1. Jehofa o neile batswadi boikarabelo bofe?

GE Jehofa a be a bopa Adama le Efa, e lego banyalani ba mathomo, o dirile gore ba be le kganyogo ya go ba le bana. Ke ka baka leo Beibele e rego: “Bana ke bohwa bjo bo tšwago go Jehofa.” (Ps. 127:3) Seo se ra go re’ng? Go hwetša karabo, a re re mogwera wa gago yo mogolo o go kgopela gore o mo hlokomelele tšhelete e ntši kudu. O tlo ikwa bjang? Ga go pelaelo gore o tla thabišwa ke gore o a go tshepa. Eupša o tla tshwenywa ke gore o tlo hlokomela bjang tšhelete yeo e ntši. Jehofa e lego mogwera wa rena yo mogologolo, o file batswadi selo se bohlokwa kudu go feta tšhelete seo ba swanetšego go se hlokomela. O neile batswadi boikarabelo bja go kgonthišetša gore bana ba bona ba hlokomelwa gabotse e bile ba thabile.

2. Re tlo araba dipotšišo dife sehlogong se?

² Ke mang a swanetšego go kgethela banyalani ge e ba ba tla ba le bana, le gore ba tla ba le bona neng? Gona batswadi ba ka dira’ng gore ba thuše bana ba bona gore ba thabele bophelo? E le gore re hwetše dikarabo tša dipotšišo tše, anke re boleleng ka melao ya motheo ya Beibele e sego kae yeo e tlago go thuša banyalani ba Bakriste go dira diphetho tše dibotse.

3. (a) Ke mang a swanetšego go kgethela banyalani ge e ba ba tla ba le bana? (b) Ke molao ofe wa motheo wa Beibele woo bagwera le ba leloko ba swanetšego go dula ba o gopola?

³ Ditšong tše dingwe, batho ba nagana gore monna le mosadi ba swanetše go ba le bana kapelapela ka morago ga gore ba nyalane. Ka gona banyalani bao ba ka ikwa ba gapeletšega go ba le  bana kapelapela ka baka la seo ba gabo bona le batho ba bangwe ba ba botšago sona goba ba se bolelago. Ngwanabo rena Jethro wa kua Asia o re: “Banyalani ba bangwe bao ba nago le bana ka phuthegong ba ka dira gore banyalani bao ba se nago bana ba ikwe ba gapeletšega go ba le bona.” Ngwanabo rena yo mongwe wa kua Asia e lego Jeffrey o re: “Ba bangwe ba botša banyalani bao ba se nago bana gore ba ka se be le motho yo a tlago go ba hlokomela ge ba tšofetše.” Eupša ga go na motho yo a swanetšego go kgethela banyalani ge e ba ba tla ba le bana. Ke bona ba swanetšego go ikgethela. (Bagal. 6:5) Ke therešo gore bagwera le ba leloko ba nyaka gore banyalani bao ba thabe, eupša ba swanetše go kwešiša gore banyalani ba ke bona ba swanetšego go ikgethela ge e ba ba tla ba le bana goba go se bjalo.—1 Bathes. 4:11.

4-5. Ke dipotšišo dife tšeo banyalani ba swanetšego go ipotšiša tšona, gona ba swanetše go boledišana neng ka dipotšišo tše? Hlalosa.

⁴ Banyalani bao ba nyakago go ba le bana ba swanetše go ipotšiša dipotšišo tše tše bohlokwa. Ya pele, ba nyaka go ba le bana neng? Ya bobedi, ba nyaka bana ba bakae? Eupša ba swanetše go boledišana ka dipotšišo tše neng? Gona ke ka baka la’ng go ipotšiša dipotšišo tšeo go le bohlokwa kudu?

⁵ Gantši go bohlokwa gore monna le mosadi ba bolele ka taba ya go ba le bana pele ba ka nyalana. Ke ka baka la’ng ba swanetše go bolela ka taba ye pele ba nyalana? Ke ka gobane go bohlokwa kudu gore ba dumelelane ka taba ye. Le gona ba tla swanelwa ke go ipotšiša ge e ba tla kgona go godiša bana. Banyalani ba bangwe ba kgethile gore ba be le bana ka morago ga ngwaga goba e mebedi ba šetše ba nyalane. Ka baka la’ng? Ka gobane ba nyaka go tlwaela go phela gotee pele ba ka ba le bana. Seo se tla dira gore ba tlwaelane gabotse pele e ka ba batswadi, ka gobane ge ba šetše ba na le bana ba tlo swanelwa ke go diriša nako e ntši le matla go ba hlokomela.—Baef. 5:33.

