YO MONGWE LE YO MONGWE wa rena o swanetše go ipotšiša gore: “Na ke motho wa go leboga?” Beibele e boletše e sa le pele gore mehleng ye re phelago go yona batho ba bantši e tla ba “ba go se leboge.” (2 Tim. 3:2) Mohlomongwe o tseba batho bao ba dulago ba nyaka go direlwa dilo, goba go fiwa dilo. Batho bao ba ka bona eka ga go hlokagale gore ba leboge ge ba fiwa dilo. Ruri o ka ba o tseba gore go phela le batho ba bjalo ga go bose.

Eupša rena Jehofa o re ruta gore ‘re leboge.’ Re swanetše go ‘leboga selo se sengwe le se sengwe.’ (Bakol. 3:15; 1 Bathes. 5:18) Ge e le gabotse, go leboga go a re hola. Go re hola bjang? A re kweng kamoo re holegago ka gona.

Lebaka le bohlokwa la gore re dule re leboga ke gore re tlo thaba ka mehla. Ge o phela o leboga ba bangwe o tlo dula o thabile, gomme bao o ba lebogago le bona ba tlo thaba. Ke ka baka la’ng go leboga go dira gore o thabe e bile go dira gore ba bangwe ba thabe? Lebaka ke gore gantši ge batho ba go direla dilo, ba bona o le bohlokwa. Se se bontšha gore ba na le taba le wena. Le gona ge o bona seo o tlo thaba. Re bona se mohlaleng wa Ruthe. Boase o ile a swara Ruthe gabotse ka go mo fa dijo. Ga go pelaelo gore ge Ruthe a be a bona gore Boase o na le taba le yena, o ile a thaba.—Ruthe 2:10-13.

Go leboga Modimo go bohlokwa kudu. Ga go pelaelo gore o fela o nagana ka dilo tšeo Modimo a go diretšego tšona le tšeo a tšwelago pele a go direla tšona gore o be le tswalano e botse le yena. E bile o fela o nagana ka tsela yeo a go hlokometšego ka yona ka go go nea dijo le dilo tše dingwe. (Doit. 8:17, 18; Dit. 14:17) Eupša go e na le go no fela o nagana ka dilo tšeo, o swanetše go naganišiša ka tšona ka mo go tseneletšego. Go naganišiša ka dilo tšeo Jehofa a go direlago tšona go tla dira gore o mo leboge kudu le go bona gore o go rata kudu.—1 Joh. 4:9.

Eupša go fo naganišiša ka tšona ga se gwa lekana, re swanetše go leboga Jehofa. (Ps. 100:4, 5) Puku e nngwe e re: “Go leboga go dira gore batho ba thabe kudu.”

Lebaka le lengwe la gore re leboge ge batho ba re direla dilo ke gore segwera sa rena le bona se tlo gola. Ka moka ga rena re nyaka go lebogwa. Ge o leboga motho yo mongwe go tšwa pelong ge a go diretše selo se sebotse, segwera sa lena se tlo gola. (Baroma 16:3, 4) Le gona batho bao ba tlwaetšego go leboga, gantši ke bona ba thušago ba bangwe. Ba kgona go bona dilo tše dibotse tšeo batho ba bangwe ba ba direlago tšona gomme seo sa ba dira gore le bona ba nyake go direla ba bangwe dilo tše dibotse. Ruri go thuša ba bangwe go a thabiša. Ke ka baka leo Jesu a ilego a re: “Go na le lethabo le legolo go neeng go feta go amogeleng.”—Dit. 20:35.

Robert Emmons yo a bego a šoma gare ga bao ba bego ba dira nyakišišo ka go leboga kua Yunibesithing ya California o re: “Gore o be motho wa go leboga, o swanetše go gopola gore ka moka ga rena re a hlokana. Ka dinako tše dingwe re a fa, gomme ka dinako tše dingwe re a fiwa.” Taba e bohlokwa ke gore, motho ke motho ka batho. Ka mohlala, ba ka re thuša ka go re fa dijo goba ba re thuša ge re babja. (1 Bakor. 12:21) Motho wa  go leboga o tšeela godimo seo ba bangwe ba mo direlago sona. Potšišo ke gore: Na wena o tlwaetše go leboga ba bangwe?

