1. Re ka ipotšiša dipotšišo dife ge re nagana ka tumelo ya Aborahama?

 LE GE batho ba bantšhi ba ile ba kwa ka Aborahama, eupša ga ba mo tsebe gabotse. Le ga go le bjalo, wena o mo tseba gabotse. Ka mohlala o a tseba gore Beibele e re Aborahama ke “tatago bohle bao ba nago le tumelo.” (Baroma 4:11) Eupša o ka ipotšiša gore, ‘Na nka swana le Aborahama gomme ka ba le tumelo ya go swana le yeo a bego a na le yona?’ Ee, o ka swana le yena.

2. Ke ka baka la’ng go le bohlokwa go ithuta ka mohlala wa Aborahama? (Jakobo 2:​22, 23)

² Tsela e nngwe yeo ka yona re ka bago le tumelo ya go swana le ya Aborahama, ke ka go ithuta ka mohlala wa gagwe. Aborahama o be a dula a dira dilo tšeo Modimo a mo laelago gore a di dire. O ile a ya nageng ya kgole le gagabo, a dula ditenteng ka mengwaga e mentšhi, a ba a ikemišetša go dira sehlabelo ka morwa wa gagwe e lego Isaka. Aborahama o dirile dilo tšeo ka moka ka baka la gore o be a na le tumelo e tiilego go Jehofa. Tumelo ya Aborahama le dilo tšeo a di dirilego, di ile tša dira gore e be mogwera wa Jehofa. (Bala Jakobo 2:​22, 23.) Jehofa o nyaka gore ka moka ga rena, go akaretša le wena, re thabele ditšhegofatšo tše swanago. Ka baka leo, o ile a budulela bangwadi ba Beibele e lego Paulo le Jakobo gore ba ngwale ka mohlala wa Aborahama. Re tlo boledišana ka mohlala wa gagwe, wo o lego go Baroma kgaolo 4 le go Jakobo kgaolo 2. Mangwalo a ka bobedi a bolela selo se bohlokwa ka Aborahama.

3. Paulo le Jakobo ba tsopotše temana efe ya Beibele?

 ³ Paulo le Jakobo ba tsopotše go mantšu ao a lego go Genesi 15:​6, ye e rego: “Aborahama a ba le tumelo go Jehofa, gomme Modimo a mmona a lokile.” Motho yo a lokilego, ke yo Modimo a mo amogelago e bile a mmona a se na molato. Go a makatša gore motho yo a sa phethagalago e bile e le modiradibe, Modimo a ka mo lebelela a se na molato! Ruri le wena o ka nyaka gore Modimo a go lebelele ka tsela yeo, le gona go a kgonega. Re tlo kwa gore ke ka baka la’ng Jehofa a ile a re Aborahama o lokile le gona ke’ng seo rena re swanetšego go se dira gore Jehofa a bolele gore re lokile.

4. Ke’ng seo se thibelago batho gore e be baloki?

⁴ Ge Paulo a be a ngwalela Baroma lengwalo, o ile a bolela gore batho ka moka ke badiradibe. (Baroma 3:23) Ka gona, motho a ka dira’ng gore Modimo a mo lebelele a lokile goba a se na molato, le gore a mo amogele? Paulo o ile a diriša mohlala wa Aborahama gore a kgone go thuša Bakriste bao ba botegago go araba potšišo yeo.

5. Ke ka baka la’ng Jehofa a ile a re Aborahama o lokile? (Baroma 4:​2-4)

⁵ Jehofa o boletše gore Aborahama o lokile nakong ya ge a be a dula nageng ya Kanana. Ke ka baka la’ng Jehofa a ile a re Aborahama o lokile? Na ke ka gobane Aborahama o be a latela Molao wa Moshe? Aowa. (Baroma 3:23) Molao woo o ile wa newa Baisiraele mengwaga e fetago e 400 ka morago ga ge Jehofa a šetše a boditše Aborahama gore o lokile. Bjalo ke ka baka la’ng Modimo a ile a re Aborahama o lokile? Modimo o ile a bontšha Aborahama botho bjo bogolo ka go bolela gore o lokile ka baka la tumelo ya gagwe.—Bala Baroma 4:​2-4.

