1. Ke ka baka la’ng re ka re go be go le bohlokwa gore Aborahama a dule a na le kholofelo?

 JEHOFA o tshepišitše mogwera wa gagwe Aborahama gore ditšhaba ka moka di tla šegofatšwa ka morwa wa gagwe. (Gen. 15:5; 22:18) Ka ge Aborahama a be a na le tumelo go Modimo, o be a kgodišegile gore o tlo phethagatša dilo tšeo Modimo a mo tshepišitšego tšona. Le ga go le bjalo, ge Aborahama a be a na le mengwaga e 100, gomme mosadi wa gagwe a na le e 90, banyalani bao ba botegago ba be ba se ba tšwa ba eba le morwa. (Gen. 21:​1-7) Beibele e re: “Motheong wa kholofelo [Aborahama] o ile a ba le tumelo, gore e tla ba tatago ditšhaba tše dintši ka go dumelelana le seo se bego se boletšwe.” (Baroma 4:18) O a tseba gore dilo tšeo Modimo a bego a di tshepišitše Aborahama di ile tša phethagala. O ile a ba tatago morwa yo a bego a mo letetše e lego Isaka. Ke ka baka la’ng Aborahama a be a kgodišegile gore Jehofa o tlo phethagatša dikholofetšo tša gagwe?

2. Ke ka baka la’ng Aborahama a be a kgodišegile gore kholofetšo yeo Jehofa a bego a mo tshepišitše yona e tlo phethagala?

² Ka ge Aborahama a be a na le segwera se sebotse le Jehofa, o be a “kgodišegile ka botlalo gore seo [Modimo] a bego a se holofeditše” se be se tlo direga. (Baroma 4:21) Jehofa o ile a amogela Aborahama a ba a bolela gore o lokile ka baka la tumelo ya gagwe. (Jak. 2:23) Ka ge Baroma 4:18 e bontšha, Aborahama o be a na le tumelo e bile a na le kholofelo. Ga bjale, a re boneng gore ke’ng seo moapostola Paulo a ilego a se bolela ka kholofelo go Baroma kgaolo 5.

3. Ke’ng seo Paulo a se hlalosago ka kholofelo?

³ Paulo o hlalosa gore ke ka baka la’ng re ka kgodišega gore kholofelo ya rena e ka se “lebiše go nyamišweng.” (Baroma 5:5) O re thuša le go bona gore go ba le tumelo go dikholofetšo tšeo  Modimo a re tshepišitšego tšona go ka re thuša bjang go ba le tumelo e tiilego. Ge re dutše re boledišana ka Baroma 5:​1-5, nagana kamoo kholofelo yeo o nago le yona e bego e dutše e gola ka gona go tloga mathomong. Ge re dutše re boledišana ka lengwalo le, o tlo bona gore o ka dira eng gore kholofelo ya gago e tie le go feta. A re thomeng ka go kwa ka kholofelo ye e kgahlišago yeo Paulo a rego ga e lebiše go nyamišweng.

4. Ke’ng seo se hlaloswago go Baroma 5:​1, 2?

⁴ Bala Baroma 5:​1, 2. Paulo o ngwaletše Bakriste ba kua Roma mantšu a. Bana babo rena le dikgaetšedi ba moo, ba be ba ithutile ka Jehofa le Jesu, ba bontšhitše tumelo e bile ba fetogile Bakriste. Ka baka leo Modimo o boletše gore ba “lokile ka baka la tumelo” ya bona gomme a ba tlotša ka moya wa gagwe o mokgethwa. Ka gona, ba ile ba ba le kholofelo e botse e bile ba kgodišegile gore ba tlo e hwetša.

5. Batlotšwa ba na le kholofelo efe?

⁵ Ka morago, Paulo o ile a ngwalela Bakriste ba Efeso a ba botša ka kholofelo yeo Modimo a ba neilego yona. Kholofelo yeo e be e le ya gore ba tlo hwetša “bohwa bja bakgethwa.” (Baef. 1:18) Le gona, o ile a botša Bakolose gore kholofelo yeo ba be ba tlo e hwetša ba le kae. O ile a e bitša gore ke “kholofelo yeo le e boloketšwego magodimong.” (Bakol. 1:​4, 5) Kholofelo yeo Bakriste ba tloditšwego ba nago le yona ke ya gore ba tlo tsošetšwa go yo phela legodimong moo ba tla bego ba buša le Jesu Kriste.—1 Bathes. 4:​13-17; Kut. 20:6.

