1, 2. Batho ba bangwe ba re paradeise ke’ng?

BANA BABO RENA ba bantši go tšwa dinageng tše difapafapanego ba be ba ile kopanong ya selete kua Seoul, Korea. Ge kopano e fela, bana babo rena le dikgaetšedi ba Korea ba be ba nyamile kudu ge ba be ba kgaogana le baeng bao ba bego ba tlile kopanong. Ba bantši ba bona ba ile ba re, “Re tla bonana Paradeiseng!” O nagana gore ba be ba bolela ka paradeise efe?

² Batho ba bantši ba bolela dilo tše di fapafapanego ka Paradeise. Ba bangwe ba re paradeise ga se selo sa kgonthe. Ba bangwe ba re ke lefelo le ge e le lefe leo ba ka hwetšago lethabo go lona. Mengwageng e mentši e fetilego, mosadi yo a itšego o ile a bona lefelo leo le tletšego ka matšoba gomme a ile a mo kgahla kudu moo a ilego a re: “Ruri ye ke paradeise!” Gaešita le ge go ena lehlwa le lentši ngwaga o mongwe le o mongwe moo, lefelo leo le sa bitšwa Paradeise le lehono. Wena o nagana gore Paradeise ke’ng? Na o nagana gore e tla ba gona?

3. Beibele e re botša’ng ka paradeise?

³ Beibele e re botša ka paradeise yeo e kilego ya ba gona le yeo e tlago go ba gona nakong e tlago. Puku ya mathomothomo ya Beibele e re botša ka Paradeise. Ka Beibeleng ya Katholika ya Douay Version, yeo e fetoletšwego go tšwa go Selatine, Genesi 2:8 e re: ‘Mathomong Morena Modimo o be a dirile paradeise e kgahlišago: ke moka o ile a bea motho yo a bego a mmopile go yona.’ Ka Seheberu temana yeo e re serapa sa Edene.  Lentšu Edene le ra go re “Kgahlišago,” le gona serapa seo se be se tloga se kgahliša kudu. Serapa seo e be e le se sebotse kudu, dijo e le tše dintši kudu, go na le matšoba a kgahlišago e bile batho ba phedišana gabotse le diphoofolo.—Gen. 1:29-31.

4. Ke ka baka la’ng re ka re serapa sa Edene e be e le paradeise?

⁴ Lentšu la Segerika pa·raʹdei·sos, ka Seheberu le fetoletšwe e le “serapa.” Ge Cyclopaedia ya M’Clin-tock and Strong e bolela ka lentšu pa·raʹdei·sos e hlalosa gore ge Mogerika a ekwa lentšu leo, o be a nagana ka lefelo le legolo le le lebotse leo go lona go se nago selo seo se ka bakago mathata, eupša e le lefelo leo le tletšego dihlare tše dibotse tša go ba le dienywa tšeo di nošetšwago ka meetse a tšwago dinokaneng tše di kgahlišago. Kgauswi le dinokana tšeo go na le bjang bjo botala gomme diphala le dinku di fula moo.—Bapiša le Genesi 2:15, 16.

5, 6. Ke ka baka la’ng gona bjale re sa phele Paradeiseng, gona seo se dira gore re ipotšiše’ng?

⁵ Jehofa o ile a bea Adama le Efa paradeiseng e bjalo, eupša ka maswabi ga se ba ka ba dulela moo sa ruri. Go diragetše’ng? Ba ile ba se kwe Jehofa gomme seo se ile sa dira gore ba se sa dula moo. Ka baka leo, bona le bana ba bona ba ile ba lahlegelwa ke Paradeise. (Gen. 3:23, 24) Le ge go be go se na motho yo a kilego a dula Paradeiseng yeo ka morago ga Adama le Efa, go bonagala e ile ya dula e le gona go fihlela go etla Meetsefula mehleng ya Noa.

⁶ Batho ba bantši ba ka ipotšiša gore, ‘Na go ka ba le motho le ge e le ofe yo a ka phelago gape Paradeiseng mo lefaseng?’ Beibele e re’ng tabeng ye? Ge e ba o fela pelo ya go tlo phela Paradeiseng le bagwera ba gago le ba leloko, ke’ng seo se dirago gore o kgodišege gore ka nnete e tlo ba gona? Na o ka kgona go hlalosa gore ke ka baka la’ng o kgodišegile gore Paradeise e tlo ba gona?