6. Ke ka baka la’ng Jehofa a ka re motho yo a dirago dibe o lokile?

⁶ Paulo o boletše gore ge motho a bontšha tumelo go Modimo, “tumelo ya gagwe o e balelwa e le go loka.” (Baroma 4:5) Paulo o okeditše ka gore: “Go etša ge Dafida le yena a bolela ka lethabo la motho yo Modimo a mmalelago go loka ka ntle le mediro ge a re: ‘Go thaba bao ditiro tša bona tša go hloka molao di swaretšwego le bao dibe tša bona di khupeditšwego; go thaba motho yo sebe sa gagwe le gatee Jehofa a ka se se balego.’” (Baroma 4:​6-8; Ps. 32:​1, 2) Modimo o lebalela batho bao ba nago le tumelo go yena. O ba lebalela ka mo go feletšego, o lebelela batho ba bjalo ba lokile e bile ba se na molato, ka baka la tumelo ya bona.

7. Ke ka baka la’ng re ka re bahlanka ba Modimo ba nakong e fetilego ba be ba lokile?

⁷ Modimo o ile a bolela gore Aborahama, Dafida le bahlanka ba bangwe ba botegago ba lokile le ge e be e sa le badiradibe ba sa phethagalago. Eupša ka baka la tumelo ya bona, Modimo o ile a ba lebelela ba se na molato, kudukudu ge ba bapetšwa le bao ba bego ba se na tumelo go yena. (Baef. 2:12) Paulo o ile a bolela gabotse lengwalong leo a le ngwaletšego Baroma gore tumelo, ke yona e dirago gore re kgone go ba bagwera ba Modimo. Aborahama le Dafida, ba ile ba gwerana le Modimo ka gobane ba be ba na le tumelo. Le rena re ka kgona go ba bagwera ba Modimo, ge e ba re na le tumelo.

8-9. Ke dilo dife tše di fošagetšego, tšeo batho ba bangwe ba ilego ba di bolela ka dilo tše Paulo le Jakobo ba di ngwadilego, gona ka baka la’ng?

⁸ Ke mengwaga e mentšhi baetapele ba bodumedi ba ngangišana kamoo tumelo le mediro di tswalanago ka gona. Baruti ba bangwe ba ruta gore, e le gore o phološwe o swanetše  go dumela feela go Morena Jesu Kriste. O ka ba o ile wa ba kwa ba re: “Dumela go Jesu gomme o phološwe.” Baruti ba bangwe ba tsopola mantšu a Paulo ao a rego: “Modimo a [mmalela] go loka ka ntle le mediro.” (Baroma 4:6) Ba bangwe ba re, e le gore o phološwe, o swanetše go ya mafelong a bodumedi le gore o dire dilo tšeo kereke e rego o di dire, mohlomongwe ba ka tsopola Jakobo 2:24 yeo e rego: “Motho o tla bolelwa gore o lokile ka mediro, e sego ka tumelo e nnoši.”

⁹ Ka baka la go se dumelelane moo, diithuti tše dingwe tša Beibele di nagana gore Paulo le Jakobo ba be ba sa dumelelane ge ba bolela ka seo motho a swanetšego go se dira gore a amogelwe ke Modimo. Baetapele ba bangwe ba bodumedi ba nagana gore Paulo o be a dumela gore motho o swanetše go ba le tumelo feela gore Modimo a mo amogele, mola Jakobo a be a dumela gore motho o swanetše go dira dilo tšeo di lokilego gore Modimo a kgone go mo amogela. Moruti yo mongwe o ile a bolela gore: “Jakobo o be a sa kwešiše lebaka la Paulo la go bolela gore motho o lokile ka baka la tumelo feela e sego ka mediro.” Eupša Jehofa o ile a budulela Paulo le Jakobo gore ba ngwale seo ba se ngwadilego. (2 Tim. 3:16) Ka gona, go ka ba le tsela e kaone ya go kwešiša dilo tšeo ba di boletšego. Re ka dira seo ka go kwešiša seo ba bego ba bolela ka sona.

