1. Motho o dira’ng go bontšha gore o a itshola?

 GO BOHLOKWA gore re itshole ge re dirile diphošo. Beibele e bontšha gore motho yo a itsholago o hloya dilo tše mpe tšeo a di dirilego e bile o tlogela go di dira.—Mat. 3:8; Dit. 3:19; 2 Pet. 3:9.

2. Ke ka baka la’ng go le bohlokwa go tseba gore go itshola ke’ng? (Nehemia 8:9-11)

² Batho ka moka ba swanetše go tseba gore go itshola ke’ng. Ka baka la’ng? Ka gobane letšatši le lengwe le le lengwe re dira diphošo. Ka ge ka moka ga rena re etšwa go Adama le Efa, re na le sebe sa leabela e bile re a hlokofala. Ka gona ka moka ga rena re swanetše go itsholela dibe goba diphošo tšeo re di dirago. (Baroma 3:23; 5:12) Batho bao ba bego ba na le tumelo e tiilego ba bjalo ka moapostola Paulo, le bona ba ile ba hwetša go le thata go dira se se lokilego. (Baroma 7:21-24) Na se se ra gore re swanetše go dula re nyamile ka baka la diphošo tšeo re di dirago? Aowa, ka gobane Jehofa ke Modimo yo a nago le kwelobohloko e bile o nyaka go re bona re thabile. Nagana ka mohlala wa Bajuda ba mehleng ya Nehemia. (Bala Nehemia 8:9-11.) Jehofa o be a sa nyake gore ba nyame ka mo go feteletšego ka baka la diphošo tšeo ba di dirilego nakong e fetilego. Eupša o be a nyaka gore ba mo hlankele ba thabile. Jehofa o a tseba gore ge re bontšha gore re a itshola seo se tlo dira gore re thabe. Ka gona, o re ruta gore go itshola ke eng. Ge re ka itsholela dibe tšeo re di dirilego re ka kgodišega gore Jehofa o tlo re lebalela.

3. Re tlo ithuta’ng sehlogong se?

³ Sehlogong se, re tlo bolela ka dilo tše tharo tšeo di tlago go re thuša go kwešiša gabotse gore go itshola ke eng. Sa pele, re  tlo bona kamoo Jehofa a ilego a ruta Baisiraele gore go itshola ke eng. Sa bobedi, ra bona gore Jehofa o thuša bjang batho gore ba itshole. Sa mafelelo, re tlo bona gore balatedi ba Jesu ba ile ba ithuta eng ka go itshola.

KAMOO JEHOFA A ILEGO A RUTA BAISIRAELE GO ITSHOLA

4. Jehofa o ile a ruta Baisiraele eng?

⁴ Ge Jehofa a be a dira gore Baisiraele e be setšhaba, o ile a ba nea melao yeo ba ilego ba dumela go e latela. Ge ba be ba ka latela melao yeo, Jehofa o be a tlo ba šireletša le go ba šegofatša. O ile a re: “Ditaelo tšeo ke le botšago tšona lehono ga di thata e bile le ka kgona go di latela.” (Doit. 30:11, 16) Eupša ge Baisiraele ba be ba ka kgetha go se latele melao ya Modimo goba ba kgetha go rapela medimo e mengwe, Jehofa o be a ka se sa ba šegofatša e bile dilo di be di ka se ba sepelele gabotse. Seo se be se sa bolele gore Jehofa o be a ba hlapile diatla. Ba be ba ka kgona go ‘boela go Jehofa Modimo wa bona gomme ba dira dilo ka moka tšeo a ba laetšego tšona.’ (Doit. 30:1-3, 17-20) Ka mantšu a mangwe, ba be ba ka itshola. Ge ba be ba ka dira bjalo, Jehofa o be a tlo ba amogela gape le go ba šegofatša.

5. Jehofa o ile a dira’ng go thuša batho ba gagwe? (2 Dikgoši 17:13, 14)

⁵ Baisiraele ba be ba tshela melao ya Jehofa gantšhi. Ba be ba rapela medimo ya diswantšho le go dira dilo tše dingwe tšeo Jehofa a di hloilego. Se se ile sa dira gore dilo di se ke tša ba sepelela gabotse. Eupša Jehofa o ile a dula a thuša batho ba gagwe gore ba mo hlankele gape. O ile a romela baporofeta gantšhi le gantšhi gore ba thuše batho ba gagwe gore ba itshole le go boela go yena.—Bala 2 Dikgoši 17:13, 14.