6. Mehla ye e boima yeo re phelago go yona e dirile gore banyalani ba bangwe ba kgethe go dira’ng?

⁶ Bakriste ba bangwe ba kgethile go ekiša mohlala wa barwa ba Noa ba bararo le basadi ba bona. Banyalani bao ba bararo ga se ba ka ba ba le bana gateetee ka morago ga gore ba nyalane. (Gen. 6:18; 9:18, 19; 10:1; 2 Pet. 2:5) Jesu o ile a swantšha mehla ya rena le “mehla ya Noa,” le gona ga go pelaelo gore re phela “[dinakong] tše di hlobaetšago tšeo go lego thata go lebeletšana le tšona.” (Mat. 24:37; 2 Tim. 3:1) Ke ka baka leo banyalani ba bangwe ba kgethilego gore ba tšwe ba eme ka go ba le  bana e le gore ba fetše nako e ntši ba hlankela Jehofa.

7. Melao ya motheo yeo e lego go Luka 14:28, 29 le go Diema 21:5, e ka thuša banyalani bjang?

⁷ Banyalani ba bohlale ba dula fase gomme ba “bala ditshenyegelo” pele ba ka ba le bana, le gore ba ka ba le ba bakae. (Bala Luka 14:28, 29.) Banyalani bao ba kilego ba godiša bana ba re go godiša bana go nyaka tšhelete e ntši. E bile go hloka nako e ntši le matla. Ka gona go bohlokwa gore banyalani ba ipotšiše dipotšišo tše bjalo ka gore: ‘Na ka moka ga rena re tlo swanelwa ke go bereka e le gore re tle kgone go reka dilo tšeo di nyakegago ka lapeng? Na re a dumelelana gore ke dilo dife tšeo re tlogago re di hloka ka lapeng? Ge e ba ka moka ga rena re tlo swanelwa ke go bereka, ke mang a tlago go re hlokomelela bana? Bana ba rena ba tla latela mohlala wa mang tseleng yeo ba dirago dilo ka yona le tseleng yeo ba naganago ka yona?’ Ge banyalani ba boledišana ka dipotšišo tše, ba diriša mantšu ao a lego go Diema 21:5.—Bala.

8. Banyalani ba swanetše go naganišiša ka mathata afe ao a ka tlišwago ke go ba le bana, gona monna yo a ratago mosadi wa gagwe o tlo dira’ng?

⁸ Bana ba hloka nako le tlhokomelo ya batswadi ba bona ka bobedi. Ge e ba banyalani ba na le bana ba banyenyane ba go latelana, batswadi ba ka hwetša go le thata go fa ngwana yo mongwe le yo mongwe nako. Banyalani bao ba ilego ba godiša bana ba mmalwa ka nako e tee, ba re ka dinako tše dingwe ba be ba sa tsebe gore ba dire eng goba ba reng. Mma a ka dula a ikwa a lapile kudu. Seo se ka dira gore a se be le matla a go ithuta, a go rapela, le a go ya tšhemong ka mehla. Le gona go ka ba thata gore a theetše gabotse ge a le dibokeng. Ke nnete gore monna yo a ratago mosadi wa gagwe o tlo mo thuša go hlokomela bana ba bona ge ba le dibokeng le ge ba le ka gae. Ka mohlala, monna yoo a ka thuša mosadi wa gagwe ka mešongwana ya ka gae. Le gona a ka šoma ka thata go kgonthišetša gore bohle ka lapeng ba holwa ke Borapedi bja Lapa. E bile o kgonthišetša gore o ya le lapa la gagwe tšhemong ka mehla.

9-10. Batswadi ba swanetše go dira’ng gore ba thuše bana ba bona go rata Jehofa?

⁹ Ke dilo dife tšeo batswadi ba ka di dirago go ruta bana ba bona go rata Jehofa? Ba ka šireletša bana ba bona bjang lefaseng le le lebe? A re kweng gore ke dilo dife tšeo batswadi ba ka di dirago.

¹⁰ Rapela Jehofa gore a go thuše. Nagana ka mohlala wa Manoa le mosadi wa gagwe, bao e bilego batswadi ba Simisone. Ka morago ga gore Manoa a tsebe gore yena le mosadi wa gagwe ba tlo ba le ngwana, o ile a lopa Jehofa gore a mo thuše go tseba kamoo ba ka godišago ngwana wa bona ka gona.

11. Batswadi ba ka ekiša bjang mohlala wa Manoa wo o lego go Baahlodi 13:8?

 ¹¹ Nihad le Alma, e lego banyalani bao ba tšwago nageng ya Bosnia and Herzegovina, ba ile ba ithuta mohlaleng wa Manoa. Ba re: “Go swana le Manoa, re ile ra lopa Jehofa gore a re thuše go ba batswadi ba babotse. Jehofa o ile a araba dithapelo tša rena ka ditsela tša go fapafapana. O ile a diriša Mangwalo, dikgatišo tše di theilwego Beibeleng, diboka le dikopano.”—Bala Baahlodi 13:8.

