1-2. Mohlala wa Angelito o re ruta’ng?

NA BATSWADI ba gago ke Dihlatse tša Jehofa? Ge e ba go le bjalo, o swanetše go dula o gopola gore ga se gore ge bona e le bagwera ba Modimo, go ra gore le wena o mogwera wa gagwe. Go sa šetšwe gore batswadi ba rena ke Dihlatse tša Jehofa goba go se bjalo, yo mongwe le yo mongwe o swanetše go ba le segwera se sebotse le Jehofa.

² Nagana ka mohlala wa ngwanabo rena Angelito yo a dulago kua Asia. Ka gabo e be e le Dihlatse tša Jehofa. Eupša ge e be e sa le mofsa, o be a sa ikwe a na le tswalano e botse le Modimo. O re: “Ke be ke hlankela Jehofa ka gobane ke be ke no nyaka go dira seo ka gae ba se dirago.” Eupša Angelito o ile a phetha ka gore a iphe nako ya go bala Lentšu la Modimo le go naganišiša ka lona, gomme a thoma go rapela Jehofa gantšinyana. Angelito o ile a ithuta’ng? O re: “Ke ithutile gore tsela e nnoši ya gore ke be le segwera le Jehofa ke gore nna ka bonna ke mo tsebe.” Taba ye ya Angelito e dira gore re ipotšiše dipotšišo tše tša bohlokwa: Phapano ke efe magareng ga go tseba Modimo le go mo tseba gabotse? Gona re ka dira’ng gore re tsebe Jehofa gabotse?

3. Phapano ke efe magareng ga go tseba Modimo le go mo tseba gabotse?

³ Re ka no ipotša gore re tseba Modimo ka ge re tseba leina la gagwe goba tše dingwe tša dilo tšeo a di boletšego goba a di  dirilego. Eupša seo ga se re gore re tseba Modimo gabotse. Re swanetše go ipha nako ya go ithuta ka Jehofa le dika tša gagwe tše dibotse. Ke moka re tlo thoma go kwešiša gore ke ka baka la eng a bolela e bile a dira dilo tše itšego. Le gona seo se tlo re thuša go bona ge e ba Jehofa a rata seo re se naganago le seo re se dirago. Ke moka ge re šetše re tseba seo Jehofa a nyakago re se dira, re swanetše go se dira.

4. Go ithuta ka mehlala ya batho ba ka Beibeleng go tla re thuša bjang?

⁴ Batho ba bangwe ba ka re kwera ka ge re nyaka go hlankela Modimo, le gona ba ka re ganetša le go feta ge re thoma go ya dibokeng. Eupša ge e ba re bota Jehofa, a ka se tsoge a re lahlile. Re tla be re thoma go ba le segwera seo se ka se tsogego sa fela le Modimo. Eupša na ruri go a kgonega gore re tsebe Jehofa gabotse ka tsela yeo? Ee go a kgonega! Mehlala ya batho bao ba sa phethagalago ba go swana le Moshe le Kgoši Dafida e bontšha gabotse gore seo se a kgonega. Ge re dutše re ithuta ka dilo tšeo ba di dirilego, re tlo araba dipotšišo tše tše pedi: Ba ile ba dira’ng gore ba tsebe Jehofa? Gona re ka ithuta’ng mehlaleng ya bona?

5. Moshe o ile a kgetha go dira’ng?

⁵ Moshe o ile a kgetha go hlankela Jehofa. Ge a be a na le mengwaga e ka bago e 40, o ile a kgetha go phela le batho ba Modimo e lego Baisiraele, go e na le go nyaka go tsebja e le “morwa wa morwedi wa Farao.” (Baheb. 11:24) Moshe o ile a gana go ba le maemo a godimo. Ge Moshe a be a kgetha go thekga Baisiraele, o be a tseba gore Farao o tlo galefa kudu. Farao e be e le kgoši e matla kudu, le gona Baegipita ba be ba nagana gore e be e le modimo. Ruri seo se be se bontšha gore Moshe o be a na le tumelo e tiilego! Moshe o be a botile Jehofa. Go bota Jehofa ka tsela yeo go thušitše Moshe gore a be le tswalano e botse le Jehofa bophelo bja gagwe ka moka.—Die. 3:5.

