1-2. Batswadi ba swanetše go ikwa bjang ge bana ba bona ba thoma go botšiša dipotšišo ka dilo tšeo Beibele e di rutago?

 BATHO ba bantšhi ba a tseba gore go godiša bana ke mošomo o mogolo. Ge e ba o godiša bana re a go reta ge o leka go ba thuša gore ba be le tumelo. (Doit. 6:6, 7) Ge bana ba dutše ba gola, ba ka thoma go botšiša dipotšišo tše dintšhi ka dilo tšeo Beibele e di rutago le melao ya motheo yeo e lego gona yeo re phelago ka yona.

² Mathomong o ka tshwenyega ge bana ba gago ba thoma go botšiša dipotšišo. Ka dinako tše dingwe dipotšišo tšeo di ka dira gore o nagane gore bana ba gago ga ba na tumelo. Eupša ge bana ba dutše ba gola ba ka thoma go botšiša dipotšišo gore ba kgone go tiiša tumelo ya bona. (1 Bakor. 13:11) Ka gona o se ke wa tšhoga ge ba thoma go botšiša dipotšišo. Lebelela dipotšišo tšeo e le selo seo se ka thušago ngwana wa gago gore a kgone go inaganela le go emela ditumelo tša gagwe.

3. Re tlo boledišana ka’ng sehlogong se?

³ Sehlogong se, re tlo boledišana ka dilo tšeo batswadi ba ka di dirago go thuša bana ba bona gore ba be le tumelo e tiilego, gore ba kwešiše gore ke ka baka la’ng go latela melao ya motheo ya Beibele go le bohlokwa le gore ba ka dira’ng gore ba emele ditumelo tša bona. Le gona, re tlo kwa gore ke ka baka la’ng go le bohlokwa gore bana ba botšiše dipotšišo, ra kwa le ka dilo tšeo batswadi ba ka di dirago go thuša bana ba bona gore ba bolele ka ditumelo tša bona.

THUŠA BANA BA GAGO GORE BA BE LE TUMELO E TIILEGO

4. Ke dipotšišo dife tšeo bana ba ka di botšišago, gona ka baka la’ng?

⁴ Batswadi ba kwešiša gore bana ba bona ba ka se no ba le tumelo ka gobane bona ba na le yona. Batswadi ba tseba gore ga  se ba belegwa ba na le tumelo go Jehofa, go bjalo le ka bana ba bona. Ge bana ba dutše ba gola ba ka ipotšiša dipotšišo tša go swana le gore: ‘Na Modimo o gona e le ka nnete? Na nka tshepa seo Beibele e se rutago?’ Beibele e re kgothaletša gore re diriše “matla a rena a tlhaologanyo” le go “kgonthišetša dilo tšohle.” (Baroma 12:1; 1 Bathes. 5:21) O ka thuša bjang bana ba gago gore ba tiiše tumelo ya bona?

5. Batswadi ba ka dira’ng go thuša bana ba bona gore ba tshepe seo Beibele e se bolelago? (Baroma 12:2)

⁵ Thuša bana ba gago go bona gore seo Beibele e se rutago ke nnete. (Bala Baroma 12:2.) Ge bana ba gago ba botšiša dipotšišo ba bontšhe gore ba ka hwetša bjang dikarabo ba diriša dithulusi tša go dira nyakišišo tše bjalo ka Watch Tower Publications Index le puku ya Tlhahlo ya go Dira Nyakišišo ya Dihlatse tša Jehofa. Ba ka ya ka tlase ga sehlogo seo se rego “Beibele,” ke moka ba nyaka sehlogwana seo se rego “E buduletšwe ke Modimo” gore ba hwetše bohlatse bja gore Beibele ga se puku feela yeo e ngwadilwego ke batho. Go e na le moo ke “ lentšu la Modimo.” (1 Bathes. 2:13) Ka mohlala, ngwana wa gago a ka dira nyakišišo ka motse wa kgale wa Ninife. Batho bao ba ganetšanago le Beibele ba ile ba bolela gore motse wa Ninife ga se wa ka wa ba gona. Eupša ka bo 1850, mašope a motse woo a ile a utollwa gomme seo sa bontšha gore seo Beibele e se bolelago ke nnete. (Tsef. 2:13-15) A ka bala sehlogo seo se rego “Na o be o Tseba?” ka go Morokami wa November 2021 gore a ithute ka mo go oketšegilego ka boporofeta bja mabapi le go fedišwa ga motse wa Ninife. Kgothaletša bana ba gago go bapetša seo dikgatišo tša rena di se bolelago le seo dipuku tše dingwe tšeo batho ba di tshepago di se bolelago. Ge bana ba gago ba ka dira bjalo ba tla kgona go bona gore seo Beibele e se bolelago ke nnete.

