1. “Khutšo ya Modimo” ke eng, gona e ka re hola bjang? (Bafilipi 4:6, 7)

 GO NA LE khutšo yeo batho ba bantši mo lefaseng ba sa tsebego ka yona. Ke “khutšo ya Modimo” e lego khutšo yeo e tlišwago ke go ba le segwera se sebotse le Tatago rena wa legodimong. Ge re na le khutšo ya Modimo re ikwa re šireletšegile. (Bala Bafilipi 4:6, 7.) Re thabela go ba le segwera sa kgaufsi le batho ba bangwe bao ba mo ratago. E bile re thabela go ba le segwera sa kgaufsi le “Modimo wa khutšo.” (1 Bathes. 5:23) Ge re tseba Tatago rena, re mo kwa e bile re mo tshepa, khutšo ya Modimo e tlo re dira gore re se ke ra belaela le ge re kopana le mathata.

2. Ke ka baka la’ng re ka kgodišega gore re ka ba le khutšo ya Modimo?

² Na go a kgonega gore re be le khutšo ya Modimo ge re kopana le mathata, go swana le mauba a malwetši, dikotsi, dintwa goba re tlaišwa? Mathata a ka moka, a ka dira gore re tšhoge. Eupša Jesu o ile a botša balatedi ba gagwe gore: “Le se dumelele dipelo tša lena di huduega le ge e le go di dumelela go tšhoga ka baka la poifo.” (Joh. 14:27) Bana babo rena le dikgaetšedi ba be ba dutše ba latela keletšo yeo. Jehofa o ile a ba thuša gore ba be le khutšo ge ba dutše ba kopana le mathata a bophelo.

3. Leuba la bolwetši le dirile bjang gore re se sa ba le khutšo?

³ Leuba la bolwetši le ka fetoša motho goba la fetoša dilo tšeo motho a tlwaetšego go di dira. Nagana ka bolwetši bja COVID-19. Pego e nngwe e bontšha gore batho ba bangwe ba be ba na le bothata bja go robala nakong ya leuba la bolwetši. Leuba leo la bolwetši le dirile gore go be le koketšego e kgolo ya go tshwenyega, ya dipelaelo, go gateletšega monaganong, go diriša bjala le dihlaretagi gampe le dintwa tša ka lapeng le  go leka go ipolaya. Ge go ka ba le leuba la bolwetši mo o dulago gona, o ka dira eng gore o se tshwenyege kudu le gore o thabele khutšo ya Modimo?

4. Ke ka baka la’ng go tseba boporofeta bja Jesu bja mabapi le mehla ya bofelo go re nea khutšo?

⁴ Jesu o boletše e sa le pele gore mehleng ya bofelo go tla ba le mauba a malwetši “lefelong le lengwe ka morago ga le lengwe.” (Luka 21:11) Go tseba se go re tlišetša khutšo bjang? Ga re makatšwe ke mauba a malwetši. Re a tseba gore Jesu o boletše gore dilo tše di tlo direga. Ka gona re tlo latela keletšo ya Jesu, yeo a e neilego batho bao ba phelago mehleng ya bofelo, yeo e rego: “Le bone gore le se ke la tšhoga.”—Mat. 24:6.

5. (a) Go ya ka Bafilipi 4:8, 9, re swanetše go rapelela’ng ge re lebeletšane le leuba la bolwetši? (b) Go theetša Beibele e rekhotilwego go ka go hola bjang?

⁵ Leuba la bolwetši le ka dira gore re dule re belaela e bile re tšhogile. Se ke seo se ilego sa diragalela kgaetšedi yo a bitšwago Desi. b Ka morago ga gore malome’agwe, motswala’gwe le ngaka ya gagwe ba hlokofale ka baka la bolwetši bja COVID-19, o be a tšhoga gore o tla fetelwa ke bolwetši bjo gomme a bo fetišetša go mmagwe yo a godilego. Ka baka la bolwetši bjo, o be a nagana gore a ka lahlegelwa ke mošomo wa gagwe, gomme a tla a palelwa ke go reka dijo le go lefa madulo. O be a tshwenyegile ka dilo tše mo a bego a palelwa le ke go robala bošego. Eupša Desi o ile a boela a ba le khutšo. Bjang? O ile a rapela Jehofa a mo kgopela gore a mo thuše gore a dule a išitše maswafo fase le go nagana ka dilo tše dibotse. (Bala Bafilipi 4:8, 9.) O ile a theetša ge Jehofa a “bolela” le yena ka Beibele yeo e rekhotilwego. O re, “Mantšu a babadi a ile a ntira gore ke se sa tshwenyega kudu le go mpontšha gore Jehofa o na le taba le nna.”—Ps. 94:19.

