1, 2. Phihlelo ya Tony e re bontšha bjang gore motho a ka fetoga?

TONY o gotše a se na tatagwe. O be a tsena sekolo sa sekontari, eupša o be a sa rate sekolo. E bile o be a nagana le go tlogela sekolo. Mafelobekeng a mangwe le a mangwe Tony o be a eya dimubing le bagwera ba gagwe. O be a sa rate go lwa e bile a sa diriše dihlaretagi, eupša o be a sa tsebe gore o phelela eng. Tony o be a nagana gore Modimo ga a gona. Ka gona ka letšatši le lengwe o ile a kopana le banyalani ba bangwe ba Dihlatse tša Jehofa, gomme a ba botša gore o nagana gore Modimo ga a gona. Banyalani bao ba ile ba mo nea diporoutšha tše pedi, ya The Origin of Life—Five Questions Worth Asking le ya Na Dilo tše di Phelago di Bopilwe?

² Ge banyalani bao ba etela Tony gape, o be a šetše a dumela gore Modimo o gona. O be a badile diporoutšha tšeo kudu moo e lego gore di be di šetše di šošobane. Tony o ile a ba botša gore: “Bjale ke a dumela gore Modimo o gona.” O ile a thoma go ithuta Beibele le banyalani bao, ke moka ganyenyane-ganyenyane bophelo bja gagwe bo ile bja fetoga. O ile a thoma le go phasa gabotse sekolong. Gaešita le hlogo ya sekolo seo Tony a bego a tsena go sona e ile ya makala kudu gore Tony o fetogile. Hlogo ya sekolo e ile ya botša Tony gore: “O fetogile, e bile o phasa gabotse kudu. Na o fetošitšwe ke gore o ithuta le Dihlatse  tša Jehofa?” Tony o ile a re ee, gomme a thoma go mmotša ka Beibele. O ile a fetša sekolo gomme lehono ke mmulamadibogo wa ka mehla e bile ke mohlanka wa bodiredi. Tony o thabile kudu ka gobane gona bjale o na le Tate yo lerato, e lego Jehofa.—Ps. 68:5.

3. Jehofa o nea bafsa keletšo efe?

³ Phihlelo ya Tony e re gopotša gore Jehofa o rata bafsa kudu. Lena bafsa, Jehofa o nyaka gore dilo di le sepelele gabotse bophelong e bile o nyaka gore le ipshine ka bophelo. Ke ka baka leo a le eletšago ka gore: “Gopola Mmopi wa gago yo Mogolo matšatšing a bofseng bja gago.” (Mmo. 12:1) Lehono ga go bonolo go kwa keletšo ye, eupša go a kgonega. Jehofa a ka go thuša gore o ipshine ka bophelo gona bjale le ge o godile. E le gore re kwešiše taba ye gabotse, re tlo boledišana ka seo se ilego sa thuša Baisiraele go fenya ditšhaba tšeo di bego di dula Nageng ya Kholofetšo, le gore Dafida o tšere kae matla a go fenya Goliata wa senatla.

4, 5. Re ka ithuta’ng tseleng yeo Baisiraele ba ilego ba fenya Bakanana ka yona le kamoo Dafida a ilego a fenya Goliata? (Bona diswantšho tšeo di lego mathomong a sehlogo.)

⁴ Jehofa o ile a nea Baisiraele ditaelo dife ge ba be ba le kgauswi le go tsena Nageng ya Kholofetšo? Na o ile a ba botša gore ba itlwaetše go ba mašole a bogale goba ba itlwaeletše ntwa? Aowa! (Doit. 28:1, 2) O ile a ba botša gore ba be ba swanetše go mo kwa le go mmota. (Josh. 1:7-9) Go be go ka bonagala keletšo yeo e sa kwagale, eupša ge e le gabotse e be e le keletšo e botse kudu bakeng sa Baisiraele. Jehofa o ile a ba thuša go fenya Bakanana ka makga a mantši. (Josh. 24:11-13) Go nyakega tumelo gore re kwe Jehofa. Ka mehla tumelo e re thuša go atlega. Ga e sa le go tloga kgale tumelo e thuša batho gore ba atlege, le lehono go sa le bjalo.

