1. Mokriste o swanetše go dira eng gore a atlege?

 KGOŠI Dafida o boditše Solomone gore: “[Tia] matla gomme o be monna.” (1 Dikg. 2:​1-3) Banna ka moka ba Bakriste lehono ba dira gabotse ge ba latela keletšo yeo. E le gore ba kgone go dira seo, ba swanetše go ithuta go kwa melao ya Modimo, le go diriša melao ya motheo dikarolong ka moka tša maphelo a bona. (Luka 2:52) Ke ka baka la’ng go le bohlokwa gore bana babo rena ba baswa e be banna bao ba godilego moyeng?

2-3. Ke ka baka la’ng go le bohlokwa gore ngwanabo rena wa moswa e be Mokriste yo a godilego moyeng?

² Monna wa Mokriste o na le maikarabelo a mantšhi ka gae le ka phuthegong. Lena bana babo rena ba baswa, le ka ba le šetše le naganišišitše ka maikarabelo ao le ka tlago la ba le ona nakong e tlago. Le ka ba le šetše le nagana ka go ba babulamadibogo, bahlanka ba bodiredi ke moka ka morago la ba bagolo ba phuthego. Le ka ba le bile le nyaka go tlo nyala le go ba le bana. (Baef. 6:4; 1 Tim. 3:1) E le gore le tle le kgone go fihlelela dilo tše ka moka, le swanetše go ba Bakriste bao ba godilego moyeng. b

³ O ka thušwa ke eng gore o be Mokriste yo a godilego moyeng? Go na le dilo tšeo o swanetšego go ithuta go kgona go di dira. Gona bjale o ka dira eng gore o itokišeletše maikarabelo ao o ka tlago wa ba le ona nakong e tlago le gore o a phethe gabotse?

4. O ka hwetša kae mehlala e mebotse yeo o ka e ekišago? (Bona le seswantšho.)

⁴ Kgetha mehlala e mebotse yeo o ka e ekišago. Beibele e na le mehlala e mebotse yeo bana babo rena ba baswa ba ka e ekišago.  Banna bao ba ka Beibeleng ba be ba rata Modimo e bile ba na le maikarabelo a mantšhi a go hlokomela batho ba gagwe. O ka hwetša gape le mehlala e mebotse ka lapeng la geno goba ka phuthegong. (Baheb. 13:7) Le gona o na le mohlala o mobotse go e feta ka moka, e lego wa Jesu Kriste. (1 Pet. 2:21) Ge o dutše o ithuta ka mehlala ye, nagana ka dika tše o di ratago ka banna bao. (Baheb. 12:​1, 2) Bona kamoo o ka ekišago mehlala ya bona ka gona.

5. O ka kgona bjang go nagana go swana le Jehofa, gona ke ka baka la’ng seo se le bohlokwa? (Psalme 119:9)

⁵ “Lota . . . tlhaologanyo.” (Die. 3:21) Monna yo a nago le tlhaologanyo o naganišiša pele a dira diphetho. Ka gona šoma ka thata gore o be le tlhaologanyo. Ka baka la’ng? Ka gobane lehono mo lefaseng go tletše masogana ao a dirago diphetho a ithekgile ka dilo tšeo a di naganago goba tsela yeo a ikwago ka yona. (Die. 7:7; 29:11) Thelebišene, dimubi, inthanete le social media (goba go boledišana ka inthanete) le tšona di ka kgoma tsela yeo o naganago le go dira dilo ka yona. Bjale o ka ba le tlhaologanyo bjang? O ka thoma ka go ithuta ka melao ya motheo ya ka Beibeleng le go bona kamoo e ka go holago ka gona. Ke moka wa diriša melao yeo ya motheo go dira diphetho tšeo di tlago go thabiša Jehofa. (Bala Psalme 119:9.) Ge o ka ithuta go nagana ka tsela ye, o tlo kgona go ba ngwanabo rena yo a godilego moyeng. (Die. 2:​11, 12; Baheb. 5:14) Bona kamoo go ba le tlhaologanyo go tlago go go thuša maemong a a mabedi: (1) tsela yeo o itshwarago ka yona ge o na le dikgaetšedi (2) le ge o dira diphetho tša gore o tlo apara eng le gore o tlo lebelelega bjang.