6. Batswadi ba ka thuša bjang bana ba bona gore ba diriše matla a bona a go nagana? (Bona le seswantšho.)

⁶ Thuša bana ba gago go diriša matla a bona a monagano. Batswadi ba ka boledišana le bana ba bona ka seo Beibele e se rutago goba ka tumelo yeo ba nago le yona go Modimo. Ba ka boledišana le bana ba bona ge ba le di Musiamong, phakeng goba ge ba etetše ofisi ya lekala ya Dihlatse tša Jehofa. Ka mohlala, ge le etetše musiamo goba le bogetše dibidio le diswantšho tša wona, le ka bolela le bana ba lena ka dilo tšeo di diragetšego nakong e fetilego tšeo di bontšhago gore seo Beibele e se bolelago ke nnete. Mohlomongwe o ka ruta ngwana wa gago ka Leswika la Moaba. Leswika le le na le mengwaga e 3 000 ebile le ngwadile leina la Jehofa godimo ga lona. Leswika le le hwetšwa Louvre Museum toropong ya Paris kua  France. Le gona, leswika le le ka Musiamong wo o bitšwago “Beibele le Leina la Modimo” wo o lego Ntlongkgolo ya Lefase ka Moka ya Dihlatse tša Jehofa yeo e lego kua Warwick, New York. Leswika la Moaba le bontšha gore Kgoši Mesha wa Moaba o ile a hlanogela Baisiraele. Seo se dumelelana le seo Beibele e se bolelago. (2 Dikg. 3:4, 5) Ge bana ba gago ba bona gore seo Beibele e se bolelago ke nnete ebile se nepagetše, ba tlo ba le tumelo e tiilego.​—Bapiša le 2 Dikoronika 9:6.

7-8. (a) Re ithuta’ng go dilo tše dibotse tšeo re kgonago go di bona tlholong? Nea mohlala. (Bona le seswantšho.) (b) Ke dipotšišo dife tšeo di ka thušago ngwana wa gago, go bona gore ka nnete Modimo o gona?

⁷ Thuša bana ba gago go naganišiša ka dilo tšeo Jehofa a di bopilego. Ge o dutše o sepela le bana ba gago phakeng, boledišana le bona ka dilo tše di kgahlišago tšeo Jehofa a di bopilego. Ka baka la’ng? Dilo tšeo di bontšha gore Jehofa o bohlale. Ke kgale borasaense ba bona gore dilo tše dintšhi di bopilwe ka tsela e raraganego. Rasaense yo a bitšwago Nicola Fameli o hlalosa gore ge o ka lebelela tsela yeo dilo di bopilwego ka yona o tlo bona gore di nyakile di swana. Gantšhi tsela yeo dilo tše di swanago ka yona e bitšwa Fibonacci sequence. a

