KE NNETE gore o thabela dimpho tše di fapafapanego tšeo Jehofa a go neilego tšona le tokologo yeo a go neilego yona ya gore o ka di diriša bjang. Sa go thabiša ke gore Beibele e hlalosa beine e le mpho e tšwago go Modimo, e re: “Dijo ke tša go thabiša bašomi, gomme beine e dira gore bophelo bo thabiše.” (Mmo. 10:19; Ps. 104:15) Mohlomongwe o šetše o bone gore batho ba bangwe ba na le bothata bja go diriša bjala. Le gona, batho lefaseng ka moka ba lebelela bjala ka ditsela tša go se swane. Bakriste ba thušwa ke’ng gore ba dire diphetho tše dibotse ka bjala?

Go sa šetšwe gore re dula kae goba re godišeditšwe setšong sefe, ge re ka dumelela Modimo a hlahla tsela yeo re naganago ka yona le diphetho tšeo re di dirago, re tlo holega kudu gomme ra thaba.

Mohlomongwe o ka ba o lemogile gore batho ba bantšhi lefaseng ba dula ba enwa bjala e bile ba nwa ka mo go feteletšego. Ba bangwe ba nwa bjala ka gobane bo ba thuša gore ba ikwe ba lapologile, mola ba bangwe ba enwa bjala gore ba kgone go lebeletšana le mathata a bona. Mafelong a mangwe ge motho a enwa bjala bjo bontšhi, batho ba nagana gore o godile goba o na le matla.

Bakriste ba hwetša keletšo e bohlale e tšwago go Mmopi wa bona yo lerato. Ka mohlala, o re lemošitše e sa le pele ka ditlamorago tše mpe tša go nwa ka mo go feteletšego. Re ka ba re šetše re badile Diema 23:​29-35 yeo e re botšago ka motho wa setagwa le mathata ao a ilego a mo wela. a Ngwanabo rena Daniel yo e lego mogolo kua Europe, o bolela ka bophelo bja gagwe bja pele e eba Mokriste, o re: “Ke be ke dula ke enwa bjala kudu gomme seo se dirile gore ke dire diphetho tše mpe, ka baka la se, ke ile ka diragalelwa ke dilo tše mpe gomme ke ikwa ke nyama ge ke nagana ka tšona.”

Bakriste ba ka dira diphetho dife tše dibotse gomme ba phema go welwa ke mathata ao a welago batho ba go nwa bjala kudu? Re swanetše go dumelela Modimo a re thuša go nagana le go dira dilo ka tsela yeo a di dirago ka yona.

A re boneng gore Beibele e re’ng ka bjala, re bone le mabaka ao a dirago gore batho ba nwe bjala.

Beibele ga e ganetše batho go nwa bjala. Go e na le moo, e re botša gore go nwa beine go ka dira gore re thabe. Re bala gore: “Eya o je dijo tša gago o thabile, o nwe beine ya gago ka pelo e thabilego.” (Mmo. 9:7) Ka nako e nngwe Jesu o ile a nwa beine, le bahlanka ba bangwe ba botegago ba Jehofa ba ile ba nwa beine.—Mat. 26:​27-29; Luka 7:34; 1 Tim. 5:23.

Lentšu la Modimo le bontšha phapano magareng ga go nwa bjala le go tagwa. Le hlalosa gore: “Le se ke la tagwa ke beine.” (Baef. 5:18) E bile gape le bontšha gore “matagwa . . . a ka se je bohwa bja Mmušo wa Modimo.” (1 Bakor. 6:10) Jehofa o tloga a gana go nwa kudu le botagwa. Go ena le gore re nwe bjala go swana le batho ba moo re dulago gona, re dira diphetho tšeo di tlago go thabiša Jehofa.

Batho ba bangwe ba nagana gore ba ka nwa bjala bjo bontšhi ke moka ba se ke ba tagwa. Eupša seo se kotsi kudu. Beibele e bontšha gabotse gore go nwa “beine e ntši” go ka dira gore monna (goba mosadi) a dire sebe se segolo gomme a se sa ba le segwera se sebotse le Jehofa. (Tito 2:3; Die. 20:1) Jesu o ile a ba a lemoša gore go nwa kudu go ka dira gore motho a se ke a tsena lefaseng le leswa la Modimo. (Luka 21:​34-36) Bjale Mokriste a ka thušwa  ke’ng gore a pheme mathata ao a ka tlišwago ke go nwa bjala?

