1. Go naganišiša ka kholofetšo ya Jehofa ya bophelo bjo bo sa felego go dira gore re ikwe bjang?

 JEHOFA o tshepiša gore bao ba mo theetšago ba tlo hwetša “bophelo bjo bo sa felego.” (Baroma 6:23) Ge re nagana ka seo Jehofa a re tshepišitšego sona, lerato la rena go yena le a gola. Nagana ka se: Tatago rena wa legodimong o re rata kudu mo e lego gore ga go na seo se ka re aroganyago le yena.

2. Kholofelo ya go tlo phela ka mo go sa felego e re thuša bjang?

² Kholofetšo ya Modimo ya bophelo bjo bo sa felego e re thuša go kgotlelela mathata. Le ge manaba a rena a ka re tšhošetša ka gore a tlo re bolaya, re ka se tlogele go hlankela Jehofa. Ka baka la’ng? Ka gobane re a tseba gore ge re ka hwa re botegela Jehofa, o tlo re tsoša gomme ra se sa hwa gape. (Joh. 5:28, 29; 1 Bakor. 15:55-58; Baheb. 2:15) Ke ka baka la’ng re kgodišega gore re ka phela ka mo go sa felego? A re boledišaneng ka mabaka a latelago.

3. Ke ka baka la’ng re ka kgodišega gore Jehofa a ka dira gore re phele go ya go ile? (Psalme 102:12, 24, 27)

³ Re a tseba gore Jehofa a ka kgona go dira gore re phele go ya go ile ka ge e le mothopo wa bophelo e bile a sa hwe. (Ps. 36:9) Bona ditemana tše sego kae tšeo di bontšhago gore Jehofa o be a dutše a le gona e bile o tlo dula a le gona. Psalme 90:2 e re “Jehofa ke wa go tloga mehleng ya neng le neng go iša mehleng ya neng le neng.” Psalme 102 e bolela  seo se swanago. (Bala Psalme 102:12, 24, 27.) Moporofeta Habakuku o ile a ngwala ka Tatago rena wa Legodimong gore: “Jehofa, a ga se wa ba gona go tloga kgalekgale? O Modimo wa ka, Mokgethwa wa ka, ga o hwe.”—Habak. 1:12.

4. Hlalosa gore ke ka baka la’ng re se ra swanela ke go tshwenywa ke taba ya gore Jehofa o be a dutše a le gona.

⁴ Na o hwetša go le thata go kwešiša gore Jehofa o bile gona go tloga “mehleng ya neng le neng”? (Jes. 40:28) Batho ba bantši ba hwetša go le thata go kwešiša seo. Elihu o ile a bolela ka Modimo gore: “Palo ya nywaga ya gagwe ga e latišege.” (Jobo 36:26) Eupša ge e ba re sa kwešiše selo, seo ga se bolele gore ga se nnete. Ka mohlala, re ka no ba re sa kwešiše gore mohlagase o šoma bjang eupša seo ga se bolele gore mohlagase ga o gona. Ka mo go swanago, le rena re ka se kwešiše ka mo go feletšego taba ya gore Jehofa o be a dutše a le gona le gore o tlo dula a le gona. Eupša se ga se bolele gore Modimo ga a phele ka mo go sa felego. Bokgoni bja Mmopi wa rena ga se bja lekanyetšwa ke seo re se kwešišago le seo re sa se kwešišego. (Baroma 11:33-36) O be a dutše a le gona pele ga ge dilo ka moka di ka ba gona, go akaretša letšatši le dinaledi. Jehofa o re kgodiša gore “Ke yena Modiri wa lefase ka matla a gagwe.” O bile gona pele a ka ‘phurolla magodimo.’ (Jer. 51:15; Dit. 17:24) Re na le lebaka le lefe le lengwe leo le ka re kgodišago gore re ka phela go ya go ile?

5. Ke kholofelo efe yeo Adama le Efa ba bego ba na le yona?

⁵ Dilo ka moka tšeo Jehofa a di bopilego mo lefaseng di be di tlo hwa ka ntle le batho. O ba file kholofelo ya moswananoši ya go se hwe. Eupša Jehofa o lemošitše Adama gore: “Ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.” (Gen. 2:17) Ge nkabe Adama le Efa ba kwe Jehofa ba be ba ka se hwe. Ke mo go kwagalago gore mafelelong Jehofa o be a tlo ba dumelela gore ba je dienywa tša “sehlareng sa bophelo.” Se se be se tla bolela gore Jehofa o ba kgonthišetša gore ba tla “phela go ya go ile.” b—Gen. 3:22.

6-7. (a) Ke’ng se sengwe seo se bontšhago gore batho ba be ba se ba bopelwa gore ba hwe? (b) Ke dilo dife tšeo o felago pelo ya go tlo di dira? (Bona diswantšho.)