6. Jehofa o ile a diriša bjang baporofeta ba gagwe go thuša Baisiraele go bona gore itshola go bohlokwa? (Bona le seswantšho.)

⁶ Ge Baisiraele ba be ba sa kwe melao ya Jehofa, o be a diriša baporofeta ba gagwe go ba thuša go bona diphošo tša bona le gore ba di lokiše. Ka mohlala, Jehofa o ile a diriša Jeremia go botša Baisiraele gore: “Boa, wena Isiraele wa mohlanogi, . . . nka se le lebelele ka  sefahlego se se befetšwego, ka gobane ke a botega. . . . Nka se dule ke befetšwe go iša mehleng ya neng le neng. Elang hloko molato wa lena, ka gobane le senyeditše Jehofa.” (Jer. 3:12, 13) Jehofa o ile a diriša le Joele go botša Baisiraele gore: “Boelang go nna ka dipelo tša lena ka moka.” (Joele 2:12, 13) A diriša Jesaya go ngwala gore: “Itlhwekišeng; tlošang bobe ditirong tša lena ka pele ga ka; tlogelang go dira bobe.” (Jes. 1:16-19) Ke moka a diriša le Hesekiele go ngwala gore: ‘Na ruri ke kgahlwa ke lehu la yo kgopo? Ke kgahlwa ke gore a furalele ditsela tša gagwe gomme a dule a phela. Ga ke kgahlwe ke lehu la yo a hwago. Ka gona, furalelang ditsela tša lena gomme le dule le phela.’ (Hesek. 18:23, 32) Jehofa o a thaba ge a bona batho ba itshola, ka gobane o nyaka gore ba phele go ya go ile! Jehofa ga a emele gore batho ba itshole pele, ke moka ya ba gona a ba thuša. A re kweng kamoo a ilego a thuša bangwe ka gona.

7. Jehofa o be a nyaka go ruta Baisiraele eng ge a be a diriša mohlala wa Hosea le mosadi wa gagwe?

⁷ Jehofa o ile a diriša mohlala wa mosadi wa moporofeta Hosea go re ruta’ng? Gomere o ile a dira bohlotlolo, ke moka a tlogela Hosea a ya go banna ba bangwe. Na mosadi yoo o be a ka fetoga a itshola? Ka ge Jehofa a kgona go bona dipelo, o ile a botša Hosea gore: “Boela o rate mosadi wa gago yo a ratanago le monna yo mongwe, e bile a dira bootswa le yena, go etša ge Jehofa a rata Baisiraele le ge ba rapela medimo e mengwe.” (Hos. 3:1; Die. 16:2) Le ge mosadi wa Hosea a be a sa dira sebe se segolo, Jehofa o ile a kgopela Hosea gore a mo lebalele le go boelana le yena. a Jehofa o dirišitše mohlala wa Hosea go bontšha batho ba gagwe gore o ikwa bjang ka bona. Le ge ba dira dibe tše dikgolo, Jehofa o be a ba bontšha gore o sa ba rata le gore o ikemišeditše go ba thuša gore ba itshole gomme ba tlogele dilo tše mpe tšeo ba bego ba di dira. Mohlala wo wa mosadi wa Hosea o re bontšha gore Jehofa o re tseba gabotse, le gore o tlo dula a thuša motho yo a dirilego sebe se segolo gore a itshole.—Die. 17:3.

JEHOFA O THUŠA BJANG BATHO GORE BA ITSHOLE?

8. Jehofa o ile a leka go thuša Kaine bjang gore a itshole? (Genesi 4:3-7) (Bona le seswantšho.)

⁸ Kaine e be e le ngwana wa mathomo wa Adama le Efa. Le yena o be a na le sebe go swana le batswadi ba gagwe, e bile Beibele ge e mo hlalosa e re: “O be a dira dilo tše mpe.” (1 Joh. 3:12) Mohlomongwe le ke lebaka leo Jehofa a bego a sa amogele “Kaine le sehlabelo sa gagwe.” Go ena le gore Kaine a fetoge, “o ile a galefa kudu e bile sefahlego sa gagwe se be se bontšha gore o nyamile.” Ka morago ga gore Jehofa a lemoge seo o ile a bolela le yena. (Bala Genesi 4:3-7.) O ile a bolela le Kaine gabotse, a ba a mo tshepiša gore ge a ka mo kwa o tla mo šegofatša. Ka maswabi, Kaine o ile a se mo theetše. O ile a gana ge Jehofa a mo thuša gore a itshole. Ka ge Kaine a se a ka a kwa Jehofa, na se se dirile gore Jehofa a tlogele le go thuša batho ba bangwe? Le gatee!