6. Go nagana go swana le Jehofa go tlo thuša bjang ngwanabo rena wa moswa gore a hlomphe dikgaetšedi?

⁶ Monna yo a ithutilego go nagana go swana le Jehofa o tlo kgona go hlompha basadi. Ka mohlala, ngwanabo rena wa moswa a ka kgahlwa ke kgaetšedi yo a itšego gomme a nyaka go mo tseba gakaone. Eupša ngwanabo rena wa moswa yo a naganago go swana le Jehofa, a ka se dire selo seo se ka dirago gore kgaetšedi a bone eka o nyaka go nyalana le yena mola go se bjalo. (1 Tim. 5:​1, 2) Ge e ba a ratana le kgaetšedi yo a itšego, o tlo mo šireletša ka gore ba dule ba na le motho yo a tlago go ba hlokomela ge ba le mmogo.—1 Bakor. 6:18.

7. Go nagana go swana le Jehofa go tlo thuša bjang ngwanabo rena wa moswa gore a dire phetho e botse ya gore o tlo apara eng le gore o tlo itokiša bjang?

 ⁷ Tsela e nngwe yeo lesogana la Mokriste le ka bontšhago gore le nagana go swana le Jehofa, ke ge le kgetha tsela ya go apara le go itokiša. Batho ba bantšhi bao ba dirago diaparo tša matšatši a le go di bapatša, ga ba hlankele Jehofa e bile ba phela maphelo ao a gobogilego. Diaparo tšeo ba di dirago di ka swara motho kudu goba tša dira gore banna ba bonagale eka ke basadi. Ge ngwanabo rena wa moswa yo a ithutago go ba Mokriste yo a godilego a kgetha diaparo tšeo a tlago go di apara, o hlahlwa ke melao ya motheo ya ka Beibeleng le go ekiša mehlala e mebotse ya ka phuthegong. A ka ipotšiša gore: ‘Na dilo tšeo ke di kgethago di bontšha gore ke nagana go swana le Jehofa e bile ke hlompha batho ba bangwe? Na tsela yeo ke aparago ka yona e dira gore batho ba bangwe ba bone gore ke ineetše go Modimo e bile ke a mo hlankela?’ (1 Bakor. 10:​31-33; Tito 2:6) Ge ngwanabo rena wa moswa a nagana go swana le Jehofa, bana babo le dikgaetšedi gotee le Tatagwe wa legodimong ba tlo mo hlompha.   

8. Ngwanabo rena wa moswa a ka ithuta bjang go botega?

⁸ Botega. Ngwanabo rena wa moswa yo a botegago, o šoma ka thata gore a phethe dikabelo tša gagwe. (Luka 16:10) Nagana ka mohlala wa Jesu. O be a sa tšeele dilo fase. Go e na le moo, o dirile dikabelo ka moka tšeo Jehofa a mo neilego tšona le ge ka dinako tše dingwe go be go se bonolo go dira bjalo. O be a rata batho, kudukudu barutiwa ba gagwe, moo a ilego a feleletša a ba hwetše. (Joh. 13:1) O ka ekiša Jesu ka go šoma ka thata dikabelong ka moka tšeo ba go filego tšona. Ge e ba o sa kgone go dira selo se itšego, ikokobetše gomme o kgopele bana babo rena bao ba godilego gore ba go thuše. O se ke wa ithola kgwara ge o dira dilo. (Baroma 12:11) Go e na le moo, šoma ka thata gore o phethe dikabelo tša gago ka moka, ka gobane o di “direla Jehofa, e sego batho.” (Bakol. 3:23) Ka ge o se wa phethagala, ikokobetše gomme o amogele diphošo tšeo o felago o di dira.—Die. 11:2.

9. Ke ka baka la’ng go le bohlokwa gore ngwanabo rena wa moswa a ithute go dira dilo tše itšego?

⁹ E le gore o be Mokriste yo a godilego moyeng, o tlo swanelwa ke go ithuta go dira dilo tše di ka go thušago. Se se tlo go thuša gore o amogele dikabelo ka phuthegong, o hwetše mošomo wo o tlago go go thuša go itlhokomela le go hlokomela ba lapa la gago, le go ba le segwera se sebotse le batho ba bangwe. A re boneng mehlala ya dilo tše dingwe tše o ka ithutago go di dira.

10-11. Ge e ba ngwanabo rena wa moswa a ithuta go bala le go ngwala gabotse, o tlo ikhola bjang le go hola ba bangwe ka phuthegong? (Psalme 1:​1-3) (Bona le seswantšho.)

¹⁰ Ithute go bala le go ngwala gabotse. Beibele e re monna yo a thabilego le yo a atlegilego, o bala Lentšu la Modimo ka mehla le go naganišiša  ka lona. (Bala Psalme 1:​1-3.) Ge o bala Beibele letšatši le lengwe le le lengwe, o tlo tseba tsela yeo Jehofa a naganago ka yona gomme seo sa go thuša gore o ithute go diriša Mangwalo gabotse. (Die. 1:​3, 4) Ka phuthegong go nyakega banna ba mohuta woo. Ka baka la’ng?   