7, 8. (a) Jehofa o ile a holofetša Aborahama eng? (b) Kholofetšo yeo e ka ba e ile ya dira gore Aborahama a nagane’ng?

⁷ Beibele ke yona e ka re thušago go araba dipotšišo tša mabapi le Paradeise, ka gobane e ngwadilwe ke Jehofa, e lego yena Mohlami wa Paradeise. Nagana ka seo Jehofa a ilego a se botša mogwera wa gagwe Aborahama. Jehofa o ile a re o be a tla atiša peu ya Aborahama “go etša lešabašaba la lešing la lewatle.” Le gona o ile a mo nea kholofetšo ye e bohlokwa: “Ditšhaba ka moka tša lefase di tla šegofatšwa ka peu ya gago ka ge o kwele lentšu la ka.” (Gen. 22:17, 18) Modimo o ile a bušeletša kholofetšo yeo go morwa wa Aborahama le go setlogolo sa gagwe.—Bala Genesi 26:4; 28:14.

⁸ Ga go na moo Beibele e re botšago gore Aborahama o be a nagana gore batho ba tlo šegofatšwa ka go ya paradeiseng legodimong. Ka gona ge Jehofa a be a re “ditšhaba ka moka tša lefase” di be di tla šegofatšwa, Aborahama o swanetše go ba a ile a nagana gore batho ba tlo šegofatšwa ba le mo lefaseng. Eupša na go sa na le mangwalo a mangwe ao a bontšhago gore paradeise e tlo ba mo lefaseng?

9, 10. Ke diporofeto dife tšeo di re kgodišago gore lefase e tla ba paradeise?

⁹ Dafida yo e bego e le yo mongwe wa ditlogolwana tša Aborahama, o ile a bolela gore nakong e tlago “badiradibe” le “bao ba dirago tša go se loke” ba tlo fedišwa. Ka morago ga moo go tlo direga’ng? Beibele e re: ‘Yo kgopo a ka se sa ba gona.’ (Ps. 37:1, 2, 10) Ke moka “ba boleta bona e tla ba beng ba lefase, ba tla thaba kudu ka baka la go ata ga khutšo.” Dafida o ile a ngwala le gore: “Baloki bona e tla ba beng ba lefase, ba tla dula mo go lona ka mo go sa felego.” (Ps. 37:11, 29; 2 Sam. 23:2) O nagana gore dikholofetšo tše di ile tša kgoma bjang batho bao ba bego ba nyaka go dira thato ya Modimo? Di ile tša dira gore ba kgodišege gore ge e ba mo lefaseng go tlo dula baloki feela, gona paradeise e swanago le serapa sa Edene e tla ba gona gape nakong e tlago.

¹⁰ Ge nako e dutše e eya, Baisiraele ba bantši bao ba bego ba ipolela gore ba hlankela Jehofa, ba ile ba mo hlanogela. Ka gona Jehofa o ile a dira gore Bababilona ba fenye Baisiraele bao, ba ba senyetše  naga gomme ba iše ba bantši ba bona bothopša. (2 Dikor. 36:15-21; Jer. 4:22-27) Eupša baporofeta ba Jehofa ba ile ba porofeta gore Baisiraele ba be ba tla boela nageng ya gabo bona ka morago ga mengwaga e 70. Diporofeto tšeo di ile tša phethagala. Le rena diporofeto tšeo di a re kgoma. Ge re dutše re ithuta ka tšona, nagana ka lefase la paradeise leo le sa tlago.

