Tabakgolo mo lengwalong le la Doiteronomio 22:25-27 ga se go bona monna yo molato, ka gobane o be a šetše a bonwe molato. Lebaka la gore molao wo o bewe, e be e le go tlo bontšha gore mosadi yo ga a na molato. Lengwalo la Doiteronomio 22:23, 24 le re thuša go kwešiša gore ke ka baka la eng ngwanenyana yo go bolelwago ka yena go Doiteronomio 22:25-27 a be a sa bonwe molato.

Ditemana tše di bolela ka monna yo a robetšego le ngwanenyana yo a beeleditšwego ge ba be ba le “motseng.” Monna yoo o be a bonwa molato ka gobane go ya ka molao, mosadi yo a beeleditšwego go be go swana le ge a nyetšwe. Ke ka baka la’ng ngwanenyana yo le yena a be a bonwa molato? Ka gobane go ya ka temana 24, “ga se a goeletša moo motseng.” Ge nkabe a ile a goeletša, ba bangwe ba be ba tla mo kwa gomme ba mo thuša. Eupša ga se a goeletša. Ka baka leo, bobedi bja bona ba be ba bonwa molato wa bohlotlolo.—Doit. 22:23, 24.

Eupša go Doiteronomio 22:25-27, Molao wa Moshe o re: “Ge e ba ngwanenyana yo a beeleditšwego a hweditšwe ke monna nageng gomme a mo swara a robala le yena, gona monna yo a robetšego le yena a bolawe a nnoši, eupša ngwanenyana yoo o se ke wa mo dira selo. Ngwanenyana yoo ga se a dira sebe seo se swanelwago ke lehu, ka gobane taba ye e etša ge monna a ka tsogela wa gabo gomme a mmolaya, a fediša bophelo bja gagwe. Monna yoo o hweditše ngwanenyana yoo nageng. Ngwanenyana yo a beeleditšwego o ile a goeletša eupša a hloka wa go mo hlakodiša.”

Boemong bjo, ngwanenyana yo o be a sa bonwe molato. Ka baka la’ng? Ka gobane “o ile a goeletša eupša a hloka wa go mo hlakodiša.” Ka gona, o be a se a dira bohlotlolo. Eupša monna yo o be a bonwa molato wa go kata le wa go hlotlola ka gobane ‘o ile a swara mosadi yo a beeleditšwego a robala le yena.’

Le ge tabakgolo mo lengwalong le e be e le go bontšha gore mosadi yo o be a se na molato, ditemana tše di hlalosa gabotse gore monna yo o be a na le molato wa go kata le wa bohlotlolo. Re ka kgodišega gore baahlodi ‘ba be ba tla nyakišiša molato woo gabotse,’ gomme ba dira phetho go ya ka melao ya Modimo yeo e bego e bušeleditšwe gantši Molaong wa Moshe.—Doit. 13:14; 17:4; Ek. 20:14.