⁵ Goliata e be e le lešole le matla. E be e le wa botelele bja dimithara tše 2,9 e bile dibetša tša gagwe di be di le bogale kudu. (1 Sam. 17:4-7) Eupša Dafida yena o be a na le dilo tše pedi feela. O be a swere seragamabje e bile a na le tumelo go Jehofa. Motho yo a bego a se na tumelo o be a ka nagana gore Dafida e be e le lešilo ka go nyaka go lwa le Goliata. Eupša ge e le gabotse lešilo le legolo e be e le Goliata.—1 Sam. 17:48-51.

6. Re tlo ithuta’ng sehlogong se?

⁶ Sehlogong se se fetilego re ithutile ka dilo tše nne tšeo di ka re thušago go thaba le go atlega bophelong. Re ithutile gore re swanetše go kgotsofatša kganyogo ya rena ya go nyaka go tseba Modimo, go gwerana le bagwera ba kgonthe, go ipeela dipakane tša moya le go hlompha tokologo yeo Modimo a re neilego yona. Sehlogong se, re tlo ithuta ka ditsela tše dingwe tšeo re ka holegago ka tšona ge re ka dira dilo tšeo. Anke ga bjale re ithuteng ka melao ya motheo ya Beibele yeo e lego go Psalme 16.

7. (a) Motho wa moya ke motho wa mohuta mang? (b) “Karolo” ya Dafida e be e le eng, gona e be e dira gore a ikwe bjang?

⁷ Motho wa moya o na le tumelo go Modimo e bile o dira sohle seo a ka se kgonago gore a nagane go swana le Modimo. Pele a dira diphetho o kgopela Jehofa gore a mo hlahle ke moka a latela tlhahlo yeo. (1 Bakor. 2:12, 13) Dafida o re beetše mohlala o mobotse kudu. O itše: “Jehofa ke karolo ya seo ke se abetšwego le ya senwelo sa ka.” (Ps. 16:5) Dafida o be a leboga “karolo” ya gagwe, e lego tswalano ya gagwe le Jehofa. Le gona o be a ithekga ka Jehofa. (Ps. 16:1) Ke ka baka leo a ilego a ngwala gore: “Ke rata go thaba.” Go be go se na selo sa go thabiša Dafida kudu go feta segwera sa gagwe le Modimo.—Bala Psalme 16:9, 11.

8. Ke dilo dife tšeo di ka dirago gore o thabe e le ka kgonthe?

⁸ Batho ba go rata tšhelete le menate ba ka se tsoge ba hweditše lethabo la kgonthe go swana le Dafida. (1 Tim. 6:9, 10) Ngwanabo rena yo mongwe wa kua Canada o itše: “Lethabo la kgonthe  ga re le hwetše dilong tša lefase eupša re le hwetša ge re hlankela Jehofa Modimo, yena Monei wa mpho e nngwe le e nngwe e botse.” (Jak. 1:17) Ge re na le tumelo go Jehofa e bile re mo hlankela, re tlo thaba kudu. Ke’ng seo se ka go thušago go tiiša tumelo ya gago? O ka thušwa ke go fetša nako e ntši le Jehofa ka go bala Lentšu la gagwe, go lebelela tlholo ya gagwe e botse le go naganišiša ka dika tša Gagwe tše bjalo ka lerato leo a go bontšhago lona.—Baroma 1:20; 5:8.

9. O ka dira’ng gore Lentšu la Modimo le fetoše semelo sa gago go swana le Dafida?

⁹ Jehofa o bontšha gore o a re rata ka go fela a re nea tayo. Dafida o be a amogela tayo ya Jehofa. O itše: “Ke tla reta Jehofa, yena yo a nkeleditšego. Bošego dipshio tša ka di mphošolotše.” (Ps. 16:7) Dafida o be a naganišiša ka dikgopolo tša Modimo gomme a nagana go swana le Yena. Le gona o ile a dumelela dikgopolo tša Modimo di fetoša semelo sa gagwe. Le wena ge o ka ekiša Dafida, o tlo rata Modimo kudu gomme wa dira sohle seo o ka se kgonago gore o dule o mo kwa. E bile o tlo gola moyeng. Kgaetšedi yo a bitšwago Christin o itše: “Ge ke dira nyakišišo e bile ke naganišiša ka seo ke se badilego, ke kwa eka dilo tšeo ke di badilego Jehofa o di ngwaletše nna ka go lebanya.”

