1. Jehofa o nyaka gore batho ka moka ba dire’ng?

 JEHOFA o neile batho tokologo ya go itirela diphetho. Re diriša tokologo yeo go dira diphetho letšatši le lengwe le le lengwe. E nngwe ya diphetho tše bohlokwa tšeo motho a ka di dirago ke go ineela go Jehofa le go ba karolo ya lapa la gagwe. Jehofa o nyaka gore yo mongwe le yo mongwe a dire phetho yeo. Ka baka la’ng? Ka gobane o rata batho e bile o nyaka gore ba dule ba thabile. O nyaka gore ba thabele go gwerana le yena e bile ba phele go ya go ile.—Doit. 30:19, 20; Bagal. 6:7, 8.

2. Jehofa o ikwa bjang ge batho ba dira dibe gomme ba sa itshole? (1 Johane 2:1)

² Jehofa ga a gapeletše batho gore ba mo hlankele. O dumelela motho yo mongwe le yo mongwe a ikgethela gore o nyaka go dira eng. Bakriste ba swanetše go dira eng ge Mokriste a dira sebe se segolo? Ge e ba motho yoo a sa itshole o swanetše go tlošwa ka phuthegong. (1 Bakor. 5:13) Le ge motho yoo a ka tlošwa ka phuthegong, Jehofa o duma gore a itshole gomme a boele go yena. Ge e le gabotse, lebaka le legolo la gore Jehofa a re nee topollo ke gore a kgone go lebalela batho bao ba itsholelago dibe tša bona. (Bala 1 Johane 2:1.) Modimo wa rena yo a re ratago o kgothaletša batho bao ba dirilego dibe tše dikgolo gore ba itshole.—Sak. 1:3; Baroma 2:4; Jak. 4:8.

3. Re tlo boledišana ka eng sehlogong se?

³ Jehofa o re botša gore o ikwa bjang ka dibe le batho bao ba di dirago, gomme o nyaka gore re mo ekiše. Sehlogong se re tlo ithuta kamoo re ka mo ekišago ka gona. Ge re dutše re bala sehlogo se, re tlo ithuta ka tsela yeo phuthego ya Korinthe e ilego ya swaragana le motho yo a bego a dirile sebe se segolo, ra kwa ka seo moapostola Paulo a ilego a botša phuthego gore e se dire ka morago ga gore motho yoo a itshole, ke moka ra kwa seo pego ye ya Beibele e re rutago sona ka tsela yeo Jehofa a lebelelago Bakriste bao ba dirilego dibe tše dikgolo.

PHUTHEGO E ILE YA DIRA ENG GE MOTHO YO MONGWE A BE A DIRILE SEBE SE SEGOLO?

4. Go ile gwa direga’ng kua phuthegong ya Korinthe? (1 Bakorinthe 5:1, 2)

⁴ Bala 1 Bakorinthe 5:1, 2. Nakong ya ge Paulo a le leetong la boraro la boromiwa o ile a kwa ditaba tšeo di ješago dihlong ka phuthego yeo e bego e sa tšwa go hlongwa kua Korinthe. Monna yo mongwe phuthegong yeo o be a dula le mosadi wa tatagwe. Seo monna yo a bego a se dira se be se tšhoša, e bile e be e le boitshwaro “bjo bo sego gona gaešita le gare ga ditšhaba.” Phuthego yeo e be e sa bone phošo ka seo monna yo a bego a se dira, e bile e ile ya no mo tlogela a le ka phuthegong. Mohlomongwe ba bangwe ka phuthegong ba be ba nagana gore Modimo o kwela batho bao ba sa phethagalago bohloko, e bile o a ba kwešiša. Eupša Jehofa ga a nyake batho ba dira dibe. Tsela yeo monna yo a bego a itshwere ka yona e be e senya leina le lebotse la phuthego. Le gona, o be a ka dira gore Bakriste ba bangwe ba feleletše ba swana le yena. Ka gona, Paulo o ile a laela bagolo gore ba dire’ng?

5. Paulo o ile a botša phuthego gore e dire’ng, le gona o be a era go re’ng? (1 Bakorinthe 5:13) (Bona le seswantšho.)

⁵ Bala 1 Bakorinthe 5:13. Jehofa o ile a thuša Paulo go ngwala lengwalo leo le bego le laela gore motho yo a sa itsholego a tlošwe ka phuthegong. Bakriste ba bangwe bona ba be ba swanetše go swara bjang motho yo a tlošitšwego ka phuthegong? Paulo o ile a ba botša gore ba “lese go gwerana” le yena. O be a era go re’ng? Paulo o ile a hlalosa gore taelo yeo e be e era gore ‘le go ja ba se ke ba ja le motho yoo.’ (1 Bakor. 5:11) Go ja le motho go ka dira gore o feleletše o swere magang le yena. Mo re kgona go bona gore Paulo o be a era gore phuthego e se ke ya gwerana le monna yoo. Se se be se tlo thuša ba bangwe ka phuthegong  gore ba se ke ba feleletša ba itshwara go swana le yena. (1 Bakor. 5:5-7) Le gona, ge batho ba bangwe ka phuthegong ba se sa gwerana le monna yoo, o be a tlo bona gore ga e sa le mogwera wa Jehofa, gomme seo sa dira gore a itshole.

