1. Ke ka baka la’ng Bakriste ba swanetše go kolobetšwa? (Bona seswantšho se se lego ka mo godimo.)

NGWAGA o mongwe le o mongwe barutwana ba diketekete ba Beibele ba a kolobetšwa. Ba bantši ba bona ke bafsa le bana bao ba ka bago ba godišeditšwe therešong. Na le wena o yo mongwe wa bona? Ge e ba go le bjalo, re a go reta. Mokriste o swanetše go kolobetšwa e le gore a tle a phološwe.​—Mat. 28:19, 20; 1 Pet. 3:21.

2. Ke ka baka la’ng motho a se a swanela go tšhaba go ineela go Jehofa?

² Le ge go kolobetšwa go dira gore motho a šegofatšwe ka ditsela tše dintši, eupša go na le maikarabelo. Maikarabelo ao ke afe? Letšatšing leo o kolobeditšwego ka lona, o ile wa araba ka ee potšišong ye e rego, “Motheong wa sehlabelo sa Jesu Kriste, na o sokologile dibeng tša gago gomme wa ineela go Jehofa gore o dire thato ya gagwe?” Ge o be o kolobetšwa o be o bontšha gore o ineetše go Jehofa. O tshepišitše Jehofa gore o a mo rata le gore o tla dira thato ya gagwe pele ga dilo ka moka. Go ineela go Modimo ga se papadi. Eupša na o swanetše go itsholela gore o ile wa ineela go yena?  Aowa! O ka se tsoge wa itsholela gore o dirile phetho ya go ineela go Jehofa. Nagana ka taba ye! Ge motho a le kgole le Jehofa o laolwa ke Sathane e bile Sathane ga a nyake gore o tle o phologe. Ge e le gabotse, a ka rata go bona o fedišwa le yena ka ge o ile wa mo thekga go lwantšha bogoši bja Jehofa.

3. Go ineela go Jehofa go tliša ditšhegofatšo dife?

³ Go e na le gore o thekge Sathane, nagana ka ditšhegofatšo tšeo o nago le tšona ka ge o le Mokriste yo a ineetšego le yo a kolobeditšwego. Ka ge ga bjale o phelela Jehofa o ka bolela o kgodišegile gore: “Jehofa o ka lehlakoreng la ka; nka se boife. Motho wa lefaseng a ka ntira’ng?” (Ps. 118:6) Ga go na tokelo yeo e phalago go ba ka lehlakoreng la Jehofa le go amogelwa ke yena.

4, 5. (a) Ke ka tsela efe go ineela go Jehofa e lego boikarabelo bja gago? (b) Ke mathata afe ao bafsa le batho ba bagolo ba kopanago le ona?

⁴ Ka ge o le Mokriste yo a kolobeditšwego, tswalano ya gago le Jehofa ga e swane le ntlo yeo batswadi ba gago ba ka go šielago yona gore e be bohwa bja gago. Go fapana le seo, ga bjale o swanetše go šomela phološo ya gago gaešita le ge o dula le batswadi ba gago. Ke ka baka la’ng o swanetše go dula gopola seo? Ka gobane o ka se tsebe mathata ao a tlago go go wela nakong e tlago. Ka mohlala, o ka ba o ile wa kolobetšwa o sa le ngwana gomme ga bjale o thoma go ikwa ka tsela e itšego ka batho ba bong bjo bo fapanego le bja gago. Mofsa yo mongwe o itše: “Gantši ngwana a ka se kgopišwe ke go se je khekhe ya letšatši la matswalo sekolong ka gobane e le Hlatse ya Jehofa. Eupša ge kganyogo ya ngwana yoo ya go ba le thobalano e dutše e gola, ngwana yoo o swanetše go kgodišega gore go kwa melao ya Modimo ka mehla ke phetho e botse.”

⁵ Ke therešo gore mathata ga a wele bafsa feela. Le batho bao ba kolobeditšwego e le ba bagolo ba welwa ke mathata a mantši. Mathata ao e ka ba a lenyalo, go babja goba mošomo. Ee, motho yo mongwe le yo mongwe go sa šetšwe gore ke yo mo kaakaang, o tlo kopana le mathata ao a tlago go bontšha ge e ba a botegela Jehofa.​—Jak. 1:12-14.

6. (a) Go ineela go Jehofa go sa šetšwe seo se go diragalelago bophelong go bolela’ng? (b) O ka ithuta’ng lengwalong la Bafilipi 4:11-13?