10. Go ya ka Jesaya 26:3, go ba motho wa moya go go hola bjang?

¹⁰ Ge o le motho wa moya o tlo kgona go bona dilo go swana le Modimo mabapi le lefase le. Jehofa o go nea tsebo le bohlale. Ka baka la’ng? Ka gobane o nyaka gore o tsebe dilo tše bohlokwa bophelong, o dire diphetho tše dibotse e le gore o tle o ipshine ka bophelo ka mo go sa felego. (Bala Jesaya 26:3.) Ngwanabo rena Joshua yo a dulago United States o re: “Ge e ba tswalano ya gago le Jehofa e tiile, o tlo kgona go tseba dilo tše bohlokwa bophelong le tšeo di se nago mohola.”

11. Dafida o ile a kgetha bagwera ba gagwe bjang?

¹¹ Bala Psalme 16:3. Dafida o be a kgona go kgetha bagwera ba kgonthe e bile a ‘kgahlwa’ ke go gwerana le batho ba go rata Jehofa. O ile a hlalosa bagwera ba gagwe gore ke “bakgethwa” ka gobane ba be ba phela ka melao ya Jehofa ya boitshwaro. Mopsalme yo mongwe le yena o ile a ikwa go swana le Dafida tabeng ya go kgetha bagwera. O ngwadile gore: ‘Ke dirišana le bohle bao ba boifago Modimo, gotee le bao ba lotago ditaelo tša gagwe.’ (Ps. 119:63) Ka ge re ithutile sehlogong se se fetilego, le wena o ka kgona go hwetša bagwera ba bantši bao ba ratago Jehofa. E bile o ka gwerana gaešita le batho bao e sego dithaka tša gago.

12. Ke ka baka la’ng segwera sa Dafida le Jonathane se be se kgahliša?

¹² Dafida o be a sa gwerane le dithaka tša gagwe feela. Na o sa gopola yo mongwe wa bagwera ba Dafida? E be e le Jonathane. Pego ya mabapi le segwera sa bona ke e nngwe ya dipego tše di kgahlišago kudu tšeo re balago ka tšona ka Beibeleng. Na o be o tseba gore Jonathane o be a feta Dafida ka mengwaga e ka bago e 30? Eupša ke ka baka la’ng segwera sa bona se be se kgahliša? Ka moka ga bona ba be ba na le tumelo go Modimo. Le gona ba be ba hlomphana kudu e bile yo mongwe le yo mongwe o be a lebelela dika tše dibotse go mogwera wa gagwe, tše bjalo ka sebete seo ba se bontšhitšego ge ba be ba elwa le manaba a Modimo.—1 Sam. 13:3; 14:13; 17:48-50; 18:1.

13. O ka dira’ng gore o be le bagwera ba bantši? Nea mohlala.

¹³ Go swana le Dafida le Jonathane, le rena re ‘kgahlega ka mo go feletšego’ ge re gwerana le batho bao ba ratago Jehofa e bile ba na le tumelo go yena. Kgaetšedi Kiera yo a hlanketšego Modimo ka mengwaga e mentši o re: “Ke na le bagwera ba bantši lefaseng ka moka bao ba godišitšwego ka ditsela tša go se swane le bao ba tšwago ditšong tše di fapafapanego.” Ge o ka ekiša Kiera o tlo kgona go bona gore ka nnete Lentšu la Modimo le moya wa Gagwe di dira gore re be lapa letee lefaseng ka moka.

14. (a) O ka thušwa ke’ng gore o ipeele dipakane tša moya? (b) Bafsa ba bangwe ba ikwa bjang ka go ipeela dipakane tša moya?