6. Ke’ng seo ngwanabo rena yo mongwe wa motlotšwa a se boletšego ka kholofelo?

⁶ Bakriste ba tloditšwego ba tšeela godimo kholofelo yeo. Yo mongwe wa batlotšwa bao ke ngwanabo rena Frederick Franz, yo a boletšego gore: “Kholofelo ya rena ke selo sa kgonthe, le gona e tla phethagala ka botlalo go yo mongwe le yo mongwe wa ditho tše 144 000 tša mohlatswana ka tekanyo yeo re sa kago ra ba ra e gopola.” Ngwageng wa 1991, ka morago ga gore ngwanabo rena Franz a hlankele Jehofa ka go botega ka mengwaga e mentšhi, o ile a  bolela gore: “Ga se re lahlegelwe ke bohlokwa bja kholofelo yeo. . . . go e letela ga rena ka nako e telele go dira gore re e leboge ka mo go oketšegilego. Ke selo seo se swanelwago ke go letelwa, lege e ka ba ka nywaga e milione. Ke nagana ka bohlokwa bja kholofetšo ya rena kudu go feta lege e le neng pele.”

7-8. Batho ba bantšhi ba na le kholofelo efe? (Baroma 8:​20, 21)

⁷ Lehono bahlanka ba bantšhi ba Jehofa ba na le kholofelo, e lego kholofelo yeo Aborahama le yena a bego a na le yona, ya go phela go ya go ile mo lefaseng ka tlase ga Mmušo wa Modimo. (Baheb. 11:​8-10, 13) Paulo o ngwadile ka dilo tše dibotse tšeo di letetšego bao ba nago le kholofelo ya go tlo phela mo lefaseng. (Bala Baroma 8:​20, 21.) Ge o be o thoma go ithuta ka dilo tše dibotse tšeo Beibele e tshepišago gore di tlo direga nakong e tlago, ke’ng seo o ilego wa fela pelo ya go bona se direga? Na o ile wa fela pelo ya gore ka letšatši le lengwe o ipone o phethagetše e bile o se na sebe? Goba na o be o thabišitšwe ke go kwa gore batho bao o ba ratago bao ba hlokofetšego ba tlo phela gape paradeiseng mo lefaseng? Ka ge Modimo a re file kholofelo, o na le dilo tše dibotse tše o felago pelo ya go di bona di direga mo lefaseng.

⁸ Go sa šetšwe gore re tlo thabela go phela legodimong goba mo lefaseng go ya go ile, ka moka ga rena re thabišwa ke kholofelo yeo re nago le yona. Re ka kgodišega gore kholofelo yeo re nago le yona ke ya kgonthe. Paulo o re hlalosetša gore seo se tlo direga bjang. A re boneng gore Paulo o ngwadile’ng ka kholofelo ya rena. Seo a se ngwadilego se tlo dira gore re tshepe gore kholofelo ya rena ke ya kgonthe le gore Modimo o tlo phethagatša seo a se holofeditšego.

9-10. Go ya ka mohlala wo Paulo a boletšego ka wona, Bakriste ba ka letela’ng? (Baroma 5:3) (Bona le diswantšho.)

⁹ Bala Baroma 5:3. Ditlaišego tša rena di ka dira gore re tshepe gore dilo tšeo Modimo a re holofeditšego tšona di tlo direga e le ka nnete. Seo se ka re makatša. Eupša balatedi ba Kriste ka moka ba swanetše go letela gore ba tlaišege.  Nagana ka mohlala wa Paulo. O ile a botša Bakriste ba kua Thesalonika gore: “Ge re be re na le lena re be re fela re le botša e sa le pele gore re be re tla tlaišega gomme seo ke sona se diregilego feela bjalo ka ge le tseba.” (1 Bathes. 3:4) Le gona, o ile a ngwalela Bakriste ba kua Korinthe gore: “Bana bešo ga re rate gore le se tsebe ka tlaišego yeo e re wetšego . . . mo re bego re tloga re sa kgonthišege gaešita le ka maphelo a rena.”—2 Bakor. 1:8; 11:​23-27.

¹⁰ Lehono Bakriste le bona ba ka tlaišega ka tsela e itšego. (2 Tim. 3:12) Na le wena o ile wa tlaišwa ge o be o thoma go ba molatedi wa Jesu e bile o na le tumelo go yena? Bagwera ba gago le ba leloko ba ka ba ba ile ba go kwera, ba go swara gampe goba mongmošomo le batho ba o šomago le bona ba ka ba ba ile ba go tlaiša ka ge o bolela nnete. (Baheb. 13:18) Na o ile wa tlaišwa ke ba mmušo ka ge o botša batho ba bangwe ka kholofelo ye o nago le yona? Go sa šetšwe gore re tlaišwa bjang, Paulo o re re swanetše go dula re thabile. Ka baka la’ng?

