Ke belegwe ka 1927 toropong e nnyane ya kgauswi le Chicago, Illinois, U.S.A. Batswadi ba ka be ba na le bana ba bahlano e lego Jetha, Don, nna, Karl, le Joy. Re be re tloga re ikemišeditše go hlankela Jehofa. Jetha o ile a ya klaseng ya bobedi ya Sekolo sa Gilead ka 1943. Don o ile a ya go hlankela Bethele ya kua Brooklyn, New York, ka 1944, Karl a ya ka 1947 gomme Joy a ya ka 1951. Mohlala wa bona le wa batswadi ba ka o ile wa nthuša kudu.

Batswadi ba ka ba be ba bala Beibele ebile ba rata Modimo gomme ba dira gore le rena re rate go dira sona seo. Tate o ile a se sa rata go ya kerekeng ka morago ga gore e be lešole kua Yuropa nakong ya Ntwa ya Pele ya Lefase. Mma o ile a leboga gore o boile gae a sa phela, gomme a re go yena: “Karl, a re ye kerekeng yeo re bego re eya go yona.” Tate o ile a mo araba ka gore: “Ke tla go felegetša eupša nka se tsene.” Mma a mmotšiša gore: “Ka baka la’ng?” O ile a araba ka gore: “Nakong ya ge re be re le ntweng, baruti ka moka bao ba bego ba le bodumeding bjo tee eupša ba le ka mahlakoreng a fapanego a ntwa, ba ile ba rapelela mašole le dibetša tša ona. Ke ile ka ipotšiša gore, ‘kgane Modimo o thekga mašole afe?’”

Ka letšatši le lengwe ge mma a be a le kerekeng, Dihlatse tša Jehofa tše pedi di ile tša tla ka gae. Ba ile ba nea tate dipuku tše pedi tšeo di bitšwago Light, tšeo di bego di bolela ka lengwalo la Kutollo. Tate o ile a amogela dipuku tšeo. Mma o ile a di bona gomme a thoma go di bala. Ka letšatši le lengwe o ile a bona ka kuranteng e nngwe go bolelwa gore bao ba ka ratago go ithuta Beibele ba tle le dipuku tša bona tšeo di bitšwago Light. O ile a ya. Ge a fihla, mosadi yo mongwe yo a godilego o ile a mmulela mojako. Mma o ile a mmontšha e nngwe ya dipuku tšeo a bego a di swere gomme a re go yena: “Le ithuta ka dipuku tše?” Mosadi yoo o ile a re: “Ee, tsena.” Beke e latelago mma o ile a ya le rena ke moka ka morago ra thoma go ya ka mehla.

Ka letšatši le lengwe, yo a bego a swere thuto o ile a re ke bale lengwalo la Psalme 144:​15, leo le bontšhago gore batho bao ba hlankelago Jehofa ba thabile. Temana yeo e ile ya nkgahla go swana le tše dingwe tše pedi, e lego ya 1 Timotheo 1:11, yeo e rego Jehofa ke “Modimo yo a thabilego,” le Baefeso 5:1, yeo e re kgothaletšago ka gore “ekišang  Modimo.” Ke ile ka ipotša gore ke swanetše go thabišwa ke go hlankela Mmopi wa ka le go mo leboga ka tokelo yeo a nneilego yona ya gore ke mo tsebe. Go ithuta ka Jehofa e ile ya ba selo se bohlokwa kudu bophelong bja ka.

Phuthego ya kgauswi e be e le kua Chicago. Re ile ra kgona go ya dibokeng ka mehla gomme ka thoma go tseba Beibele. Ke gopola ka letšatši le lengwe moswari wa thuto a kgetha Jetha gore a arabe. Ge ke mo kwa a araba ke ile ka re: ‘Se a bolelago ka sona ke a se tseba, nkabe ke emišitše letsogo gore ke arabe.’ Ke ile ka thoma go lokišetša le go araba ge ke le dibokeng. Sa bohlokwa ke gore nna le bana ba gešo re ile ra ba bagwera ba bagolo ba Jehofa. Ke kolobeditšwe ka 1941.

Ke gopola kopano yeo e bego e swerwe kua Cleveland, Ohio ka 1942. Go be go na le batho bao ba bego ba le mafelong a fetago a 50 kua United States bao ba bego ba theeditše lenaneo leo ka founo. Re be re dutše ka gare ga ditente tšeo di lego kgauswi le lefelo la kopano. Nakong ya Ntwa ya Bobedi ya Lefase, Dihlatse tša Jehofa di be di thoma go ganetšwa kudu. Bošego ke ile ka bona bana babo rena ba pakile dikoloi tša bona di lebeletše ka ntle ga ditente. Ba be ba kgopetše gore go be le motho o tee ka koloing e nngwe le e nngwe gore a hlokomele batho bošego. Ge batho ba be ba ka tla go re tshwenya, ba be ba tšhuma mabone gore ba fahle bao ba tlago go re tshwenya le go ba letšetša dipele gore ba ba rasetše. Ba bangwe ba be ba kitimela go yo thuša. Ke ile ka bona gore bahlanka ba Jehofa ba dula ba le komana madula a bapile. Go bona seo go ile gwa dira gore re robale bošego ka moka re sa tshwenyege.

