1. Batho ba bangwe ba ikwa bjang ge ba nagana ka go phela go ya go ile?

 BATHO ba bantšhi ba leka go ja dijo tša phepo le go itšhidulla gore ba dule ba phetše gabotse. Eupša ba a tseba gore le ge ba dira dilo tše, ba tlo tšofala le go hlokofala. Batho ba bangwe ba nagana gore ga go kgonege go phela go ya go ile mola ba bangwe ba sa nyake go phela go ya go ile ka gobane bophelo bo tletše ka mathata. Eupša go lengwalo la Johane 3:16 le 5:24, Jesu o boletše gore go a kgonega gore motho a be le “bophelo bjo bo sa felego.”

2. Lengwalo la Johane kgaolo 6 le re botša eng ka bophelo bjo bo sa felego? (Johane 6:39, 40)

² Ka letšatši le lengwe, Jesu o ile a fepa lešaba le lentšhi ka mohlolo a diriša senkgwa le hlapi. a Mohlolo woo Jesu a o dirilego o be o kgahliša, eupša seo Jesu a ilego a se bolela ka moragonyana se be se kgahliša le go feta. Nakong ya ge a be a eya Kaperenaume yeo e lego kgauswi le lebopo la Galilea, o ile a botša lešaba leo le bego le mo šetše morago gore o tlo tsoša batho bao ba hlokofetšego gomme ba phela ka mo go sa felego. (Bala Johane 6:39, 40.) Nagana gore o tlo direga’ng  ka bagwera ba gago le batho ba geno bao ba hlokofetšego. Mantšu a Jesu a bontšha gore batho ba bantšhi bao ba hlokofetšego ba tlo tsošwa gomme wena le batho bao o ba ratago la phela ka mo go sa felego. Eupša batho ba bangwe ba be ba thatafalelwa ke go kwešiša mantšu ao Jesu a a boletšego go Johane kgaolo 6.Jesu o rile’ng?

3. Jesu o ile a re botša eng ka yena go Johane 6:51?

³ Ka morago ga gore Jesu a fepe lešaba, o ile a nagana ka manna ao Jehofa a ilego a a nea Baisiraele ge ba be ba le lešokeng. Ge e le gabotse Beibele e bitša manna gore ke “senkgwa seo se tšwago legodimong.” (Ps. 105:40; Joh. 6:31) Jesu o ile a diriša manna go ruta lešaba thuto e bohlokwa. Le ge Jehofa a ile a nea Baisiraele manna ka mohlolo, mafelelong ba ile ba hwa. (Joh. 6:49) Eupša Jesu o be a ipitša “senkgwa sa kgonthe seo se tšwago legodimong,” “senkgwa seo se tšwago go Modimo,” le “senkgwa sa bophelo.” (Joh. 6:32, 33, 35) Jesu o ile a bontšha phapano yeo e lego gona magareng ga gagwe le manna. O ile a re: “Ke nna senkgwa se se phelago se se theogilego legodimong, ge e ba motho le ge e le ofe a eja senkgwa se o tla phela ka mo go sa felego.” (Bala Johane 6:51.) Bajuda bao ba bego ba mo theeditše ba ile ba makala. Ba ile ba ipotšiša gore go tla bjang gore Jesu a re o phala manna ao Jehofa a bego a a nea borakgolokhukhu ba bona? Jesu o ile a ba thuša go kwešiša ka go ba botša gore: “Senkgwa seo ke tlago go se nea ke nama ya ka.” O be a e ra go re’ng? Go bohlokwa gore re kwešiše seo a bego a se bolela. Go dira bjalo go re thuša go bona gore go a kgonega gore rena le batho bao re ba ratago re tle re phele ka mo go sa felego. A re kweng gore Jesu o be a e ra go re’ng.

SENKGWA SE SE PHELAGO LE MMELE WA GAGWE

4. Ke ka baka la’ng batho ba bangwe ba ile ba makatšwa ke seo Jesu a ilego a se bolela?

⁴ Batho ba bangwe ba ile ba makatšwa ke seo Jesu a ilego a se bolela ge a be a re ke le fa “nama ya ka yeo ke e neago bakeng sa lefase.” Mohlomongwe ba be ba nagana gore Jesu o nyaka gore ba je nama ya gagwe. (Joh. 6:52) Jesu o ile a ba botša selo se sengwe gape seo se ilego sa ba makatša le go feta, o ile a re: “Ka ntle le gore le je nama ya morwa motho le gore le nwe madi a gagwe, ga le na bophelo go lena.”​—Joh. 6:53.