⁸ Ge ngwana wa gago a ithuta saense sekolong, o tlo lemoga gore dilo tše dintšhi di bopilwe ka ditsela tše di kgahlišago. Ka mohlala, matlakgogedi a dira gore sebakabaka se se ke sa ba kgole le lefase, a dira gore maphoto a mawatle a se ke a tshela mollwane, ebile a thuša gore re kgone go phela gabotse mo lefaseng. Bjale ke mang a bopilego dilo tše ka tsela ye e makatšago? Ke mang a dirilego gore dilo tše tša tlhago di dule gabotse le ka tsela e kgahlišago? Ge ngwana wa gago a dutše a ipotšiša dipotšišo tše, ke moo a tlago go kgona go bona gore Modimo o gona ebile ke yena a bopilego dilo tše ka moka. (Baheb. 3:4) Ka nako e nngwe o ka botšiša ngwana wa gago gore, “Ge e ba Modimo a re bopile, na go ka se kwagale go phetha ka gore o tlo re nea melao ya motheo yeo e re thušago gore re thabe?” O ka bala le yena Beibele gore o kgone go mmotšha kamoo Jehofa a letetšego gore re phele ka gona.

KE KA BAKA LA’NG GO LATELA MELAO YA MOTHEO YA BEIBELE GO LE BOHLOKWA?

9. Ke eng seo se ka dirago gore ngwana wa gago a botšiše dipotšišo ka melao ya motheo ya Beibele?

⁹ Ka dinako tše dingwe ngwana wa gago a ka ipotšiša gore ke ka baka la’ng Beibele e re dilo tše itšego di fošagetše. Ipotšiše gore ke ka baka la’ng ngwana wa gago a ipotšiša potšišo yeo. Na o ganetšana le seo Beibele e se bolelago goba o no ba a nyaka go kgona go hlalosa seo Beibele e se bolelago go batho ba bangwe? Go  sa šetšwe gore ke ka baka la’ng ngwana wa gago a ka ipotšiša potšišo yeo, o ka mo thuša gore a kwešiše melao ya motheo ya Beibele ka go bala le yena puku ya O ka Thabela Bophelo go ya go ile! b

10. O ka thuša bjang ngwana wa gago gore a tiiše segwera sa gagwe le Jehofa?

¹⁰ Thuša ngwana wa gago gore a gwerane le Jehofa. Ge o ithuta Beibele le ngwana wa gago leka go mo thuša ka go diriša mehlala goba dipotšišo tšeo di lego ka pukung ya O ka Thabela Bophelo go ya go ile! (Die. 20:5) Ka mohlala, thuto 8 e bapetša Jehofa le mogwera yo a nago le taba le rena, yo a re botšago dilo tšeo di ka re šireletšago goba go re hola. Ka morago ga go boledišana le yena ka lengwalo la 1 Johane 5:3, o ka mmotšiša gore: “Go tseba gore Jehofa ke mogwera wa rena o mobotse go re thuša bjang go theetša dilo tšeo a re botšago gore re di dire?” Potšišo yeo e ka bonala e le bonolo, eupša e ka thuša ngwana wa gago go bona gore melao ya motheo yeo Jehofa a re neago yona ke bohlatse bja gore o a re rata.​—Jes. 48:17, 18.

11. O ka thuša bjang bana ba gago gore ba phele ka melao ya motheo ya Beibele? (Diema 2:10, 11)

¹¹ Thuša ngwana wa gago go bona gore melao ya motheo ya Beibele e ya re hola. Ge le bala Beibele goba temana ya letšatši, boledišanang kamoo melao ya motheo ya Beibele e thušitšego lapa la lena ka gona. Ka mohlala o ka thuša ngwana wa gago go bona gore go bohlokwa gore re dule re šoma ka thata le go bolela nnete. (Baheb. 13:18) O ka mmotšha le gore go phela ka melao ya motheo ya Beibele go dira gore re phele gabotse mmeleng le go dula re thabile. (Die. 14:29, 30) Go boledišana le bana ba gago ka melao ya motheo ya Beibele go tlo ba thuša go bona gore keletšo ya Beibele e bohlokwa kudu.​—Bala Diema 2:10, 11.

