SEHLOGO SE ITHUTWAGO 31
KOPELO 12 Modimo yo Mogolo, Jehofa
Dilo Tšeo Jehofa a di Dirilego Gore a re Phološe
“Modimo o ratile lefase kudu mo a ilego a gafa Morwa wa gagwe yo a tswetšwego a nnoši.”—JOH. 3:16.
SEO RE TLAGO GO ITHUTA SONA
Sehlogong se, re tlo ithuta ka dilo tšeo Jehofa a di dirago gore a re thuše go lwantšhana le sebe le kamoo a dirago gore re tle re ipshine ka bophelo bjo bo sa felego re se na sebe.
1-2. (a) Sebe ke’ng gona re ka dira’ng gore re se fenye? (Bona le “Tlhaloso ya Mantšu a Itšego.”) (b) Re tlo boledišana ka’ng sehlogong se le tše dingwe tšeo di latelago? (Bona le sehlogo seo se lego go letlakala 32 seo se rego “Mmadi yo a Rategago.”)
NA O a tseba gore Jehofa o go rata gakaakang? E le gore o hwetše karabo, ithute ka dilo tšeo a di dirilego gore a go phološe sebeng le lehung. Sebe a ke lenaba le legolo leo o ka se kgonego go le fenya o nnoši. Ka moka ga rena re dira diphošo letšatši le lengwe le le lengwe e bile re a hlokofala ka baka la sebe. (Baroma 5:12) Sa go kgahliša ke gore Jehofa a ka re thuša gore re fenye sebe. Re tloga re kgodišegile gore re tlo fenya!
2 Jehofa o be a dutše a thuša batho go lwantšhana le sebe ka mengwaga e ka bago e 6 000. Ka baka la’ng? Ka gobane o rata batho. Jehofa ke kgale a rata batho e bile a dira dilo tše dintšhi gore a ba thuše. Modimo o a tseba gore sebe se a bolaya e bile ga a nyake gore re hwe. O nyaka gore re phele ka mo go sa felego. (Baroma 6:23) Sehlogong se, re tlo araba dipotšišo tše tše tharo: Jehofa o thušitše bjang batho bao ba nago le sebe gore ba be le kholofelo? Batho ba mehleng ya Beibele bao ba bego ba na le sebe ba ile ba dira eng gore Modimo a ba amogele? Jesu o dirile eng gore a phološe batho sebeng le lehung?
JEHOFA O THUŠITŠE BJANG BATHO BAO BA NAGO LE SEBE GORE BA BE LE KHOLOFELO?
3. Go tlile bjang gore Adama le Efa ba dire sebe?
3 Ge Jehofa a bopa monna wa mathomo le mosadi, o be a nyaka gore ba thabe. O ile a ba nea legae le lebotse, a dira gore ba thabele lenyalo le go ba nea kabelo e kgahlišago. Ba be ba swanetše go ba le bana ba bantšhi le go dira lefase ka moka gore e be paradeise go swana le serapa sa Edene. Go be go na le selo setee feela seo a bego a ba thibetše go se dira. O ile a ba botša gore ge ba ka se kwe taelo yeo ba tlo ba le sebe gomme ba hwa. Re a tseba gore go diregile eng. Sebopiwa se sengwe sa moya seo se bego se sa rate Modimo le batho, se ile sa dira gore Adama le Efa ba se ke ba kwa Jehofa gomme ba dire sebe. Ba ile ba dira seo Sathane a bego a se nyaka. Ba ile ba fetoga badiradibe ka baka la go se theetše Tatago bona yo ba ratago. Seo Jehofa a se boletšego se ile sa direga. Go tloga lona letšatšing leo, ba bile le mathata a magolo. Ba ile ba thoma go tšofala ke moka ba hwa.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Ke ka baka la’ng Jehofa a hloile sebe e bile a re thuša go lwantšhana le sona? (Baroma 8:20, 21)
4 Jehofa o dumeletše pego ye e nyamišago e ngwalwa ka Beibeleng gore e tle e re hole. E re thuša go kwešiša gore ke ka baka la’ng a hloile sebe. Se senya segwera sa rena le Jehofa e bile se dira gore re hwe. (Jes. 59:2) Sathane o hloile Jehofa le batho e bile o dirile gore mo lefaseng go be le sebe. Ka morago ga gore Adama le Efa ba dire sebe, Sathane o ile a nagana gore o sentše morero wa Jehofa. Eupša o be sa lemoge gore Jehofa o tloga a rata batho. Modimo ga se a ka a fetola morero wa gagwe ka bana ba Adama le Efa. Ka ge a rata batho, o ile a dira gore ba be le kholofelo. (Bala Baroma 8:20, 21.) Jehofa o be a tseba gore ba bangwe ba bana ba Adama ba be ba tlo mo rata, ba nyaka le gore a ba thuše go lwantšhana le sebe. Ka ge e le Tatago bona le Mmopi wa bona, o be a tlo ba thuša gore ba se sa ba le sebe le gore ba dule e le bagwera ba gagwe. Jehofa o be a tlo ba thuša bjang?
