SEHLOGO SE ITHUTWAGO 34
KOPELO 107 Mohlala wa Modimo wa Lerato
Bagolo ba ka Bontšha Bjang Gore ba Rata Batho Bao ba Dirilego Dibe tše Dikgolo le go ba Gaugela?
“Modimo ka botho bja gagwe o leka go go iša boitsholong.”—BAROMA 2:4.
SEO RE TLAGO GO ITHUTA SONA
Sehlogong se re tlo ithuta gore bagolo ba ka dira’ng go thuša Bakriste bao ba dirilego dibe tše dikgolo.
1. Go ka direga’ng ka morago ga gore motho a dire sebe se segolo?
SEHLOGONG seo se fetilego, re ithutile gore moapostola Paulo o ile a botša bagolo gore ba dire eng nakong ya ge monna yo mongwe a be a dirile sebe se segolo phuthegong ya kua Korinthe. Monna yoo o ile a se itshole gomme a tlošwa ka phuthegong. Eupša lengwalo la sehlogo se le bontšha gore batho bao ba dirilego dibe tše dikgolo ba ka kgona go thušwa. Ba ka thušwa gore ba itshole. (Baroma 2:4) Bagolo ba ka thuša bjang batho bao ba dirilego dibe tše dikgolo gore ba itshole?
2-3. Re swanetše go dira’ng ge re tseba gore Mokristegotee le rena o dirile sebe se segolo, gona ka baka la’ng?
2 Bagolo ba swanetše go tseba gore motho yo a itšego o dirile sebe se segolo pele ba ka mo thuša. Re swanetše go dira eng ge re ka tseba gore Mokristegotee le rena o dirile sebe se segolo, e lego selo seo se ka dirago gore a feleletše a tlošitšwe ka phuthegong? Re swanetše go mo kgothaletša go kgopela bagolo gore ba mo thuše.—Jes. 1:18; Dit. 20:28; 1 Pet. 5:2.
3 Bjale, re swanetše go dira eng ge eba motho yoo a gana go kgopela thušo go bagolo? Rena re ka ya go bagolo gomme ra ba botša ka taba yeo gore motho yoo a hwetše thušo yeo a e hlokago. Ge re dira bjalo, re tla be re bontšha gore re rata motho yoo ka gobane re a tseba gore bagolo ba tla mo thuša. Ge motho a ka tšwela pele a dira sebe, o tlo senya segwera sa gagwe le Jehofa. E bile a ka senya le leina la phuthego. Ka gona, ge re botša bagolo ka taba yeo, re bontšha gore re rata Jehofa le motho yoo.—Ps. 27:14.
BAGOLO BA THUŠA BJANG BAKRISTE BAO BA DIRILEGO SEBE SE SEGOLO?
4. Morero wa bagolo ke’ng ge ba kopana le motho yo a dirilego sebe se segolo?
4 Ge motho yo mongwe ka phuthegong a dira sebe se segolo, bagolo ba tlo kgetha banna ba bararo gare ga bona bao ba tlago go hlankela komiting. a Bana babo rena bao, ba swanetše go ba le boikokobetšo. Le ge ba leka go thuša motho yo a dirilego sebe se segolo gore a itshole, ba lemoga gore ba ka se gapeletše motho gore a fetoge. (Doit. 30:19) Bagolo ba a tseba gore ga se batho ka moka bao ba ka itsholago go swana le Kgoši Dafida. (2 Sam. 12:13) Ba bangwe ba ka no kgetha go se kwe keletšo yeo Jehofa a ba neago yona. (Gen. 4:6-8) Lega go le bjalo, morero o mogolo wa bagolo ke go thuša motho yo a dirilego sebe gore a itshole. Ke melao efe ya motheo yeo e ka thušago bagolo ge ba leka go thuša motho yo a dirilego sebe se segolo?
5. Ke keletšo efe yeo bagolo ba swanetšego go e gopola ge ba kopana le motho yo a dirilego sebe se segolo? (2 Timotheo 2:24-26) (Bona le seswantšho.)
5 Le ge motho a dirile sebe se segolo, bagolo ba sa mo lebelela a le bohlokwa go Jehofa. Motho yoo o no swana le nku yeo e timetšego. (Luka 15:4, 6) Ka gona, ge bagolo ba kopana le motho yoo, ga ba mo tšeatšee goba go mo swara makgwakgwa, le gona ga ba no nyaka go mo sekiša eupša ba nyaka go mo thuša. Ba bontšha dika tšeo di lego go 2 Timotheo 2:24-26. (Bala.) Bagolo ba dula ba le boleta e bile ba le botho ge ba leka go thuša motho yo a dirilego sebe se segolo gore a fetoge.