9. Jehofa o ile a thuša bjang Dafida gore a itshole?

⁹ Jehofa o be a rata Kgoši Dafida kudu. O ile a ba a bolela le gore ke “monna yo a kwanago le pelo ya [gagwe].” (Dit. 13:22) Eupša Dafida o ile a dira dibe tše dikgolo tša go swana le bohlotlolo le go bolaya. Go ya ka molao, Dafida o be a swanetšwe ke go bolawa. (Lef. 20:10; Num. 35:31) Eupša Jehofa o be a nyaka go  thuša Dafida gore a itshole. b Jehofa o ile a romela moporofeta Nathane gore a ye go Kgoši Dafida go mo thuša gore a itshole, le ge ka nako yeo Dafida a be a sa itshole. Nathane o ile a diriša mohlala woo o ilego wa thuša Dafida gore a bone gore o dirile dibe tše dikgolo le gore o swanetše go itshola. Dafida o ile a itshola. (2 Sam. 12:1-14) O ile a ngwala le psalme yeo e bontšhago kamoo a itsholago ka gona. (Ps. 51) Psalme yeo ile ya thuša le batho ba bantšhi bao ba dirilego dibe gore ba itshole. Go kgahliša kudu go bona gore Jehofa o be a rata Dafida le gore o mo thušitše gore a itshole.

10. Go tseba gore Jehofa ga a re felele pelo e bile o ikemišeditše go re lebalela go dira gore o ikwe bjang?

¹⁰ Jehofa o hloile sebe e bile ga a rate go bona batho se dira. (Ps. 5:4, 5) Eupša ka ge a tseba gore re dira dibe, o re thuša go dira se se lokilego ka ge a re rata. O thuša le batho bao ba nweletšego ka gare ga dibe gore ba itshole ba boele go yena. Go a kgothatša go tseba gore Jehofa o ikemišeditše go re lebalela. Ka ge re tseba gore Jehofa ga a re felele pelo e bile o ikemišeditše go dula a re lebalela, le rena re nyaka go dula re mmotegela e bile re itshole ge re dirile sebe. A re boneng gore Jesu o ile a ruta balatedi ba gagwe eng.

JESU O ILE A RUTA’NG BALATEDI BA GAGWE KA GO ITSHOLA?

11-12. Jesu o dirišitše papišo efe go bontšha gore Jehofa o ikemišeditše go dula a re lebalela? (Bona seswantšho sa letlakala la ka ntle.)

¹¹ Sehlogong se se fetilego, re ithutile gore Jehofa o ile a dira gore Johane mokolobetši le Jesu Kriste ba rute batho ba lekgolong la pele la mengwaga gore ke ka baka la’ng go be go le bohlokwa gore ba itshole.—Mat. 3:1, 2; 4:17.

¹² Ge Jesu a be a le mo lefaseng, o ile a ruta batho gore Jehofa o ikemišeditše go lebalela batho bao ba mo direlago diphošo. Jesu o ile a re ruta kamoo Jehofa a re lebalelago ka gona ka go diriša papišo ya morwa wa lehlaswa. Morwa yoo o ile a kgetha go tloga gae a ya go dira dilo tše mpe kudu. Eupša ge a thoma go bona gore o dirile diphošo, o ile a boela  gae. Tatagwe o ile a dira’ng ge a mmona? Jesu o boletše gore ge morwa yoo a “le kgole tatagwe a mmona gomme a mo šokela, a mo kitimela a mo gokarela a mo atla ka lerato.” Morwa yoo o be a sa nagane gore tatagwe a ka mo lebalela. Ka gona o ile a ya gae gomme a kgopela go ba mošomi, eupša tatagwe o be a ikemišeditše go mo lebalela le go mo amogela ka gae. Tatagwe o ile a re: “O be a timetše gomme a hwetšwa.” (Luka 15:11-32) Pele Jesu a etla lefaseng, o ile a bona ge Jehofa a be a lebalela badiradibe ba bantšhi bao ba bego ba itshola. Papišo ya Jesu e a re kgothatša e bile e re bontšha kamoo Jehofa a re lebalelago ka gona.