12. Tate yo mongwe o ile a thuša bjang morwa wa gagwe go bona gore melao ya motheo ya Beibele e bohlokwa?

¹² Ngwanabo rena Steve e lego tate yo a tšwago kua France, o hlalosa kamoo yena le mosadi wa gagwe ba thušago ngwana wa bona Ethan yo a lego mahlalagading go bona gore melao yeo Jehofa a re neago yona e bontšha gore o a re rata. O re: “Re mmotšiša dipotšišo tša go swana le gore, ‘ke ka baka la’ng Jehofa a nyaka gore re phele ka melao ya gagwe ya motheo? Melao ye ya motheo e bontšha bjang gore Jehofa o a re rata? Go ka direga’ng ge e ba re ka se phele ka melao ya motheo ya Beibele?’” Go boledišana le Ethan ka dilo tše go mo thušitše gore a kgone go phela ka melao ya motheo ya Beibele. Ngwanabo rena Steve o oketša ka gore: “Morero wa rena o mogolo ke go thuša Ethan go bona gore Beibele e na le bohlale bjoo bo phagametšego bja batho.”

13. Batswadi ba ka tlwaetša bjang bana ba bona gore ba phele ka melao ya motheo ya Beibele? Nea mohlala.

¹³ Tlwaetša bana ba gago go phela ka melao ya motheo ya Beibele. O ka dira seo ge e ba ngwana wa gago a swanetše go bala puku e nngwe e itšego ya mošomo wa sekolo. Ka mohlala, batho bao go bolelwago ka bona ka pukung yeo, ba ka ba ba dira dilo tšeo Jehofa a rego di fošagetše. Dilo tše bjalo ka go ba le thobalano e gobogilego le go rata dintwa gomme ya kgothaletša batho gore ba ba ekiše. O ka kgothaletša ngwana wa gago go naganišiša ka tsela yeo Jehofa a ikwago ka gona ge batho ba sa phele ka melao ya gagwe ya motheo. (Die. 22:24, 25; 1 Bakor. 15:33; Bafil. 4:8) Go dira bjalo go ka mo thuša gore a be le sebete sa go bolela le morutiši goba barutwana ba bangwe ka melao ya motheo ya Beibele ge ba dutše ba ahlaahla puku yeo ka klaseng.

 THUŠA BANA BA GAGO GO EMELA DITUMELO TŠA BONA

14. Ke dilo dife tšeo di ka tšhošago bana ba Bakriste, gona ka baka la’ng?

¹⁴ Bana ba Bakriste ba ka ba le dihlong tša go emela ditumelo tša bona. Ka mohlala, ba ka lewa ke dihlong tša go hlalosa ditumelo tša bona ge ka klaseng go bolelwa gore dilo di no ba gona ka go itiragalela. Ka baka la’ng? Morutiši wa bona a ka ba bontšha gore go na le bohlatse bja gore dilo di no ba gona ka go itiragalela. O ka thuša bjang bana ba gago gore ba kgone go ba le sebete sa go emela ditumelo tša bona maemong a bjalo?

15. Ke’ng seo se ka thušago bana ba gago gore ba kgodišege ka seo ba se dumelago?

¹⁵ Thuša ngwana wa gago go kgodišega ka seo a se dumelago. Ngwana wa gago ga se a swanela go ba le dihlong ka nnete yeo a e tsebago ka tlholo. (2 Tim. 1:8) Ka baka la’ng? Ka gobane borasaense ba bantšhi ba a tseba gore dilo ga se tša no ba gona ka go itiragalela. Tsela yeo dilo tšeo di bopilwego di hlakahlakanego ka yona, e bontšha borasaense bao gore go na le yo a di hlamilego. Seo se dira gore ba se ke ba dumela thuto yeo e lego gona lefaseng goba dikolong ya gore dilo di no ba gona ka go itiragalela. Selo se sengwe seo se ka thušago ngwana wa gago gore a be le tumelo ke go tseba gore ke’ng seo se thušitšego bana babo le dikgaetšedi go dumela gore dilo di bopilwe. c

16. Batswadi ba ka thuša bjang bana ba bona go kgona go hlalosetša batho ba bangwe gore go na le Mmopi? (1 Petro 3:15) (Bona le seswantšho.)

