga go selo se bohlokwa seo se fetago lethabo leo re nago le lona la go hlankela Jehofa, le go tseba gore o tlo re fa bophelo bjo bo sa felego ka tlase ga Mmušo wa gagwe. Segwera sa rena le Jehofa se bohlokwa kudu e bile re dula re šoma ka thata gore re se šireletše. Ga go selo seo se re thabišago go feta gore re “mo kgahliše ka mo go tletšego.”—Bakol. 1:10.

10-11. Michael o ile a thušwa ke eng gore a fetoše tsela yeo a bego a phela ka yona?

¹⁰ Ba bantši ba rena re ile ra tlogela dilo tše dintši gore Jehofa a re amogele. Ba bangwe ba tlogetše mešomo ya boiphedišo ya maemo a godimo, mola ba bangwe ba tlogetše go leka go huma gore ba ithute ka Jehofa le go fetoša maphelo a bona. Michael o ile a dira se se swanago. Ga se a gola a tseba ditherešo. Ge e be e sale mofsa o ile a ithuta go bapala karate. O re: “Ke be ke ikgantšha ka tsela yeo ke tlwaeditšego mmele wa ka. E bile ka dinako tše dingwe ke be ke ikwa o ka re ga go na motho yo a ka mphenyago.” Eupša ge Michael a be a thoma go ithuta Beibele o ile a bona kamoo Jehofa a ikwago ka gona ka bošoro. (Ps. 11:5) Ge Michael a bolela ka banyalani bao ba mo rutilego Beibele o re: “Ga go na letšatši leo ba ilego ba mpotša gore ke tlogele go bapala karate, seo ba se dirilego ke go tšwela pele ba nthuta ditherešo tša Beibele.”

¹¹ Ge Michael a be a tšwela pele a ithuta ka Jehofa, o ile a mo rata kudu. O ile a kgongwa kudu ke gore Jehofa o kwela bahlanka ba gagwe bohloko. Ge nako e dutše e eya, Michael o ile a lemoga gore o swanetše go dira diphetogo bophelong bja gagwe. O re: “Ke be ke tseba gore go tlogela karate go be go tlo ba thata kudu eupša ke be ke tseba gore ge nka e tlogela ke tlo thabiša Jehofa. Ke be ke kgodišegile gore go mo hlankela go phala dilo ka moka tšeo ke bego ke di dira.” Michael o be a tseba gore o swanetše go dira diphetogo tše dikgolo bophelong bja gagwe ka gobane seo a ithutilego sona ka Beibeleng se bohlokwa kudu.—Jak. 1:25.

12-13. Therešo ya Beibele e thušitše Mayli bjang?

¹² Beibele e bontšha bohlokwa bja therešo ka go e swantšha le lebone leo le bonegelago leswiswing. (Ps. 119:105; Baef. 5:8) Mayli yo a tšwago Azerbaijan, o leboga kudu ka therešo yeo a e hweditšego ka Lentšung la Modimo. O goletše ka lapeng leo le nago le madumedi a mantši. Tatagwe e be e le mo-Muslim, mmagwe yena a le bodumeding bja se-Juda. O re: “Le ge ke be ke sa belaele gore Modimo o gona eupša ke be ke na le dipotšišo tše dintši. ‘Ke be ke ipotšiša gore ke ka baka la’ng Modimo a bopile batho le gore ke ka baka la’ng a ba tlogela ba tlaišega mo lefaseng ke moka ka morago ba fišwa diheleng. Ka ge batho ba bantši ba re dilo tšeo di diregago ke thato ya Modimo ke ile ka ipotšiša gore, na Modimo o kgahlwa ke go laola batho le go ba bona ba tlaišega?’”

¹³ Mayli o ile a tšwela pele a nyaka dikarabo tša dipotšišo tša gagwe. Ge nako e dutše e eya, o ile a dumela go ithuta Beibele gomme ka morago a ba yo mongwe wa Dihlatse tša Jehofa. O re: “Dikarabo tšeo ke di hweditšego ka Beibeleng di fetošitše bophelo bja ka le go dira gore ke thabe. Tsela yeo Beibele e hlalosago ditaba ka yona e dira  gore ke ikwe ke na le khutšo. Go swana le Mayli, ka moka ga rena re tumiša Jehofa “yo a [re] biditšego leswiswing gomme a [re] biletša seetšeng sa gagwe se se makatšago.”—1 Pet. 2:9.