11. Jesaya 11:6-9 e ile ya phethagala bjang la mathomo, gona seo se dira gore re ipotšiše’ng?

¹¹ Bala Jesaya 11:6-9. Jehofa o ile a laela Jesaya go ngwala e sa le pele gore ge batho ba gagwe ba boetše nageng ya gabo bona, ba be ba ka se boife selo. Ba be ba ka se tšhoge gore ba tla hlaselwa ke diphoofolo goba batho. Batho ba bagolo le ba banyenyane ba be ba tla šireletšega. Na maemo a mohuta woo ga a go gopotše maemo a mabotse ao a bego a le gona serapeng sa Edene? (Jes. 51:3) Jesaya o ile a bolela le gore lefase ka moka “le tla tlala tsebo ya Jehofa go etša ge meetse a khurumeditše lewatle.” Tsebo yeo e be e ka se tlale setšhabeng sa Isiraele feela. Eupša re ka ipotšiša gore seo se tlo direga neng?

12. (a) Baisiraele bao ba ilego ba boela nageng ya gabo bona ba ile ba thabela ditšhegofatšo dife? (b) Ke’ng seo se bontšhago gore lengwalo la Jesaya 35:5-10 le sa tlo phethagala gape?

¹² Bala Jesaya 35:5-10. Hlokomela gore Jesaya o ile a bolela gape gore Baisiraele bao ba boetšego nageng ya gabo bona ba be ba ka se hlaselwe ke diphoofolo goba batho. O ile a bolela le gore naga ya bona e be e tlo tšweletša dienywa tše dintši ka ge go tla ba le meetse a mantši go no swana le serapeng sa Edene. (Gen. 2:10-14; Jer. 31:12) Na diporofeto tšeo di be di tla phethagala ka nako yeo feela? Hlokomela gore boporofeta bjoo bo ile bja bontšha gore difofu, digole le difoa di be di tlo fodišwa ka mohlolo. Eupša seo ga se sa ka sa phethagala ge Baisiraele ba boetše nageng ya gabo bona. Go e na le moo, Modimo o be a bontšha gore o be a tlo fediša malwetši ka moka nakong e tlago.

13, 14. Baisiraele bao ba ilego ba boela nageng ya gabo bona ba ile ba bona Jesaya 65:21-23 e phethagala bjang, gona ke karolo efe ya boporofeta bjo yeo e sa tlago go phethagala nakong e tlago? (Bona seswantšho seo se lego mathomong a sehlogo.)

¹³ Bala Jesaya 65:21-23. Ge Baisiraele ba boetše nageng ya gabo bona, ga se ba hwetša go na le dintlo tša manobonobo, le gona ga se ba hwetša mašemo a lemilwe. Eupša dilo di ile tša fetoga ge nako e dutše e eya ka gobane Modimo o ile a ba šegofatša. Nagana kamoo ba ilego ba thaba ka gona ge ba be ba aga dintlo gomme ba dula go tšona le go ipshina ka dijo tšeo ba di lemilego.

¹⁴ Hlokomela gore boporofeta bjo bo bontšha gore matšatši a rena “a tla etša matšatši a sehlare.” Dihlare tše dingwe di kgona go phela mengwaga e dikete. E le gore batho ba kgone go phela nako yeo e telele, go nyakega gore ba phele gabotse mmeleng. Ge e ba batho ba ka phela lefaseng leo le nago le khutšo le leo le kgahlišago leo Jesaya a boletšego ka lona e sa le pele, bophelo bo tla thabiša kudu. Ka nako yeo boporofeta bja gore re tlo phela nako e telele bo tla phethagala.

15. Ke ditšhegofatšo dife tše dingwe tšeo Jesaya a boletšego ka tšona e sa le pele?

¹⁵ Nagana kamoo ditšhegofatšo tšeo re boletšego ka tšona sehlogong se di bontšhago gore go tla ba le paradeise mo lefaseng. Ka nako yeo batho ka moka lefaseng ba tlo šegofatšwa ke Modimo. Batho ba ka se tšhabe go hlaselwa ke diphoofolo goba batho. Jehofa o tlo fodiša difofu, difoa le digole. Batho ba tlo ikagela dintlo tšeo ba di ratago le go ipshina ka dijo tšeo ba di bjetšego. Ba tlo phela nako e telele go feta dihlare. Ruri Beibele e re nea bohlatse bja gore lefase e tlo ba paradeise! Eupša batho ba bangwe ba ka bolela gore diporofeto tše ga se gore di bolela gore lefase e tlo ba paradeise. O ka ba araba bjang? Ke’ng seo se go dirago gore o kgodišege gore go tla ba le paradeise mo lefaseng? Motho yo a phagamego kudu yo a kilego a phela, e lego Jesu, o ile a bolela lebaka leo le re kgodišago gore Paradeise e tlo ba gona.