6. O ka thušwa bjang ke go ba le thuto ya motho ka noši le go ba gona dibokeng?

⁶ Leuba la bolwetši le ka dira gore o se sa dira dilo go swana le peleng, eupša o se ke wa dumelela seo se go thibela gore o be le thuto ya motho ka noši goba o se sa ba gona dibokeng. Diphihlelo tšeo di lego ka dikgatišong tša rena le dibidiong tša rena, di tlo go gopotša gore bana babo rena le dikgaetšedi ba hlankela Jehofa le go mmotegela le ge ba na le mathata a swanago. (1 Pet. 5:9) Diboka di tlo go thuša go nagana ka dilo tše di kgothatšago tšeo di tšwago ka Beibeleng. O tlo ba le sebaka sa go kgothatšwa le go kgothatša batho ba bangwe. (Baroma 1:11, 12) Ge o nagana kamoo Jehofa a ilego a thekga bahlanka ba gagwe ge ba be ba babja, ba tšhogile goba ba le noši, tumelo ya gago e tla tia gomme wa kgodišega gore le wena o tla go thekga.

7. O ithuta’ng go moapostola Johane?

 ⁷ Leka go dula o boledišana le bana beno le dikgaetšedi. Leuba la bolwetši le ka dira gore re se sa kopana le bana babo rena le dikgaetšedi. Ka nako yeo, o ka ikwa go swana le moapostola Johane. O be a nyaka go bona sefahlego sa mogwera wa gagwe Gayo. (3 Joh. 13, 14) Eupša Johane o ile a lemoga gore, o be a ka se kgone go bona sefahlego sa mogwera wa gagwe Gayo. Ka gona Johane o ile a dira seo a ka se kgonago, e lego go ngwalela Gayo lengwalo. Ge e ba o sa kgone go etela bana beno le dikgaetšedi, leka go boledišana le bona ka founo, bidio goba go ba ngwalela melaetša. Ge e ba o dula o boledišana le Bakristegotee le wena o tlo ikwa o se noši e bile o na le khutšo. Ge e ba o ikwa o tshwenyegile, boledišana le bagolo gomme o amogele kgothatšo ya bona e lerato.—Jes. 32:1, 2.

8. Ke bjang dikotsi di ka dirago gore o se sa ba le khutšo?

⁸ Ge e ba o ile wa welwa ke kotsi ya mafula, tšhišinyego ya lefase goba mollo, se se ka ba se ile sa go kweša bohloko kudu ka nako e telele. Ge e ba o ile wa hlokofalelwa ke batho ba o ba ratago goba dilo tšeo o bego o na le tšona o ka ba o ile wa ikwa o nyamile, o se sa na tshepo goba o galefile kudu. Seo ga se bolele gore o rata dilo tše di bonagalago goba ga o na tumelo. Go lebeletšana le teko go thata kudu le gona batho ba bangwe ba ka letela gore o ikwe ka tsela yeo. (Jobo 1:11) Le ge o ka kopana le mathata a mantši, o ka ba le khutšo. Bjang?

9. Ke’ng seo Jesu a re boditšego sona ka dikotsi?

⁹ Gopola seo Jesu a se porofetilego. Batho ba bantši ba nagana gore ba ka se tsoge ba diragaletšwe ke dikotsi. Eupša rena re a tseba gore go tlo ba le dikotsi tše dintši nakong ya rena e bile tše dingwe tša tšona di ka re diragalela. Jesu o ile a botša barutiwa ba gagwe gore ditšhišinyego tše dikgolo tša lefase le dikotsi tše dingwe di be di tlo direga pele bofelo bo etla. O ile a porofeta gape gore go tlo ba le “go oketšega ga go hloka molao” e lego seo re se bonago lehono. (Luka 21:11) Ka mohlala, go na le bosenyi bjo bontši, dintwa le ditlhaselo tša botšhošetši. Jesu ga se a ka a bolela gore mathata a, a tlo wela feela bao ba sa hlankelego Jehofa. (Mat. 24:12) Ge e le gabotse, bahlanka ba bantši ba botegago ba Jehofa le bona ba ile ba welwa ke dikotsi tše. (Jes. 57:1; 2 Bakor. 11:25) Jehofa a ka no se re šireletše ka mohlolo ge re welwa ke dikotsi, eupša o tlo re nea se re se hlokago gore re dule re išitše maswafo fase e bile a ba a re nea le khutšo.