13-14. Moapostola Petro o ile a ithuta’ng ka go itshola, gona o ile a ruta batho ba bangwe eng? (Bona le seswantšho.)

¹³ Moapostola Petro le yena o ile a ithuta thuto e bohlokwa go Jesu ya kamoo Jehofa a lebalelago batho bao ba itsholago. Petro o be a dira diphošo tše dintšhi eupša Jesu o be a dula a ikemišeditše go mo lebalela. Ka mohlala, ka morago ga gore Petro a latole Jesu gararo o ile a nyama kudu. (Mat. 26:34, 35, 69-75) Eupša ka morago ga gore Jesu a tsošwe, go ka direga gore o ile a ya go Petro ge a be a le noši gomme a bolela le yena. (Luka 24:33, 34; 1 Bakor. 15:3-5) Ga go pelaelo gore ge a be a ile go yena, o ile a mo kgothatša le go mmotša gore o mo lebaletše.—Mar. 16:7.

¹⁴ Ka ge Petro a ile a itshola gomme a lebalelwa, o be a ka kgona go ruta batho ba bangwe ka go itshola le go lebalelwa. Ka morago ga monyanya wa Pentekoste, Petro o ile a nea Bajuda bao e bego e se Bakriste polelo, a ba botša gore ba bolaile Mesia. O ile a re go bona: “Itsholeng le sokologe e le gore dibe tša lena di phumolwe, gore mehla ya tapologo e tle e etšwa sefahlegong sa Jehofa.” (Dit. 3:14, 15, 17, 19) Petro o ile a ruta gore ge e ba motho a itshola, o tlogela go dira dilo tše mpe, ke  moka a dira dilo tšeo di kgahlišago Modimo. O bontšhitše le gore Jehofa o lebalela motho ka mo go feletšego, gwa ba bjalo ka ge e ka motho yoo ga se a ka a dira sebe. Le ka morago ga mengwaga e mentšhi, Petro o ile a botša Bakriste gore: “Jehofa . . . ga a le felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Pet. 3:9) Go a kgothatša go tseba gore Jehofa o ikemišeditše go re lebalela ge re itshola le ge re dirile dibe tše dikgolo!

15-16. (a) Paulo o ile a ithuta bjang go lebalela? (1 Timotheo 1:12-15) (b) Re tlo ithuta ka’ng sehlogong se se latelago?

¹⁵ Saulo wa Tareso o be a dirile dilo tše dintšhi tše mpe, ka gona o be a swanetše go itshola gore a lebalelwe. O be a tlaiša balatedi ba Jesu Kriste. Bakriste ba bantšhi ba be ba nagana gore a ka se tsoge a fetogile. Eupša Jesu o be a tseba gore Saulo a ka fetoga gomme a itshola. Jehofa le Jesu ba be ba bona dika tše dibotse go Saulo. Ka gona Jesu o ile a re: “Monna yoo ke sebjana se ke se kgethilego.” (Dit. 9:15) Jesu o ile a diriša le mohlolo gore Saulo a itshole. (Dit. 7:58–8:3; 9:1-9, 17-20) Ka morago ga gore Saulo a itshole gomme e be Mokriste o ile a leboga kudu ka ge Jehofa a ile a mmontšha botho le kgaugelo. (Bala 1 Timotheo 1:12-15.) O ile a ruta bana babo le dikgaetšedi gore: “Modimo ka botho bja gagwe o leka go go iša boitsholong.”—Baroma 2:4.

¹⁶ Paulo o ile a dira’ng ge a be a ekwa gore bana babo le dikgaetšedi ba phuthego ya Korinthe, ba tlogela monna yo a dirago bootswa gore a tšwele pele a le ka phuthegong? Seo a ilego a se dira, se bontšha kamoo Jehofa a ratago batho bao a ba layago le go ba gaugela ge ba bontšha gore ba a itshola. Sehlogong se se latelago re tlo bona gore re ka mo ekiša bjang, le go kwa gore go ile gwa direga’ng phuthegong ya Korinthe.