16, 17. Go be go direga’ng ge Jesu a be a bolela ka Paradeise?

¹⁶ Le ge Jesu a be a se na molato, o ile a kokotelwa koteng magareng ga disenyi tše pedi gore a bolawe. Pele se sengwe sa disenyi tšeo se ka hwa, se ile sa dumela gore Jesu ke kgoši ke moka sa re: “Jesu, o nkgopole ge o tsena Mmušong wa gago.” (Luka 23:39-42) Seo Jesu a ilego a se tshepiša monna yoo go Luka 23:43 se kgoma bophelo bja gago. Diithuti tše dingwe tša Beibele di bea leswao la fegelwana pele ga lentšu “lehono” gomme di fetolela temana ye ka tsela ye: “Ruri ke a go botša, lehono o tla ba le nna Paradeiseng.” Batho ba na le dikgopolo tše di fapafapanego mabapi le gore fegelwana yeo e swanetše go ba kae lefokong leo. Eupša ge e le gabotse Jesu o be a era go re’ng ge a be a re “lehono”?

¹⁷ Maleme a mantši lehono a diriša fegelwana go dira gore taba e kwagale. Eupša dingwalweng tša kgale tša Segerika, maswaodikga a be a sa dirišwe kudu. Seo se dira gore re ipotšiše gore na Jesu o be a re: “Ruri ke a go botša, lehono o tla ba le nna Paradeiseng”? Goba na o be a re: “Ruri ke go botša lehono, o tla ba le nna Paradeiseng”? Bafetoledi ba bea fegelwana pele goba ka morago ga lentšu “lehono” go ya ka seo ba naganago gore Jesu o be a se bolela. Le gona mekgwa yeo e mebedi ya go fetolela temana ye e hwetšagala ka diphetolelong tša Beibele tšeo di dirišwago lehono.

18, 19. Ke’ng seo se re thušago go kwešiša gore Jesu o be a era go re’ng ge a be a re: “Ruri ke go botša lehono, o tla ba le nna Paradeiseng”?

¹⁸ Lega go le bjalo, gopola seo Jesu a ilego a se botša barutiwa ba gagwe mabapi le lehu la gagwe. O itše: “Morwa wa motho le yena o tla ba lebitleng matšatši a mararo le mašego a mararo.” O ile a ba a re: “Morwa wa motho o tla ekwa gomme a gafelwa diatleng tša batho, ba tla mmolaya ke moka ka letšatši la boraro o tla tsošwa.” (Mat. 12:40; 16:21; 17:22, 23; Mar. 10:34) Moapostola Petro o ile a ngwala gore seo se ile sa direga. (Dit. 10:39, 40) Ka gona Jesu ga se a ya Paradeiseng ka letšatši leo yena le sesenyi seo ba hwilego ka lona. Jesu o be a le “Bodulabahu [goba “Hadese”]” ka matšatši a mararo, go fihlela Modimo a mo tsoša bahung.—Dit. 2:31, 32; mongwalo wa ka tlase. *

¹⁹ Ge Jesu a be a tshepiša sesenyi seo o ile a thoma ka gore: “Ruri ke go botša lehono.” Mokgwa wo wa go bolela o be o tlwaelegile le mehleng ya Moshe. Moshe o ile a re: “Mantšu a ao ke go laelago ona lehono, o a bee pelong ya gago.”—Doit. 6:6; 7:11; 8:1, 19; 30:15.

