1. Re swanetše go dira’ng gore re be Bakriste bao ba godilego moyeng?

 RE MAKATŠWA ke tsela yeo bana ba golago ka lebelo ka yona. Go bonagala go sa nyakege maiteko a itšego gore motho a feleletše a gotše. Eupša gore motho e be Mokriste yo a godilego moyeng, go nyakega gore a dire selo se itšego. b (1 Bakor. 13:11; Baheb. 6:1) Go nyakega gore re be le segwera se se tiilego le Jehofa gore re kgone go fihlelela seo. Re hloka moya wa gagwe o mokgethwa gore o re thuše go hlagolela dika tše dibotse, go ithuta mešomo e mengwe le go itokišeletša maikarabelo ao re tlo bago le ona nakong e tlago.—Die. 1:5.

2. Re ithuta’ng go Genesi 1:​27, le gona re tlo boledišana ka’ng sehlogong se?

² Ge Jehofa a be a bopa batho, o dirile monna le mosadi. (Bala Genesi 1:27.) Ke nnete gore monna le mosadi ga ba swane ka ponagalo, eupša go na le dilo tše dingwe gape tšeo ba sa swanego ka tšona. Ka mohlala, Jehofa o neile banna le basadi maikarabelo a go se swane, e bile o ba thuša gore ba kgone go phethagatša maikarabelo ao a bona. (Gen. 2:18) Sehlogong se, re tlo kwa gore kgaetšedi wa moswa a ka dira’ng gore e be Mokriste yo a godilego moyeng. Sehlogong se se latelago, re tlo bona gore bana babo rena ba baswa bona ba ka dira’ng.

3-4. Dikgaetšedi tša baswa di ka hwetša kae mehlala e mebotse yeo di ka e ekišago? (Bona le seswantšho.)

³ Beibele e bolela ka basadi ba bantšhi bao ba bego ba rata Jehofa  e bile ba mo hlankela. (Bala sehlogo seo se lego go jw.org/nso seo se rego: “Re ka Ithuta Eng go Basadi Bao go Bolelwago ka Bona ka Beibeleng?”) Ba be ba na le dika tšeo lengwalo la rena la sehlogo le bolelago ka tšona, e lego go ba “ba lekanetšego mekgweng” le bao ba “botegago dilong tšohle.” Go oketša moo, dikgaetšedi tša baswa di ka hwetša basadi bao e lego Bakriste bao ba godilego moyeng ka phuthegong gomme tša ekiša mehlala ya bona.

⁴ Dikgaetšedi tša baswa, naganang ka basadi bao ba lego ka diphuthegong tša gabo lena bao ba beago mohlala o mobotse gomme le ba ekiše, le šetšeng dika tša bona tše dibotse ke moka le boneng kamoo le ka di ekišago ka gona. Dirapeng tšeo di latelago, re tlo bolela ka dika tše tharo tšeo dikgaetšedi di swanetšego go ba le tšona.

5. Ke ka baka la’ng go le bohlokwa gore kgaetšedi yo a godilego moyeng a be le boikokobetšo?

⁵ Boikokobetšo ke seka sa bohlokwa seo Mokriste yo a godilego moyeng a swanetšego go ba le sona. Mosadi yo a ikokobeditšego o thabela go gwerana le Jehofa le batho ba bangwe. (Jak. 4:6) Mosadi yo a ratago Jehofa o ikokobeletša bohlogo bjo Tatagwe wa legodimong a bo hlomilego. (1 Bakor. 11:3) Molao woo wa motheo o dirišwa ka phuthegong le ka lapeng. c

6. Dikgaetšedi tša baswa di ka ithuta’ng mohlaleng wa Rebeka?

⁶ Nagana ka mohlala wa Rebeka. E be e le mosadi yo bohlale yoo bophelong bja gagwe ka moka, a bego a dira diphetho tše dibotse e bile a tseba gore o swanetše go di diriša neng le gona bjang. (Gen. 24:58; 27:​5-17) Le gona, o be a hlompha e bile a dula a ikemišeditše go latela tlhahlo. (Gen. 24:​17, 18, 65) Ge e ba o ikokobeditše e bile o thekga dithulaganyo tša Jehofa, o tlo ba mohlala o mobotse ka lapeng la geno le ka phuthegong.

