Ka ge Danièle e be e le motho wa go nagana ka pela, o ile a ntshebela a re: “O se ke wa tshwenyega ka go founela maphodisa, a šetše a fihlile.” Go be go na le koloi yeo e bego e sa tšwa go ema kgauswi le hotele. Ka morago ga metsotso e sego kae, nna le mosadi wa ka re ile ra golegwa. Ke leboga gore Danièle o ile a ntemoša, ka gobane ke ile ka kgona go ba le nako ya go fa ngwanešo yo mongwe difaele tše itšego tše bohlokwa.

Ge re be re išwa seteišeneng sa maphodisa ke ile ka leboga gore ke na le mosadi wa go rata Modimo le yo a nago le sebete. Ye ke e nngwe ya ditiragalo tše dintši tšeo nna le Danièle re ilego ra dirišana go tšona. E re ke hlalose gore go tlile bjang gore re etele dinaga tšeo modiro wa rena wa go bolela ditaba tše dibotse o bego o thibetšwe.

Ke belegwe ka 1930 kua Croix, e lego torotswana yeo e lego ka leboa la Fora. Ka gae e be e le Makatholika a magolo. Lapa lešo le be le eya Mmiseng beke e nngwe le e nngwe, tate yena o be a dula a swaregile ka dilo tša kereke. Eupša ge ke be ke na le mengwaga e ka bago e 14, go ile gwa ba le tiragalo e nngwe yeo e ilego ya mpula mahlo gomme ka kgona go bona gore kereke e be e ruta maaka.

Nakong ya ntwa ya bobedi ya lefase, naga ya Fora e be e laolwa ke mašole a Jeremane. Gantši ge moruti a be a rera o be a re kgothaletša gore re thekge mmušo wa Vichy woo peleng o bego o buša Nazi. Dilo tšeo a bego a di bolela di be di re tšhoša. Go swana le batho ba bantši ba Fora, re be re theetša radio ya BBC ka sephiring, yeo e bego e gaša ditaba tšeo di tšwago go mašole a dinaga tša go fapafapana. Ka September 1944, moruti o ile a re tlaba. O ile a rulaganya gore go be le tirelo ya go leboga gore mašole ao a tšwago dinageng tšeo di fapafapanego a oketšegile. Seo se ile sa ntšhoša gomme sa dira gore ke se sa tshepa baruti.

Ka moragonyana ga gore ntwa yeo e fele, tate o ile a hlokofala. Ka nako yeo, sesi o be a šetše a nyetšwe gomme a dula Belgium. Ka gona ke ile ka swanelwa ke go hlokomela mma. Ke ile ka hwetša mošomo khamphaning ya mašela. Motho yo a bego a nkhirile le morwa wa gagwe le bona e be e le Makatholika a magolo. Le ge bokamoso bja ka bo be bo phadima khamphaning yeo, ke be ke tlo lebana le teko e se kgale.

Ka 1953, sesi Simone o ile a re etela. Ka nako yeo sesi e be e le Hlatse ya Jehofa. Ka gona o ile a diriša Beibele go pepentšha dithuto tša maaka tša Kereke ya Katholika tša mabapi le dihele, Borarobotee le gore moya ga o hwe. Mathomong ke be ke sa dumelelane le yena  ka gobane o be a sa diriše Beibele ya Katholika, eupša go se go ye kae ke ile ka lemoga gore o be a mpotša therešo. Ka moragonyana o ile a ntlela le dimakasine tša Morokami, gomme ke be ke di bala bošego. Kapejana ke ile ka lemoga gore ke hweditše therešo; eupša ke be ke tšhaba gore ge nka emela Jehofa ke tlo felelwa ke mošomo.

Ke feditše dikgwedi tše sego kae ke no ipalela Beibele le Merokami. Mafelelong ke ile ka phetha ka gore ke ye Holong ya Mmušo ya Dihlatse tša Jehofa. Ge ke le moo, ke ile ka kgahlwa ke lerato leo ba ilego ba mpontšha lona. Ka morago ga gore ke ithute Beibele ka dikgwedi tše tshela le ngwanešo yo mongwe yo e bego e le kgale e le Hlatse ya Jehofa, ke ile ka kolobetšwa ka September 1954. Ke ile ka thaba kudu ge mma le kgaetšedi ya ka le bona e e ba Dihlatse tša Jehofa.

