1. Pele ga ge Jesu a ka hwa, o boditše modirabobe yo a bego a le kgauswi le yena go re’ng? (Luka 23:39-43)

 JESU le badirabobe ba babedi bao ba bego ba le kgauswi le yena, ba ile ba kwa bohloko kudu ge bophelo bja bona bo be bo felela ganyenyane-ganyenyane. (Luka 23:32, 33) Go bonagala badirabobe ba e be e se barutiwa ba Jesu ka ge ba ile ba bolela gampe ka yena. (Mat. 27:44; Mar. 15:32) Eupša o tee wa bona o ile a fetoga. O boletše gore: “Jesu, o nkgopole ge o tsena Mmušong wa gago.” Jesu a mo araba a re: “Ruri ke go botša lehono, o tla ba le nna Paradeiseng.” (Bala Luka 23:39-43.) Ga go na bohlatse bjo bo bontšhago gore modirabobe yoo o ile a amogela molaetša wo Jesu a bego a bolela ka ona wa “Mmušo wa magodimo.” Le gona Jesu ga se a bolela gore monna yo o tla tsena mmušong wa legodimong. (Mat. 4:17) Jesu o be a bolela ka paradeise ya mo lefaseng. Ke ka baka la’ng re re’alo?

2. Re tseba bjang gore modirabobe yo a bego a itshola e be e le Mojuda?

² Go bonagala eka modirabobe yo a bego a itshola e be e le Mojuda. Modirabobe yoo o ile a botša yo mongwe gore: “Na ga o boife Modimo le gatee, ka ge bjale o ahlotšwe ka tsela e swanago?” (Luka 23:40) Bajuda ba be ba rapela Modimo o tee, eupša batho ba ditšhaba ba be ba dumela go medimo e mentši. (Ek. 20:2, 3; 1 Bakor. 8:5, 6) Ge nkabe badirabobe bao e se Bajuda, mohlomongwe modirabobe yoo o be a ka ba botšiša gore, “Na ga le tšhabe medimo le gatee?” Go oketša moo, Jesu o be a se a romelwa go batho ba ditšhaba eupša o be a rometšwe “go dinku tše di timetšego tša ntlo ya Isiraele.” (Mat. 15:24) Modimo o be a boditše Baisiraele gore o be a tla tsoša bahu. Go ka direga gore modirabobe yo a bego a itshola o be  a tseba ka taba ye, ka gobane mantšu a gagwe a bontšha gore o nagana gore Jehofa o be a tlo tsoša Jesu gore a buše Mmušong wa Modimo. Monna yo o be a tshepa gore le yena Modimo o tla mo tsoša.

3. Modiradibe yoo a ka ba a ile a nagana ka’ng ge Jesu Kriste a be a bolela ka paradeise? Hlalosa. (Genesi 2:15)

³ Ka ge modirabobe yo a bego a itshola e be e le Mojuda, go ka direga gore o be a tseba ka Adama le Efa le Paradeise yeo Jehofa a bego a ba beile go yona. Mohlomongwe modirabobe yoo o be a dumela gore paradeise yeo Jesu a boletšego ka yona e be e tla ba serapa se sebotse mo lefaseng.—Bala Genesi 2:15.

4. Mantšu ao Jesu a a boditšego modirabobe yo mongwe a swanetše go re dira gore re nagane ka’ng?

⁴ Mantšu ao Jesu a a boditšego modirabobe a swanetše go re dira gore re nagane ka tsela yeo bophelo bo tla bago ka yona paradeiseng. Ge e le gabotse, re ka ithuta se sengwe ka paradeise go tšwa go pušo ya khutšo ya Kgoši Solomone. Beibele e re botša gore Jesu o feta Solomone ka bogolo. Ka gona re ka letela gore Jesu le bao a tla bego a buša le bona ba tlo dira lefase gore e be paradeise e botse. (Mat. 12:42) Ka gona ba “dinku tše dingwe” ba swanetše go tseba seo ba swanetšego go se dira gore ba kgone go phela paradeiseng ka mo go sa felego.—Joh. 10:16.