10. Ke “mediro” efe yeo Paulo a bego a bolela ka yona? (Baroma 3:​21, 28) (Bona le seswantšho.)

¹⁰ Ke “mediro” efe yeo Paulo a bego a bolela ka yona go Baroma 3 le 4? O be a bolela kudu ka “mediro ya molao,” yeo Moshe a e neilego Baisiraele Thabeng ya Sinai. (Bala Baroma 3:​21, 28.) Go bonagala mehleng ya Paulo, Bakriste ba bangwe ba Bajuda ba be ba thatafalelwa  ke go amogela gore Molao wa Moshe le mediro yeo e bego e sepedišana le Molao woo ga e sa šoma. Paulo o ile a diriša mohlala wa Aborahama go bontšha gore motho ga se a no swanela go latela “mediro ya molao” gore Modimo a kgone go mo amogela.” Go nyakega le tumelo. Go tseba se go kgothatša ka gobane go re thuša go bona gore re ka kgona go amogelwa ke Modimo. Se se ra gore re ka kgona go ba le tumelo go Modimo le go Kriste gomme mafelelong, Modimo a re amogela.

11. Ke “mediro” efe yeo Jakobo a bego a bolela ka yona?

¹¹ Ka lehlakoreng le lengwe, “mediro” yeo go bolelwago ka yona go Jakobo kgaolo 2 ga se “mediro ya molao” yeo Paulo a bego a bolela ka yona. Jakobo o bolela ka mediro, goba dilo tšeo Bakriste ba di dirago bophelong bja bona letšatši le lengwe le le lengwe. Mediro yeo e bontšha ge e ba Mokriste a na le tumelo e tiilego go Modimo goba go se bjalo. Re tlo boledišana ka mehlala e mebedi yeo Jakobo a e bontšhitšego.

12. Jakobo o hlalositše bjang tswalano magareng ga tumelo le mediro? (Bona le seswantšho.)

¹² Mohlala wa mathomo ke wa ge Jakobo a bolela gore Bakriste ba swanetše go ba le tekatekano ge ba dirišana le batho ba bangwe. O ile a nea mohlala wa se ka motho yo a swarago mohumi gabotse eupša a nyatša motho yo a diilago. Jakobo o bontšhitše gore motho yoo a ka bolela gore o na le tumelo, eupša wa hwetša e sa sepedišane le mediro. (Jak. 2:​1-5, 9) Mohlala wa bobedi ke wa ge Jakobo a bolela ka motho yoo a bonago ‘ngwanabo goba kgaetšedi a se na dijo goba diaparo’ eupša a se mo thuše. Le ge motho yoo a ka bolela gore o na le tumelo eupša a se e bontšhe ka mediro, go no swana le ge a se  na yona. Jakobo o ngwadile gore, “tumelo le yona ge e le nnoši, e se na mediro, e hwile.”—Jak. 2:​14-17.

13. Jakobo o dirišitše mohlala ofe go hlalosa tumelo yeo e sepedišanago le mediro? (Jakobo 2:​25, 26)

¹³ Jakobo o ile a bolela gore Rahaba ke mohlala wa motho yo a nago le tumelo yeo e sepedišanago le mediro. (Bala Jakobo 2:​25, 26.) O be a kwele ka Jehofa e bile a lemogile gore o thekga Baisiraele. (Josh. 2:​9-11) Dilo tšeo a bego a di dira di ile tša bontšha gore o na le tumelo ka gobane o ile a šireletša dihlodi tše pedi tša Baisiraele ge maphelo a tšona a be a le kotsing. Ka baka la se, mosadi yoo yo e bego e se Moisiraele e bile a sa phethagala, o ile a bolelwa gore o lokile go swana le Aborahama. Mohlala wa Rahaba o re ruta gore dilo tšeo re di dirago di swanetše go bontšha gore re batho bao nago le tumelo.