Go kotsi gore motho a dumelele setšo sa gabo se laola tsela yeo a nwago bjala ka yona. Ge Bakriste ba eja goba ba enwa, ba dira seo ka tsela ye e tlago go kgahliša Jehofa. Beibele e re gopotša gore: “Go sa šetšwe gore le a ja, le a nwa goba le dira selo le ge e le sefe se sengwe, dirang dilo tšohle gore le tagafatše Modimo.” (1 Bakor. 10:31) A re boledišaneng ka dipotšišo le melao ya motheo ya Beibele yeo re swanetšego go naganišiša ka yona:

Na ke nwa bjala e le gore batho ba bangwe ba nkamogele? Ekisodo 23:2 e re: “O se ke wa latela lešaba.” Jehofa o be a lemoša Baisiraele gore ba se ke ba ekiša batho bao ba bego ba sa mo thabiše. Temošo yeo e sa dutše e šoma le go Bakriste lehono. Ge e ba re dumelela dithaka tša rena di šušumeletša tsela yeo re naganago ka yona le yeo re dirago diphetho ka yona ka bjala, re ka feleletša re tlogetše go phela ka melao ya Jehofa gomme seo sa dira gore re se sa ba le segwera se sebotse le yena.—Baroma 12:2.

Na ke nwa bjala ka gobane ke nyaka go bontšha batho gore ke na le matla? Ditšong tše dingwe ga se phošo go dula o enwa bjala le go nwa ka mo go feteletšego. (1 Pet. 4:3) Eupša ekwa gore 1 Bakorinthe 16:13 e re kgothaletša go dira’ng. E re: “Dulang le phakgame, emang le tiile tumelong, tšwelang pele le dira senna, tiang matla.” Na ka nnete bjala bo ka thuša motho gore a be le matla? Le gatee. Bjala bo ka dira gore motho a se ke a nagana gabotse le go dira gore a se ke a dira diphetho tše dibotse. Ka gona, go nwa bjala kudu ga go bolele gore motho o na le matla. Go ena le moo, go bontšha gore o na le bofokodi. Jesaya 28:7 e re botša ka motho yo a arogilego ka baka la bjala e bile a thekesela gomme mafelelong a kgopša.

Re hloka matla a go tšwa go Jehofa gore re kgone go dira dilo tšeo di lokilego, le gona seo se bolela gore re swanetše go dula re phafogile e bile re eme re tiile tumelong. (Ps. 18:32) Mokriste wa nnete a ka kgona go dira dilo tše ge e ba a dula a le šedi e bile a dira dilo tšeo di tlago go šireletša segwera sa gagwe le Jehofa. Ge Jesu a be a le mo lefaseng, o ile a bontšha gore o na le matla ao ka gobane batho ba bantšhi ba be ba mo hlompha, a  na le sebete e bile a ikemišeditše go dira se se lokilego.

Na ke nwa bjala gore ke tšhabele mathata a ka? Mopsalme o ile a ngwala gore: “Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.” (Ps. 94:19) O se ke wa re ge o na le mathata a mantšhi wa nwa bjala, go ena le moo, botša Jehofa ka ona. Tsela e kaone ya go dira bjalo ke ka go dula o rapela Jehofa. Le gona, ba bantšhi ba hweditše gore go hola kudu go hwetša thušo go motho yo a godilego ka phuthegong. Ge e ba motho a enwa bjala gore a kgone go lebeletšana le mathata, seo se ka feleletša se dirile gore a palelwe ke go dira diphetho tše dibotse. (Hos. 4:11) Daniel yo re boletšego ka yena pejana, o re: “Ke be ke dula ke tshwenyegile e bile ke ikwa ke le molato. Ke be ke enwa e le gore ke kgone go lebeletšana le mathata a ka, eupša mathata ao a be a oketšega gomme mafelelong ka lahlegelwa ke bagwera le go ikwa ke se na mohola.” Daniel o thušitšwe ke’ng? O re: “Ke ile ka lemoga gore ke swanetše go ithekga ka Jehofa, e sego ka bjala. Mafelelong ke ile ka kgona go lebeletšana le mathata a ka le go a fenya. Jehofa o dula a ikemišeditše go re thuša le ge go bonagala e ka mathata a rena a ka se rarollege.—Bafil. 4:​6, 7; 1 Pet. 5:7.

