Ka letšatši le lengwe, kgaetšedi yo mongwe kua New Zealand o ile a bogela bidio yeo e lego go jw.org ya sehlogo seo se rego, “Le Hlokomelane” yeo e bolelago kamoo Jehofa a bontšhago kwelobohloko ka gona. (Jes. 63:​7-9) O ile a diriša seo a ithutilego sona ka go thuša motho yo mongwe. Lona letšatšing leo ge a be a le mabenkeleng, o ile a kopana le mosadi yo mongwe yo a bego a hloka legae gomme a mmotša gore o nyaka go mo rekela dijo. Ke moka mosadi yoo o ile a dumela. Ka morago ga gore kgaetšedi yoo a mo nee dijo, o ile a mo nea bohlatse a diriša pampišana ya Na Tlaišego e tla ka ya Fela?

Mosadi yoo o ile a thoma go lla. O ile a botša kgaetšedi yoo gore o godišitšwe e le Hlatse ya Jehofa eupša o ile a tlogela therešo mengwaga e mentšhi e fetilego. Eupša ga bjale o be a rapela Jehofa, a mo kgopela gore a mo thuše go boela ka phuthegong. Kgaetšedi o ile a nea mosadi yoo Beibele gomme ba rulaganya gore ba tle ba ithute mmogo. a

Re ka ekiša Jehofa ka go kwela batho ba bangwe bohloko, go akaretša ba leloko le bana babo rena le dikgaetšedi ka phuthegong. Re ka bontšha batho ba bangwe kwelobohloko ka go ba botša ditaba tše dibotse.