5. O nagana gore bophelo bo tlo ba bjang Paradeiseng?

⁵ O nagana gore bophelo bo tlo ba bjang paradeiseng? Mohlomongwe o nagana ka serapa se sebotse go swana le serapa sa Edene. (Gen. 2:7-9) O ka ba o gopola boporofeta bja Mika bja gore motho “yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe.” (Mika 4:3, 4) O ka gopola le ditemana tša ka Beibeleng tšeo di bolelago gore go tla ba le dijo tše dintši. (Ps. 72:16; Jes. 65:21, 22) Ka gona o ka ipona o le serapeng se sebotse, e bile o dutše tafoleng yeo e tletšego ka dijo tše dibose. O ka nagana le ka monkgo o mobose wa mehlare le matšoba. O ka nagana ka bagwera ba gago go akaretša bao ba tsošitšwego le sega mmogo e bile le thabela bogwera. Seo ga se ditoro feela. Re ka kgodišega gore dilo tše di tlo direga mo lefaseng, e bile re tlo dira mošomo wo o thabišago Paradeiseng.

6. Re tlo dira’ng Paradeiseng? (Bona seswantšho)

⁶ Jehofa o re bopetše gore re thabele mošomo wa rena. (Mmo. 2:24) Re tlo swarega kudu nakong ya Pušo ya Kriste ya Mengwaga e Sekete. Bao ba tlago go phologa masetlapelo a magolo le batho ba dimilione bao ba tla bego ba tsošitšwe bahung, ba tlo hloka diaparo, dijo le mafelo a go dula. E le gore se se kgonege re tlo swanelwa ke go šoma ka thata. Go swana le ge Adama le Efa ba be ba ipshina ka serapa  sa Edene, le rena re tlo ipshina ka go phela Paradeiseng. Go tlo thabiša kudu go ruta batho ba dimilione bao ba tsošitšwego bao ba sa tsebego mo gontši ka Jehofa le morero wa gagwe le go ruta bao ba botegago bao ba phetšego pele Jesu a etla mo lefaseng!

7. Re ka kgodišega ka’ng gona ka baka la’ng?

⁷ Re ka kgodišega gore paradeiseng re tlo phela bophelo bjo bo nago le khutšo, bjo bo rulagantšwego gabotse, e bile ra ba le dilo ka moka tšeo re di hlokago. Ka baka la’ng? Ka gobane Jehofa o šetše a re bontšhitše gore bophelo bo tla ba bo le bjang ka tlase ga pušo ya Morwa wa gagwe. Re kgona go bona mohlala wa se pegong ya pušo ya Kgoši Solomone.

8. Mantšu ao Kgoši Dafida a a ngwadilego go Psalme 37:10, 11, 29 a ile a phethagala bjang? (Bona “Dipotšišo tše di Tšwago go Babadi” ka go Morokami wo.)

⁸ Kgoši Dafida o ile a budulelwa gore a ngwale gore bophelo bo tla be bo le bjang nakong e tlago ge go tla be go buša kgoši e bohlale le e botegago. (Bala Psalme 37:10, 11, 29.) Re dula re balela batho Psalme 37:11 ge re bolela ka paradeise ya nakong e tlago. Re na le lebaka la go dira bjalo ka gobane Jesu le yena o ile a tsopola mantšu ao Thutong ya Thabeng. (Mat. 5:5) Eupša mantšu a Dafida a bontšhitše gore bophelo bo be bo tla ba bjang mehleng ya Kgoši Solomone. Nakong ya ge Solomone a buša, batho ba kua Isiraele ba be ba thabela khutšo le botee nageng “yeo e elago maswi le dinose.” Modimo o be a itše: “Ge e ba le ka sepela ka melao ya ka . . . , Ke tla tliša khutšo nageng, la robala go se yo a le tšhošago.” (Lef. 20:24; 26:3, 6) Mantšu ao a ile a phethagala nakong ya ge Solomone a buša Isiraele. (1 Dikor. 22:9; 29:26-28) Le gona Jehofa o be a tshepišitše gore batho ba kgopo ‘ba tla be ba se sa le gona.’ (Ps. 37:10) Le ge mantšu ao a lego go Psalme 37:10, 11, 29 a phethagetše nakong e fetilego, re a tseba gore a tlo phethagala le nakong e tlago.

9. Kgošigadi ya kua Sheba e ile ya re’ng ka pušo ya Solomone?

⁹ Kgošigadi ya kua Sheba e ile ya kwa ka khutšo le botee tšeo Baisiraele ba di thabelago ka tlase ga pušo ya Solomone. Kgošigadi yeo e ile  ya tloga lefelong la kgole gomme ya ya Jerusalema gore e iponele ka mahlo. (1 Dikg. 10:1) Ka morago ga go bona pušo ya Solomone, e itše: “Ke be ke se ka botšwa le seripa sa tšona. . . . Go thaba setšhaba sa gago; go thaba bahlanka ba ba gago bao ba emago pele ga gago ka mehla gomme ba theetša bohlale bja gago!” (1 Dikg. 10:6-8) Eupša dilo tšeo di bego di direga ka tlase ga Pušo ya Solomone e no ba mohlala wa dilo tšeo Jehofa a tlago go di direla batho ka tlase ga pušo ya Morwa wa Gagwe Jesu.