6. Re ithuta’ng mohlaleng wa Moshe?

⁶ Re ithuta’ng mohlaleng wa Moshe? Go swana le Moshe, ka moka ga rena re swanetše go dira phetho ya ge e ba re tla hlankela Modimo le go gwerana le batho ba gagwe. Re ka swanela ke go ikgafa gore re hlankele Modimo, gomme seo se ka dira gore batho ba bangwe bao ba sa tsebego Jehofa ba re ganetše. Eupša ge re bota Tatago rena wa legodimong, re ka kgodišega gore o tla re thekga.

7-8. Moshe o ile a tšwela pele a ithuta’ng?

⁷ Moshe o ile a tšwela pele a ithuta ka dika tša Jehofa le go dira seo Modimo a se nyakago. Ka mohlala, ge Jehofa a be a kgopela Moshe gore a ntšhe Baisiraele Egipita o ile a ikwa a sa swanelege, gomme o ile a botša Jehofa seo ka makga a mantši. Modimo o ile a mmontšha kwelobohloko, ka mantšu a mangwe, o ile a kwešiša kamoo Moshe a bego a ikwa ka gona, ke moka a mo nea thušo yeo a bego a e hloka. (Ek. 4:10-16) Seo se ile sa dira gore Moshe a kgone go botša Farao melaetša ya kahlolo. Ke moka Moshe o ile a bona Jehofa a diriša matla a gagwe go phološa Baisiraele. E bile o ile a bona ge Jehofa a fediša Farao le madira a gagwe Lewatleng le Lehwibidu.—Ek. 14:26-31; Ps. 136:15.

⁸ Ka morago ga gore Moshe a ntšhe Baisiraele Egipita, ba ile ba dula ba ngongorega. Le ge ba be ba dula ba ngongorega, Moshe o ile a bona kamoo Jehofa a ilego a se fele pelo ge a be a dirišana le batho bao a bego a ba ntšhitše bokgobeng. (Ps. 78:40-43) Le gona Moshe o ile a bona Jehofa a bontšha boikokobetšo bjo bogolo ge a be a kgetha go se sa fediša  Baisiraele ka morago ga gore Moshe a mo kgopele gore a ba gaugele.—Ek. 32:9-14.

9. Go ya ka Baheberu 11:27, segwera sa Moshe le Jehofa se be se tiile gakaaka’ng?

⁹ Ka morago ga gore Moshe a ntšhe Baisiraele Egipita, segwera sa gagwe le Modimo se ile sa tia kudu moo go bego go le bjalo ka ge eka o bona Tatagwe wa legodimong. (Bala Baheberu 11:27.) Go bontšha kamoo segwera sa bona se bego se tiile ka gona, Beibele e re: “Jehofa [o ile] a bolela le Moshe ba lebantše difahlego, go etša ge motho a bolela le wa gabo.”—Ek. 33:11.

10. Re swanetše go dira’ng gore re tsebe Jehofa gabotse?

¹⁰ Seo re ithutago sona: E le gore re tsebe Jehofa gabotse, re swanetše go ithuta dika tša gagwe e bile re dire seo a se nyakago. Jehofa o nyaka gore “mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:3, 4) Tsela e nngwe ya gore re dire seo Jehofa a se nyakago ke ka go ruta batho ka yena.

11. Go ruta batho ka Jehofa go re thuša bjang go mo tseba gakaone?

¹¹ Gantši ge re ruta batho ka Jehofa re kgona go mo tseba gakaone. Ka mohlala, re kgona go bona kwelobohloko ya Jehofa ge a re thuša go hwetša batho bao ba nyakago go mo hlankela. (Joh. 6:44; Dit. 13:48) Le gona re kgona go bona gore Lentšu la Modimo le na le matla ge re bona batho bao re ithutago le bona Beibele ba fetoša mekgwa ya bona e mebe. (Bakol. 3:9, 10) E bile re kgona go bona gore Modimo ga a felele pelo batho ba tšhemong ya gabo rena ka ge re boela go bona gantši e le gore ba ithute ka yena gomme ba tle ba phologe.—Baroma 10:13-15.

12. Go ya ka Ekisodo 33:13, Moshe o ile a kgopela Jehofa eng, gona ka baka la’ng?

¹² Moshe o be a tšeela godimo kudu segwera sa gagwe le Jehofa. Le ge Moshe a dirile mediro e megolo a diriša leina la Modimo, o ile a kgopela Jehofa gore a mo thuše go mo tseba gakaone. (Bala Ekisodo 33:13.) Moshe o be a na le mengwaga ya ka godimo ga e 80 ge a be a dira kgopelo yeo, eupša o be a tseba gore go be go sa na le dilo tše dintši tšeo a ka ithutago tšona ka Tatagwe yo lerato wa legodimong.