⁶ E le gore o dule o botegela Jehofa maemong ka moka, le ka mohla ga se wa swanela go lebala gore o swanetše go dula o phetha seo o mo tshepišitšego sona go sa šetšwe seo se go diragalelago bophelong. Seo se bolela gore o boditše Mmuši wa legohle e lego Jehofa gore o tlo dula o mo hlankela gaešita le ge bagwera goba batswadi ba gago ba tlogela go dira bjalo. (Ps. 27:10) Maemong ka moka, kgopela Jehofa gore a go thuše go dula o phetha seo o mo tshepišitšego sona.​—Bala Bafilipi 4:11-13.

7. Go šomela phološo “ka go boifa le go thothomela” go bolela’ng?

⁷ Jehofa o nyaka gore o be mogwera wa gagwe. Eupša go nyakega gore o šome ka thata gore o dule o gwerane le yena e le gore a tle a go phološe. Ge e le gabotse, Bafilipi 2:12 e re: “Dulang le šomela phološo ya lena ka go boifa le go thothomela.” Mantšu a a bontšha gore o swanetšego go tseba kamoo o ka dulago o gwerane le Jehofa le go mmotegela go sa šetšwe mathata ao a ka go welago. Ga se wa swanela go no ipotša gore o tla kgona. Gaešita le bahlanka ba kgale ba Jehofa ba ile ba palelwa ke go dula ba mmotegela. Ka gona, ke dilo dife tšeo wena o ka di dirago gore o tle o phološwe?

8. Thuto ya motho ka noši e akaretša’ng, gona ke ka baka la’ng e le bohlokwa?

⁸ E le gore re gwerane le Jehofa re swanetše go mo theetša e bile re swanetše go bolela le yena. Tsela e kgolo yeo re theetšago Jehofa ka yona ke ka go ithuta Beibele. Seo se akaretša go bala Lentšu la Modimo le dikgatišo tšeo di theilwego Beibeleng gomme wa naganišiša ka seo o se badilego. Ge o dutše o dira bjalo, gopola gore go ithuta Beibele ga go swane le go dira mošomo wa sekolo. Ga se gwa swanela go ba bjalo ka ge eka o swara seo o ithutago sona ka hlogo e le feela gore o tle o phase tlhahlobo ya sekolong. Go e na le moo, go ithuta go swana le go tšea leeto le le thabišago leo o tšamago o utolla dilo tše difsa le go ithuta ka Jehofa. Go dira bjalo go tla go thuša gore o batamele kgauswi le Modimo, gomme le yena a go batamele.​—Jak. 4:8.

9. Wena o thušitšwe ke’ng gore thuto ya gago ya motho ka noši e thabiše?

⁹ Mokgatlo wa Jehofa o re neile dilo tšeo di ka go thušago gore o be le lenaneo le lebotse la go ithuta Beibele. Ka mohlala, go jw.org/nso ka tlase ga “Bafsa,” go na le karolo ya “Mešomo ya go Ithuta Beibele” yeo e ka go thušago gore o ithute ka ditiragalo tša ka Beibeleng. Gona moo wepesaeteng yeo, karolo ya tlhahlo ya go ithuta ya “Ke Eng Seo ge e le Gabotse Beibele e se Rutago?” e ka go thuša gore o kgodišege ka ditumelo tša gago. E ka go thuša gape gore o ithute kamoo o ka hlalosetšago batho ba bangwe ditumelo tša gago. Le gona ka go Phafoga! ya July–September 2009, sehlogong se se rego, “Bafsa ba a Botšiša . . . Nka Dira Bjang Gore go Bala Beibele go Thabiše?” o ka hwetša dilo tše dingwe tšeo di ka go thušago go ithuta ka Modimo. Go bala le go naganišiša go ka go thuša gore o šomele phologo ya gago.​—Bala Psalme 119:105.

10. Ke ka baka la’ng go rapela go le bohlokwa?

¹⁰ Ge re ithuta Beibele, re theetša Jehofa gomme ge re rapela re bolela le yena. Ga se ra swanela go tšea thapelo e no ba mokgwa goba e le yeo e re thušago go hwetša mahlatse. Go e na le moo, ge re rapela re boledišana le Mmopi wa rena. Jehofa o nyaka gore o bolele le yena. (Bala Bafilipi 4:6.) Ge o tshwenyegile, Beibele e go eletša gore o “[lahlele] maima a gago go Jehofa.” (Ps. 55:22) Na o a dumela gore keletšo ye ya Beibele e ka go thuša? Go na le bana  babo rena le dikgaetšedi ba dimilione bao ba ka go kgonthišetšago gore keletšo yeo e ile ya ba thuša. Le wena e ka go thuša!

