Moapostola Paulo o ile a ngwalela Bathesalonika lengwalo a ba botša gore: “Ge e ba motho le ge e le ofe a sa kwe lentšu la rena ka lengwalo le, le dule le mo swaile.” (2 Bathes. 3:14) Nakong e fetilego re be re re ye ke tlhahlo yeo e lebišitšwego go bagolo. Ba be ba ka nea polelo ya go lemoša phuthego ge go be go na le Mokriste yo a bego a sa latele melao ya motheo ya Beibele le ge a be a newa keletšo gantšhi. Ke moka ka morago bagoeledi ba be ba se sa gwerana le motho yo a swailwego.

Tsela yeo re bego re kwešiša lengwalo le ka yona e fetogile. Gona bjale re a kwešiša gore keletšo ya Paulo e lebišitšwe go Mokriste yo mongwe le yo mongwe yo a swanetšego go dira phetho. Ka gona ga go hlokege gore bagolo ba nee polelo ya go lemoša phuthego. Ke ka baka la eng re fetošitše tsela yeo re bego re kwešiša lengwalo le ka yona? A re kweng gore Paulo o be a bolela ka eng ge a be a nea keletšo ye.

Paulo o boletše gore ba bangwe ka phuthegong yeo ba be ba sepela ka go “hloka thulaganyo.” Ba be ba sa theetše keletšo yeo e tšwago ka Lentšung la Modimo. Nakong e fetilego ge a be a ba etetše, o ile a ba nea taelo yeo e rego: “Ge e ba motho a sa nyake go šoma le go ja a se ke a ja.” Eupša ba bangwe ba be ba sa nyake go šoma gore ba itlhokomele le ge ba be ba ka kgona go dira bjalo. Le gona ba be ba tsenatsena ditaba tša batho. Bakriste ba be ba swanetše go swara bjang batho ba mohuta woo?—2 Bathes. 3:6, 10-12.

Paulo o ile a bolela gore “le dule le mo swaile.” Lentšu la Segerika leo le dirišitšwego mo le ra gore Bakriste ba swanetše go lemoga motho wa mohuta woo gomme ba ralokele kgole le yena. Paulo o be a bolela le phuthego ka moka, e sego bagolo feela. (2 Bathes. 1:1; 3:6) Ka gona ge Mokriste yo mongwe le yo mongwe a be a ka lemoga gore Mokriste yo a itšego ga a kwe keletšo yeo e tšwago ka Beibeleng, o be a ka kgetha go tlogela go gwerana le yena.

Na Paulo o be a era gore motho yo bjalo o swanetše go swarwa bjalo ka ge eka o tlošitšwe ka phuthegong? Aowa, Paulo o itše: “Le tšweleng pele le mo eletša e le ngwanabo lena.” Bakriste ba be ba ka tšwela pele ba dirišana le motho yoo ge ba le dibokeng le tšhemong. Eupša ba be ba ka kgetha go se mo meme ge ba eya dipokanong tša bogwera goba ba ithabiša. Ka baka la’ng? Paulo o itše: “Gore a hlabje ke dihlong.” Ka ge Mokriste yoo a swailwe, a ka thoma go lešwa dihlong ke tsela yeo a itshwarago ka yona gomme a fetoga.—2 Bathes. 3:14, 15.

Lehono Bakriste ba ka diriša bjang keletšo ye? Sa mathomo re swanetše go kgonthišetša gore tsela yeo motho yoo a itshwerego ka yona, ka nnete ke ya go “hloka thulaganyo,” go etša ge Paulo a hlalositše. O be a sa bolele ka batho bao ba dirago dilo tšeo matswalo a rena a sa dumelelanego le tšona eupša di sa thulane le melao ya motheo ya Beibele, e bile o be a sa bolele ka bao ba dirago diphetho tšeo di sa swanego le tša rena. Le gona o be a sa bolele ka batho bao ba re kwešitšego bohloko. Paulo o be a bolela ka batho bao ba hweditšego keletšo yeo e tšwago ka Lentšung la Modimo eupša ba no kgetha go se e kwe.

Lehono ge re lemoga gore Mokristegotee le rena o gana go kwa keletšo yeo e lego ka Lentšung la Modimo a, re tlo kgetha go se sa gwerana le yena. Ka ge e le rena re itirelago phetho yeo, ga se ra swanela go bolela ka taba yeo le batho ba bangwe, ntle le bao re dulago le bona ka gae. Re ka tšwela pele re dirišana le motho yoo ge re le dibokeng le ge re le tšhemong. Ge a thoma go kwa keletšo yeo e lego ka Beibeleng re ka gwerana le yena gape.