13. Ke tsela efe e nngwe yeo re ka bontšhago gore re tšeela godimo segwera sa rena le Modimo?

¹³ Seo re ithutago sona: Go sa šetšwe gore re na le nako e kae re hlankela Jehofa, re swanetše go dula re tšeela godimo segwera sa rena le yena. Tsela e nngwe ya go bontšha gore re tšeela godimo segwera sa rena le Modimo ke go bolela le yena ka thapelo.

14. Ke ka baka la’ng thapelo e re thuša go tseba Modimo kutšwanyana?

¹⁴ Ge e ba o nyaka go ba le segwera se se tiilego le motho yo a itšego, o swanetše go bolela le yena ka mehla. Ka gona e le gore o be le segwera se se tiilego le Modimo, o se ke wa tšhaba go mmotša dilo tšeo o di naganago le kamoo o ikwago ka gona. (Baef. 6:18) Krista yo a dulago kua Turkey o re: “Nako le nako ge ke botša Jehofa kamoo ke ikwago ka gona gomme ke bona a nthuša, seo se dira gore ke mmote kutšwanyana le go mo rata le go feta. Go bona kamoo Jehofa a arabago dithapelo tša ka ka gona, go nthuša gore ke bone Jehofa e le Tate le Mogwera wa ka.”

15. Jehofa o ile a hlalosa bjang Kgoši Dafida?

¹⁵ Kgoši Dafida o belegetšwe ka lapeng leo le bego le hlankela Jehofa. Eupša Dafida ga se a ka a no hlankela Jehofa ka ge ka gabo ba be ba mo hlankela. O ile a ithuta ka yena, a ba le segwera se sebotse le yena gomme seo sa dira gore Jehofa a mo rate kudu. Jehofa ka  boyena o ile a re Dafida ke “monna yo a kwanago le pelo ya [gagwe].” (Dit. 13:22) Go tlile bjang gore Dafida a be le segwera se se tiilego ka tsela ye le Jehofa?

16. Ke’ng seo Dafida a ilego a ithuta sona ka Jehofa tlholong?

¹⁶ Dafida o ile a ithuta ka Jehofa tlholong. Ge Dafida e be e sa le yo monyenyane, o be a fetša nako e ntši a le nageng a hlokometše dinku tša tatagwe. Mohlomongwe ke ka yona nako yeo moo a ilego a thoma go naganišiša ka dilo tšeo Jehofa a di dirilego. Ka mohlala, ge Dafida a be a bona dinaledi tšeo di tletšego legodimong bošego, o be a naganišiša le ka yo a di dirilego. O be a kgona go bona dika tša Jehofa tlholong. Dafida o ile a tutueletšega go ngwala gore: “Magodimo a bolela ka letago la Modimo; gomme mediro ya diatla tša gagwe e tsebatšwa ke sebakabaka.” (Ps. 19:1, 2) Ge Dafida a be a naganišiša kamoo batho ba bopilwego ka gona, o ile a bona bohlale bja Jehofa. (Ps. 139:14) Le gona ge Dafida a be a naganišiša ka dilo tšeo Jehofa a di bopilego, o ile a ikwa e se selo ge a ipapiša le Jehofa.—Ps. 139:6.

17. Re ka ithuta’ng ge e ba re naganišiša ka tlholo?

¹⁷ Seo re ithutago sona: Re swanetše go rata tlholo ya Jehofa. Iphe nako ya go bogela dilo tšeo a di bopilego gomme o di thabele. O se ke wa no di gaša mahlo gomme wa feta. Ka mehla naganišiša ka seo tlholo e go rutago sona ka Modimo. Ipotšiše gore: Batho, mehlare le diphoofolo di nthuta eng ka Jehofa? Ge o ka dira bjalo, gona letšatši le lengwe le lengwe o tlo ithuta dilo tše dintši ka Tatago yo lerato. (Baroma 1:20) Le gona letšatši le letšatši o tlo mo rata le go feta.