Go swana le badiši ba kgale, bagolo ba šoma ka thata gore ba thuše dinku tšeo di timetšego (Bona serapa 5)
6. Bagolo ba itokiša bjang pele ba kopana le motho yo a dirilego sebe se segolo? (Baroma 2:4)
6 Bagolo ba thoma pele ka go nyaka tlhahlo ya Jehofa. Ba leka go ekiša Jehofa ge ba thuša motho yo a dirilego sebe se segolo, ba gopola mantšu a Paulo ao a rego: “Modimo ka botho bja gagwe o leka go go iša boitsholong.” (Bala Baroma 2:4.) Bagolo ba swanetše go gopola gore ke badiši bao ba hlahlwago ke Kriste. (Jes. 11:3, 4; Mat. 18:18-20) Pele bagolo ba kopana le motho yo a dirilego sebe se segolo, ba swanetše go rapela Jehofa gore a ba thuše go gopola gore morero o mogolo wa go kopana le motho yoo, ke go leka go mo thuša gore a itshole. Ba swanetše go dira nyakišišo ka Beibeleng le ka dikgatišong tša rena, ba be ba rapele Jehofa gore a ba thuše go kwešiša ditaba gabotse. Ba swanetše go tseba motho yoo gabotse le go leka go kwešiša gore ke’ng seo se ka bago se dirile gore a dire sebe se segolo.—Die. 20:5.
7-8. Bagolo ba ka ekiša bjang Jehofa ka go se fele pelo ge ba kopana le motho yo a dirilego sebe se segolo?
7 Bagolo ba ekiša Jehofa ka go se fele pelo. Ba gopola kamoo Jehofa a ilego a leka go thuša batho bao ba ilego ba dira diphošo nakong e fetilego. Ka mohlala, Jehofa o ile a se fele pelo ge a be a leka go thuša Kaine, a mo lemoša gore go tla direga’ng ka yena ge a ka se fetoge a ba a mmotša gore o tla mo šegofatša ge eba a ka fetoga. (Gen. 4:6, 7) Jehofa o ile a diriša moporofeta Nathane go eletša Dafida, gomme Nathane o ile a diriša papišo yeo e ilego ya dira gore Dafida a fetoge. (2 Sam. 12:1-7) Le gona, Jehofa o ile a “dulela” go romela baporofeta “letšatši le letšatši” go Baisiraele bao ba bego ba sa kwe. (Jer. 7:24, 25) Jehofa o be a sa emele batho ba gagwe ba itshola pele, ya ba gona a ba thuša ka morago. Eupša o be a dula a thuša batho ba gagwe gore ba itshole.
8 Bagolo ba ekiša Jehofa ge ba leka go thuša motho yo a dirilego sebe se segolo. Ba diriša keletšo yeo e lego go 2 Timotheo 4:2 ya gore ba se ke ba fela pelo. Ka gona, bagolo ba swanetše go dula ba išitše maswafo fase e bile ba sa fele pelo gore ba thuše motho yo a dirilego sebe se segolo gore a kgone go itshola. Ge ba ka kwata goba ba bontšha go tenega, motho yoo a ka palelwa ke go theetša keletšo ya bona goba a gana go itshola.
9-10. Bagolo ba ka thuša bjang motho yo a dirilego sebe se segolo gore a itshole?
9 Bagolo ba swanetše go leka go tseba gore ke dilo dife tšeo di ka bago di dirile gore motho yoo a feleletše a dirile sebe se segolo. Ka mohlala, ba ka ipotšiša gore, na motho yo a ka ba a be a thomile go fokola tumelong ka ge a se sa ithuta goba a se sa ya tšhemong? Na o be a šetše a thomile go se sa rapela ka mehla? Na o be a šetše a thomile go dumelela dilo tše mpe tšeo a di kganyogago di mo laola? O be a thomile go phela le bomang? Dilo tšeo a ithabišago ka tšona ke tša mohuta mang? Na dilo tše ka moka e ka ba tšona di dirilego gore a feleletše a dirile sebe se segolo? Na motho yoo o a kwešiša gore dilo tšeo a di dirilego di dira gore Jehofa a ikwe bjang?
10 Bagolo ba swanetše go botšiša motho yoo dipotšišo tšeo di tlago go mo thuša gore a bone gore ke dilo dife tšeo di ka bago di ile tša dira gore segwera sa gagwe le Jehofa se fokole, gomme a feleletša a dirile sebe se segolo. (Die. 20:5) Eupša ba swanetše go botšiša dipotšišo tšeo ka tsela e botho, ba se ke ba mmotšiša dipotšišo tšeo di ka mo lešago dihlong. Le gona, ba ka ekiša tsela yeo Nathane a ilego a thuša Dafida ka yona ka go diriša dipapišo tšeo di ka dirago gore motho yoo a bone phošo ya gagwe gomme a itshole. Go ka direga gore ge bagolo ba kopana le motho la mathomo, a ka kwešwa bohloko ke phošo yeo a e dirilego a ba a feleletša a itshotše.
