Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

Mangwalo a bontšha bjang gore Modimo o re kwela bohloko?

Ge Baisiraele e be e le makgoba kua Egipita, Modimo o ile a bona tlaišego ya bona gomme a ba kwela bohloko. (Ek. 3:7; Jes. 63:9) Modimo o re bopile ka seswantšho sa gagwe, ka gona re ka kgona go ba le kwelobohloko go swana le yena. O dula a re kwela bohloko gaešita le ge ka dinako tše dingwe re ikwa eka ga re swanelwe ke lerato la gagwe.—wp18.3, matl. 8-9.

Dithuto tša Jesu di ile tša thuša batho bjang gore ba se kgetholle ba bangwe?

Mehleng ya Jesu, Bajuda ba bantši ba be ba na le kgethollo. Kriste o ile a kgothaletša batho gore ba be le boikokobetšo le gore ba se kgetholle ba bangwe. O ile a kgothaletša barutiwa ba gagwe gore ba swarane bjalo ka bana ba motho.—w18.06, matl. 9-10.

Taba ya gore Modimo o ile a se dumelele Moshe a tsena Nageng ya Kholofetšo e re ruta’ng?

Moshe e be e le mogwera yo mogolo wa Jehofa. (Doit. 34:10) Ge Baisiraele ba be ba le kgauswi le go fetša mengwaga e 40 ba ralala lešokeng, ba ile ba thoma go ngongorega gape ka meetse. Modimo o ile a botša Moshe gore a bolele le leswika. Eupša Moshe o ile a betha leswika leo. Jehofa o ile a galefela Moshe kudu. A ka ba a ile a galefišwa ke gore ga se a kwa ditaelo tša gagwe le gore o paletšwe ke go dira gore batho ba rete Modimo ka ge e le yena a dirilego mohlolo woo. (Num. 20:6-12) Se ke thuto e bohlokwa kudu go rena. Re swanetše go kwa Jehofa le go dira gore batho ba mo rete.—w18.07, matl. 13-14.

Ke’ng seo se ka dirago gore re se ke ra bona dilo gabotse ge re ahlola batho go ya ka seo re se bonago?

Go na le dilo tše tharo tšeo di dirago gore batho ba ahlole batho ba bangwe go ya ka seo ba se bonago. Dilo tšeo ke: (1) Morafo goba lefelo leo motho a tšwago go lona, (2) gore motho ke mohumi goba ke modiidi le (3) gore motho o na le mengwaga e mekae. Re swanetše go ekiša Jehofa ka go dira sohle seo re ka se kgonago gore re se kgetholle ba bangwe. (Dit. 10:34, 35)—w18.08, matl. 8-12.

Ke ditsela dife tše dingwe tšeo bana babo rena bao ba tšofetšego ba ka thušago batho ba bangwe?

Mokriste yo a tšofetšego yoo a hweditšego kabelo e mpsha, o sa le bohlokwa kudu go Modimo e bile a ka thuša ba bangwe. A ka thuša batho bao e sego Dihlatse tša Jehofa eupša balekane ba bona e le Dihlatse gotee le batho bao ba fodilego moyeng, a ka swara dithuto tša Beibele goba a leka go diriša mekgwa e mengwe ya go ruta batho Beibele.—w18.09, matl. 8-11.

Bakriste ba na le Didirišwa dife tša go Ruta Batho Beibele?

Ba na le dikarata tša JW.ORG le ditaletšo. E bile ba na le dipampišana tše seswai gotee le dimakasine tša Morokami le Phafoga! Le gona ba na le diporoutšha tše mmalwa, dipuku tše pedi tšeo ba di dirišago go ithuta Beibele le batho le dibidio tše nne tšeo di šomago gabotse ge ba bolela le batho, tše bjalo ka bidio ya Ke ka Baka la Eng o Swanetše go Ithuta Beibele?​—w18.10, letl. 16.

Bakriste ba ka “reka therešo” bjang go etša ge Diema 23:23 e bontšha?

Ga go nyakege gore re ntšhe tšhelete gore re reke therešo, eupša go nyakega nako le maiteko.—w18.11, letl. 4.

Re ka ithuta’ng tseleng yeo Hosea a ilego a dirišana le mosadi wa gagwe Gomere?

Gomere o ile a dira bootswa gantši, eupša Hosea o ile a mo lebalela gomme a se mo hlale. Mokriste a ka kgetha go lebalela molekane wa gagwe yoo a dirilego bootswa. Ge a ka robala le yena le ge a tseba gore o dirile bootswa, ga a sa na mabaka a Mangwalo a gore a mo hlale.—w18.12, letl. 13.