18. Go ya ka Psalme 18, Dafida o ile a lemoga’ng?

¹⁸ Dafida o ile a kgona go bona gore Jehofa o be a mo thuša. Ka mohlala, ge Dafida a be a šireletša dinku tša tatagwe go tau le bere, o ile a lemoga gore Jehofa ke yena a ilego a mo thuša gore a bolaye diphoofolo tšeo. Le gona ge a be a fenya Goliata wa senatla, o ile a bona gore Jehofa o be a mo thuša. (1 Sam. 17:37) E bile ge a be a tšhabela Kgoši Saulo yo a bego a na le mona, le gona moo o ile a bona gore Jehofa ke yena a ilego a phološa bophelo bja gagwe. (Psalme 18 le mantšu a yona a mathomong.) Ge nkabe Dafida a be a na le boikgogomošo, o be a tla no nagana gore ga se a thušwa ke motho go dira dilo tše ka moka. Eupša ka ge a be a ikokobeditše, o ile a kgona go bona gore o thušitšwe ke Jehofa.—Ps. 138:6.

19. Re ka ithuta’ng mohlaleng wa Dafida?

¹⁹ Seo re ithutago sona: Ga se ra swanela go no kgopela Jehofa gore a re thuše. Eupša re swanetše go leka go bona kamoo a re thušago ka gona, le gore o re thuša neng. Ge e ba re ikokobeditše, re tla amogela gore re ka se kgone go dira dilo ka moka, gomme Jehofa ke yena a re thušago go dira seo re ka se kgonago. Le gona ka mehla ge re bona Jehofa a re thuša, segwera sa rena le yena se tlo tia le go feta. Isaac, e lego ngwanabo rena wa kua Fiji yo a hlanketšego Jehofa ka mengwaga e mentši, o ile a bona gore seo ke therešo. O re: “Ge ke lebelela bophelo bja ka, ke kgona go bona kamoo Jehofa a ilego a nthuša ka gona go tloga letšatšing leo ke ilego ka thoma go ithuta Beibele go fihla lehono. Ruri ke kgona go bona gore Jehofa o gona.”

20. Re ka ithuta’ng go segwera seo Dafida a bego a na le sona le Modimo?

²⁰ Dafida o ile a ekiša dika tša Jehofa. Jehofa o re bopile ka seswantšho sa gagwe e le gore re kgone go ekiša dika tša gagwe. (Gen. 1:26) Ge re fetša nako e ntši re ithuta ka dika tša Jehofa, re tlo kgona go mo ekiša gakaone.  Dafida o ile a kgona go ekiša Tatagwe wa legodimong ge a be a dirišana le ba bangwe ka gobane o be a tseba Jehofa gabotse. Nagana ka mohlala wo o tee: Dafida o ile a direla Jehofa sebe ka go dira bootswa le Batseba, gomme ka morago a laela gore monna wa gagwe a bolawe. (2 Sam. 11:1-4, 15) Eupša ka ge Dafida a kile a gaugela ba bangwe, Jehofa le yena o ile a mo gaugela. Ka ge Dafida e be e le mogwera yo mogolo wa Jehofa, Baisiraele ba be ba mo rata kudu gomme Jehofa o ile a mo diriša e le mohlala go dikgoši tše dingwe tša Isiraele.—1 Dikg. 15:11; 2 Dikg. 14:1-3.

21. Go ya ka Baefeso 4:24 le 5:1, mafelelo e ba afe ge re ‘ekiša Modimo’?

²¹ Seo re ithutago sona: Re swanetše go ba “baekiši ba Modimo.” Ge re ekiša Modimo re a holega e bile re ithuta dilo tše dintši ka yena. Le gona ge re ekiša dika tša gagwe re bontšha gore re bana ba gagwe.—Bala Baefeso 4:24; 5:1.

22-23. Go tlo direga’ng ge e ba re diriša seo re ithutago sona ka Jehofa?

²² Sehlogong se, re bone gore Jehofa o nyaka re ithuta ka yena re diriša tlholo le Lentšu la gagwe e lego Beibele. Ka Beibeleng go na le mehlala e mentši ya bahlanka ba Modimo bao ba botegago ba go swana le Moshe le Dafida bao re ka ba ekišago. Jehofa o dirile sohle gore a re thuše go mo tseba. Ka gona, le rena re swanetše go dira sohle seo re ka se kgonago gore re ithute ka yena.

²³ Re ka se tsoge re feditše go ithuta ka Jehofa. (Mmo. 3:11) Taba ya gore re tseba dilo tše dintši gakaakang ka Jehofa ga e bohlokwa, eupša sa bohlokwa ke gore re dira eng ka seo re se tsebago. Ge e ba re diriša seo re ithutilego sona e bile re leka go ekiša Tatago rena yo lerato, o tla tšwela pele a batamela kgauswi le rena. (Jak. 4:8) Le gona Jehofa o diriša Beibele go re kgonthišetša gore a ka se tsoge a lahla bao ba nyakago go mo tseba gabotse.