Lebaka le lengwe la gore o ithute go leboga ke gore o tla nagana ka dilo tše dibotse go e na le go nagana ka dilo tše di sa kgahlišego. Seo se tla go thuša gore o nagane ka dilo tše dibotse go e na le go tshwenyega kudu ka mathata a gago. Ge e ba o le motho wa go leboga, o tlo bona dilo tše dibotse tšeo ba bangwe ba di dirago, gomme seo se tla dira gore o leboge le go feta. Ge o ka šetša dilo tše dibotse bophelong, seo se tla go thuša gore o dire seo moapostola Paulo a se boletšego ge a be a re: ‘Ka mehla thaba Moreneng.’—Bafil. 4:4.

Go ba motho wa go leboga go tla go thuša gore o dule o naganne ka dilo tše dibotse. Gantši ge motho a dula a nagana ka dilo tše dibotse ga a ke a eba le mona le go dula a kwatile. Le gona batho ba go leboga gantši ga ba rate mahumo. Ba leboga seo ba nago le sona, e bile ga ba lwele go hwetša dilo tše dingwe.—Bafil. 4:12.

Ka ge o le Mokriste, o swanetše go ba o šetše o lemogile gore Sathane o nyaka go go nyamiša ka mathata ao o kopanago le ona mehleng ye ya bofelo. Sathane o tla thaba ge o ka thoma go ba le mokgwa wa go balabala. Go ba le mokgwa wo go ka dira gore batho ba se thabele go go theetša ge o ba botša molaetša wa Beibele. Eupša ge o le motho wa go leboga, seo se bontšha gore o na le dika tšeo di enywago ke moya wa Modimo, e lego lethabo leo le tlišwago ke go bona dilo tše dibotse tšeo Modimo a go direlago tšona gotee le tumelo ya gore re tlo thabela bophelo nakong e tlago.—Bagal. 5:22, 23.

Ga go pelaelo gore ka ge o le Hlatse ya Jehofa, o dumelelana le selo se sengwe le se sengwe seo re boletšego ka sona sehlogong se mabapi le go leboga. Eupša o ka ba o lemoga gore ga go bonolo go dula o le motho wa go leboga le go bona dilo tše dibotse tšeo Jehofa a go direlago tšona. O se ke wa dumelela seo se go nyamiša. O ka kgona go dula o le motho wa go leboga. O ka kgona bjang? Letšatši le lengwe le le lengwe iphe nako ya go nagana ka dilo tšeo o ka di lebogago bophelong. Ge o ka dira bjalo, o tlo dula o le motho wa go leboga. Seo se tla dira gore o se be motho wa go belaela kudu ge o lebeletšane le mathata. Dula o nagana ka dilo tše dibotse tšeo Modimo a go direlago tšona le tšeo batho ba bangwe ba go direlago tšona tšeo di go thabišago. E bile mohlomongwe o ka thoma go ngwala dilo tšeo ka pukung. Letšatši le lengwe le le lengwe o ka ngwala dilo tše pedi goba tše tharo tšeo o di lebogago.

Banyakišiši ba hweditše gore go tlwaela go leboga go ka fetoša tsela yeo re naganago ka yona, gomme seo sa dira gore re ipshine ka bophelo. Motho wa go leboga o dula a thabile. Nagana ka dilo ka moka tše dibotse tšeo di go diragaletšego bophelong, le dilo ka moka tše dibotse tšeo o di hwetšago gona bjale, gomme o dule o di leboga. Go e na le gore o tšeele fase dilo ka moka tše dibotse tšeo Jehofa a go direlago tšona bophelong, dula ‘o mo leboga, ka ge a lokile.’ Le gona ‘leboga selo se sengwe le se sengwe.’—1 Dikor. 16:34; 1 Bathes. 5:18.