5. Ke ka baka re ka kgodišega gore o be a dira papišo ge a be a re setšhaba se je nama ya gagwe le go nwa madi a gagwe?

⁵ Mehleng ya Noa, Modimo o ile a botša batho gore ba se ke ba ja madi. (Gen. 9:3, 4) Jehofa o ile a nea le Baisiraele molao wa gore ba se ke ba ja madi. Mang le mang yo a bego a ka ja madi o be a swanetše gore “a bolawe.” (Lef. 7:27.) Jesu o be a hlompha melao yeo Jehofa a e neilego batho ba gagwe. (Mat. 5:17-19) O be a ka se tsoge a kgothaleditše Bajuda gore ba je nama ya gagwe le go nwa madi a gagwe ka nnete. Eupša o ile a bolela seo go ruta setšhaba gore se ka dira eng gore se hwetše “bophelo bjo bo sa felego.”​—Joh. 6:54.

6. Re swanetše go kwešiša bjang mantšu ao Jesu a a boletšego ge a be a re batho ba swanetše go ja nama ya gagwe le go nwa madi a gagwe?

⁶ Jesu o ile a diriša papišo ge a be a bolela le lešaba. Le ge a be a bolela le mosadi wa Mosamaria o ile a diriša papišo. O itše: “Mang le mang yo a nwago meetse ao ke tlago go mo nea ona a ka se ke a nyorwa le ka mohla, eupša meetse ao ke tlago go mo nea ona, go yena e tla ba sediba sa meetse seo se runyago bakeng sa go nea bophelo bjo bo sa felego.”  (Joh. 4:7, 14) b Jesu o be a sa re gore mosadi yoo o tla no hwetša bophelo bjo bo sa felego ka go no nwa meetse a itšego. Ka mo go swanago o be a sa re gore lešaba leo le lego Kaperenaume le be le tla hwetša bophelo bjo bo sa felego ka go ja nama ya gagwe le go nwa madi a gagwe.

DITIRAGALO TŠE PEDI TŠEO DI SA SWANEGO

7. Ke’ng seo ba bangwe ba se bolelago ka mantšu a Jesu ao a lego go Johane 6:53?

⁷ Batho ba madumedi a mangwe ba re mantšu ao Jesu a a boletšego go Johane 6:53 ao a rego: ‘Go ja nama le go nwa madi a gagwe’, ke ona a dirilego gore go be le selalelo. Ka baka la’ng? Ka gobane ge Jesu a be a swere Selalelo sa Morena o ile a diriša mantšu ao a nyakilego go swana le ao. (Mat. 26:26-28) Ba bolela gore mang le mang yo a bago gona Selalelong sa Morena o swanetše go ja senkgwa le go nwa beine. Seo ba se bolelago ga se nnete. Go bohlokwa kudu gore re kwešiše tiragalo ye gabotse ka gobane ngwaga o mongwe le o mongwe batho ba bantšhi lefaseng ka moka ba bokana le rena ge re gopola lehu la Jesu. Re tlo kwa phapano magareng ga seo Jesu a se boletšego go Johane 6:53 le seo a se boletšego nakong ya Selalelo sa Morena.

8. Ditiragalo tše tše pedi di fapana ka’ng? (Bona le seswantšho.)

 ⁸ A re boneng kamoo ditiragalo tše tše pedi di fapanago ka gona. Sa pele, Jesu o be a le kae ge a be a bolela mantšu ao a lego go Johane 6:53-56? O be a bolela le Bajuda bao ba bego ba le Galilea ka 32 C.E. O boletše mantšu ao mo e ka bago ngwaga pele a dira Selalelo sa Morena kua Jerusalema. Sa bobedi, o be a bolela le bomang? O be a bolela le batho bao ba bego ba le kua Galilea bao ba bego ba tshwenyegile ka dijo ebile ba se na taba le Modimo. (Joh. 6:26) Ge Jesu a be a bolela dilo tšeo ba bego ba sa di kwešiše ba be ba tlogela go mo latela. Le ba bangwe ba barutiwa ba ba gagwe ba ile ba tlogela go mo latela. (Joh. 6:14, 36, 42, 60, 64, 66) Batho bao ba be ba sa swane le baapostola ba Jesu ba 11 ba botegago bao ba bego ba na le yena Selalelong sa Morena. Ba ile ba dula le yena le ge ba be ba sa kwešiše dilo tše dingwe tšeo a bego a di ruta. Baapostola ba ba gagwe bao ba botegago ba be ba sa swane le batho ba bantšhi bao ba bego ba le motseng wa Galilea ka gobane bona ba be ba dumela gore Jesu ke Morwa wa Modimo yo a tšwago legodimong. (Mat. 16:16) O ile a re go bona: “Ke lena bao le swareletšego le nna melekong ya ka.” (Luka 22:28) Mantšu a Jesu ao a lego go Johane 6:53, a be a sa hlalose seo se bego se tlo direga ka Selalelo sa Morena. Go na le dilo tše dingwe tšeo di bontšhago gore ditiragalo tše tše pedi ga di swane.