Mengwaga e mentšhi ka morago ge ke nagana ka kopano yeo, ke lemoga gore mma o ile a se bontšhe go tshwenyega goba go tšhoga. O ile a tloga a tshepa Jehofa le mokgatlo wa gagwe. Nka se tsoge ke lebetše mohlala wo a re beetšego wona.

Pele ga kopano yeo, mma o ile a thoma go hlankela bjalo ka mmulamadibogo wa ka mehla. O ile a theetša dipolelo tša go bolela ka tirelo ya nako e tletšego ka kelohloko. Ge re boela gae o ile a re: “Ke nyaka go tšwela pele ke le mmulamadibogo wa ka mehla eupša nka se kgone go dira bjalo ge e ba ke na le mošomo o montšhi wa go hlwekiša legae la rena.” O ile a re kgopela gore re mo thuše. Re ile ra dumela gore a re nee diphapoši tšeo re swanetšego go di hlwekiša pele ga dijo tša mesong. Ge rena re e tšwa re eya sekolong, yena o be a šala a beakanya dilo tše dingwe gabotse ke moka a ya tšhemong. O be a šoma ka thata, eupša ga se a ka a tlogela go hlokomela bana ba gagwe. Re be re dula re mo hwetša ka gae. Ka matšatši a mangwe ge re etšwa sekolo re be re eya le yena tšhemong gomme seo sa re thuša go kwešiša gore go ba mmulamadibogo ke eng.

Ke bile mmulamadibogo ke na le mengwaga e 16. Le ge tate e be e se Hlatse ka nako yeo, o be a rata seo ke bego ke se dira. Ka letšatši le lengwe ke ile ka mmotša gore ke šoma ka thata tšhemong eupša ga ke hwetše motho yo a nyakago go ithuta Beibele le nna. Ke ile ka emanyana gomme ka mmotšiša gore: “Na o ka thabela go ithuta le nna?” O ile a homolanyana ke moka ka morago a araba ka gore: “Nka thabela go ithuta le wena morwa.” Thuto ya  ka ya mathomo ya Beibele ebile tate. Ke be ke thabile kudu.

Re ile ra bala puku yeo e rego “The Truth Shall Make You Free.” Ge re dutše re ithuta, ke ile ka lemoga gore tate o nthuša gore ke be moithuti yo mokaone wa Lentšu la Modimo le gore ke be morutiši yo a nago le bokgoni. Ka mohlala, ka letšatši le lengwe ge re be re bala serapa se itšego o ile a re: “Ke bona se puku ye e se bolelago eupša wena o tseba bjang gore puku ye e bolela nnete?” Ke ile ka se tsebe gore ke reng go yena ka nako yeo. Ka gona, ke ile ka re go yena: “Gona bjale ga ke tsebe gore ke go arabe bjang, eupša nakong e tlago ge re bala ke tla go nea karabo.” Ke ile ka kgona go mo araba. Ke ile ka hwetša ditemana tšeo di bego di bolela ka seo re bego re boledišana ka sona. Ka morago ga moo, ke ile ka kgona go lokišetša thuto ya rena gabotse le go ithuta go dira nyakišišo. Seo se nthušitše go ba morutwana yo mokaone wa Lentšu la Modimo e le gore ke kgone go thuša tate. O ile a diriša seo a bego a ithuta sona gomme a kolobetšwa ka 1952.

Ke tlogile gae ke na le mengwaga e 17. Jetha a o ile a ba moromiwa gomme Don a ya Bethele. Ke ile ka kgothatšwa ke tsela yeo ba bego ba rata dikabelo tša bona ka gona. Ke ile ka dira kgopelo ya go ya Bethele le Sekolong sa Gilead ka nako e tee gomme ka tlogelela tšohle ka diatleng tša Jehofa. Go bile le mafelelo afe? Ke ile ka bitšwa Bethele ka 1946.

Ke bile le dikabelo tše dintšhi tše di fapanego Bethele gomme ka kgona go ithuta dilo tše dintšhi tše diswa. Ke feditše mengwaga e 75 ke le Bethele, gomme mengwageng yeo ka moka, ke ile ka ithuta go dira dipuku le go thuša ka di tšhelete. Ke ile ka ithuta le go amogela dilo Bethele le go di romela ka ntle ga Bethele. Ke tloga ke thabela dilo tše dintšhi tšeo ke ithutago tšona borapeding bja mesong bja Bethele le dipolelong tšeo di theilwego Beibeleng tša Bethele.