12. Josefa le Maria ba ile ba beela bana ba bona mohlala ofe?

¹² Ruta ka mohlala. Dilo tšeo o di bolelago di bohlokwa, eupša gantši bana ba ithuta dilong tšeo o di dirago. Ga go pelaelo gore Josefa le Maria ba beetše bana ba bona mohlala o mobotse kudu, go akaretša le Jesu. Josefa o ile a šoma ka thata gore a hlokomele lapa la gagwe. Le gona o ile a thuša lapa la gagwe gore le rate go hlankela Jehofa. (Doit. 4:9, 10) Le ge Josefa a be a sa gapeletšwe ke Molao go ya Jerusalema le lapa la gagwe “ngwaga o mongwe le o mongwe” go yo keteka Paseka, o ile a ya le lona. (Luka 2:41, 42) Mohlomongwe botate ba bangwe ba be ba bona go ya Jerusalema le malapa a bona e le morwalo. Eupša Josefa o be a rata go hlankela Jehofa, le gona o ile a ruta bana ba gagwe go dira seo. E bile Maria o be a tseba Mangwalo gabotse. Ga go pelaelo gore o ile a ruta bana ba gagwe go rata Lentšu la Modimo ka dilo tšeo a bego a di bolela le tšeo a bego a di dira.

13. Banyalani ba bangwe ba ile ba ekiša mohlala wa Josefa le Maria bjang?

¹³ Nihad le Alma bao re boletšego ka bona pejana, ba ile ba ekiša mohlala wa Maria le Josefa. Seo se ile sa ba thuša bjang gore ba rute morwa wa bona gore a rate go hlankela Jehofa? Ba re: “Re ile ra leka go bontšha morwa wa rena ka mediro gore go bose go phela ka melao ya motheo ya Jehofa.” Nihad o boletše le gore: “Eba motho yo o nyakago gore ngwana wa gago e be yena.”

14. Ke ka baka la’ng batswadi ba swanetše go tseba gore bana ba bona ba gwerane le bomang?

¹⁴ Thuša bana ba gago gore ba kgethe bagwera ba babotse. Mma le tate ba swanetše go tseba gore bana ba bona ba gwerane le bomang le gore ba dira eng ge ba na le bagwera bao. Seo se ra gore batswadi ba swanetše go tseba gore bana ba bona ba boledišana le bomang Inthaneteng le difounong tša bona. Bagwera ba ka dira gore bana ba fetoše tsela yeo ba naganago ka yona le tsela yeo ba dirago dilo ka yona.—1 Bakor. 15:33.

15. Batswadi ba ka ithuta’ng mohlaleng wa Jessie?

¹⁵ Batswadi ba swanetše go dira’ng ge ba sa tsebe mo gontši ka dikhomphutha le difouno? Jessie e lego tate wa kua Philippines o re: “Re be re sa tsebe mo gontši ka thekinolotši. Eupša seo ga se sa ka sa re thibela go ruta bana ba rena ka dikotsi tšeo di ka tlišwago ke go se diriše dikhomphutha, difouno le dithabolete gabotse.” Jessie ga se a ka a thibela bana ba gagwe go diriša dilo tšeo feela ka gobane yena a be a sa tsebe mo gontši ka tšona. O re: “Ke be ke botša bana ba ka gore ke mo gobotse gore ba diriše difouno tša bona go ithuta leleme le lefsa, go lokišetša diboka le go bala Beibele letšatši le letšatši.” Ge e ba o le motswadi, na o kile wa bala le bana ba gago le go boledišana le bona ka karolo ya “Bafsa” yeo e lego go jw.org/nso, yeo e bolelago ka go diriša difouno gabotse tabeng ya go romelana melaetša le go bea dinepe Inthaneteng? Na o kile wa boledišana le bona ka bidio yeo e rego, Diriša Social Network Gabotse le yeo e rego, Na Didirišwa tša Gago tša Elektroniki di a go Laola? * Dilo tše di ka go thuša ge o dutše o ruta bana ba gago kamoo ba ka dirišago difouno tša bona gabotse.—Die. 13:20.

16. Batswadi ba bantši ba dirile’ng go thuša bana ba bona, gona mafelelo e bile afe?

 ¹⁶ Batswadi ba bantši ba dira sohle seo ba ka se kgonago gore ba thuše bana ba bona gore ba gwerane le batho bao ba beago mohlala o mobotse wa go hlankela Jehofa. Ka mohlala, N’Déni le Bomine e lego banyalani ba kua Côte d’Ivoire, gantši ba be ba amogela molebeledi wa tikologo ka legaeng la bona. N’Déni o re: “Se se ile sa thuša morwa wa rena. O ile a thoma go bula madibogo gomme gona bjale ke mothuši wa molebeledi wa tikologo.” Na le wena o ka thuša bana ba gago gore ba gwerane le batho ba bjalo?