Ka 1958 ke ile ka ba le tokelo ya go ya kopanong ya ditšhabatšhaba kua New York, eupša ka manyami mma o ile a hlokofala dibeke tše sego kae pele kopano e fihla. Ge ke boa kopanong yeo ke ile ka tlogela mošomo gomme ka thoma go ba mmulamadibogo ka ge go be go se sa na motho yo ke mo hlokomelago ka gae. Nakong yona yeo ke ile ka tshepiša go tlo nyala kgaetšedi Danièle Delie yo e bego e le mmulamadibogo yo mafolofolo. Re ile ra nyalana ka May 1959.

Danièle o be a thomile tirelo ya gagwe ya nako e tletšego motseng o mongwe wa magaeng kua Brittany. Go be go nyakega gore a be le sebete e le gore a yo bolela ditaba tše dibotse tikologong yeo e bego e tletše Makatholika. Le gona o be a swanetše go ba le sebete e le gore a ye metse ya magaeng ka paesekele go yo ruta batho Beibele. Go be go na le selo seo re swanago ka sona. Re be re etiša pele modiro wa go bolela ditaba tše dibotse ka ge re be re sa tsebe gore bofelo bo tlo tla neng. (Mat. 25:13) Moya wa Danièle wa boikgafo o ile wa re thuša go kgotlelela tirelong ya nako e tletšego.

Matšatši a sego kae ka morago ga gore re nyalane re ile ra kgethwa go ba balebeledi ba tikologo. Re ile ra tlwaela go phela bophelo bja go se be le dilo tše dintši. Phuthego ya pele yeo re ilego ra e etela e be e na le bagoeledi ba 14, gomme bana babo rena ba be ba se na dilo tše dintši. Ka gona re be re robala godimo ga materase sethaleng ka Holong ya Mmušo. Re be re sa robale ka go iketla, eupša re be re kgona go khutša.

Le ge bophelo bja rena e be e le bja leemaema, Dan-ièle o ile a tlwaela kabelo yeo. Gantši o be a fela a swanelwa ke go nkemela ka koloing ya rena e nyenyane ge re be re swere seboka sa bagolo seo se sa rulaganywago, eupša le gatee ga se a ka a ngongorega. Re bile balebeledi ba tikologo ka mengwaga e mebedi feela, gomme nakong yeo ka moka re ile ra ithuta gore go bohlokwa gore banyalani ba ntšhetšane sa mafahleng le go dirišana.—Mmo. 4:9.

Ka 1962, re ile ra laletšwa go ya Sekolong sa Gilead seo se tšerego dikgwedi tše lesome kua Brooklyn, New York. Re be re le klaseng ya bo-37. Klaseng ya rena re be re le 100, gomme gare ga rena go na le banyalani ba 13. Ke sa gopola re thabela bogwera le bana babo rena bao ba bego ba na le tumelo, ba bjalo ka Frederick Franz, Ulysses Glass le Alexander H. Macmillan.

Sekolong seo re ile ra rutwa gore re be šedi. Mathapama a mangwe ka Mekibelo ge re feditše klaseng, re be re eya go bona mafelo a itšego New York City. Re be  re tseba gore ka Mošupologo re tlo kgopelwa gore re ngwale gore re bone eng. Gantši re be re boa re lapile ka Mekibelo thapama. Motho yo a bego a re bontšha toropo e be e le moithaopi gona moo Bethele. O be a re botšiša dipotšišo gore re gopole gore re bone eng gore re se tlo swara bothata ge re yo ngwala molekwana ka Mošupologo. Ka Mokibelo o mongwe re ile ra fetša mathapama ka moka re sepela toropong. Re ile ra etela moago o mongwe moo re ilego ra ithuta ka maswika a manyenyane le a magolo ao a welego lefaufaung. Musiamong wa Amerika wa Dilo tša Tlhago, re ile ra ithuta phapano magareng ga mehuta ya dikwena. Ge re fihla Bethele, motho yo a bego a re bontšha toropo o ile a re botšiša gore: “Phapano ke efe magareng ga maswika a manyenyane le a magolo ao a welego lefaufaung?” Danièle o be a lapile gomme o ile a araba a re, “maswika a magolo a na le meno a magolo.”