10. Jesu o phagametše Solomone ka ditsela dife?

¹⁰ Jesu o phagametše Solomone ka ditsela ka moka. Solomone e be e le motho yo a sa phethagalago yoo ka dinako tše dingwe a ilego a dira diphošo tšeo di ilego tša dira gore batho ba Modimo ba be le mathata. Ka lehlakoreng le lengwe Jesu ke Mmuši yo a phethagetšego e bile ga a dire diphošo. (Luka 1:32; Baheb. 4:14, 15) Jesu o ile a botegela Modimo le ge Sathane a be a mo leka. Kriste a ka se tsoge a dirile sebe goba a dira selo le ge e le sefe seo se ka gobatšago batho bao ba mmotegelago. E tloga e le tokelo e kgolo go bušwa ke Kgoši e bjalo.

11. Ke bomang bao ba tlago go thuša Jesu go buša?

¹¹ Jesu o tlo šoma le babušigotee le yena ba 144 000 ka go hlokomela batho le go phethagatša morero wa Modimo ka lefase. (Kut. 14:1-3) Batho ba ba 144 000 ba ile ba kopana le mathata a mantši le diteko, ka gona ba tlo kgona go kwela bao ba tla bego ba phela mo lefaseng bohloko. Ge e le gabotse babušigotee le Jesu ba tlo dira eng?

12. Ke mošomo ofe woo Jehofa a tlago go o nea ba 144 000?

¹² Jesu le babušigotee le yena ba na le mošomo o montši woo ba tla bego ba o dira go feta woo Solomone a bego a na le wona. Kgoši Solomone o be a hlokomela batho ba dimilione lefelong letee feela. Eupša bao ba tla bego ba buša Mmušong wa Modimo ba tla be ba hlokomela batho ba dibilione lefaseng ka moka. Jehofa o tlo nea batho ba 144 000 tokelo e kgolo kudu!

13. Boikarabelo bjo bo kgethegilego bjo bašomigotee le Jesu ba tla bego ba na le bjona bo akaretša eng?

¹³ Ba 144 000 e tlo ba dikgoši le baperisita go swana le Jesu. (Kut. 5:10) Ka tlase ga Molao wa Moshe, baperisita ba be ba na le boikarabelo bja go kgonthišetša gore batho ba phetše gabotse mmeleng e bile ba na le segwera se sebotse le Jehofa. Molao woo e be e le “moriti wa dilo tše dibotse tše di tlago go tla,” ka gona re ka re bao ba tlago go buša le Jesu ba tlo kgonthišetša gore batho ba phetše gabotse mmeleng e bile ba na le segwera se sebotse le Modimo. (Baheb. 10:1) A re tsebe gore dikgoši tše le baperisita ba tlo boledišana bjang le batho bao ba tla bego ba phela ka tlase ga Mmušo wa Modimo mo lefaseng. Go sa šetšwe gore Jehofa o rulaganya eng, batho bao ba tla bego ba le Paradeiseng mo lefaseng ba tlo hwetša tlhahlo yeo ba e hlokago.—Kut. 21:3, 4.

14. Na ba “dinku tše dingwe” le bana babo Jesu ba a dirišana?

¹⁴ Jesu o biditše bao ba tlago go buša le yena gore ke “mohlatswana.” (Luka 12:32) O boletše le ka sehlopha se sengwe gore ke ba “dinku tše dingwe.” Dihlopha tše tše pedi di dira mohlape o tee. (Joh. 10:16) Dihlopha tše tše pedi di šetše di dirišana e bile di tlo tšwela pele di dirišana ge lefase le eba Paradeise. Ka nako yeo, “mohlatswana” o tla be o le legodimong gomme ba “dinku tše dingwe”  ba tla be ba thabela bophelo bjo bo sa felego mo lefaseng. Eupša go na le dilo tše dingwe tšeo ba “dinku tše dingwe” ba swanetšego go di dira gore ba tle ba kgone go phela Paradeiseng.

15. (a) Ba “dinku tše dingwe” ba dirišana bjang le bana babo Jesu? (b) O ka ekiša bjang mohlala wa ngwanabo rena yo a lego lebenkeleng? (Bona seswantšho.)