11. Jesu o be a swara bjang batho bao ba dirilego dibe tše dikgolo?
11 Bagolo ba leka go ekiša Jesu. Ge Jesu a be a thuša Saulo wa Tareso, o ile a mmotšiša potšišo yeo e ilego ya dira gore a nagane gabedi. O ile a re go yena: “Saulo, Saulo, o ntlhomaretše’ng?” Potšišo ye e ile ya thuša Saulo go bona gore o swanetše go fetoga. (Dit. 9:3-6) Le gona, ge Jesu a thuša “mosadi yo a bitšwago Isebele,” o ile a re: “Ke mo neile nako ya gore a itshole.”—Kut. 2:20, 21.
12-13. Bagolo ba dira’ng gore ba nee motho yo a dirilego sebe se segolo nako e lekanego gore a itshole? (Bona le seswantšho.)
12 Bagolo ba ekiša Jesu ka go se kitimele go nagana gore motho yo a dirilego sebe se segolo a ka se itshole. Ke nnete gore batho ba bangwe ba ka itshola ge bagolo ba kopana le bona la mathomo, eupša ba bangwe go ka nyakega gore bagolo ba se ke ba boledišana le bona gatee feela. Ka morago ga gore bagolo ba kopane le motho yoo la mathomo, go ka direga gore a šale a nagana ka taba yeo ba mmoditšego yona. E bile a ka no šala a rapela Jehofa a mo kgopela gore a mo lebalele. (Ps. 32:5; 38:18) Se se ka dira gore ge ba tlo kopana le yena gape, ba hwetše a fetogile.
13 Bagolo ba swanetše go bontšha motho yo a dirilego sebe se segolo botho e bile ba mo kwele bohloko e le gore ba mo thuše gore a itshole. Ba rapela gore Jehofa a šegofatše maiteko a bona a go thuša motho yoo gore a itshole e bile a fetoge.—2 Tim. 2:25, 26.
Bagolo ba ka kopana le motho yo a dirilego sebe se segolo ka makga a mmalwa gore ba mo thuše gore a itshole (Bona serapa 12)
14. Ge e le gabotse ke mang a dirago gore motho yo a dirilego sebe se segolo a itshole, gona ke ka baka la’ng re realo?
14 Ge motho yo a dirilego sebe se segolo a itshola, re thaba kudu! (Luka 15:7, 10) Le ge bagolo e le bona ba kopanago le motho yoo, ge e le gabotse ke mang a dirago gore a itshole? Gopola gore Paulo o ile a re’ng ge a be a bolela ka batho bao ba dirilego dibe tše dikgolo. O ile a re: “Mohlomongwe Modimo a ka ba dira gore ba fetoše dipelo tša bona.” (2 Tim. 2:25) Jehofa ke yena a thušago motho gore a fetoge e sego bagolo. Paulo o re botša gore ge motho a itshola, o thoma go kwešiša nnete ya ka Beibeleng gabotse, a nagana gabotse e bile a phonyokga gore Sathane a se ke a mo tanya.—2 Tim. 2:26.
15. Bagolo ba ka thuša bjang motho yo a itsholago ka morago ga go dira sebe se segolo?
15 Ge motho yo a dirilego sebe se segolo a itshola, komiti e tlo rulaganya gore a hwetše maeto a bodiši gore ba mo thuše gore Sathane a se ke a mo tanya gape le gore a lokiše segwera sa gagwe le Jehofa. (Baheb. 12:12, 13) Bagolo ba ka se botše batho ba bangwe gore motho yoo o dirile sebe sa mohuta mang. Bjale, ke’ng seo bagolo ba swanetšego go se tsebiša phuthego?
“BA SOLWE PELE GA BABOGEDI KA MOKA”
16. Ge Paulo a bolela ka “babogedi” o bolela ka bomang? (1 Timotheo 5:20)
16 Bala 1 Timotheo 5:20. Paulo o ngwaletše Timotheo mantšu a gore a kgone go thuša “batho bao ba tlwaetšego go dira sebe.” O be a era gore re’ng? Paulo o be a sa re gore batho ba ka phuthegong ka moka ke “babogedi.” Eupša o be a bolela ka batho bao ba ka bego ba šetše ba tseba ka sebe seo motho yoo a se dirilego. Eka ba bao ba mmonego ge a dira sebe seo goba bao a ba boditšego ka sona. Bagolo ba tla botša batho bao ba tsebago ka sebe seo gore le bona ba tseba ka taba yeo e bile ba thušitše motho yo a dirilego sebe se segolo.