11. Ke ka baka la’ng re swanetše go ikemišetša go kgotlelela mathata ka moka?

¹¹ Re ka thaba le ge re tlaišega ka gobane seo se tlo re thuša gore re be le seka se sebotse. Baroma 5:3 e re, “tlaišego e tšweletša kgotlelelo.” Bakriste ka moka ba tlo tlaišega, ka gona ba swanetše go kgotlelela. Re swanetše go ikemišetša go kgotlelela teko e nngwe le e nngwe yeo re ka kopanago le yona. Go kgotlelela go tlo re thuša gore re tle re kgone go bona ge dikholofetšo tšeo re di letetšego di phethagala. Ga re nyake go swana le batho bao Jesu a bego a naganne ka bona ge a be a bolela ka dipeu tšeo di wetšego godimo ga maswika. Batho ba bjalo mathomong ba amogela lentšu ba thabile, eupša ge “masetlapelo goba tlaišego” e tšwelela, ba a kgopša. (Mat. 13:​5, 6, 20, 21) Ke nnete gore go tlaišwa goba go ganetšwa ga go bonolo, eupša go kgotlelela go ba le mehola e mentšhi. Bjang?

12. Re holega bjang ge re kgotlelela mathata?

¹² Morutiwa Jakobo o boletše ka mehola yeo e tlišwago ke go kgotlelela mathata. O ngwadile gore: “Tlogelang kgotlelelo e phethe morero wa yona, e le gore le be ba phethagetšego le ba hlaphogetšwego dilong ka moka, le sa hloke selo.” (Jak. 1:​2-4) Jakobo o boletše gore kgotlelelo e na le mošomo wo e swanetšego go o dira. E ka go thuša gore o be le tumelo e oketšegilego le go se fele pelo e bile o ithekge ka Modimo. Go na le tsela e nngwe yeo re holegago ka yona ge re kgotlelela mathata.

13-14. Kgotlelelo e tšweletša’ng, gona e tswalana bjang le kholofelo? (Baroma 5:4)

¹³ Bala Baroma 5:4. Paulo o boletše gore kgotlelelo e tšweletša “boemo bjo bo amogelegago.” Ge o kgotlelela, Jehofa o tlo go amogela. Se ga se bolele gore Jehofa o a thaba ge o welwa ke ditlaišego le mathata. Go ena le moo, o a thaba ge a bona o kgotlelela. Go tloga go kgothatša go tseba gore ge re kgotlelela, Jehofa o a thaba!—Ps. 5:12.

¹⁴ Gopola gore Aborahama o ile a kgotlelela mathata gomme seo sa dira gore Modimo a mo amogele. Jehofa o be a mo tšea e le mogwera wa gagwe e bile a mo lebelela a lokile. (Gen. 15:6; Baroma 4:​13, 22) A ka kgona go dira se se swanago le go rena. Modimo ga a re amogele ka gobane re dira mošomo o itšego tirelong ya gagwe goba re na le ditokelo tše itšego. O re amogela ka gobane re kgotlelela mathata a rena ka go botega. Go sa šetšwe gore re na le mengwaga e mekae, maemo a rena ke afe, goba re kgona go dira eng, ka moka ga rena re ka kgona go kgotlelela. Na go na le bothata bjo o bo kgotleletšego ka go botega gona bjale? Ge e ba go le bjalo, tseba gore Modimo o a go amogela. Ge re bona gore Modimo o a re amogela, re tlo bona gore ka nnete o tlo re direla  dilo tšeo a re holofeditšego tšona nakong e tlago.

15. Ke’ng seo Paulo a boletšego ka sona, gona ke ka baka la’ng se ka makatša batho ba bangwe?

¹⁵ Paulo o hlalositše gore Jehofa o tlo re amogela ge re kgotlelela mathata a rena ka go botega. Paulo o tšwetša poledišano ye pele ka gore: “Boemo bjo bo amogelegago bjona bo tšweletša kholofelo, gomme kholofelo ga e lebiše go nyamišweng.” (Baroma 5:​4, 5) Se se ka makatša ba bangwe. Ka baka la’ng? Ka gobane mathomong go Baroma 5:​2, Paulo o hlalositše gore Bakriste bao ba lego Roma ba be ba šetše ba na le kholofelo, e lego “kholofelo ya letago la Modimo.” Eupša yo mongwe a ka ipotšiša gore: ‘Ge e ba Bakriste bao ba be ba šetše ba na le kholofelo, gona ke ka baka la’ng Paulo a ile a bolela ka kholofelo ka moragonyana?’