Ge e ba ka dinako tše dingwe o fela o enwa bjala, o ka ipotšiša dipotšišo tše di latelago gore o itlhahlobe, ‘Na go na le wa leloko goba mogwera wa kgauswi yo a ilego a bontšha gore o tshwenyega ka tsela yeo ke nwago ka yona?’ Ge e ba go le bjalo, se se ka bontšha gore o na le bothata bjo o ka bago o sa bo lemoge. ‘Na ke nwa go feta ka mo ke bego ke tlwaetše go nwa ka gona?’ Ge e ba go le bjalo, se se ka bontšha gore o thoma go lemalela bjala. ‘Na ke palelwa ke go kgotlelela go se nwe bjala ka matšatši a sego kae goba ka nako e teletšana?’ Ge e ba go le bjalo, se se ka ba se bontšha gore o thoma go lemalela bjala. Go ka direga gore o hloka thušo gore o kgone go fenya bothata bjoo.

Bakriste ba bangwe ba kgethile go se nwe bjala ka ge bo ka ba bakela mathata goba dikotsi. Ba bangwe ba ka kgetha go se nwe bjala ka ge ba sa rate tatso ya bjona. Ge e ba motho yo o phelago le yena a dira phetho ya mohuta woo, o ka mmontšha  botho ka go hlompha phetho yeo a e dirilego ntle le go mo ahlola.

Mohlomongwe o dirile phetho e bohlale ya gore o nyaka go nwa bjala bjo bo kaakang. Goba mohlomongwe o ka ipeela nako ya gore o tlo nwa neng, e ka ba gatee ka beke goba ganyenyane ge o eja. Ba bangwe ba ka kgetha mohuta wa bjala bjo ba tlago go bo nwa ka tsela e lekanyeditšwego, go swana le beine goba dipiri e sego mabjala a bogale, le ge mabjala ao a ka tswakwa le dino tše dingwe. Ge e ba motho a ipeetše gore o tlo nwa bjala ka tsela e itšego, go tlo ba bonolo gore a e latele. Mokriste yo a godilego ga a na taba le gore batho ba bangwe ba tla reng ka yena mabapi le phetho yeo a e dirilego ya gore o tla nwa bjala bjang.

Go bohlokwa gore re naganele batho ba bangwe ge re dira diphetho mabapi le bjala. Baroma 14:21 e re: “Ke mo gobotse go se je nama, go se nwe beine goba go se dire selo le ge e le sefe seo ka sona ngwaneno a kgopišegago.” O ka diriša bjang keletšo ye? Bontšha gore o rata bana beno. Ge e ba o bona okare bjala bo kgopiša motho yo mongwe, go kaone gore o se ke wa bo nwa ge a le gona. Ge o ka dira bjalo o tla be o bontšha batho ba bangwe gore o a ba rata e bile o tshwenyega kudu ka bona go e na le go tshwenyega ka wena o nnoši.—1 Bakor. 10:24.

Mmušo o ka ba o beile melao yeo e swanetšego go hlahla Mokriste ge a dira phetho ya go nwa bjala. Melao yeo e ka ba e bontšha gore o swanetše go ba le mengwaga e mekae pele o ka thoma go nwa bjala, goba e ka ba e bontšha gore ge batho ba nwele, ga se ba swanela go otlela goba go diriša metšhene e itšego.—Baroma 13:​1-5.

Jehofa o re neile dimpho tše dintšhi e bile o re file le tokologo ya go ikgethela gore re ka di diriša bjang. Se se akaretša go kgetha seo re tlago go se ja goba go se nwa. Eka dilo tšeo re kgethago go di dira di ka bontšha gore re leboga tokologo yeo re nago le yona ka go e dirišetša go kgahliša Tatago rena wa legodimong.