17. Ge sebe se segolo se tsebja ka phuthegong goba go ka tla gwa direga gore se tsebje, go dirwa tsebišo efe, gona ka baka la’ng?
17 Ka dinako tše dingwe go ka direga gore sebe seo se šetše se tsebja ke batho ba bantšhi ka phuthegong goba go ka tla gwa direga gore se tsebje. Ge go le bjalo, “babogedi” e tlo ba batho ba ka phuthegong ka moka. Ka gona, phuthego e tla tsebišwa gore ngwanabo rena goba kgaetšedi o kgalemetšwe. Ka baka la’ng? Paulo o itše: Gore “e be temošo go ba bangwe ka moka.”
18. Bagolo ba tlo thuša bjang baswa bao ba dirilego dibe tše dikgolo? (Bona le seswantšho.)
18 Go tla direga’ng ge e ba baswa ba mengwaga ya ka tlase ga e 18 bao ba kolobeditšwego ba dira sebe se segolo? Go tlo kgethwa bagolo ba babedi gore ba kopane le moswa le batswadi ba gagwe ba Bakriste. b Bagolo ba tlo nyaka go tseba gore ke’ng seo batswadi ba šetšego ba se dirile go thuša ngwana wa bona gore a itshole. Ge e ba moswa yoo a arabela gabotse ge batswadi ba gagwe ba mo thuša gore a itshole, gona bagolo bao ba babedi ba ka no phetha ka gore ga go nyakege komiti. Bagolo ba a tseba gore Jehofa o neile batswadi boikarabelo bja go thuša bana ba bona ge ba dirile diphošo. (Doit. 6:6, 7; Die. 6:20; 22:6; Baef. 6:2-4) Ba tlo fela ba etela moswa yoo le batswadi ba gagwe go kgonthišetša gore moswa yoo o hwetša thušo yeo a e hlokago. Bjale, go tlo direga’ng ge e ba moswa yoo a sa itshole gomme a tšwela pele a dira sebe se segolo? Ge e ba go le bjalo, go tlo kgethwa komiti yeo e tlago go kopana le yena gotee le batswadi ba gagwe ba Bakriste.
Ge moswa a dirile sebe se segolo, bagolo ba babedi ba tlo kopana le yena le batswadi ba gagwe ba Bakriste goba mohlokomedi wa gagwe wa Mokriste (Bona serapa 18)
“JEHOFA O NA LE LERATO LE LEGOLO E BILE KE YO A GAUGELAGO”
19. Bagolo ba ka ekiša bjang Jehofa ge ba thuša batho bao ba dirilego dibe tše dikgolo?
19 Jehofa o nyaka gore bagolo ba gopole gore ba na le boikarabelo bja go netefatša gore phuthego e dula e hlwekile. (1 Bakor. 5:7) Le gona, o nyaka gore ge eba go kgonega, motho yo a dirilego sebe se segolo a itshole. Ge ba thuša motho, ba tshepa gore o tla itshola gomme a fetoga. Ka baka la’ng? Ka gobane ba nyaka go ekiša Jehofa yo a nago le “lerato le legolo e bile [e le] yo a gaugelago.” (Jak. 5:11) Moapostola Johane yo a bego a tšofetše le yena o be a bontšha gore o rata phuthego. O ngwadile gore: “Bana ba ka ba ba rategago, ke le ngwalela dilo tše gore le se ke la dira sebe. Eupša ge e ba motho a ka dira sebe, re na le mothuši yo a nago le Tate, e lego Jesu Kriste, yena yo a dirago dilo tše di lokilego pele ga Modimo.”—1 Joh. 2:1.
20. Re tlo boledišana ka’ng sehlogong seo se latelago?
20 Ka maswabi, ka dinako tše dingwe Mokriste a ka gana go itshola. Ka gona, o swanetše go tlošwa ka phuthegong. Bagolo ba swanetše go dira’ng ge seo se direga? Re tlo araba potšišo yeo sehlogong seo se latelago.
KOPELO 103 Badiši—Dimpho Tšeo e Lego Banna
a Nakong e fetilego, sehlopha se se be se bitšwa komiti ya boahlodi. Eupša ka ge mošomo wa bona o mogolo e se go ahlola, re ka se sa diriša polelwana yeo. Re tlo se bitša gore ke komiti ya bagolo.
b Ka dinako tše dingwe bagolo ba ka kopana le mohlokomedi wa moswa yoo, yo e lego Mokriste goba batho ba bangwe ka phuthegong bao ba hlokomelago moswa yoo.