7. Dikgaetšedi tša baswa di ka ekiša bjang Esitere ka go bontšha boipoetšo?

⁷ Seka se sengwe seo Bakriste ka moka bao  ba godilego ba swanetšego go ba le sona, ke boipoetšo. Beibele e re “bohlale ke bja baipoetši.” (Die. 11:2) Esitere o be a na le boipoetšo e bile e le mohlanka wa Modimo yo a botegago. Boipoetšo bja gagwe bo mo thušitše gore a se ke a ikgogomoša. O ile a theetša keletšo ya motswala wa gagwe e lego Morodekai gomme a e diriša. (Esitere 2:​10, 20, 22) O ka ekiša mohlala wa Esitere ka go kgopela ba bangwe keletšo gomme wa e diriša.—Tito 2:​3-5

8. Lengwalo la 1 Timotheo 2:​9, 10 le ka thuša bjang kgaetšedi gore a be le boipoetšo ge a kgetha moaparo le go itokiša?

⁸ Esitere o bontšhitše boipoetšo ka tsela e nngwe. O be a “bopegile e bile a bogega,” eupša ga se a ka a ipiletša mahlo a batho go sa hlokagale. (Esitere 2:​7, 15) Mohlala wa Esitere o ka thuša bjang dikgaetšedi tša baswa? Tsela e nngwe yeo ba ka holegago ka yona, go bolelwa ka yona go 1 Timotheo 2:​9, 10. (Bala.) Moapostola Paulo o botša basadi ba Bakriste gore ba ikgabiše ka moaparo o rulagantšwego gabotse e bile ba hlaphogelwe monaganong. Mantšu a Segerika ao a dirišitšwego mo a bontšha gore mosadi wa Mokriste o swanetše go apara ka tsela e hlomphegago le yeo e bontšhago gore o na le taba le batho ba bangwe e bile o hlompha le tsela yeo ba naganago ka yona. Re tloga re leboga dikgaetšedi tša gabo rena tšeo di aparago ka tsela yeo e rulagantšwego gabotse!

9. Re ka ithuta’ng mohlaleng wa Abigaile?

⁹ Go ba le temogo ke seka se sengwe seo dikgaetšedi tša Bakriste di swanetšego go ba le sona. Temogo ke’ng? Ke go tseba phapano magareng ga selo seo se sa lokago le seo se lokilego ke moka wa kgetha go dira seo se lokilego. Nagana ka mohlala wa Abigaile. Monna wa gagwe o ile a dira phetho e sa lokago, yeo e bego e ka bea bophelo bja lapa la gagwe ka moka kotsing. Abigaile o ile a gata kgato ka pelapela. O ile a kgona go phološa lapa la gagwe ka ge a ile a ba le temogo. (1 Sam. 25:​14-23, 32-35) Go ba le temogo go re thuša go tseba gore re swanetše go bolela neng le gore re swanetše go homola neng. E bile go re thuša gore re bontšhe batho ba bangwe gore re a ba kgahlegela ntle le go ba dira gore ba ikwe ba se ba lokologa.—1 Bathes. 4:11.

10-11. O ka holega bjang le go hola batho ba bangwe ge o kgona go bala le go ngwala gabotse? (Bona le seswantšho.)

¹⁰ Kgaetšedi wa Mokriste o swanetše go ithuta go dira dilo tše itšego. Dilo tše dingwe tšeo mosetsana a ithutago go di dira e sa le yo monyenyane di tlo mo thuša bophelong bja gagwe ka moka. A re boneng tše dingwe tša tšona.

¹¹ Ithute go bala le go ngwala gabotse. Ditšong tše dingwe, go bala le go ngwala ga go lebelelwe e le dilo tše bohlokwa tšeo basadi ba  ka ithutago tšona. Eupša go bohlokwa gore Mokriste yo mongwe le yo mongwe a ithute go bala le go ngwala. d (1 Tim. 4:13) Ka gona, o se ke wa dumelela selo se go šitiša go bala le go ngwala gabotse. O tlo holega bjang? Go ithuta go bala le go ngwala go ka go thuša gore o hwetše mošomo. O tlo kgona go ithuta Lentšu la Modimo le go le ruta ba bangwe. Sa bohlokwa le go feta ke gore ge o bala le go naganišiša ka Lentšu la Jehofa, o tlo batamela kgauswi le yena.—Josh. 1:8; 1 Tim. 4:15.

12. Ke’ng seo o ithutago sona go Diema 31:​26, seo se ka go thušago gore o kgone go boledišana le batho ba bangwe gabotse?