10. Ke ka baka la’ng re ka re re bontšha gore re na le tumelo ge re itokišeletša dikotsi? (Diema 22:3)

¹⁰ Go tlo ba bonolo go dula re išitše maswafo fase ge kotsi e tšwelela ge e ba re ile ra itokišeletša e sa le pele. Eupša na go itokišeletša e sa le pele go bolela gore ga re tshepe Jehofa? Aowa. Go e na le moo go itokišeletša dikotsi go bontšha gore re tloga re tshepa gore Jehofa a ka re hlokomela. Bjang? (Bala Diema 22:3.) Lentšu la Modimo le re eletša gore re itokišeletše dikotsi tšeo di tlago. c Mokgatlo wa Modimo o dula o re eletša gore re itokišeletše dikotsi ka dikgatišo tša rena, diboka tša rena le ditsebišo tšeo di lego nakong. Na re tshepa Jehofa? Ge e ba go le bjalo re tlo latela keletšo yeo a re neago yona gona bjale, pele dikotsi di tšwelela.

11. O ithuta’ng mohlaleng wa Margaret?

¹¹ Nagana ka phihlelo ya kgaetšedi yo a bitšwago Margaret. O ile a laelwa gore a tšwe ka ntlong ka ge go be go na le mollo mo a dulago.  Ditsela di ile tša tlala ka ge batho ba bantši ba be ba nyaka go tšhaba ka nako e tee. Go be go na le muši o moso e bile Margaret o be a sa kgone go tšwa ka koloing ya gagwe. Eupša o ile a fologa ka ge a be a itokišitše e sa le pele. O be a swere mmapa ka mokotlaneng wa gagwe wo o bego o tla mo thuša go sepela ka tsela e nngwe. O be a ile a otlela tseleng yeo nakong e fetilego gore go tle go be bonolo gore a e hwetše nakong ya kotsi. Margaret o ile a phologa kotsi yeo ka ge a be a itokišitše e sa le pele.

12. Ke ka baka la’ng re latela megato ya tšhireletšego?

¹² Ka dinako tše dingwe balaodi ba ka re laela gore re se ke ra sepela ditseleng, re tloge mafelong ao re dulago go ona a kotsi goba re latele melao e mengwe e le gore re dule re bolokegile. Batho ba bangwe ba ka diega go kwa ditaelo goba ba dikadika ka ge ba sa nyake go tlogela dilo tšeo ba nago le tšona. Bakriste bona ba arabela bjang? Beibele e re botša gore: “Ka baka la Morena, ikokobeletšeng bohle bao e lego balaodi, e ka ba e le go kgoši ka ge e le yo mogolo goba go babuši ka ge ba romilwe ke yena.” (1 Pet. 2:13, 14) Mokgatlo wa Modimo le wona o re nea tlhahlo gore re dule re bolokegile. Re dula re gopotšwa gore re nee bagolo dinomoro tšeo di lego nakong gore ba re founele nakong ya kotsi. Na o šetše o ba neile dinomoro tša gago? Re ka hwetša le tlhahlo ya moo re ka dulago gona, moo re ka tšhabelago gona, moo re ka hwetšago dilo tša tlhakodišo goba gore re ka thuša batho ba bangwe bjang. Ge e ba re ka palelwa ke go latela tlhahlo yeo, re ka bea maphelo a rena le maphelo a bagolo kotsing. Gopola gore banna ba bao ba botegago ba re hlokometše. (Baheb. 13:17) Margaret o boletše gore, “Ke tloga ke dumela gore go latela tlhahlo ya bagolo le ya mokgatlo go phološitše bophelo bja ka.”

13. Ke eng seo se ilego sa dira gore Bakriste bao ba bego ba tšhabile magaeng a bona ba thabe e bile ba be le khutšo?

¹³ Bana babo rena le dikgaetšedi ba bantši bao ba ilego ba swanelwa ke go tlogela magae a bona ka baka la dikotsi goba dintwa, ba ile ba swanelwa ke go tlwaela maemo a bona a mafsa le go tšwela pele ba hlankela Jehofa. Go swana le Bakriste ba mehleng ya pele bao ba ilego ba gašana, ka baka la go tlaišwa, ba tšwela pele “ ba tsebatša ditaba tše dibotse tša lentšu.” (Dit. 8:4) Go bolela ditaba tše dibotse go ile gwa ba thuša gore ba dule ba nagana  ka Mmušo wa Modimo go e na le go nagana ka maemo a bona a thata. Ka baka la se, ba ile ba tšwela pele ba thabile, e bile ba na le khutšo.