20. Ke’ng se sengwe gape seo se re thušago go kwešiša mantšu a Jesu?

²⁰ Ge mofetoledi yo mongwe yo a tšwago tikologong yeo Jesu a bego a dula go yona a be a bolela ka mantšu a Jesu o itše: “Ntlha ya bohlokwa kudu temaneng ye ke lentšu ‘lehono’ gomme lefoko le le swanetše go balwa ka tsela ye, ‘Ruri ke go botša lehono, o tla ba le nna Paradeiseng.’ Jesu o ile a tshepiša sesenyi seo ka letšatši leo ba bego ba tla bolawa ka lona, gomme o be a tlo phethagatša seo nakong e tlago.” Mofetoledi yoo o boletše le gore batho ba lefelong leo ba be ba tlwaetše go bolela bjalo, gomme seo se be se era gore “motho o be a tshepiša go dira selo se itšego ke moka a tlo se phethagatša letšatšing le lengwe.” Ke ka baka leo phetolelo e nngwe ya Sesiria ya lekgolong la bohlano la mengwaga e fetoletšego temana ye ka gore: “Amene, ke go botša gore lehono o tla ba le nna Serapeng sa Edene.” Ka moka ga rena re swanetše go kgothatšwa ke seo Jesu a ilego a se tshepiša sesenyi seo.

21. Re tseba bjang gore sesenyi seo ga se sa ka sa ya legodimong?

²¹ Ge Jesu a be a botša sesenyi seo ka Paradeise, o be a sa bolele ka paradeise ya legodimong. Re tseba seo bjang? Sesenyi seo se be se sa tsebe gore Jesu o be a dirile kgwerano le baapostola ba gagwe bao ba botegago gore ba yo buša le yena legodimong.  (Luka 22:29) Le gona sesenyi seo se be se sa kolobetšwa e bile se se sa tlotšwa ka moya o mokgethwa. (Joh. 3:3-6, 12) Ka gona ge Jesu a be a tshepiša sesenyi seo gore o tla ba le sona paradeiseng, o be a bolela ka paradeise ya mo lefaseng. Mengwaga e mentši ka morago ga moo, moapostola Paulo o ile a bona pono ya monna yo a ilego a “išwa paradeiseng.” (2 Bakor. 12:1-4) Go fapana le sesenyi seo, Paulo gotee le baapostola ba bangwe bao ba bego ba botega, ba ile ba kgethwa go yo buša le Jesu legodimong. Eupša Paulo o be a bolela ka paradeise yeo e sa tlago. * Na paradeise yeo e be e tla ba mo lefaseng? Na wena o tla ba gona paradeiseng yeo?

22, 23. Ke’ng seo wena o se letetšego?

²² Gopola gore Dafida o ile a bolela gore go tlo ba le nako yeo ‘baloki e tla bago beng ba lefase.’ (Ps. 37:29; 2 Pet. 3:13) Dafida o be a bolela ka nako yeo batho ka moka mo lefaseng ba tla bego ba phela ka melao ya Modimo ya go loka. Boporofeta bjo bo lego go Jesaya 65:22 bo re: “Matšatši a batho ba ka a tla etša matšatši a sehlare.” Se se ra gore batho ba tlo phela mengwaga e dikete. Na le wena o ka tla wa phela mengwaga yeo? Ee. Kutollo 21:1-4 e re Modimo o tlo ba le batho ba gagwe gomme e nngwe ya dikholofetšo tša gagwe ke gore “lehu le ka se hlwe le sa ba gona” lefaseng le lefsa.

²³ Seo Beibele e se rutago ka Paradeise se kwagala gabotse. Ke nnete gore Adama le Efa ba ile ba lahlegelwa ke Paradeise kua Edene, eupša seo ga se bolele gore go fedile ka Paradeise. Ka ge Modimo a tshepišitše, o tlo šegofatša batho ba gagwe ka moka paradeiseng. Jehofa o ile a laela Dafida gore a ngwale gore batho ba boleta le bao ba lokilego ba tlo dula mo lefaseng ka mo go sa felego. Le gona diporofeto tšeo di lego ka pukung ya Jesaya di swanetše go dira gore re fele pelo ya go tlo phela maemong a mabotse paradeiseng. Eupša potšišo ke gore paradeise e tlo tla neng? E tlo tla nakong ya ge seo Jesu a se holofeditšego sesenyi seo se phethagala. Le wena o ka ba gona Paradeiseng yeo. Ka nako yeo, go tlo phethagala seo bana babo rena le dikgaetšedi ba kua kopanong ya Korea ba ilego ba se bolela ge ba be ba re: “Re tla bonana Paradeiseng!”