11. Ke ka baka la’ng re swanetše go dula re leboga Jehofa?

¹¹ Ga se ra swanela go rapela Jehofa ge feela re nyaka thušo. Beibele e re: “Ipontšheng le le ba lebogago.” (Bakol. 3:15) Ka dinako tše dingwe re tshwenyega kudu ka mathata ao re nago le ona moo re feleletšago re sa lemoge ditšhegofatšo tše dintši tšeo re nago le tšona. Gore’ng mo letšatšing o sa iphe nako ya go nagana ka bonyenyane dilo tše tharo tšeo o ka lebogago Modimo ka tšona? Ke moka rapela Jehofa o mo leboge ditšhegofatšo tšeo. Mofsa yo a bitšwago Abigail, yo a ilego a kolobetšwa a na le mengwaga e 12, o re: “Ke nagana gore re swanetše go leboga Jehofa go feta motho le ge e le ofe mo lefaseng. Nako le nako ge Jehofa a re a re direla dilo tše dibotse, re swanetše go mo leboga. Ke ile ka kwa kgopotšo ye e botse: ‘O be o ka ikwa bjang ge o ka re o tsoga wa hwetša dilo tšeo o sego wa di leboga maabane di se gona?’” *

12, 13. Ke ka baka la’ng go le bohlokwa gore o nagane ka tsela yeo Jehofa a ilego a go thuša ka yona?

¹² Kgoši Dafida wa mehleng ya kgale yoo Jehofa a ilego a mo hlakodiša mathateng a mantši a magolo, o itše: “Latswang le be le boneng gore Jehofa o lokile; go thaba monna yo a tšhabelago go yena.” (Ps. 34:8) Temana yeo e gatelela bohlokwa bja go iponela letsogo la Jehofa. Ge o bala Beibele le dikgatišo tša rena e bile o eba gona dibokeng, o kwa ka diphihlelo tše di kgothatšago tša batho bao Jehofa a ilego a ba thuša gore ba dule ba mmotegela. Eupša ge tswalano ya gago le yena e dutše e gola o swanetše go iponela letsogo la Jehofa ka bowena. Wena o ile wa latswa bjang gomme wa bona gore Jehofa o lokile?

¹³ Bakriste ba bangwe ba ile ba latswa gomme ba bona gore Jehofa o lokile. Jehofa o ile a ba laletša gore ba mmatamele le go batamela Morwa wa gagwe. Jesu o itše: “Ga go motho yo a ka tlago go nna ge a sa gogwe ke Tate yo a nthomilego.” (Joh. 6:44) Na le wena mantšu ao a a go ama? Mofsa a ka re, ‘Jehofa o ile a goga batswadi ba ka gore ba tle go Yena, gomme nna ka fo latela.’ Eupša ge o be o neela bophelo bja gago go Jehofa gomme o kolobetšwa, o bontšhitše gore o na le tswalano e kgethegilego le Jehofa. Ga bjale o go tseba e le ka kgonthe. Beibele e re kgonthišetša ka gore: “Ge e ba motho a rata Modimo, yena yoo o tsebja ke yena.” (1 Bakor. 8:3) Ka mehla tšeela godimo karolo yeo Jehofa a go neilego yona ka mokgatlong wa gagwe.

14, 15. Go ya tšhemong go ka tiiša bjang tumelo ya gago?

¹⁴ Le gona o ka bona gore Jehofa o lokile ge a go nea sebete sa go bolela le batho ba bangwe ka ditumelo tša gago ge o le tšhemong gotee le ge o le sekolong. Bafsa ba bangwe ba thatafalelwa ke go bolela le dithaka tša bona ka Modimo ge ba le sekolong. Mohlomongwe le wena o a kwešiša gore ke ka baka la eng ba thatafalelwa ke seo. Lebaka ke gore ga o tsebe gore dithaka tšeo di tlo arabela bjang. Go bolela le bana bao e lego sehlopha go ka ba thata kudu go feta ge o bolela le ngwana o tee yo o tsenago le yena ka klaseng. Ke’ng seo se ka go thušago?

¹⁵ Sa pele, nagana ka seo se dirago gore o kgodišege gore seo o se dumelago ke nnete. O ka diriša tlhahlo ya go ithuta yeo e lego go jw.org/nso. E diretšwe go go thuša gore o naganišiše ka seo o se dumelago, lebaka la gore o se dumele, le kamoo o ka se hlalosetšago ba bangwe. Ge o tloga o kgodišegile ka ditumelo tša  gago e bile o itokišitše gabotse, o tlo tutueletšega go botša batho ba bangwe ka Jehofa.​—Jer. 20:8, 9.