5. Jehofa o neile neng batho kholofelo ya go phološwa sebeng? Hlalosa. (Genesi 3:15)
5 Bala Genesi 3:15. Jehofa o ile a nea batho kholofelo ge a be a ahlola Sathane. Modimo o ile a bolela e sa pele gore “peu” e tla nea batho kholofelo. Peu yeo e be e tlo pšhatla Sathane gomme ya fediša mathata ka moka ao a a bakilego serapeng sa Edene. (1 Joh. 3:8) Eupša peu yeo e be e tlo tlaišega pele, Sathane o be a tlo e loma gomme ya hwa. Jehofa o be a tlo kwa bohloko kudu ge seo se direga. Bohloko bjoo bo be bo tlo ba le mohola mafelelong ka gobane batho ba bantšhi ba be ba tlo phološwa sebeng le lehung.
BATHO BA MEHLENG YA KGALE BA ILE BA DIRA’NG GORE BA THABIŠE JEHOFA?
6. Banna ba bjalo ka Abele le Noa bao ba bego ba na le tumelo ba ile ba dira’ng gore ba gwerane le Jehofa?
6 Ganyenyane-ganyenyane, Jehofa o ile a bontšha gore batho bao ba nago le sebe ba ka dira’ng gore e be bagwera ba gagwe. Ka morago ga selo seo se diregilego kua Edene, Abele e lego morwa wa bobedi wa Adama le Efa, e bile yena wa mathomo wa go bontšha tumelo go Jehofa. O ile a direla Jehofa sehlabelo ka ge a be a mo rata e bile a nyaka go mo thabiša. Abele o dirile sehlabelo seo ka dikwana ka ge e be e le modiši. Jehofa o ile a ikwa bjang? O ile a ‘amogela Abele le sehlabelo sa gagwe.’ (Gen. 4:4) Jehofa o ile a amogela le dihlabelo tša batho ba bangwe ba bjalo ka Noa, bao ba bego ba mo rata le go mo tshepa. (Gen. 8:20, 21) Ge Jehofa a be a amogela dihlabelo tšeo, o be a bontšha gore go a kgonega gore batho bao ba nago le sebe ba ka kgona go mo kgahliša le gore e be bagwera ba gagwe. b
7. Re ithuta’ng go seo Aborahama a bego a ikemišeditše go se dira?
7 Jehofa o ile a kgopela Aborahama e lego monna yo a bego a na le tumelo gore a dire selo se sengwe se boima. O ile a mo kgopela gore a dire sehlabelo ka morwa wa gagwe e lego Isaka. Kgopelo yeo e ile ya imela Aborahama kudu. Lega go le bjalo, o be a ikemišeditše go kwa Jehofa. Nakong ya ge Aborahama a le kgauswi le go bolaya Isaka, Jehofa o ile a mo thibela. Mohlala wo o be o bontšha seo Jehofa a bego a tlo se direla batho bao ba nago le tumelo ka ge a ba rata kudu. O be a ikemišeditše go neelana ka Morwa wa gagwe yo a mo ratago kudu gore e be sehlabelo.—Gen. 22:1-18.