¹⁴ Bala Psalme 16:8. Go hlankela Jehofa e be e le selo se bohlokwa kudu go Dafida. Ge e ba o ekiša Dafida ge o ipeela dipakane gomme o dula o ipotšiša gore Jehofa o nyaka o dira eng, o tlo ipshina ka bophelo. Ngwanabo rena yo a bitšwago Steven o itše: “Ge ke šoma ka thata go fihlelela dipakane tšeo ke ipeetšego tšona gomme ke kgona go di fihlelela, ke thaba kudu.” Ngwanabo rena yo mongwe wa mofsa yoo a tšwago Jeremane yo ga bjale a hlankelago nageng e nngwe, o itše: “Ge ke godile, ga ke nyake gore ge ke nagana ka bophelo bja ka bja ge ke be ke sa le yo mofsa, ke hwetše ke se ka direla Jehofa selo.” Na le wena o ikwa bjalo? Ge e ba o ikwa bjalo gona diriša bokgoni bja gago go tumiša Jehofa le go thuša batho ba bangwe. (Bagal. 6:10) Ipeele dipakane tša moya gomme o rapele Jehofa gore a go thuše go di fihlelela. Jehofa o thabela go araba dithapelo tša mohuta woo.—1 Joh. 3:22; 5:14, 15.

15. Ke dipakane dife tšeo o ka ipeelago tšona? (Bona lepokisi leo le rego, “ Dipakane tše di Kgahlišago.”)

¹⁵ Ke dipakane dife tšeo o ka ipeelago tšona? O ka ipeela pakane ya go araba ka mantšu a gago dibokeng, go tšea bobulamadibogo bja ka mehla goba go hlankela Bethele. O ka ithuta leleme le lengwe gore o kgone go botša batho bao ba bolelago leleme leo ditaba tše dibotse. Mofsa yo a bitšwago Barak, yo a lego tirelong ya nako e tletšego, o re: “Letšatši le lengwe le le lengwe ge ke tsoga ke thaba kudu ka gobane ke tseba gore ke diriša matla a ka go hlankela Jehofa e bile ga go na selo se sengwe seo se nthabišago go swana le go hlankela Jehofa.”

16. Dafida o be a ikwa bjang ka melao le melao ya motheo ya Modimo, gona ka baka la’ng?

¹⁶ Bala Psalme 16:2, 4. Ka ge re ithutile sehlogong se se fetilego, ge e ba re phela ka melao le melao ya motheo ya Beibele, re tlo ba le tokologo ya kgonthe gomme ra rata se sebotse le go hloya se sebe. (Amose 5:15) Dafida o ile a re Jehofa ke Mothopo wa go loka. Go loka ke go itshwara ka tsela e kgahlišago le e botse. Jehofa o lokile dilong ka moka le gona dilo ka moka tše dibotse tšeo re nago le tšona di tšwa go yena. Dafida o ile a šoma ka thata gore a ekiše Modimo le go rata dilo tšeo a di ratago. Le gona o ile a hloya dilo tšeo Jehofa a di hloilego. Se sengwe sa dilo tšeo  ke go rapela medimo ya diswantšho, e lego go rapela motho le ge e le ofe goba selo le ge e le sefe ntle le go rapela Jehofa. Go rapela medimo ya diswantšho go dira gore batho ba inyatšiše e bile go dira gore ba se tumiše Jehofa eupša ba tumiše dilo tšeo di sa swanelago go tumišwa.—Jes. 2:8, 9; Kut. 4:11.

17, 18. (a) Dafida o ile a re’ng ka borapedi bja maaka? (b) Ke dilo dife tšeo di dirago gore batho ba ipakele “mahloko a mantši”?

¹⁷ Mehleng ya ge Beibele e sa ngwalwa, gantši boitshwaro bjo bo sa hlwekago bja tša thobalano e be e le karolo ya borapedi bja maaka. (Hos. 4:13, 14) Batho ba bantši ba be ba rata borapedi bja maaka ka gobane ba be ba itshwara ka tsela yeo e sa hlwekago. Eupša na borapedi bjoo bo be bo ba dira gore ba thabe? Le ganyenyane! Dafida o boletše gore batho bao ba rapelago medimo ya maaka ba welwa ke “mahloko a mantši.” E bile batho bao ba be ba direla medimo yeo ya maaka dihlabelo ka bana ba bona. (Jes. 57:5) Jehofa o be a hloile mekgwa yeo ya bona e sehlogo! (Jer. 7:31) Ge nkabe o phetše mehleng yeo, ruri o be o tla thabela gore batswadi ba gago ba hlankela Jehofa!