¹² Ithute go boledišana le batho ba bangwe gabotse. Go bohlokwa gore Bakriste ba kgone go boledišana le batho ba bangwe gabotse. Morutiwa Jakobo o neile keletšo e botse, yeo e rego: “Motho yo mongwe le yo mongwe a akgofele go kwa, a diege go bolela.” (Jak. 1:19) Ge o theetša ka kelohloko ge batho ba bangwe ba bolela o bontšha gore o ba ‘kwela bohloko.’ (1 Pet. 3:8) Ge e ba o sa kwešiše gore motho yo mongwe o re’ng goba o ikwa bjang, o ka mmotšiša dipotšišo. Ke moka, o naganišiše pele o bolela. (Die. 15:28.) Ipotšiše gore: ‘Na seo ke tlago go se bolela ke nnete e bile se tlo kgothatša motho yo ke bolelago le yena? Na ke tlo kgona go bontšha tlhompho le botho?’ Ithute go Bakriste bao ba godilego bao ba kgonago go bolela le batho ba bangwe. (Bala Diema 31:26.) Ba theetše ge ba bolela. Ge o dutše o ithuta tsela e kaone ya go bolela le batho ba bangwe, segwera sa gago le bona se tlo gola.

13. O ka ithuta bjang go hlokomela legae? (Bona le seswantšho.)

¹³ Ithute go hlokomela lapa. Mafelong a mantšhi, basadi ke bona ba ikarabelago ka go hlokomela legae. Mmago goba kgaetšedi yo mongwe yo a nago le bokgoni, a ka go thuša go dira mošomo wo gabotse. Kgaetšedi yo a bitšwago Cindy o re: “E nngwe ya dimpho tše bohlokwa tšeo mma a nneilego tšona, ke go thabela go šoma ka thata. Go ithuta mešongwana e itšego e bjalo ka go apea, go hlwekiša, go roka le go ya mabenkeleng, go nthušitše gore bophelo bja ka bo be bonolo le gore ke kgone go ba le nako ya go hlankela Jehofa. Mma o nthutile le go amogela baeng, gomme se se dirile gore ke kgone go kopana le bana bešo le dikgaetšedi bao nka ekišago mohlala wa bona.” (Die. 31:​15, 21, 22) Mosadi yo a šomago ka thata, a amogela baeng e bile a kgona go hlokomela legae, o bohlokwa kudu ka lapeng le ka phuthegong.—Die. 31:​13, 17, 27; Dit. 16:15.

14. O ithuta’ng mohlaleng wa Crystal, gona o swanetše go dula o nagana ka’ng?

¹⁴ Ithute go itirela dilo. Go bohlokwa gore Bakriste bao ba godilego ba kgone go itirela dilo. (Bafil. 4:11) Kgaetšedi yo a bitšwago Crystal, o re: “Batswadi ba ka ba ile ba nkgothaletša gore kua sekolong, ke ithutele go dira  dilo tšeo di ka tlago tša nthuša ge ke gotše. Tate o ile nkgothaletša gore ke kgethe dithuto tšeo di sepedišanago le tša ditšhelete, gomme seo se ile sa nthuša kudu.” Go oketša moo, go ithuta go itirela dilo go tlo go thuša go hwetša mošomo le go go thuša gore o kgone go diriša tšhelete ya gago gabotse. (Die. 31:​16, 18) O se ke wa tsena dikolotong go sa hlokagale gore o tle o kgone go ba le nako e ntšhi ya go hlankela Jehofa.—1 Tim. 6:8.

15-16. Dikgaetšedi tšeo di sego tša nyalwa di ka hola bjang batho ba bangwe? (Mareka 10:​29, 30)

¹⁵ Ge o ka ithuta go ba le dika tše dibotse le go dira mešomo e itšego, seo se tlo go thuša go phetha maikarabelo a gago a nakong e tlago. A re boneng mehlala e sego kae ya dilo tšeo o ka di dirago.

¹⁶ O ka kgetha go fetša nako e itšego o se lenyalong. Jesu o boletše gore batho ba bangwe ba kgetha go se nyalwe le ge seo se sa kgothaletšwe mafelong ao ba dulago go ona. (Mat. 19:​10-12) Ba bangwe ba kgetha go se nyalwe ka mabaka a fapafapanego. Kgodišega gore Jehofa le Jesu ba go lebelela o le bohlokwa le ge o se wa nyalwa. Lefaseng ka moka, bo kgaetšedi bao ba sego lenyalong ba tšewa ba le bohlokwa ka diphuthegong tša gabo bona. Ka ge ba rata batho ba bangwe e bile ba na le taba le bona, ba feleletša ba e ba bjalo ka bo sesi le bommago bona.—Bala Mareka 10:​29, 30; 1 Tim. 5:2.