Ka morago ga moo re ile ra hwetša kabelo yeo re bego re sa e letela ya go yo hlankela lekaleng la Fora, gomme re hlanketše moo mengwaga ya ka godimo ga e 53. Ka 1976, ke ile kgethwa go ba molomaganyi wa Komiti ya Lekala e bile ka abelwa go etela dinaga tša Afrika le ka Bodikela bja Asia moo modiro wa rena wa go bolela ditaba tše dibotse o bego o thibetšwe. Ke gona moo re ilego ra ya Gabon, gomme gwa direga seo re se hlalositšego mathomong. Go bolela nnete, gantši ke be ke ikwa eka nka se kgone go phetha maikarabelo a ao ke bego ke sa a letela. Eupša Danièle o be a dula a nthekga gore ke phethe kabelo le ge e le efe.

Re ile ra rata kabelo ya rena ya Bethele di tloga fase. Ka ge Danièle a be a ithutile Seisemane ka dikgwedi tša ka tlase ga tše hlano pele re ka ya Gilead, o ile a ba mofetoledi yo a nago le bokgoni wa dikgatišo tša rena. Go hlankela Bethele go be go re kgotsofatša kudu, eupša go thuša phuthegong go be go re thabiša le go feta. Ke gopola re sepela ka terene le Danièle bošego gomme re lapile kudu, eupša re thabile ka gobane re be re swere dithuto tša Beibele tšeo di tšwelago pele. Eupša ka manyami, Danièle o ile a thoma go babja gomme seo sa dira gore a se sa ba mafolofolo go swana le peleng.

Ka 1993, Danièle o ile a botšwa gore o na le kankere ya matswele. Kalafo ya gona e be e le bohloko, o be a swanetše go dira ophareišene le kalafo ya kankere (chemotherapy). Mengwaga e lesomehlano ka morago ga moo, go ile gwa hwetšwa gape gore o na le kankere yeo e bego e phatlalala ka lebelo. Lega go le bjalo, o be a tšeela kabelo ya gagwe ya go ba mofetoledi godimo kudu moo a ilego a tšwela pele a e dira le ge a be a babja kudu.

Le ge Danièle a be a babja o šoro, ga se ra ka ra nagana go tloga Bethele. Le gona go babja o le Bethele go na le ditlhohlo, kudukudu ge e ba ba bangwe ba sa kwešiše gore o babja gakaakang. (Die. 14:13) Le ge Danièle a be a le mengwageng ya bo-70, o be a na le sefahlego sa go kgahliša seo se bego se sa bontšhe gore o a babja. E be e se motho wa go ikwela bohloko, go e na le moo o be tshwenyegile ka go thuša ba bangwe. O be a tseba gore go theetša ba bangwe go ka ba imolla kudu. (Die. 17:17) Ga se gore Danièle o be a itira moeletši, lega go le bjalo, o ile a diriša phihlelo ya gagwe go thuša dikgaetšedi tše dintši gore di se ke tša boifa kankere.

Teko e nngwe yeo re ilego ra lebeletšana le yona ke ge Danièle a thoma go palelwa ke go dira dilo tše  itšego. Ge a be a se sa kgona go šoma ka mehla, o be a dira sohle seo a ka se kgonago go nthekga ka ditsela tše dintši. O be a leka ka gohle go nnolofaletša bophelo, gomme seo se ile sa dira gore ke tšwele pele ke hlankela ke le molomaganyi wa Komiti ya Lekala ka mengwaga e 37. Ka mohlala, letšatši le letšatši o be a dira dijo tša mosegare gore re di thabele gotee ka phapošing.—Die. 18:22.

