Na o ka araba dipotšišo tše di latelago o diriša Merokami ya 2019?

Kholofetšo ya Modimo yeo e rego: “Sebetša le ge e le sefe seo se rulelwago go lwa le wena se ka se atlege” e ra go re’ng? (Jes. 54:17)

Re ka tshepa gore Modimo o tla re šireletša ‘ledimong leo le tšubutlago.’ (Jes. 25:4, 5) Manaba a rena a ka se tsoge a atlegile go dira gore re se sa hlankela Jehofa.—w19.01, matl. 6-7.

Tsela yeo Modimo a ilego a dirišana le Bakanana le Baisiraele bao ba bego ba sa mo kwe e ile ya bontšha bjang gore o na le toka?

Modimo o ile a ahlola batho bao ba bego ba na le mekgwa e šišimišago ya thobalano le bao ba bego ba swara basadi le bana gampe. O ile a šegofatša batho bao ba bego ba mmotegela e bile ba swara ba bangwe ka toka.—w19.02, matl. 22-23.

Re swanetše go dira’ng ge e ba re ka ikhwetša re le moo go rapelago motho yo e sego Hlatse ya Jehofa?

Re ka no ikhomolela eupša ra dira bjalo ka tlhompho. Re ka se re “amene” thapelong yeo, le gona re ka se swarane le bangwe ka matsogo nakong ya thapelo. Re ka kgetha go ithapelela ka pelong.—w19.03, letl. 31.

Go tlaiša bana ka tša thobalano ke sebe se segolo gakaaka’ng?

Go tlaiša ngwana ka tša thobalano ke go senyetša ngwana yoo, go senyetša phuthego, go senyetša mmušo le go direla Modimo sebe. Dinageng tšeo go nago le melao ya go begela ba mmušo ge go na le motho yo go thwego o tlaišitše ngwana ka tša thobalano, bagolo ba latela molao wa naga ka go begela ba mmušo ka taba yeo.—w19.05, matl. 9-10.

O ka dira eng gore o fetoše goba o kaonefatše seo o lego sona ka garegare?

O swanetše go dira dilo tše di latelago: Bolela le Jehofa. Naganišiša e le gore o itlhahlobe gomme o kgethe bagwera ka bohlale.—w19.06, letl. 11.

Re ka dira eng gona bjale gore re itokišeletše go tlo tlaišwa?

Re swanetše go matlafatša tswalano ya rena le Jehofa. Re kgodišege gore Jehofa o a re rata le gore a ka se tsoge a re lahlile. Re bale Beibele letšatši le letšatši le go rapela ka mehla. Re kgodišege gore dilo tšeo Jehofa a re tshepišago tšona di tlo direga. Le gona re tsebe ka hlogo mangwalo ao re a ratago le dikopelo.—w19.07, matl. 2-4.

Re ka dira eng gore re thuše batho ba gabo rena gore Jehofa a tle a ba phološe?

Go bohlokwa gore re leke go ba kwešiša, re bee mohlala o mobotse, re se ke ra fela pelo le gona re be šedi.—w19.08, matl. 15-17.

Go etša ge Jesu a re holofeditše go Mateo 11:28, re lapološwa ke eng?

Re na le baetapele bao ba re ratago, bagwera ba kgonthe le mošomo o phalago mešomo ka moka.—w19.09, letl. 23.

Modimo a ka re nea bjang kganyogo le matla a gore re nyake go dira thato ya gagwe? (Bafil. 2:13)

Ge re bala Lentšu la Modimo le go naganišiša ka lona, Modimo a ka re nea matla le kganyogo ya go dira thato ya gagwe. Moya wa gagwe o mokgethwa o ka kaonefatša bokgoni bjo re šetšego re na le bjona.—w19.10, letl. 21.

Ke megato efe yeo re swanetšego go e tšea pele re dira phetho e kgolo?

Re swanetše go gata megato e latelago e mehlano: Dira nyakišišo ka mo go tseneletšego. Rapela Jehofa gore a go nee bohlale. Lebelela gore ke ka baka la eng o dirile phetho e itšego. Ipeele dipakane tše itšego. Eba le tekatekano.—w19.11, matl. 27-29.

Na thuto ya gore moya ga o hwe e tšwa go seo Sathane a ilego a se botša Efa serapeng sa Edene?

Aowa, go bonagala go se bjalo. Sathane o ile a botša Efa gore a ka se hwe, ga se a mmotša gore moya wa gagwe o tla tšwela pele o phela kaekae. Ge nkabe thuto yeo e thomile kua serapeng sa Edene, e be e ka se sa ba gona ka morago ga Meetsefula ka gobane Noa le lapa la gagwe ke bona feela bao ba phologilego Meetsefula. Go bonagala thuto yeo e thomile pele Modimo a ka phatlalatša batho bao ba bego ba aga tora ya Babele.—w19.12, letl. 15.