17. Kgaetšedi wa moswa a ka itokišeletša bjang gona bjale go tsenela tirelo ya nako e tletšego?

¹⁷ O ka tsenela tirelo ya nako e tletšego. Bo kgaetšedi ba bantšhi ba bapala karolo e kgolo ya go bolela ditaba tše dibotse lefaseng ka moka. (Ps. 68:11) Na o ka itokišeletša gona bjale gore o tle o tsenele tirelo ya nako e tletšego? O ka ba mmulamadibogo, wa thuša go aga meago ya mokgatlo goba wa ya go hlankela Bethele. Rapela ka seo o nyakago go se dira. Bolela le bao ba šetšego ba le tirelong ya nako e tletšego yeo o nyakago go e tsenela gomme o ba botšiše gore o ka dira’ng gore o feleletše o swana le bona. Ke moka o dire dilo tšeo di ka go thušago gore o feleletše o tsenetše tirelo ya nako e tletšego. Ge o ka ba tirelong ya nako e tletšego o tlo bulegelwa ke sebaka sa go dira dilo tše dintšhi ka mokgatlong wa Jehofa.

18. Ke ka baka la’ng kgaetšedi a swanetše go kgetha molekane wa gagwe gabotse? (Bona le seswantšho.)

¹⁸ O ka kgetha go nyalwa. Dilo tšeo re boletšego ka tšona dirapeng tšeo di fetilego, di ka go thuša gore o be mosadi yo mokaone. Ge e  ba o nyaka go nyalwa, o swanetše go kgetha molekane wa gago gabotse. Go nyalwa ke e nngwe ya diphetho tše bohlokwa kudu tšeo o ka di dirago bophelong. Gopola gore motho yo o tla bego o nyalane le yena, e tlo ba hlogo ya gago gomme o tlo swanelwa ke go mo kwa. (Baroma 7:2; Baef. 5:​23, 33) Ipotšiše gore: ‘Na ke Mokriste yo a godilego? Na go hlankela Jehofa go tla pele bophelong bja gagwe? O dira diphetho tše bohlale? Na o amogela diphošo tšeo a di dirago? Na o hlompha basadi? Na a ka kgona go nthuša go dira gore segwera sa ka le Jehofa se dule se tiile le go ntlhokomela ka dilo tšeo ke di hlokago a ba a ba mogwera yo mokaone? Na o phetha maikarabelo ao a nago le ona? Ka mohlala, ke dikabelo dife tšeo a nago le tšona ka phuthegong, gona o šoma bjang go tšona?’ (Luka 16:10; 1 Tim. 5:8) E le gore o kgone o hwetša molekane yo mokaone, gopola gore le wena o swanetše go ikemišetša go ba mosadi yo mokaone.

19. Ke ka baka la’ng karolo ya go ba mothuši e le bohlokwa kudu?

¹⁹ Beibele e re mosadi yo mokaone ke “mothuši” wa molekane wa gagwe. (Gen. 2:18) Na se se ra gore mosadi ga a bohlokwa? Le gatee! Karolo ya mosadi ya go ba mothuši ke e bohlokwa kudu. Gantšhi Beibele e hlalosa Jehofa e le “mothuši.” (Ps. 54:4; Baheb. 13:6) Mosadi ke mothuši wa kgonthe go monna wa gagwe ge e ba a mo thekga e bile a dira gore diphetho tšeo a di dirago di atlege. Le gona, ka ge a rata Jehofa, o dira gore batho ba kgone go bona dika tše dibotse tša monna wa gagwe. (Die. 31:​11, 12; 1 Tim. 3:11) O ka itokišeletša go ba mosadi yo mokaone ka go rata Jehofa kudu le ka go thuša batho ba bangwe ka gae le ka phuthegong.

20. Mma yo mokaone a ka hola bjang lapa la gagwe?

²⁰ O ka ba motswadi. Wena le monna wa gago le ka ba le bana ka morago ga gore le nyalane. (Ps. 127:3) Ka gona, go ka ba bohlokwa gore o naganišiše ka seo se ka tlago sa go thuša gore o be mma yo mokaone. Dika tšeo re boletšego ka tšona, di ka go thuša gore o tle o be mosadi yo a kgahlišago le go ba mma yo mokaone. Ge e ba o na le lerato le botho e bile o sa fele pelo, o ka tla wa kgona go dira gore bana ba gago ba ikwe ba bolokegile e bile ba ratwa.—Die. 24:3.

21. Re ikwa bjang ka dikgaetšedi tša gabo rena? (Bona seswantšho sa letlakala la ka ntle.)

²¹ Lena dikgaetšedi, re le rata kudu ka baka la dilo tšeo le di direlago Jehofa le batho ba gagwe. (Baheb. 6:10) Le šoma ka thata gore le be le dika tše dibotse, le ithute mešomo yeo e ka le thušago go itlhokomela le go thuša batho bao le phelago le bona, le go itokišeletša maikarabelo ao le ka tlago la ba le ona nakong e tlago. Ruri le ba bohlokwa kudu ka mokgatlong wa Jehofa!