Danièle o be a na le kholofelo ya gore o tla fola e bile o be a nyaka go phela. O ile a ba le kankere ka lekga la boraro. Re be re feletšwe ke matla. Kalafo ya kankere e be e mo fetša matla moo ka dinako tše dingwe a bego a palelwa le ke go sepela. Pelo ya ka e be e rotha madi ge ke bona mosadi wa ka yo e bego e le mofetoledi yo a nago le bokgoni a thatafalelwa ke go bolela.

Le ge re be re ikwa eka re lahlegile, re ile ra dula re rapela, re kgodišegile gore Jehofa a ka se dumelele re lekwa go feta kamoo re ka kgonago go kgotlelela ka gona. (1 Bakor. 10:13) Ka mehla re be re leboga thušo yeo Jehofa a re neago yona ka Lentšu la gagwe, ka lefapha la tša kalafo la Bethele le thekgo e lerato ya bana babo rena.

Gantši re be re kgopela Jehofa gore a re hlahle gore re amogele kalafo ya mohuta ofe. Ka nako e nngwe mosadi wa ka o ile a dula go se na kalafo yeo a e dirišago. Ngaka yeo e bego e thušitše Danièle ka mengwaga e 23 e be e sa kgone go tseba gore ke ka baka la eng Danièle a be a be a idibala nako le nako ge a boa kalafong ya kankere (chemotherapy). Ngaka yeo le yona e be e se sa tseba gore re diriše kalafo efe. Re be re ikwa eka re lahlegile, re sa tsebe pele le morago. Ngaka e nngwe ya go alafa kankere e ile ya re e tla thuša Danièle. Go be go le bjalo ka ge eka Jehofa o butše tsela ya gore re kgone go lebeletšana le dipelaelo tša rena.

Re ile ra ithuta go lebeletšana le dipelaelo tša rena ka go se iphelele pelo. Go etša ge Jesu a boletše, “letšatši le lengwe le le lengwe le lekanwe ke bošula bja lona.” (Mat. 6:34) Go lebelela dilo ka tsela e botse le go se iše selo se sengwe le se sengwe hlogong le gona go thušitše. Ka mohlala, dikgweding tše pedi tšeo Dan-ièle a ilego a se hwetše kalafo ya kankere, o ile a bolela ka go bapala a re, “Ga sa nka ka ikwa ke le kaone ka tsela ye!” (Die. 17:22) Le ge a be a tlaišega, o be a thabela go ithuta dikoša tše difsa tša Mmušo a opelela godimo.

Go lebelela dilo ka tsela e botse ga Danièle go nthušitše go lebeletšana le mafokodi a ka. Go bolela nnete, mengwaga e 57 yeo re e feditšego re nyalane, o be a ntlhokomela ka dilo tša go fapafapana. O be a sa nyake le go nthuta go gadika mae. Ge a thoma go babja kudu, ke ile ka swanelwa ke go ithuta go hlatswa dibjana le diaparo gaešita le go apea dijo tšeo di bego di apeega gabonolo. Ke thubile digalase tše dintši ge ke dutše ke ithuta, eupša ke be ke thabela go mo direla dilo tšeo di mo thabišago. *

Ke ithutile dilo tše bohlokwa maemong ao re fetilego gona a go se phele gabotse mmeleng le botšofadi. Sa pele, ke ithutile gore ga se ra swanela go swarega kudu moo re hlokago nako ya go bontšha balekane ba rena lerato. Mengwageng yeo re sa nago le matla re swanetše go e diriša gabotse go hlokomela baratiwa ba rena. (Mmo. 9:9) Sa bobedi, ga se ra swanela go tshwenyega kudu ka dilo tša go se re selo, ka gobane seo se ka dira gore re hlokomologe ditšhegofatšo tše dintši tšeo re di thabelago letšatši le letšatši.—Die. 15:15.

Ge ke nagana mengwaga yeo re e feditšego re le tirelong ya nako e tletšego, ga ke belaele gore Jehofa o re šegofaditše kudu. Ke ikwa go swana le mopsalme yo a itšego: ‘Jehofa yena o ntshwere gabotse.’—Ps. 116:7.