8. Dihlabelo tše Baisiraele ba bego ba di dira ka diphoofolo di re ruta’ng? (Lefitiko 4:27-29; 17:11)
8 Mengwaga e mentšhi ka morago ge Jehofa a be a nea Baisiraele melao, o ile a ba botša gore ba dire dihlabelo ka diphoofolo gore a ba lebalele melato ya bona. (Bala Lefitiko 4:27-29; 17:11.) Dihlabelo tšeo di be di bontšha gore Jehofa o tlo neelana ka sehlabelo se segolo go di feta ka moka gore a phološe batho sebeng. Modimo o ile a botša baporofeta gore ba botše batho gore o tshepišitše go romela peu, e lego Morwa wa gagwe yo a tlo tlaišwago le go bolawa. O be a tlo swana le nku yeo go dirwago sehlabelo ka yona. (Jes. 53:1-12) Jehofa o be a tlo neelana ka Morwa wa gagwe e le sehlabelo gore a phološe batho sebeng le lehung. Jehofa o re diretše selo se bohlokwa kudu!
JESU O DIRILE ENG GORE A PHOLOŠE BATHO SEBENG LE LEHUNG?
9. Ke’ng seo Johane Mokolobetši a ilego a se bolela ka Jesu? (Baheberu 9:22; 10:1-4, 12)
9 Ka ngwaga wa 29 C.E., mohlanka wa Jehofa e lego Johane Mokolobetši o ile a bolela ka Jesu wa Natsaretha gore: “Bonang Kwana ya Modimo yeo e tlošago sebe sa lefase!” (Joh. 1:29) Mantšu ao a be a bontšha gore Jesu ke peu yeo go boletšwego ka yona e sa le pele. O be a tlo ba sehlabelo seo se holofeditšwego. Kholofetšo ye e dirile gore batho ba bone gore ba ka kgona go fenya sebe.—Bala Baheberu 9:22; 10:1-4, 12.
10. Jesu o ile a bontšha bjang gore o “tletše go bitša badiradibe”?
10 Jesu o be a tshwenyegile ka batho bao ba bego ba imelwa ke sebe ke moka a ba mema gore e be balatedi ba gagwe. O be a tseba gore batho ba tlaišega ka baka la sebe. O ile a gwerana le batho bao ba bego ba tsebja e le badiradibe. O ile a diriša papišo e nngwe go hlalosa gore: “Batho ba ba phetšego gabotse ga ba nyake ngaka, eupša ba babjago ba a e nyaka.” A oketša ka gore: “Ke tletše go bitša badiradibe, e sego baloki.” (Mat. 9:12, 13) Jesu o ile a dira sona seo. O ile a lebalela mosadi yo a ilego a kolobiša dinao tša gagwe ka megokgo a ba a bolela le yena ka botho. (Luka 7:37-50) O ile a ruta mosadi wa Mosamaria ditherešo tše bohlokwa ba le sedibeng le ge a be a tseba gore mosadi yoo o dula le monna yo a sego a nyalana le yena. (Joh. 4:7, 17-19, 25, 26) Modimo o ile a nea Jesu le matla a go tsoša bahu. O ile a tsoša banna, basadi le bana.—Mat. 11:5.
11. Ke ka baka la’ng badiradibe ba be ba sa tšhabe go batamela Jesu?
11 Ga go makatše gore le batho bao ba bego dira dibe tše dikgolo ba ile ba kgona go batamela kgauswi le Jesu. O ile a kwešiša kamoo ba ikwago ka gona gomme a ba kwela bohloko. Ba be ba sa tšhabe go mmatamela. (Luka 15:1, 2) Jesu o be a reta le go putsa batho bao ba bego ba bontšha tumelo go yena. (Luka 19:1-10) Tsela yeo Jesu a bego a dira dilo ka yona e be e bontšha gore Jehofa o na le kwelobohloko. (Joh. 14:9) Dilo tšeo Jesu a bego a di dira le go di bolela di be di bontšha gore Tatagwe wa legodimong o na le taba le batho bao ba sa phethagalago. Jesu o thušitše batho bao ba nago le sebe gore ba nyake go tlogela tsela yeo ba phelago ka yona gomme ba mo latele.—Luka 5:27, 28.