14. Re ka dira’ng gore re rate therešo ka mo go tseneletšego? (Bona lepokisi leo le rego “ dilo tše dingwe tšeo re ka bapetšago ditherešo tša Beibele le tšona.”)

¹⁴ Ye e no ba e mengwe ya mehlala yeo e bontšhago gore batho ba bona therešo e le bohlokwa ga kaakang. O ka nagana le ka mehlala e mengwe e mentši. O ka hwetša mabaka a mangwe a go rata therešo ka go dira thuto ya motho ka noši. Ge re dula re rata therešo, re tlo hwetša ditsela tša go bontšha ba bangwe gore re a e rata.

15. Tsela e nngwe yeo re ka bontšhago gore re rata therešo ke efe?

¹⁵ Re ka bontšha gore re rata therešo ka go ithuta Beibele ka mehla le go ithuta dikgatišo tšeo di theilwego ka Beibeleng. Le ge e le kgale re tseba therešo, eupša re sa na le mo gontši mo re ka ithutago gona. Kgatišo ya mathomothomo ya makasine wo e re: “Go swana le letšobana leo le golago ka gare ga  mefoka lešokeng, therešo le yona e ka gare ga maaka ao a lego kgauswi le go e bipa. Gore o hwetše letšobana leo, o swanetše go ntšha mahlo dinameng. . . . Ge o le hweditše, o swanetše go inama gore o le kge. O se ke wa fo kgotsofatšwa ke gore o kgele letšobana letee. . . . Dula o tsoma a mangwe.” Ga go bonolo go ithuta, eupša re a holega ge re ithuta.

16. Ke mokgwa ofe wa go ithuta Beibele wo o o dirišago e bile o bonago o šoma? (Diema 2:4-6)

¹⁶ Ga se ka moka ga rena bao re ratago go bala le go ithuta. Eupša Jehofa o re laletša gore re tšwele pele re “tsoma bohlale” e le gore re kgone go kwešiša ditherešo gakaone. (Bala Diema 2:4-6.) Re dula re holega ge re dira maiteko a. Corey o re ge a bala Beibele o bala temana e tee. O bolela gore: “Ke bala mongwalo o mongwe le o mongwe wa tlase, ka bala mangwalo ka moka ao a sepedišanago le temana yeo ke e balago ka ba ka dira nyakišišo e nngwe. Go bala ka tsela ye go dira gore ke ithute dilo tše dintši!” Le ge ba bangwe ba rena re sa ithute ka tsela ye, eupša re bontšha gore re tšeela therešo godimo ge re tšwela pele re ithuta.—Ps. 1:1-3.

17. Go diriša dilo tšeo re ithutilego tšona go ra go re’ng? (Jakobo 1:25)

¹⁷ Ka moka re a tseba gore go ithuta go no re hola ga nyenyane feela. E le gore re holege kudu re swanetše go diriša dilo tšeo re ithutago tšona maphelong a rena. Re tlo thaba kudu ge feela re dira seo. (Bala Jakobo 1:25.) Re ka dira’ng gore re bone ge e ba re phela go ya le kamoo Beibele e re laelago? Ngwanabo rena yo mongwe o re re ka hlahloba maphelo a rena go bona ge e ba re diriša dilo tšeo re ithutilego tšona, goba go bona ge e ba re sa hloka go kaonefatša. Moapostola Paulo o itše: “Go fihla moo re šetšego re tšwetše pele, anke re tšweleng pele re sepela ka thulaganyo ka yona tsela yeo.”—Bafil. 3:16.

18. Ke ka baka la’ng re šoma ka thata gore re’ tšwele pele re sepela therešong?’

¹⁸ Nagana kamoo re holegago ka gona ge re šoma ka thata gore re ‘tšwele pele re sepela therešong!’ Ga re no thaba feela, eupša re thabiša Jehofa le Bakristegotee le rena. (Die. 27:11; 3 Joh. 4) A ke mabaka a mabotse a go rata therešo le go diriša dilo tšeo re ithutago tšona.