6. Phuthego e ile ya dira’ng ka morago ga gore e hwetše lengwalo la go tšwa go Paulo, le gona go ile gwa direga’ng ka monna yo a bego a dirile sebe se segolo?

⁶ Ka morago ga gore Paulo a romele Bakriste bao ba lego Korinthe lengwalo, o ile a thoma go ipotšiša ge e ba ba tla dira seo a ba boditšego sona. Ka morago Tito o ile a botša Paulo selo seo se ilego sa dira gore a thabe. Phuthego e be e dirile dilo ka moka tšeo Paulo a ba ngwaletšego tšona. (2 Bakor. 7:6, 7) Ka morago ga dikgwedi tše itšego Paulo a rometše phuthego yeo lengwalo, monna yoo o be a šetše a itshotše. O be a itshwara gabotse e bile a latela melao ya Jehofa. (2 Bakor. 7:8-11) Paulo o ile a botša phuthego gore e dire’ng?

 PHUTHEGO E BE E SWANETŠE GO SWARA BJANG MOTHO YO A ITSHOLAGO?

7. Monna yo a bego a dirile sebe se segolo o ile a dira’ng ka morago ga gore a tlošwe ka phuthegong? (2 Bakorinthe 2:5-8)

⁷ Bala 2 Bakorinthe 2:5-8. Paulo o ngwadile gore ‘kgalemelo yeo e neilwego ke ba bantšhi ba lena, e be e lekane bakeng sa motho yo bjalo.’ Ka mantšu a mangwe, tsela yeo monna yoo a kgalemetšwego ka yona e mo thušitše. E mo thušitše bjang? E dirile gore a itshole.—Baheb. 12:11.

8. Paulo o ile a botša phuthego gore e dire’ng ka morago ga gore monna yo a bego a dirile sebe se segolo a itshole?

⁸ Paulo o ile a laela Bakorinthe gore ‘ba lebalele ka botho’ motho yo a dirilego sebe le go mo ‘kgonthišetša lerato la bona.’ Hlokomela gore Paulo o ile a laela bagolo gore ba bušetše monna yoo ka phuthegong ka ge a be a itshola. O be a nyaka gore ba bontšhe monna yoo gore ba a mo rata e bile ba mo lebaletše. Ba be ba swanetše go dira bjalo ka dilo tšeo ba di bolelago, tsela yeo ba itshwarago ka yona le dilo tšeo ba di dirago. Dilo tšeo ka moka di be di tla bontšha gore ba mo amogela gape ka phuthegong.

9. Ke ka baka la’ng ba bangwe ba ka ba ba ile ba thatafalelwa ke go lebalela monna yo a bego a dirile sebe se segolo?

⁹ Na ba bangwe ka phuthegong ba ka ba ba ile ba thatafalelwa ke go amogela monna yo a bego a itshola? Beibele ga e re botše, eupša go ka direga gore ba ile ba thatafalelwa ke go mo amogela. Tsela yeo a bego a itshwere ka yona, e dirile gore phuthego ka moka e be le mathata, le gona go ka direga gore ba bangwe ba be ba sa kwešitšwe bohloko ke dilo tšeo a bego a di dira. Ba bangwe ba ka ba ba be ba nagana gore ga go botse gore a no amogelwa gape ka phuthegong tše ekego ga se gwa direga selo, mola bona ba be ba šoma ka thata gore ba kwe melao ya Jehofa. (Bapiša le Luka 15:28-30.) Ke ka baka la’ng go be go le bohlokwa gore phuthego e bontšhe monna yo gore e tloga e mo rata ge a boela ka phuthegong?

10-11. Go be go ka direga’ng ge e ba bagolo ba be ba ka gana go lebalela motho yo a itsholago?

¹⁰ Nagana gore go be go tla direga eng ge nkabe bagolo ba gane go bušetša monna yo a bego a itshola ka phuthegong, goba ka morago ga gore a bušetšwe phuthego e palelwe ke go mmontšha gore e a mo rata. O be a ka ‘imelwa ke go nyama go feta tekano.’ O be a ka ipona a se na mohola. E bile o be a ka tlogela go leka go lokiša segwera sa gagwe le Jehofa.

¹¹ Se sengwe gape ke gore ge nkabe Bakriste bao ba palelwe ke go swarela monna yoo, ba be ba tlo senya segwera sa bona le Jehofa. Ka baka la’ng? Ka gobane ba tla be ba sa ekiše Jehofa yo a lebalelago batho bao ba itsholago, go e na le moo, ba tla be ba ekiša Sathane yo a lego sehlogo e bile a sa kwele batho bohloko. Le gona, ba tla be ba dumelela Sathane gore a ba diriše go nyamiša monna yo gore a se ke a hlankela Jehofa.”—2 Bakor. 2:10, 11; Baef. 4:27.