12. Ke’ng seo Jesu a ilego a se bolela ka lehu la gagwe?
12 Jesu o be a tseba gore o tlo neela bophelo bja gagwe. O ile a botša balatedi ba gagwe gantšhinyana gore o tlo ekwa le go kokotelwa koteng. (Mat. 17:22; 20:18, 19) O be a tseba gore sehlabelo sa gagwe se tlo fediša sebe go etša ge Johane le baporofeta ba bangwe ba boletše e sa le pele. Jesu o ile a ruta le gore ka morago ga go neela bophelo bja gagwe o “tla gogela batho ba mehuta ka moka” go yena. (Joh. 12:32) Batho bao ba sa phethagalago ba ka kgahliša Jehofa ka go dumela gore Jesu ke Morena wa bona le go ekiša mohlala wa gagwe. Ge ba ka dira bjalo, mafelelong ba tla ‘lokollwa sebeng.’ (Baroma 6:14, 18, 22; Joh. 8:32) Jesu o ile a ba le sebete le go ikemišetša go hwa ga sehlogo gore a re phološe.—Joh. 10:17, 18.
13. Jesu o bolailwe bjang, gona lehu la gagwe le re ruta’ng ka Jehofa Modimo? (Bona le seswantšho.)
13 Jesu o ile a ekwa, a golegwa, a rogwa, a thomeletšwa, a ahlolwa le go tlaišwa. Mafelelong o ile a kokotelwa koteng ya tlhokofatšo gore a bolawe. Ge a dutše a kgotleletše dilo tšeo ka moka, Jehofa o be a ekwa bohloko kudu. O be a na le matla a go phološa Jesu eupša ga se a ka a a diriša. Ke ka baka la’ng Tate yo a nago le lerato a ka tlogela Morwa wa gagwe a tlaišega? Ka gobane Jehofa o a re rata. Jesu o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Joh. 3:16.
Jehofa o ile a dumelela Morwa wa gagwe gore a bolawe e le gore a lokolle batho sebeng le lehung (Bala serapa 13)
14. Sehlabelo sa Jesu se go ruta’ng?
14 Sehlabelo sa Jesu se bontšha gabotse gore Jehofa o rata bana ba Adama le Efa. Se se tloga se bontšha gore Jehofa o go rata kudu. O ile a dira dilo tše dintšhi le go kwa bohloko gore a go phološe sebeng le lehung. (1 Joh. 4:9, 10) O nyaka gore ka moka ga rena re kgone go mo hlankela le ge re na le sebe le gore mafelelong re tle re kgone go fenya!
15. Re swanetše go dira’ng gore re holwe ke mpho ya topollo yeo Modimo a re neilego yona?
15 Mpho ye Modimo a re neilego yona, e lego sehlabelo sa Morwa wa gagwe yo a tswetšwego a nnoši e dira gore dibe tša rena di kgone go lebalelwa. Eupša go na le selo seo re swanetšego go se dira gore Modimo a re lebalele. Re swanetše go dira’ng? Johane Mokolobetši le Jesu Kriste ba boletše gore: “Itsholeng, gobane Mmušo wa magodimo o batametše.” (Mat. 3:1, 2; 4:17) Go bohlokwa gore re itshole gore re kgone go fenya sebe le go gwerana le Tatago rena yo a re ratago. Eupša go itshola go bolela’ng, le gona go re thuša bjang gore re fenye sebe? Re tlo araba potšišo ye sehlogong seo se latelago.
KOPELO 18 Go Leboga Topollo
a TLHALOSO YA MANTŠU A ITŠEGO: Lentšu “sebe” leo le dirišitšwego ka Beibeleng, le ka bolela go dira diphošo goba go palelwa ke go phela ka go dumelelana le melao ya Jehofa. Ka dinako tše dingwe lentšu “sebe” le ka bolela go se phethagale ka baka la phošo yeo Adama a e dirilego. Sebe seo re se hweditšego go Adama se dira gore ka moka ga rena re hwe.
b Jehofa o be a amogela dihlabelo tša batho bao ba botegago ka gobane o be a tseba gore nakong e tlago sehlabelo sa Jesu sa topollo se be se tlo ba phološa sebeng le lehung.—Baroma 3:25.