14. Ke ka baka la’ng re ka re dilo tšeo Paulo le Jakobo ba di ngwadilego ga di ganetšane?

¹⁴ Bangwadi ba babedi ba Beibele e lego Paulo le Jakobo ba be ba bolela ka taba ya tumelo le mediro ka ditsela tša go se swane. Paulo o be a botša Bakriste ba Bajuda gore ba ka se amogelwe ke Jehofa feela ka go no latela Molao wa Moshe. Jakobo yena o be a bontšha gore Bakriste ka moka ba swanetše go bontšha tumelo ya bona ka go direla batho ba bangwe dilo tše dibotse.

15. Re ka bontšha ka ditsela dife gore tumelo ya rena e sepedišana le mediro? (Bona le diswantšho.)

¹⁵ Ga go hlokagale gore re dire dilo ka tsela yeo Aborahama a bego a di dira ka yona e le gore go bolelwe gore re lokile. Ge e le gabotse, go na le dilo tše dintšhi tšeo re ka di dirago tšeo di ka bontšha gore re na le tumelo. Re ka amogela batho ba baswa ka phuthegong, ra thuša bana babo rena le dikgaetšedi bao  ba hlokago e bile ra direla ba malapa a gabo rena dilo tše dibotse e lego dilo tšeo Modimo a di amogelago le go di šegofatša. (Baroma 15:7; 1 Tim. 5:​4, 8; 1 Joh. 3:18) Tsela e bohlokwa kudu yeo e neago bohlatse bja gore re na le tumelo ke ka go bolela ditaba tše dibotse ka mafolofolo. (1 Tim. 4:16) Ka moka ga rena, re ka bontšha ka dilo tšeo re di dirago gore re na le tumelo ya gore dilo tšeo Jehofa a di tshepišitšego di tlo phethagala le gore ditsela tša gagwe ke tše kaonekaone. Ge re dira bjalo, re ka kgodišega gore Modimo o tlo re lebelela re le ba lokilego, e bile ra ba bagwera ba gagwe.

16. Ke’ng seo Aborahama a bego a se holofetše, gona o be a na le tumelo go eng?

¹⁶ Go Baroma kgaolo 4, re ithuta thuto e nngwe e bohlokwa go Aborahama, e lego ya go ba le kholofelo. Jehofa o ile a tshepiša Aborahama gore “ditšhaba tše dintši” di be di tla šegofatšwa ka yena. Nagana ka kholofelo e kgahlišago yeo Aborahama a bego a na le yona! (Gen. 12:3; 15:5; 17:4; Baroma 4:17) Eupša le ge Aborahama a be a na le mengwaga e 100 gomme Sara a na le e 90, ba be ba se ba tšwa ba e ba le morwa. Go ya le ka pono ya batho, go be go sa kgonege gore Aborahama le Sara ba be le morwa. Aborahama o be a swanetše go ba le tumelo e tiilego kudu. Eupša “motheong wa kholofelo o ile a ba le tumelo, gore e tla ba tatago ditšhaba tše dintši.” (Baroma 4:​18, 19) Mafelelong, seo Aborahama a bego a se holofeditšwe, se ile sa phethagala. O ile a ba tatago Isaka, e lego morwa yo e bego e le kgale a mo letetše.—Baroma 4:​20-22.

17. Re tseba bjang gore Modimo a ka re lebelela re lokile e bile re le bagwera ba gagwe?

¹⁷ Re ka amogelwa ke Modimo, ra lebelelwa re le ba lokilego, ra ba ra ba bagwera ba gagwe, go swana le Aborahama. Ge e le gabotse, Paulo o ile a gatelela seo ge a be a ngwala gore: “Mantšu a gore ‘o ile a balelwa seo, a be a se a ngwalelwa [Aborahama] feela, eupša a be a ngwaletšwe le rena bao re reretšwego go balelwa seo, gobane re dumela go yena yo a tsošitšego Jesu.” (Baroma 4:​23, 24) Go swana le Aborahama, re swanetše go ba le tumelo go Jehofa, re dire dilo tšeo di lokilego e bile re be le kholofelo. Paulo o tšwela pele ka go bolela ka kholofelo yeo re nago le yona go Baroma kgaolo 5, yeo re tlago go boledišana ka yona sehlogong se se latelago.