Aowa, go bonagala go se bjalo. Sathane ga se a ka a botša Efa gore ge a ka ja sehlare seo Modimo a ba boditšego gore ba se ka ba se ja mmele wa gagwe o be a tla hwa, eupša moya wa gagwe wa tšwela pele o phela kaekae. Sathane o ile a diriša noga go botša Efa maaka a gore ge a ka ja seenywa sa sehlare seo, ‘o be a ka se hwe lehu.’ Ge e le gabotse o be a botša Efa gore o be a tla tšwela pele a ipshina ka bophelo mo lefaseng, a sa laolwe ke Modimo.—Gen. 2:17; 3:3-5.

Ge e ba thuto ya gore moya ga o hwe e se ya thoma kua serapeng sa Edene, gona e thomile kae? Ga re tsebe. Seo re se tsebago ke gore madumedi ka moka a maaka a ile a fedišwa nakong ya Meetsefula a mehleng ya Noa. Ka ge Noa le lapa la gagwe e le bona feela ba phologilego Meetsefula, e bile ba be ba rapela Modimo wa therešo, seo se ra gore ka nako yeo go be go se na motho yo a rutago batho dithuto tša maaka.

Ka gona thuto ya gore moya wa motho ga o hwe e swanetše go ba e thomile ka morago ga Meetsefula. Ge Modimo a be a dira gore batho ba se sa bolela leleme letee kua Babele, ba ile ba “tloga moo ba ya lefaseng ka moka.” Ga go pelaelo gore ba tlogile moo le thuto ya gore moya wa motho ga o hwe. (Gen. 11:8, 9) Go sa šetšwe gore thuto yeo e thomile kae, re ka kgodišega gore Sathane Diabolo, e lego “tatago maaka,” ke yena a tlilego ka thuto ye, e bile o be a thabile ge a bona e phatlalala lefaseng ka moka.—Joh. 8:44.