¹¹ Bana babo rena le dikgaetšedi ba hloka banna bao ba nago le bokgoni bja go ruta gore ba ba nee keletšo yeo e tšwago ka Beibeleng. (Tito 1:9) Ge e ba o kgona go bala le go ngwala gabotse, o tlo kgona go lokišeletša dipolelo le di karabo tše di kgothatšago. O tlo kgona le go ngwala dintlha tšeo di tlago go go hola ge o theeditše dipolelo dibokeng le dikopanong. Dintlha tšeo di tlo go thuša gore o tiiše tumelo ya gago le go kgothatša batho ba bangwe.    

12. O tlo thušwa ke eng gore o kgone go boledišana le batho ba bangwe gabotse?

¹² Ithute go boledišana le batho gabotse. Monna wa Mokriste o swanetše go ithuta go boledišana le batho gabotse. Monna yo a kgonago go boledišana le batho gabotse, o a theetša gomme a kwešiša se batho ba se bolelago. (Die. 20:5) A ka ithuta le go theetša tsela yeo batho ba bolelago ka yona, a lebelela ponagalo ya bona ya sefahlego ge ba dutše ba bolela, le boitšhišinyo bja mmele. O ka se ithute go dira dilo tše ge e ba o sa iphe nako ya go dula le batho. Ge e ba o dula o diriša didirišwa tša elektroniki go bolela le batho, o ka se tsoge o kgonne go boledišana le bona gabotse. Ka gona leka go hwetša ditsela tša go boledišana le batho o na le bona.—2 Joh. 12.

13. Ke’ng se sengwe seo ngwanabo rena wa moswa a swanetšego go ithuta sona? (1 Timotheo 5:8) (Bona le seswantšho.)

¹³ Ithute go itlhokomela. Mokriste yo a godilego moyeng o swanetše go kgona go itlhokomela le go hlokomela ba lapa la gagwe. (Bala 1 Timotheo 5:8.) Dinageng tše dingwe, tate goba yo mongwe wa leloko a ka ruta ngwanabo rena wa moswa go dira mošomo o itšego. Dinageng tše dingwe, moswa a ka ithuta go dira mošomo o itšego a sa le sekolong. (Dit. 18:​2, 3; 20:34; Baef. 4:28) Go sa šetšwe gore o dula kae, o ka ithuta go dira selo se itšego seo se tlago go go thuša go hwetša mošomo. Tsebega ka go ba motho yo a šomago ka thata le yo a fetšago mošomo woo a o neilwego. Ge e ba o ka dira bjalo o ka kgona go hwetša mošomo le go dula o šoma. Dika tše re boletšego ka tšona le dilo tše monna wa Mokriste a ka ithutago go di dira, di bohlokwa gore motho a itokišeletše maikarabelo ao a ka tlago a ba le ona nakong e tlago. A re boneng a mangwe a maikarabelo ao.   

14. Ngwanabo rena wa moswa a ka itokišeletša bjang gore a tsenele tirelo ya nako e tletšego?

¹⁴ Tirelo ya nako e tletšego. Banna ba bantšhi ba Bakriste ba tsenela tirelo ya nako e tletšego e sa le baswa. Go ba mmulamadibogo go thuša ngwanabo rena wa moswa gore a ithute go dirišana le batho bao ba sa swanego. E bile go mo thuša gore a kgone go diriša tšhelete yeo a nago le yona gabotse. (Bafil. 4:​11-13) Tsela e kaone ya go tsenela tirelo ya nako e tletšego ke go ba mmulamadibogo wa go thuša. Batho ba bantšhi ba tšea bobulamadibogo bja go thuša ka nako e itšego, gomme seo sa ba thuša gore e tle e be babulamadibogo ba ka mehla. Ka morago ga gore e be babulamadibogo, ba ka hwetša dikabelo tše dingwe tša nako e tletšego go swana le go thuša go aga meago ya mokgatlo le go hlankela Bethele.

15-16. Ngwanabo rena wa moswa a ka dira’ng gore a swanelege goba mohlanka wa bodiredi goba mogolo ka phuthegong?

¹⁵ Mohlanka wa bodiredi goba mogolo. Banna ba Bakriste ba swanetše go nyaka go hlankela bana babo bona le dikgaetšedi ka phuthegong e le bagolo. Beibele e re banna bao ba nyakago go dira seo ba “kganyoga modiro o mobotse.” (1 Tim. 3:1) Pele ngwanabo rena a ka hlankela e le mogolo, o swanetše go swanelega go ba mohlanka wa bodiredi. Bahlanka ba bodiredi ba thuša bagolo ka ditsela tše dintšhi. Bagolo le bahlanka ba bodiredi ba hlankela bana babo rena le dikgaetšedi e bile ba šoma tšhemo ka mafolofolo. Bana babo rena ba baswa ba ka swanelega go ba bahlanka ba bodiredi ge ba eya mafelelong a mahlalagading. E bile ba ka swanelega go ba bagolo ge ba le mathomong a mengwaga ya bo 20.