16. Kholofelo e gola bjang go rena? (Bona le diswantšho.)

¹⁶ Re ka kwešiša gore Paulo o be a era gore’ng ge re ka dula re gopola gore kholofelo ke selo seo se golago. Ka mohlala, na o gopola ge o be o thoma go kwa ka dikholofetšo tše di kgahlišago tšeo di lego ka Lentšung la Modimo? Mohlomongwe ka nako yeo o ka ba o ile wa nagana gore taba ya gore re tlo phela lefaseng la paradeise go ya go ile e no ba toro feela. Eupša ge o be o ithuta ka Jehofa le go tlwaelana le dikholofetšo tšeo di lego ka Beibeleng, o ile wa kgodišega gore dilo tše a di holofeditšego di tlo phethagala e le ka kgonthe.

17. Kholofelo ya gago e tšwela pele e gola bjang ka morago ga gore o ineele go Jehofa le go kolobetšwa?

¹⁷ Ka morago ga gore o ineele go Jehofa le go kolobetšwa, o ile wa tšwela pele o ithuta ka yena le go mo rata kudu gomme wa kgodišega gore dilo tšeo a re tshepišitšego tšona di tlo direga ka nnete. (Baheb. 5:13–6:1) Mohlomongwe o ka ba o ile wa diragalelwa ke seo go bolelwago ka sona go Baroma 5:​2-4. O kile wa ba le mathata a mantšhi, wa a kgotlelela gomme seo sa dira gore Modimo a go amogele. Ka ge o tseba gore Modimo o a go rata, o na le lebaka le legolo leo le dirago gore o tle o hwetše dilo  tšeo a re tshepišitšego tšona. O tshepa gore dikholofetšo tšeo Modimo a re tshepišitšego tšona di tlo phethagala go feta kamoo o bego o tshepa ka gona mathomong. Wena ka noši o a bona gore kholofelo ye o nago le yona ke ya kgonthe. Kholofelo ye e tloga e go kgoma. Ka mantšu a mangwe, e kgoma selo se sengwe le se sengwe se o se dirago bophelong le go fetoša tsela ye o swarago ba geno ka yona, diphetho tše o di dirago le kamoo o dirišago nako ya gago ka gona.

18. Jehofa o re kgonthišetša ka eng?

¹⁸ Moapostola Paulo o bolela ka ntlha e nngwe e bohlokwa ya kholofelo yeo re nago le yona ka morago ga gore Modimo a re amogele. O go kgonthišetša gore dilo tše Modimo a go tshepišitšego tšona di tlo phethagala. Ke ka baka la’ng o ka kgodišega ka seo? Paulo o bolela ka seo Modimo a se kgonthišetšago Bakriste. O re: “Kholofelo ga e lebiše go nyamišweng; gobane lerato la Modimo le tšholletšwe dipelong tša rena ka moya o mokgethwa wo re ilego ra o newa.” (Baroma 5:5) O tloga o na le mabaka a go kgodišega gore dilo tšeo Modimo a go holofeditšego tšona di tlo phethagala.

19. O ka kgodišega ka’ng?

¹⁹ Nagana ka tshepišo yeo Jehofa a ilego a e holofetša Aborahama, kamoo a bego a mo amogela ka gona, le kamoo a bego a mo lebelela e le mogwera wa gagwe. Ditshepišo tšeo Aborahama a bego a letetše gore Modimo a mo nee tšona di ile tša direga. Beibele e re: “Ge Aborahama a bontšhitše go se fele pelo, a hwetša kholofetšo ye.” (Baheb. 6:15; 11:​9, 18; Baroma 4:​20-22) Ruri ga se a ka a nyama. Ge e ba o dula o botega, o ka kgodišega gore dikholofetšo tšeo Jehofa a go tshepišitšego tšona di tlo phethega. O na le mabaka a mantšhi a go thaba ka gobane kholofelo ya gago e ka se be ya lefeela, e bile e tlo phethagala e le ka nnete! (Baroma 12:12) Paulo o ngwadile gore: “Eka Modimo yo a neago kholofelo a ka le tlatša ka lethabo le khutšo ka go mmota ga lena, e le gore le atelwe ke kholofelo ka matla a moya o mokgethwa.”—Baroma 15:13.