12. Phuthego e be e ka ekiša bjang Jehofa?

¹² Bakriste ba kua Korinthe ba be ba ka ekiša bjang Jehofa, e sego Sathane? Ba be ba swanetše go lebalela batho bao ba itsholago ka baka la dibe tše dikgolo tšeo ba di dirilego. Ekwa seo bangwadi ba bangwe ba Beibele ba se boletšego ka Jehofa. Dafida o itše: “O lokile e bile o dula o ikemišeditše go lebalela.” (Ps. 86:5) Mika o ngwadile gore: “Ke Modimo ofe yo a swanago le wena, yo a swarelago diphošo le go lebalela dibe tša batho?” (Mika 7:18) Jesaya yena o rile: “Anke motho yo kgopo a tlogele tsela ya gagwe, le yo kotsi a tlogele menagano ya gagwe; anke a boele go Jehofa  yo a tlago go mo gaugela, le go Modimo wa rena ka gobane o tla mo lebalela kudu.”—Jes. 55:7.

13. Ke ka baka la’ng monna yo a bego a itshola a be a swanetše go bušetšwa ka phuthegong? (Bona lepokisi leo le rego “ Monna wa Kua Korinthe o Bušeditšwe Neng?”)

¹³ Bakriste ba kua phuthegong ya Korinthe ba be ba swanetše go ekiša Jehofa gomme ba amogele monna yo a bego a itshola ka phuthegong, le go mmontšha gore ba a mo rata. Paulo o boletše gore ge e ba ba lebalela monna yoo, ba tla be ba bontšha gore ‘ba a kwa dilong tšohle.’ (2 Bakor. 2:9) Ke nnete gore go be go fetile dikgwedi tše sego kae monna yoo a tlošitšwe ka phuthegong, eupša o be a itshola. Ka gona go be go ka se nyakege gore go fete nako e telele pele a ka bušetšwa ka phuthegong.

KAMOO RE KA EKIŠAGO JEHOFA YO A NAGO LE TOKA LE KWELOBOHLOKO

14-15. Re ithuta’ng tseleng yeo phuthego ya Korinthe e ilego ya swaragana le motho yo a bego a dirile sebe se segolo? (2 Petro 3:9) (Bona le seswantšho.)

¹⁴ Pego ya mabapi le kamoo phuthego ya Korinthe e ilego ya swaragana le monna yo a bego a dirilego sebe se segolo, e ile ya ngwalwa ka Beibeleng gore ‘e re rute.’ (Baroma 15:4) Pego ye e re ruta gore Jehofa ga a nyake gore bahlanka ba gagwe ba dire dibe tše dikgolo. Ga a nyake re nagana gore batho bao ba dirago dibe tše dikgolo e bile ba sa itshole ba ka no tšwela pele ba le ka phuthegong go  sa direge selo ka bona. Le ge Jehofa a re kwela bohloko, ga a no re dumelela gore re itshware ka tsela e nngwe le e nngwe, e bile ga a fetole melao ya gagwe. (Juda 4) Ge nkabe Jehofa a no dumelela batho bao ba sa itsholego gore ba tšwele pele ba le ka phuthegong, seo se be se ka se bontšhe gore o re kwela bohloko ka gobane go be go tla ba le mathata a mantšhi ka phuthegong.—Die. 13:20; 1 Bakor. 15:33.

¹⁵ Re a tseba gore Jehofa ga a nyake gore go be le motho yo a fedišwago. O nyaka gore ge e ba go kgonega, batho ka moka ba phologe. Ge batho ba itshola e bile ba nyaka go lokiša segwera sa bona le yena, o ba kwela bohloko. (Hesek. 33:11; bala 2 Petro 3:9.) Ge monna wa kua Korinthe a be a itshola e bile a tlogela sebe seo a bego a se dira, Jehofa o ile a diriša Paulo go botša phuthego gore e lebalele monna yoo le go mo amogela ka phuthegong.

16. O ikwa bjang ka tsela yeo phuthego ya Korinthe e ilego ya swaragana le motho yo a bego a dirile sebe se segolo?

¹⁶ Tsela yeo phuthego ya Korinthe e ilego ya swaragana le monna yo a dirilego sebe ka gona, e re bontšhitše gore Jehofa o na le lerato, o lokile e bile o na le toka. (Ps. 33:5) Dika tše tše dibotse tša Jehofa di dira gore re dule re mo hlankela. Ka moka ga rena re badiradibe, gomme re hloka gore Jehofa a re lebalele. Re leboga gore Jehofa o re neile topollo yeo e dirago gore a kgone go re lebalela. Go a thabiša go tseba gore Jehofa o tloga a rata batho ba gagwe, e bile o nyaka gore dilo di ba sepelele gabotse.

17. Re tlo boledišana ka eng dihlogong tše di latelago?

¹⁷ Lehono re swanetše go swaragana bjang le batho bao ba dirilego dibe tše dikgolo? Bagolo ba ka ekiša bjang tsela yeo Jehofa a ratago batho ka yona ka go leka go thuša motho yo a dirilego sebe se segolo gore a itshole? Phuthego e swanetše go dira’ng ge bagolo ba tloša motho ka phuthegong, goba ba mmušetša ka phuthegong? Re tlo araba dipotšišo tše dihlogong tšeo di latelago.