Ge Jehofa a be a laela batho gore ba ‘tlale lefase ba be ba le fenye’ o be a bontšha gore lefase ka moka e tla ba paradeise. (Gen. 1:28) Bao ba tlago go phela ka mo go sa felego mo lefaseng ba tlo swanelwa ke go dira sona seo. Ka ge serapa sa Edene se sa hlwe se le gona, ba tlo swanelwa ke go thoma go dira gore lefase e be paradeise. Ka morago ga Haramagedone re tlo ba le mošomo o montši wa go hlwekiša lefase leo le sentšwego. Ruri mošomo wo e tlo ba o mogolo kudu!

Se se re gopotša mošomo woo Baisiraele ba ilego ba swanelwa ke go o dira ge ba etšwa Babilona. Go be go se na motho yo a dulago nageng ya bona ka mengwaga e 70. Eupša Jesaya o boletše gore Jehofa o tlo kgona go ba thuša gore ba tsošološe naga ya bona. Boporofeta bjoo bo itše: O tla “dira lešoka la yona gore le etše Edene gomme leganata la yona la etša serapa sa Jehofa.” (Jes. 51:3) Jehofa o ile a thuša Baisiraele gore ba dire naga yeo lefelo le lebotse gape. Ka mo go swanago, Jehofa o  tlo kgona go thuša bao ba tlago go ja bohwa bja lefase gore ba le dire paradeise e botse. Le gona go na le dilo tšeo re ka di dirago gona bjale go bontšha gore re nyaka go ba karolo ya batho bao ba tla bego ba dira lefase paradeise.

Re ka dira seo ka go hlwekiša magae a rena le go beakanya dilo gabotse. O ka dira seo le ge baagišani ba gago ba sa hlwekiše magae a bona. O ka dira seo le ka go hlwekiša Holo ya Mmušo yeo o kopanelago go yona le Holo ya Kopano ya kgauswi. Ge e ba maemo a go dumelela, o ka thuša ka go tšea karolo medirong ya tlhakodišo. Seo se tla bontšha gore o nyaka go thuša bana beno le dikgaetšedi ge ba hloka thušo. Ipotšiše gore, ‘Na nka ithutela dilo tšeo ke nyakago go tlo di dira lefaseng le lefsa?’

Ka morago ga gore Jesu a tsoše morwedi wa Jairo o boletše gore ngwana yoo o swanetše go newa sa go ja. (Mar. 5:42, 43) E ka no ba e be e se mošomo o thata go hlokomela ngwana yoo wa mengwaga e 12. Nagana ka mošomo o mogolo woo o tla bago gona ge Jesu a phethagatša mantšu ao a rego, “bohle bao ba lego mabitleng ba [tla kwa] lentšu la gagwe gomme ba tšwa.” (Joh. 5:28, 29) Le ge Beibele e sa re botše ditaba ka moka, re ka nagana kamoo bao ba tsošitšwego ba tlago go hloka dijo, madulo le diaparo. Na o ka bontšha gona bjale gore o nyaka go thuša? Nagana ka dipotšišo tše.

Ge phuthego ya geno e etelwa ke molebeledi wa tikologo, na o mo mema gore a tle dijong. Ge bana babo rena le dikgaetšedi bao ba hlankelago Bethele ba boela tšhemong goba ge molebeledi wa tikologo a fetša modiro wa gagwe wa bosepedi, na o ka thuša ka go ba nyakela madulo? Ge e ba kopano ya selete goba e kgethegilego e tlo swarelwa lefelong la geno, na o ka ithaopela go šoma goba na o ka amogela bana babo rena ba baeng?

Go ya ka Ditiro 24:15, re letetše gore batho ba dibilione ba tle ba tsošwe. Ba bantši ba bona e tlo ba bao ba sa kago ba hwetša sebaka sa go ithuta ka Jehofa. Ba tlo hwetša sebaka seo ka morago ga ge ba tsošitšwe. a Bahlanka ba botegago ba Modimo ba tlo thuša ka go ruta batho bao. (Jes. 11:9) Charlotte yoo a boletšego ditaba tše dibotse Yuropa, Amerika Borwa, le Afrika, o fela pelo ya seo. O bolela a thabile gore: “Ke fela pelo ya go ruta batho bao ba tsošitšwego bahung. Ge ke bala ka motho yo a phetšego nakong e fetilego ke dula ke nagana gore: ‘Ge a ka ba a be a tseba ka Jehofa, bophelo bja gagwe bo ka ba bo se ka tsela ye.’ Ke fela pelo ya go botša bao ba tsošitšwego ka Jehofa le gore maphelo a bona a ka ba a be a le kaone kudu ge nkabe ba ile ba mo hlankela.”

Le bahlanka ba Jehofa bao ba botegago bao ba phetšego pele Jesu a etla mo lefaseng, ba tlo swanelwa ke go ithuta dilo tše dintši. Nagana ka lethabo le tokelo yeo re tla bago le yona ya go hlalosetša Daniele ka go phethagala ga diporofeto tšeo a di ngwadilego eupša a be a sa di kwešiše. (Dan. 12:8) Nagana ka go thuša Ruthe le Naomi go kwešiša gore ba tšere karolo ka go ba bo makgolo ba Mesia. Re tlo thaba kudu ge re tla be re ruta batho lefaseng ka moka ka ntle le go gateletšega le tšhitišo yeo e tlišwago ke lefase le la Sathane.

O ka bontšha bjang gona bjale gore o ikemišeditše go tlo ruta batho nakong e tlago? Tsela e nngwe yeo e lego molaleng ke ka go kaonefatša tsela yeo o rutago ka yona le go tšea karolo modirong wa go ruta batho ditaba tše dibotse lefaseng ka moka gona bjale. (Mat. 24:14) Le ge maemo a gago goba mengwaga ya gago e sa go dumelele go dira kamoo o bego o nyaka ka gona, o ka dira kamoo o kgonago go ruta batho ditaba tše dibotse.

Potšišo ke gore: Na o itokišeleditše go ja bohwa bja lefase? Na o fela pelo ya go tlo dula mo lefaseng, le go thuša bao ba tsošitšwego ka madulo le go ba ruta? O ka bontšha gore o ikemišeditše ka go dira dilo tšeo di swanago le tšeo o tlago go di dira ge o tla ba o eja bohwa bja lefase!