¹⁸ Le lehono, dikereke tše dintši ga di na bothata ge batho ba itshwara ka tsela e sa hlwekago e bile di dumelela banna ba ratana le banna, le basadi ba ratana le basadi. Mekgwa ya mohuta wo e dira gore batho ba nagane eka ba ipshina ka bophelo, eupša ge e le gabotse ba ipakela “mahloko a mantši.” (1 Bakor. 6:18, 19) Na le wena o lemogile seo? Ka gona lena bafsa, theetšang Tatago lena wa legodimong. Dulang le kgodišegile gore ge le ekwa Modimo le tlo ipshina ka bophelo. Dulang le naganišiša ka ditlamorago tšeo di tlišwago ke go dira sebe. Ge le ka dira bjalo, le tla bona gore monate wa nakwana wa sebe ke mathata feela. (Bagal. 6:8) Joshua yo re boletšego ka yena pejana o itše: “Re ka diriša tokologo ya rena ka mokgwa wo re ratago, eupša ge re ka e diriša gampe re ka se tsoge re thabile.”

19, 20. Bafsa bao ba nago le tumelo go Jehofa e bile ba mo kwa ba tlo hwetša ditšhegofatšo dife?

¹⁹ Jesu o ile a botša barutiwa ba gagwe gore: “Ge e ba le dula lentšung la ka, gona le barutiwa ba ka e le ka kgonthe, le tla tseba therešo gomme therešo e tla le lokolla.” (Joh. 8:31, 32) Jehofa o re lokolotše bodumeding bja maaka, ditumelong tšeo di sego tša thewa Mangwalong le dilong tše dingwe. Re fela pelo ya go tlo ipshina ka go ba le “tokologo ya letago ya bana ba Modimo” nakong e tlago. (Baroma 8:21) Le gona bjale o ka thabela tokologo e bjalo ka go ‘dula o ekwa lentšu la Kriste,’ goba dithuto tša gagwe. Ge o dira bjalo o tla “tseba therešo” e sego feela ka go ithuta yona, eupša le ka go phela ka yona.

²⁰ Lena bafsa, bontšhang gore le leboga tokologo yeo Modimo a le neilego yona. Dirišang tokologo yeo gabotse ka gobane e tla le thuša go dira diphetho tše dibotse gona bjale gomme la ba le bokamoso bjo bobotse. Ngwanabo rena yo mongwe wa mofsa o itše: “Go diriša tokologo ya gago gabotse o sa le yo mofsa go tla go thuša ge o tlo dira diphetho tše dikgolo nakong e tlago, tše bjalo ka go kgetha mošomo wa maleba, go kgetha go nyala goba go nyalwa goba go letanyana go fihlela nako e itšego.”

21. O ka dira’ng gore o tle o hwetše ‘bophelo bja kgonthe’?

²¹ Dilo tšeo batho ba di thabelago mehleng ye ke tša nakwana. Ditlalemeso ga di tsebje. (Jak. 4:13, 14) Ka gona, ke gabohlale gore o dire diphetho tšeo di tlago go go thuša gore o tle o hwetše ‘bophelo bja kgonthe,’ e lego bophelo bjo bo sa felego. (1 Tim. 6:19) Ke therešo gore Jehofa ga a gapeletše motho go mo hlankela. Eupša yo mongwe le yo mongwe o itirela kgetho. Ka gona, dira Jehofa “karolo” ya gago. Dira sohle seo o ka se kgonago go batamela kgauswi le yena le go leboga dilo ka moka “tše botse” tšeo a go neilego tšona. (Ps. 103:5) Dula o na le tumelo ya gore Jehofa o tla go thuša go “thaba ka botlalo” le go ipshina ka bophelo ka mo go sa felego.—Ps. 16:11.