⁶ Borasaense ba bangwe ba hweditše bohlatse bja gore bjoko bja rena bo ka boloka boitsebišo bjo bontši go feta dilo tše dintši tšeo re ka ithutago ka tšona bophelong bja rena  bja gona bjale. Ka 2010 kuranta ya Scientific American Mind e boletše gore bjoko bja rena bo ka boloka boitsebišo bjo bo lekanago le diiri tše 3 million goba mengwaga e 300 ya mananeo ka moka ao a lego thelebišeneng. Eupša go ka direga gore bjoko bja rena bo ka boloka dilo tše dintši go feta moo. Se se bontšha gore Jehofa o bopile bjoko bja rena gore bo boloke dilo tše dintši go feta tšeo re ka ithutago tšona ka mengwaga e 70 goba e 80.—Ps. 90:10.

⁷ Jehofa o dirile gape gore re kganyoge go phela ka mo go sa felego. Beibele e re Modimo “o tsentše bosafelego dipelong tša batho.” (Mmo. 3:11) Le ke lebaka le lengwe leo le dirago gore re lebelele lehu e le lenaba la rena. (1 Bakor. 15:26) Ge e ba re babja kudu, na re no ineela ke moka ra letela go hwa? Aowa. Gantši re ya ngakeng le go nwa dihlare gore re fole. Re dira sohle seo re ka se kgonago gore re se ke ra hwa. E bile re nyama kudu le go kwa bohloko ge motho yo re mo ratago a ehwa. (Joh 11:32, 33) Mmopi wa rena yo a re ratago, o be a ka se re nee kganyogo le matla a gore re tšwele pele re phela ge e ba morero wa gagwe e se gore batho ba phele ka mo go sa felego. Eupša re na le mabaka a mangwe ao a ka dirago gore re dumele gore re ka phela ka mo go sa felego. Ga bjale re tlo boledišana ka seo Jehofa a se dirilego nakong e fetilego le seo a se dirago gona bjale e lego bohlatse bjo bo bontšhago gore morero wa gagwe wa mathomong ga se wa fetoga.

8. Jesaya 55:11 e re ruta’ng ka morero wa Jehofa?

⁸ Jehofa ga se a ka a fetola morero wa gagwe le ge Adama le Efa ba ile ba dira sebe gomme bona le bana ba bona ba thoma go hwa.  (Bala Jesaya 55:11.) O sa nyaka gore batho bao ba botegago ba tle ba phele ka mo go sa felego. Re tseba se ka lebaka la dilo tšeo Jehofa a di boletšego le tšeo a di dirilego go phethagatša dikholofetšo tša gagwe.

9. Modimo o re holofeditše eng? (Daniele 12:2, 13)

⁹ Jehofa o tshepišitše gore o tla tsoša bahu gomme a ba nea bophelo bjo bo sa felego. (Dit. 24:15; Tito 1:1, 2) Monna yo a botegago Jobo o be a tseba gore Jehofa o fela pelo ya go tsoša batho bao ba hwilego. (Jobo 14:14, 15) Moporofeta Daniele le yena o be a tseba gore batho ba tlo tsošwa gomme ba newa sebaka sa go phela go ya go ile. (Ps. 37:29; bala Daniele 12:2, 13.) Bajuda ba mehleng ya Jesu le bona ba be ba tseba gore Jehofa a ka nea bahlanka ba gagwe bao ba botegago “bophelo bjo bo sa felego.” (Luka 10:25; 18:18) Jesu o boletše gantši ka kholofetšo ye, gomme le yena o ile tsošwa ke Tatagwe.—Mat. 19:29; 22:31, 32; Luka 18:30; Joh 11:25.

10. Go tsošwa ga batho nakong e fetilego go re nea bohlatse bofe? (Bona seswantšho)

¹⁰ Jehofa ke monei wa bophelo e bile o na la matla a go tsoša bao ba hwilego. O ile a nea moporofeta Eliya matla a gore a tsoše morwa wa mohlologadi wa Tserepata. (1 Dikg. 17:21-23) Ka morago Modimo o ile a thuša moporofeta Elisha gore a tsoše morwa wa mosadi wa Moshunema. (2 Dikg. 4:18-20, 34-37) Ditsogo tše le tše dingwe di hlatsela gore Jehofa o na le matla a go tsoša bahu. Ge Jesu a be a le mo lefaseng o ile a bontšha gore Tatagwe o mo neile matla a go tsoša bahu. (Joh 11:23-25, 43, 44) Gona bjale Jesu o legodimong gomme o neilwe “matla . . . legodimong le lefaseng.” Ka gona o tlo phethagatša kholofetšo ya gore “bohle bao ba lego mabitleng” ba tlo tsošetšwa bophelong gore ba tle ba phele ka mo go sa felego.—Mat. 28:18; Joh 5:25-29.

11. Ke bjang topollo e dirago gore go kgonagale gore re tle re phele ka mo go sa felego?

¹¹ Ke ka baka la’ng Jehofa a ile a dumelela Morwa wa gagwe gore a hwe lehu le sehlogo? Jesu o re nea lebaka ge a re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Modimo o re neile morwa wa gagwe gore a re lopolle sebeng sa rena gomme ka lebaka la seo re tlo kgona go hwetša bophelo bjo bo sa felego. (Mat. 20:28) Moapostola Paulo o ile a hlalosa karolo ya bohlokwa ya morero wa Modimo ge a be a ngwala gore: “Bjalo ka ge lehu le tlile ka motho, tsogo ya bahu le yona e tla ka motho. Gobane go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.”—1 Bakor. 15:21, 22.