14. Go tlaišwa go ka re tšeela khutšo ya rena bjang?

¹⁴ Ge re tlaišwa re ka lahlegelwa ke dilo tše dintši tšeo di re thušago gore re be le khutšo. Re thaba kudu ge re kopana, le ge re bolela ditaba tše dibotse ka bolokologi ka ntle le go tšhoga gore re ka golegwa. Ge e ba re tšhoga gore re ka tšeelwa tokologo yeo, re ka ikwa re nyamile, e bile re tšhoga gore go tlo direga eng nakong e tlago. Maikwelo a a tlwaelegile eupša re swanetše go hlokomela, Jesu o boletše gore ditlaišego di tlo dira gore barutiwa ba gagwe ba kgopše. (Joh. 16:1, 2) Bjale re ka dira eng gore re dule re na le khutšo le ge re tlaišwa.

15. Ke ka baka la’ng re sa swanela go tšhoga go tlaišwa? (Johane 15:20; 16:33)

¹⁵ Lentšu la Modimo le re botša gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Tim. 3:12) Ngwanabo rena yo a bitšwago Andrei o ile a thatafalelwa ke go dumela se ka morago ga gore modiro o thibelwe nageng ya gabo. O re: ‘Go na le Dihlatse tše dintši mo. Ke ka baka la’ng balaodi ba ka re golega ka moka?’ Eupša go e na le gore Andrei a be le khutšo, dilo tše a di naganago di ile tša mo dira gore a belaele. Bana babo rena ba bangwe ba ile ba tlogelela dilo ka matsogong a Jehofa ba se ke ba leka go ikgodiša gore ba be ba ka se golegwe. Ba be ba tseba gore ba ka no golegwa, eupša ba be ba sa tshwenyege go swana le Andrei. O ile a leka go nagana go swana le bona le go tshepa Modimo, ka gona o ile thoma go ikwa a na le khutšo le ge go be go na le mathata. Le rena re ka diragalelwa ke se se swanago. Le ge Jesu a ile a re botša gore re kgotlelele tlaišong o ile a re tiišetša le gore re ka dula re botega.—Bala Johane 15:20; 16:33.

16. Ke tlhahlo efe yeo re swanetšego go e latela ge re tlaišwa?

¹⁶ Ge modiro wa rena o thibetšwe, re ka hwetša tlhahlo yeo e tšwago go bagolo goba ofisi ya lekala. Ba tlo re šireletša le go kgonthiša gore re hwetša dijo tša moya le go bolela ditaba tše dibotse ka mo re ka kgonago. Dula o kgonthišetša gore o latela tlhahlo yeo o e hwetšago,  le ge o sa kwešiše dilo ka moka tšeo di laelwago. (Jak. 3:17) O se ke wa botša batho boitsebišo bja bana babo rena le dikgaetšedi le ka ditaba tša phuthego.—Mmo. 3:7.

17. Re ikemišeditše go dira’ng go swana le baapostola ba lekgolong la pele la mengwaga?

¹⁷ Lebaka le lengwe le legolo leo le dirago gore Sathane a lwe le batho ke ka gobane “ba na le modiro wa go nea bohlatse ka Jesu.” (Kut. 12:17) O se ke wa dumelela Sathane le batho ba gagwe ba go tšhošetša. Go bolela ditaba tše dibotse le go ruta go sa šetšwe kganetšo go dira gore re thabe go bile gore re nea khutšo. Ge baetapele ba Bajuda ba lekgolong la pele la mengwaga ba be ba laela baapostola gore ba tlogele go bolela ka ditaba tše dibotse banna bao ba go botega ba ile ba kgetha go kwa Modimo. Ba ile ba tšwela pele ba bolela ditaba tše dibotse, gomme modiro woo o be dira gore ba thabe. (Dit. 5:27-29, 41, 42) Ke nnete gore ge modiro wa rena o thibetšwe, re swanetše go ba šedi ge re bolela ditaba tše dibotse. (Mat. 10:16) Ge e ba re dira sohle seo re ka se kgonago go botša batho ba bangwe ditaba tše dibotse re tlo ba le khutšo yeo e tlišwago ke go hlankela Jehofa le go bolela ditaba tše di phološago maphelo.

18. Ke mang a ka re neago khutšo ya nnete?

¹⁸ Kgodišegang gore le ka ba le khutšo le nakong ya mathata. Ka dinako tšeo re swanetše go dula re gopola gore khutšo yeo re e nyakago ke khutšo ya Modimo, e lego khutšo yeo re ka e newago ke Jehofa feela. Ithekgeng ka yena ge go na le mauba a malwetši, dikotsi goba le tlaišwa. Dulang le le kgauswi le mokgatlo wa gagwe, dulang le lebeletše pele bokamosong bjo bo kgahlišago. Ge le dira bjalo “Modimo wa khutšo o tla ba le lena.” (Bafil. 4:9) Sehlogong seo se latelago, re tlo ithuta kamoo re ka thušago Bakristegotee le rena bao ba nago le mathata.