Aowa. Seo Dafida a se ngwadilego moo e be e le therešo.

Bona seo a se ngwadilego moo temaneng yeo le ditemaneng tše dingwe: “Ka gona ke tla opelela leina la gago ka mo go sa felego, Gore ke phethe dikeno tša ka letšatši le letšatši.” “Wena Jehofa Modimo wa ka, ke go reta ka pelo ya ka ka moka, Ke tla tagafatša leina la gago go iša mehleng ya neng le neng.” “Ke tla reta leina la gago go iša mehleng ya neng le neng, gaešita le ka mo go sa felego.”Ps. 61:8; 86:12; 145:1, 2.

Dafida o be a sa feteletše mantšu, e bile o be sa nagane gore a ka se tsoge a hwa. O be a tseba gore Jehofa o boletše gore sebe seo motho a se dirilego se tlo feleletša ka lehu, e bile Dafida o be a tseba gore o na le sebe. (Gen. 3:3, 17-19; Ps. 51:4, 5) O be a tseba gore le banna ba go botega ba go swana le Aborahama, Isaka le Jakobo, ba hwile. Dafida o be a bona gore le yena o tlo hwa. (Ps. 37:25; 39:4) Eupša mantšu a gagwe ao a lego go Psalme 61:8 a be a bontšha kganyogo ya go nyaka go tumiša Modimo goba go fihlela a ehwa.—2 Sam. 7:12.

Ka dinako tše dingwe Dafida o be a ka dilo tšeo di diregilego bophelong bja gagwe go no swana le go Psalme kgaolo 18, 51 le 52. Go Psalme kgaolo 23, Dafida o hlalosa Jehofa e le modiši yo a hlahlago, a lapološago le yo a šireletšago. Dafida le yena e be e le modiši yo bjalo. Le gona o be a nyaka go hlankela Jehofa ‘matšatši ka moka a bophelo bja gagwe.’—Ps. 23:6.

Gopola gore Jehofa ke yena a go dira gore Dafida a ngwale dilo ka moka tšeo a di ngwadilego. Tše dingwe tša dilo tšeo a di ngwadilego di be di akaretša boporofeta bjo bo bego bo sa tla go phethagala. Ka mohlala go Psalme 110, Dafida o ile a hlalosa nako yeo Morena wa gagwe a tlago go “dula ka letsogong le letona la [Modimo]” magodimong gomme a newa matla a magolo. Ke matla a go dira’ng? A go fediša manaba ka moka a Modimo le go “ahlola ditšhaba” mo lefaseng. Dafida e be e le yena rakgolo wa motho yoo e lego Mesia, yena yoo a tlago go buša a le legodimong gomme a ba “moperisita [a buša] mehleng ya neng le neng.” (Ps. 110:1-6) Jesu o ile a dumela gore boporofeta bjo bo lego go Psalme 110 bo be bo bolela ka yena le gore bo be bo tla phethagala nakong e tlago.—Mat. 22:41-45.

Dafida o be a buduletšwe gore a ngwale ka nako ya gagwe le ka nako yeo e tlago moo a tla bego a tsošitšwe gomme a thabela go tumiša Modimo go iša mehleng ya neng le neng. Se se re thuša go bona gore Psalme 37:10, 11, 29 e phethagetše nakong e fetilego ya Baisiraele e bile e tlo phethagala le nakong e tlago ge Modimo a tla be a phethagatša dikholofetšo tša gagwe ka moka.—Bona serapa 8 sehlogong seo se rego “O Tla ba le Nna Paradeiseng” ka go Morokami wo.

Psalme 61:8 le ditemana tše dingwe tšeo Dafida a di ngwadilego di re bontšha gore nakong e fetilego ya Baisiraele Dafida o be a nyaka go tumiša Jehofa go fihlela a ehwa. Le gona di re bontšha gore Dafida o tlo kgona go dira’ng nakong e tlago ge Jehofa a tla be a mo tsošitše bahung.