¹⁶ Thuša bana ba gago go kgona go hlalosa gore ke ka baka la’ng ba dumela gore go na le Mmopi. (Bala 1 Petro 3:15.) O ka boledišana le bana ba gago ka dihlogo tšeo di lego go Jw.org/nso tšeo di rego “Bafsa ba a Botšiša—Tlholo Goba Tlhagelelo?” Ngwana wa gago a ka kgetha sehlogo seo a bonago gore se ka kgona go mo thuša go ka kgona go hlalosetša ba bangwe, gore ke ka baka la’ng a dumela gore Mmopi o gona. Mo gopotše gore ga se a swanela go ngangišana le bana bao a tsenago le bona sekolo. Mo kgothaletše gore a boledišane le bona ka dilo tše bonolo tšeo di ka dirago gore poledišano yeo e kgahliše. Ka mohlala, ngwana yo a tsenago sekolo le yena a ka re go yena: “Nna ke tshepa dilo tšeo ke di bonago ebile ga sa nka ka bona Modimo.” Ngwana wa gago a ka araba ka  gore: “Nagana o sepela lešokeng gomme ge o le moo wa bona sediba seo se epilwego, sediba seo se tla no go bontšha gore go na le motho yo a lego bohlale yo a ilego a se dira. Ge e ba go le bjalo, re kgona go bona gore go na le yo a hlodilego lefase la rena le dilo tšeo di lego go lona.

17. Batswadi ba ka thuša bjang bana ba bona go hwetša ditsela tša go ruta ba bangwe ka Beibele?

¹⁷ Thuša ngwana wa gago gore a kgone go botša batho ba bangwe ka di nnete tšeo di lego ka Beibeleng. (Baroma 10:10) O ka mmotšha gore go botša batho di nnete tšeo di lego ka Beibeleng, go ka swantšhwa le go ithuta go bapala seletšo se itšego sa mmino. Ge motho a thoma go ithuta, a ka bapala dikoša tšeo di lego bonolo. Ke moka ge nako e dutše e ya, o tlo kgona go bapala le tše dingwe tšeo di lego thatanyana. Ngwana a ka dira se se swanago ge a hlalosetša batho ba bangwe ka ditumelo tša gagwe. Ka mohlala a ka botšiša ngwana yo a tsenago le yena sekolo gore: “Na o be o tseba gore bahlami ba ekiša dilo tšeo di šetšego di le gona?” E re ke go bontšhe bidio ye nngwe a še. Ka morago ga go mmontšha bidio ya dihlogo tšeo di rego Na di Hlamilwe?, a ka bolela gore: “Ge e ba mohlami a retwa ka baka la go dira selo a ekiša seo se šetšego se le gona, ke mang a swanetšego go retwa ka baka la go dira selo seo la mathomo.” Potšišo yeo e ka dira gore motho a šale a nyaka go ithuta ka mo go oketšegilego.

THUŠA BANA BA GAGO GO TIIŠA TUMELO YA BONA

18. Batswadi ba ka dira’ng gore ba dule ba thuša bana ba bona gore ba be le tumelo go Modimo?

¹⁸ Batho bao re phelago gare ga bona ga ba na tumelo go Jehofa. (2 Pet. 3:3) Batswadi, ge le dutše le ithuta Beibele le bana ba lena, ba kgothaletšeng gore ba nyake dihlogo tšeo di ka ba thuša gore ba hlomphe lentšu la Modimo le go phela ka melao ya motheo ya Beibele. Ba thuše go diriša matla a bona a tlhaologanyo ka gore ba naganišiše ka dilo tšeo di kgahlišago tšeo Jehofa a di bopilego. Ba thuše gore ba kwešiše boporofeta bja Beibele bjo bo šetšego bo phethagetše. Sa bohlokwa le go feta, batswadi rapelang le bana ba lena ebile le dule le ba rapelela. Ge o dira bjalo o ka kgodišega gore Jehofa o tlo putsa maiteko a gago a go thuša ngwana wa gago gore a be le tumelo e tiilego.​—2 Dikor. 15:7.