16. Ke’ng seo se ka go thušago gore o se tšhabe go botša ba bangwe ditumelo tša gago?

¹⁶ Gaešita le ge o lokišeditše, o ka tšhošwa ke go botša ba bangwe ka ditumelo tša gago. Kgaetšedi yo a nago le mengwaga e 18 yoo a ilego a kolobetšwa a na le mengwaga e 13, o re, “Ke tseba seo ke se dumelago eupša ka dinako tše dingwe ke thatafalelwa ke go se hlalosa ka tsela e kwagalago.” O fenya bjang bothata bjo? O re: “Ge ke na le dithaka tša ka re itshwaretše magang, ga ke ba rerele, ke leka go no ipolelela. Ka ge bana bao ke tsenago le bona sekolo ba rata go bolela ka dilo tšeo ba di dirago, le nna ke swanetše go ikwa ka tsela yeo. Ka gona ke no bolela okare ke a raloka go swana le gore: ‘Letšatši le lengwe ge ke be ke ruta motho yo mongwe ka Beibele, ke ile ka . . . ’ Ka morago ga moo, ka bolela taba yeo ke nyakago go mmotša yona. Le ge ke sa bolele ka Beibele di tloga fase, o tla hwetša bana ba bangwe ba nyaka go tseba gore ke dira eng ge ke ruta batho Beibele. Se se dira gore ba fele ba mpotšiša dilo tše dingwe ka Beibele. Ge ke diriša mokgwa wo gantši, go ba bonolo gore ke thome poledišano ya Beibele. Le gona ka morago ga gore ke bolele le bona, ke a thaba!”

17. Tsela yeo o lebelelago tumelo ya gago ka yona e ka go thuša bjang go botša ba bangwe ka yona?

¹⁷ Ge o hlompha batho ba bangwe e bile o bontšha gore o ba tšeela godimo, gantši go ba bonolo gore ba go hlomphe le go hlompha ditumelo tša gago. Olivia wa mengwaga e 17 yo a kolobeditšwego e sa le ngwana, o re: “Ke be ke dula ke tšhoga gore ge batho ba ka re ba bolela, nna ka tsenya Beibele tabeng yeo, ba tla ntšea okare ke mmamoruti.” Eupša o ile a thoma go fetoša tsela yeo a naganago ka yona. Go e na le gore a nagane kudu ka dilo tše di mo tšhošago, Olivia o re: “Bafsa ba bantši ga ba tsebe selo ka Dihlatse tša Jehofa. Dihlatse feela tšeo ba di tsebago ke rena. Ka gona, tsela yeo re itshwarago ka yona e ka dira gore batho ba theetše molaetša wa Beibele goba ba se o theetše. Ka baka leo, ge re lewa ke dihlong goba re thatafalelwa ke go botša batho ba bangwe ka tumelo ya rena, goba re tšhoga ge re bolela le bona, gona ba ka nagana gore ga re ikgantšhe ka go ba Dihlatse tša Jehofa. E bile ba ka se rate molaetša wa rena ge e ba re se ra kgodišega ka seo re se dumelago. Eupša ge e ba re bolela le bona re lokologile, re kgodišegile ka seo re ba botšago sona e bile re bolela le bona okare re swere magang, gona ba tlo re hlompha.”

18. O swanetše go dira’ng gore Jehofa a tle a go phološe?

¹⁸ Go etša ge re bone, go šomela Jehofa gore a tle a re phološe ke boikarabelo bjo bogolo. Boikarabelo bjoo bo akaretša go bala Lentšu la Modimo le go naganišiša ka lona, go rapela le go nagana ka ditsela tšeo Jehofa a ilego a go šegofatša ka tšona. Go dira dilo tšeo go tla dira gore o tshepe le go feta gore Jehofa ke mogwera wa gago, gomme seo sa go dira gore o se tšhabe go botša ba bangwe ka ditumelo tša gago.​—Bala Psalme 73:28.

19. Ke ka baka la’ng go le bohlokwa go dira maiteko a gore o šomele Jehofa gore a tle a go phološe?

¹⁹ Jesu o itše: “Ge e ba motho le ge e le ofe a nyaka go ntšhala morago, a a itatole gomme a rwale kota ya gagwe ya tlhokofatšo a ntatele ka go se kgaotše.” (Mat. 16:24) Go molaleng gore ge e ba Mokriste a nyaka go latela Jesu o swanetše go ineela go Jehofa le go kolobetšwa. Ee, go kolobetšwa go dira gore o tle o hwetše ditšhegofatšo tše dintši gona bjale le Paradeiseng. Ka gona o na le mabaka a mantši a gore o šomele Jehofa gore o tle o phologe!