Ke ithutile dilo tše dintšhi go moratho wa ka Karl, yo le yena a ilego a tla Bethele ka 1947. O be a tseba go ithuta Beibele ebile e le sekgwari sa go ruta. Ke ile ka mo kgopela gore a nthuše ka polelo yeo ke bego ke na le yona. Ke ile ka mmotša gore ke badile dilo tše dintšhi eupša ga ke tsebe gore ke di diriše bjang. O ile a nthuša ka go no mpotšiša gore: “Joel, sehlogo sa polelo ya gago se re’ng?” Ke ile ka lemoga gore o no mpotša gore ke diriše dilo tšeo di nyakegago gore ke kgone go nea polelo ya ka gabotse. Nka se tsoge ke lebetše seo a nthutilego sona.

Go ya tšhemong go dira gore motho a thabele go ba Bethele ebile o ba le diphihlelo tše di kgahlišago. Ke gopola phihlelo e nngwe ya ge re be re le  tšhemong kua Bronx, New York City. Nna le ngwanabo rena yo ke bego ke šoma le yena re ile ra tsena ka motseng wa mosadi yo mongwe yo a bego a na le dimakasine tša Morokami le Phafoga! Re ile ra mo dumediša gomme ra re go yena: “Re thuša batho gore ba ithute ka dilo tše di holago tša go tšwa ka Beibeleng.” O ile a re: “Ge e ba le tlo bolela ka Beibele, tsenang.” Re ile ra bala mangwalo ao a bolelago ka Mmušo wa Modimo le lefase le leswa. O ile a kgahlwa ke seo re se badilego ke moka beke e latelago a bitša ba bangwe ba bagwera ba gagwe gore ba tle ba be le yena ge a ithuta Beibele. Ka morago yena le monna wa gagwe ba ile ba thoma go hlankela Jehofa.

Ka morago ga gore ke phethe ka gore ke nyaka go nyala, go ile gwa ntšea mengwaga e lesome pele nka hwetša mosadi yo nka nyalanago le yena. Ke eng seo se nthušitšego go hwetša mosadi yo mokaone? Ke ile ka rapela gomme ka ipotšiša gore, ‘Ke nyaka go dira eng ka morago ga gore ke nyale?’

Ke ile ka kopana le kgaetšedi yo a bitšwago Mary Aniol ge ke be ke le kopanong kua Yankee Stadium ka 1953. Yena le Jetha ba be ba le mmogo klaseng ya bobedi ya Sekolo sa Gilead gomme ba be ba šoma mmogo bjalo ka baromiwa. Mary o ile a mpotša ka kabelo ya gagwe ya boromiwa ya kua dihlakahlakeng tša Caribbean, a mpotša le ka dithuto tša Beibele tšeo a bilego le tšona ka mengwaga e mentšhi ge a be a le moo. Ge re be re tsebana gakaone re ile ra lemoga gore re na le dipakane tša go swana. Re ile ra thoma go ratana gomme ra nyalana ka April 1955. Mary o ile a mpontšha ka ditsela tše dintšhi gore ke mpho e tšwago go Jehofa le gore ke mohlala o mobotse wo nka o ekišago. O be a thabela kabelo e nngwe le e nngwe yeo a e hwetšago. O be a šoma ka thata, a bontšha gore o tshwenyega ka batho ba bangwe ebile go hlankela Jehofa go etla pele bophelong bja gagwe. (Mat. 6:33) Re ile ra hlankela modirong wa tikologo ka mengwaga e meraro gomme ka 1958, ra bitšwa gore re tle Bethele.

Mary o nthutile dilo tše dintšhi. Ka mohlala, ge re be re sa tšwa go nyalana, re ile ra dira phetho ya gore re bale Beibele re le mmogo gomme re fetše ditemana tše 15 ka nako e tee. Ka morago ga gore re bale, yo mongwe le yo mongwe o be a bolela gore o ithutile eng mangwalong ao ke moka ra boledišana ka gore re ka a diriša bjang maphelong a rena. Mary o be a dula a mpotša ka dilo tšeo a ithutilego tšona ge a be a le Sekolong sa Gilead goba a mpotša ka tšeo a ithutilego tšona ge e be e le moromiwa. Go boledišana le yena ka dilo tše go be go nthuša gore ke kgone go kaonefatša ge ke nea dipolelo le gore ke kgone go kgothatša dikgaetšedi.​—Die. 25:11.

Mosadi wa ka yo ke mo ratago o hlokofetše ka 2013. Ke fela pelo ya go mmona lefaseng le leswa! Gona bjale ke ikemišeditše go tšwela pele ke ithuta le go tshepa Jehofa. (Die. 3:5, 6) Ke a homotšega le go thaba ge ke nagana ka dilo tšeo bahlanka ba Jehofa ba tlago go di dira lefaseng le leswa. Dilo tšeo di akaretša go ithuta ka dilo tše re bego re sa di tsebe ka Mohlahli wa rena yo Mogolo. Ke leboga dilo tšeo Jehofa a nthutilego tšona go fihla ga bjale, le kamoo a mpontšhitšego ka gona gore o tloga a nthata.