¹⁶ O swanetše go ba le dika dife gore o swanelege? Beibele e bolela ka dika tše o swanetšego go ba le tšona gore o swanelege. Gopola gore dika tše go bolelwago ka tšona ke tše di theilwego Beibeleng, le gona o swanetše go rata Jehofa, lapa la geno le phuthego. (1 Tim. 3:​1-13; Tito 1:​6-9; 1 Pet. 5:​2, 3) Leka ka thata gore o kwešiše dika tše go bolelwago ka tšona. Rapela Jehofa gomme o mo kgopele gore a go thuše gore o swanelege go di fihlelela. c

17. Ngwanabo rena wa moswa a ka itokišeletša bjang go re e tle e be molekane le hlogo ya lapa? (Bona le seswantšho.)

¹⁷ Go ba molekane le hlogo ya lapa. Jesu o boletše gore banna ba bangwe ba Bakriste ba ka kgetha go se nyale. (Mat. 19:12) Eupša ge e ba o kgetha go nyala, o tlo ba le maikarabelo a oketšegilego a go ba molekane le hlogo ya lapa.  (1 Bakor. 11:3) Jehofa o letetše gore monna a rate mosadi wa gagwe e bile a mo hlokomele ka dilo tšeo a di hlokago, a be mogwera wa gagwe le go mo thuša gore a be le segwera se sebotse le Jehofa. (Baef. 5:​28, 29) Dika tšeo o ka di hlagolelago le dilo tšeo o ka ithutago go di dira tšeo re boletšego ka tšona mathomong a sehlogo se, tše bjalo ka go nagana go swana le Jehofa, go hlompha basadi le go botega, di tlo go thuša gore o be molekane yo mokaone. O tlo kgona go phetha boikarabelo bja gago gabotse bja go ba molekane le hlogo ya lapa.

18. Ngwanabo rena wa moswa a ka itokišeletša bjang go re e tle e be tate?

¹⁸ Go ba tate. Ka morago ga gore o nyale o ka ba tate. O ka ithuta’ng go Jehofa ka go ba tate yo mobotse? Go na le dilo tše dintšhi tše o ka ithutago tšona. (Baef. 6:4) Jehofa o ile a bolela phatlalatša gore o rata Morwa wa gagwe Jesu e bile o a mo amogela. (Mat. 3:17) Ge o ka ba tate, kgonthišetša gore o dula o botša bana ba gago gore o a ba rata. Dula o ba reta ka baka la dilo tše dibotse tšeo ba di dirago. Botate bao ba ekišago mohlala wa Jehofa ba thuša bana ba bona gore e be Bakriste bao ba godilego. O ka ithuta boikarabelo bjo gona bjale ka go thuša batho ba bangwe ka gae le ka phuthegong le ka go ithuta go rata batho ba bangwe le go ba reta. (Joh. 15:9) Se se tlo go thuša gore o tle o be molekane le tate yo lerato. Gona bjale dika tše di ka go thuša gore Jehofa a go tšeele godimo le gore o tle o kgone go thuša lapa la geno le batho ba bangwe ka phuthegong.

19-20. Bana babo rena ba baswa ba tlo thušwa ke eng gore e be Bakriste bao ba godilego moyeng? (Bona seswantšho sa letlakala la ka ntle.)

¹⁹ Bana babo rena ba baswa, le swanetše go šoma ka thata gore le be Bakriste bao ba godilego moyeng. Le swanetše go kgetha mehlala e mebotse yeo le ka e ekišago, le nagane go swana le Jehofa, le botege, le ithute dilo tše itšego, le be le itokišeletše go phetha maikarabelo a nakong e tlago.

²⁰ Ka nako e nngwe o ka ikwa okare dilo tše o tlago go di dira di tlo go imela. Eupša o ka kgona go di dira. Gopola gore Jehofa o tloga a nyaka go go thuša. (Jes. 41:​10, 13) Bana beno le dikgaetšedi le bona ba tloga ba nyaka go go thuša. Ge e ba o eba monna yo Jehofa a nyakago o eba yena, bophelo bja gago e tlo ba bjo bo thabišago le bjo bo kgotsofatšago. Re le rata kudu bana babo rena ba baswa! Eka Jehofa a ka le šegofatša ge le dutše le šoma ka thata gore le be banna ba Bakriste bao ba godilego moyeng.—Die. 22:4.