17-18. Batswadi ba swanetše go thoma neng go ruta bana ba bona?

¹⁷ Ruta bana ba gago e sa le ba banyenyane. Go bohlokwa kudu gore batswadi ba thome go ruta bana ba bona e sa le ba banyenyane. (Die. 22:6) Nagana ka mohlala wa Timotheo. Mmagwe e lego Yunise le makgolo wa gagwe Loisa ba ile ba mo ruta go hlankela Jehofa e sa le yo monyenyane goba “go tloga boseeng.” (2 Tim. 1:5; 3:15) Mafelelo e bile afe? Ge a godile o ile a sepela le moapostola Paulo ba tšama ba kgothatša diphuthego.

¹⁸ Banyalani ba bangwe ba kua Côte d’Ivoire, e lego Jean-Claude le Peace, ba ile ba kgona go godiša bana ba bona ka moka ba tshela gore ba rate go hlankela Jehofa. Ba thušitšwe ke’ng? Ba ile ba latela mohlala wa Yunise le Loisa. Ba re: “Re ile ra thoma go nweletša Lentšu la Modimo ka dipelong tša bana ba rena ka moragonyana ga gore ba belegwe.”—Doit. 6:6, 7.

19. Go nweletša Lentšu la Modimo ka dipelong tša bana ba gago ke go dira’ng?

¹⁹ Go “nweletša” Lentšu la Modimo ka dipelong tša bana ba gago ke go dira’ng? Sa pele, a re kweng gore go “nweletša” ke eng. Go “nweletša” ke go ruta le go gopotša ka go boeletša selo gantšintši. Ka gona, e le gore batswadi ba nweletše Lentšu la Modimo ka dipelong tša bana ba bona, ba swanetše go fetša nako e ntši ba na le bona. Ka dinako tše dingwe batswadi ba ka fetšwa matla ke go boeletša gantšintši dilo tšeo ba di rutilego bana ba bona. Eupša batswadi ba swanetše go bona se e le sebaka sa go thuša bana ba bona go kwešiša Lentšu la Modimo le go le diriša maphelong a bona.

20. Hlalosa kamoo batswadi ba ka dirišago Psalme 127:4 ge ba godiša bana ba bona.

²⁰ Tseba bana ba gago gabotse. Psalme 127  e swantšha bana le mesebe. (Bala Psalme 127:4.) Bana ga ba swane, go no swana le ge mesebe e sa swane e bile e sa lekane. Ka gona batswadi ba swanetše go tseba gore ba ka ruta ngwana yo mongwe le yo mongwe bjang. Banyalani ba bangwe ba kua Israel bao ba kgonnego go godiša bana ba bona ba babedi gore ba rate Jehofa ba re botša seo se ba thušitšego. Ba re: “Re be re sa ba swarele thuto ya Beibele ka nako e tee.” Ke nnete gore hlogo e nngwe le e nngwe ya lapa e tla kgetha ge e ba go ruta bana ka tsela ye go kgonega goba go hlokagala.

21. Jehofa o thuša batswadi bjang go godiša bana?

²¹ Ka dinako tše dingwe batswadi ba ka nagana gore go boima go ruta bana ba bona ka Modimo, eupša bana ke dimpho tše di tšwago go Jehofa. Ka baka leo, Jehofa o dula a ikemišeditše go thuša batswadi bao ba mo kgopelago tlhahlo ya go godiša bana, e bile o theetša dithapelo tša bona. Le gona o araba dithapelo tša bona a diriša Beibele, dikgatišo tše di theilwego Beibeleng le batswadi bao ba beago mohlala o mobotse ka phuthegong.

22. Tše dingwe tša dilo tše dibotse tšeo batswadi ba ka di direlago bana ba bona ke dife?

²² Batho ba bangwe ba re go tšea mengwaga e 20 go godiša ngwana, eupša ge e le gabotse go ba motswadi ga go fele. Tše dingwe tša dilo tše dibotse tšeo batswadi ba ka di direlago bana ba bona ke go ba ruta ka Jehofa, go ba bontšha lerato le go fetša nako e ntši ba na le bona. Ke therešo gore bana ba ka se arabele go swana. Eupša ba bantši ba bana bao ba godišitšwego ke batswadi bao ba ratago Jehofa, ba ikwa go swana le Joanna Mae yo a tšwago Asia, yoo a itšego: “Ge ke nagana ka tsela yeo batswadi ba ka ba nkgodišitšego ka yona, ke leboga kudu gore ba ile ba nnea tayo le go nthuta go rata Jehofa. Ga se ba ka ba ithola kgwara ge ba be ba nkgodiša, eupša ba mphile bophelo bja kgonthe.” (Die. 23:24, 25) Bana babo rena ba bantši le dikgaetšedi le bona ba ikwa ka tsela e swanago.