¹⁵ Monna wa modirabobe yo a bego a itshola o ile a hwa pele a ka bontšha gore o leboga seo Jesu a mo diretšego sona. Eupša rena ba dinku tše dingwe re na le dibaka tše dintši tša go bontšha gore re ikwa bjang ka Jesu. Ka mohlala, re bontšha seo ka tsela yeo re swarago batlotšwa ka yona. Jesu o itše o tlo ahlola batho go ya ka tsela yeo ba swarago batlotšwa ka yona. (Mat. 25:31-40) Re ka thekga bana babo Jesu ka go ba thuša ka mafolofolo modirong wa go bolela ditaba tše dibotse le go dira barutiwa. (Mat. 28:18-20) Re dira seo ka go diriša dithulusi tša go ithuta Beibele tša go swana le puku ya Thabela Bophelo go ya go Ile. O ka thoma go kgopela go ithuta Beibele le batho ba bantši ge eba o se wa hlwa o thoma go diriša puku ye.

16. Re ka dira eng gore re itokišeletše go tlo phela ka tlase ga Mmušo wa Modimo?

¹⁶ Ga se ra swanela go emela Paradeise e fihla pele re ka ba batho bao Jehofa a nyakago re eba bona. Ga bjale re swanetše go šoma ka thata gore re dule re botega go dilo tšeo re di bolelago le tšeo re di dirago. Le gona re ka botegela Jehofa, balekane ba rena le Bakriste gotee le rena. Ge re ka kwa Jehofa gona bjale mo lefaseng le le kgopo, go tlo ba bonolo gore re mo kwe lefaseng le lefsa la Paradeise. Re ka ithuta go phela ka tsela yeo e bontšhago gore re itokišeletša nako e tlago. Bala sehlogo seo se rego “Na o itokišeleditše go ‘ja bohwa bja lefase’?” ka go Morokami wo.

17. Na re swanetše go nyamišwa kudu ke dibe tšeo re di dirilego nakong e fetilego? Hlalosa.

¹⁷ Ge eba re ile ra dira sebe se segolo nakong e fetilego, re swanetše go šoma ka thata gore re se ke ra ikwa molato. Ke nnete gore re ka se no dira “sebe ka boomo” re tshepile gore se tla phumolwa ke sehlabelo sa topollo. (Baheb. 10:26-31) Eupša re ka kgodišega gore ge eba re itsholetše sebe se segolo seo re se dirilego e bile re kgopetše Jehofa le bagolo gore ba re  thuše, o šetše a re lebaletše ka mo go feletšego. (Jes. 55:7; Dit. 3:19) Gopola gore Jesu o boditše Bafarisei gore: “Ke tletše go bitša badiradibe, e sego baloki.” (Mat. 9:13) Sehlabelo sa topollo se na le matla kudu a go phumola dibe tša rena ka moka.

18. O nyaka go tlo bolela eng le modirabobe yo a hwilego kgauswi le Jesu?

¹⁸ Na o ipona o le Paradeiseng o bolela le modirabobe yo a bego a bolela le Jesu? Ga go pelaelo gore le tlo ba le leboga sehlabelo sa Jesu Kriste. O ka mmotšiša gape gore go diregile eng ka diiri tša mafelelo tša Jesu mo lefaseng le gore o ile a ikwa bjang ge Jesu a be a mo fetola. Mohlomongwe le yena a ka go botšiša gore go be go le bjang go phela mehleng ya bofelo ya tshepedišo ya Sathane. E tlo ba tokelo e kgolo go ithuta Lentšu la Modimo le batho ba go swana le monna yoo!—Baef. 4:22-24.

19. Ke ka baka la’ng bophelo Paradeiseng bo ka se tšwafiše? (Bona seswantšho sa letlakala la ka ntle.)

¹⁹ Bophelo bja Paradeiseng bo ka se tšwafiše. Re tlo dula re na le batho ba bantši bao re thabelago go kopana le bona le mošomo o montši woo re ka o dirago. Sa go thabiša le go feta ke gore letšatši le lengwe le le lengwe re tlo tseba Tatago rena wa legodimong gakaone le go thabela dilo ka moka tšeo a re direlago tšona. Go tlo dula go ena le dilo tše dintši tšeo re ka ithutago tšona ka yena le ka tlholo ya gagwe. Lerato la rena go Jehofa le tlo gola ge re dutše re phela. Re leboga Jehofa le Jesu ka go re nea kholofetšo ya gore re tlo phela ka mo go sa felego Paradeiseng!