12. Mmušo wa Modimo o tlo thuša bjang go phethagatša morero wa Jehofa ka rena?

¹² Jesu o rutile barutiwa ba gagwe gore ba rapelele gore Mmušo wa Modimo o tle le gore thato ya gagwe e direge mo lefaseng. (Mat. 6:9, 10) Karolo e nngwe ya morero wa Modimo ke gore batho ba tle ba phele ka mo go sa felego mo lefaseng. E le gore se se kgonege, Jehofa o kgethile Jesu gore e be Kgoši ya Mmušo wa Mesia. Modimo o be a dutše a kgoboketša batho ba 144 000 go tšwa lefaseng gore ba tle ba šome le Jesu go phethagatša morero wa gagwe.—Kut. 5:9, 10.

13. Jehofa o dira eng gona bjale, gona ke’ng seo wena o swanetšego go se dira?

¹³ Gona bjale Jehofa o kgoboketša “lešaba le legolo” le gona o le tlwaetša gore le tle le kgone go phela ka tlase ga Mmušo wa gagwe. (Kut. 7:9, 10; Jak. 2:8) Lehono batho ba  bantši mo lefaseng ga ba ratane e bile ba a lwa eupša bao e lego karolo ya lešaba le legolo, ba šoma ka thata gore ba se ke ba hloyana. Ba bontšha ka ditiro tša bona gore ba rula ditšhoša tša bona ba di dira megoma. (Mika 4:3) Go ena le gore ba tšee karolo dintweng tšeo di bolayago batho ba bantši, ba thuša batho go hwetša “bophelo bja kgonthe” ka go ba ruta ka Modimo wa kgonthe le merero ya gagwe. (1 Tim. 6:19) Ba leloko ba ka ba ganetša goba ba ka hloka tšhelete ka ge ba thekga Mmušo wa Modimo eupša Jehofa o dula a kgonthišetša gore ba hwetša seo ba se hlokago. (Mat. 6:25, 30-33; Luka 18:29, 30) Dintlha tše di re kgodiša gore Mmušo wa Modimo ke wa therešo le gore Jehofa o tlo tšwela pele a phethagatša morero wa gagwe.

14-15. Jehofa o tlo phethagatša bjang kholofetšo ya gagwe ya go fediša lehu ka mo go sa felego?

¹⁴ Gona bjale Jesu ke kgoši legodimong, le gona o tlo phethagatša dilo ka moka tšeo Jehofa a re tshepišitšego tšona. (2 Bakor. 1:20) Ga e sa le go tloga ka 1914, Jesu o be a dutše a fenya manaba a gagwe. (Ps. 110:1, 2) Kgauswinyane, Jesu le babušigotee le yena ba tlo fediša batho ka moka ba babe mo lefaseng.—Kut. 6:2.

¹⁵ Nakong ya pušo ya Jesu ya mengwaga e sekete, bahu ba tlo tsošwa gomme bao ba kwago Jehofa ba tlo phethagala. Ka morago ga teko ya mafelelo, bao Jehofa a tlago go ba ahlola ba lokile e tla ba beng ba lefase, “ba tla dula mo go lona ka mo go sa felego.” (Ps.  37:10, 11, 29) Sa go thabiša ke gore, ‘lehu e lego lenaba la mafelelo le tla fedišwa.’—1 Bakor. 15:26

16. Lebaka le legolo leo le dirago gore re nyake go hlankela Jehofa ke lefe?

¹⁶ Ka ge re bone sehlogong se, kholofelo ya rena ya go tlo phela ka mo go sa felego e ithekgile ka Lentšu la Modimo. Kholofelo ye e ka re thuša go dula re botega mehleng ye e thata ya bofelo. Lebaka la bohlokwa la gore re dule re botegela Jehofa le Jesu ke ka gobane re ba rata e sego ka gobane re nyaka go dula re phela. (2 Bakor. 5:14, 15) Se se dira gore re nyake go ba ekiša e bile re botše ba bangwe ka kholofelo yeo re nago le yona. (Baroma 10:13-15) Ge re ithuta go ba le botho le go naganela ba bangwe re tlo ba mohuta wa batho bao Jehofa a nyakago go gwerana le bona go ya go ile.—Baheb. 13:16.

17. Re na le boikarabelo bofe? (Mateo 7:13, 14)

¹⁷ Na re tla ba gare ga bao ba tlago go hwetša bophelo bjo bo sa felego? Jehofa o re neile sebaka sa gore re tle re kgone go ba gare ga bao ba tlago go hwetša bophelo bjo bo sa felego. Ga bjale go tšwa go rena ge e ba re tla kgetha tsela e išago bophelong. (Bala Mateo 7:13, 14.) Bophelo bo tla be bo le bjang ge re tla be re phela ka mo go sa felego? Re tlo boledišana ka karabo ya potšišo ye sehlogong seo se latelago.