MANTŠU A JESU A RE HOLA

9. Jesu o be a bolela le bomang nakong ya Selalelo la Morena?

⁹ Nakong ya Selalelo sa Morena, Jesu o ile a nea baapostola ba gagwe senkgwa se sa omelwago, a ba botša le gore se emela mmele wa gagwe. Ke moka a ba nea beine, a botša gore e emela “madi a kgwerano e mpsha.” (Mar. 14:22-25; Luka 22:20; 1 Bakor. 11:24) Seo a se boletšego se bohlokwa. Jesu o dirile kgwerano e mpsha le batho bao ba tla bego ba buša le yena legodimong e sego le batho ka moka. (Baheb. 8:6, 10; 9:15) Baapostola ga se ba kwešiša dilo ka moka ka kgwerano yeo Jesu a e dirilego le bona. Le ga go le bjalo ba be ba tlo tlotšwa ka moya o mokgethwa gore ba tle ba tsene kgweranong e mpsha ke moka ba tle ba kgone go buša le Jesu legodimong.​—Joh. 14:2, 3.

10.Dilo tšeo Jesu a di boletšego a le Galilea di fapana bjang le tšeo a di boletšego Selalelong sa Morena? (Bona le seswantšho.)

¹⁰ Nakong ya Selalelo sa Morena, Jesu o be a bolela le “mohlatswana.” Sehlotswana seo se thomilwe ke baapostola ba gagwe bao ba bego ba na le yena ka phapošing. (Luka 12:32) Go letetšwe gore batho bao ba tloditšwego ba je senkgwa le go nwa beine ka gobane ke bona ba tlago go buša le Jesu legodimong. Dilo tšeo Jesu a di boletšego ge a be a na le baapostola ba gagwe ga di swane le tšeo a di boletšego ge a be a na le lešaba kua Galilea. Dilo tšeo a di boletšego di be di swanetšwe go dirwa ke batho ba bantšhi.

11. Jesu o rile’ng ge a be a le kua Galilea go bontšha gore o be a sa bolele le batho ba sego kae?

¹¹ Ge Jesu a be a le Galilea ka 32 C.E., o be a bolela le Bajuda bao ba bego ba nyaka senkgwa go yena. O ile a ba botša ka selo seo se bego se le bohlokwa kudu seo se bego se tlo dira gore ba hwetše bophelo bjo bo sa felego. O boletše le gore bao ba hlokofetšego ba tlo tsošwa letšatšing la mafelelo gomme ba phela ka mo go sa felego. Mo o be a sa bolele ka batho ba sego kae bao ba bego ba tlo tlotšwa ka moya o mokgethwa go swana le ge a boletše ka morago Selalelong sa Morena. Go ena  le moo, ge a be a le Galilea o be a bolela ka selo seo se kgahlišago seo se bego se tlo hwetšwa ke batho ka moka. Ge e le gabotse o itše: “Ge e ba motho le ge e le ofe a eja senkgwa se o tla phela ka mo go sa felego, . . . senkgwa seo ke tlago go se nea ke nama ya ka yeo ke e neago bakeng sa bophelo bja lefase.”​—Joh. 6:51.

12. Go nyakega eng gore re holwe ke dilo tše Jesu a bego a bolela ka tšona?

¹² Jesu o be a sa re gore Mojuda yo mongwe le yo mongwe kua Galilea o tlo hwetša bophelo bjo bo sa felego. Go be go tlo holega feela batho bao ba nago le tumelo go yena. Batho ba bantšhi ba re ba “dumela go Jesu” e bile ba mmitša mophološi wa bona. Eupša go no dumela seo ga se gwa lekana. (Joh. 6:29) Gona moo lešabeng leo go be go na le bao ba bego ba dumela go Jesu, eupša ka morago ba se sa dumela go yena. Ke ka baka la’ng seo se ile sa direga?

13.Gore motho a tle a be molatedi wa Jesu, o be a swanetše go dira’ng?

¹³ Batho ba bantšhi bao Jesu a ilego a ba fepa, ba be ba mo šala morago ge fela a ba nea dilo tšeo ba di hlokago. Ba be ba nyaka gore a ba fodiše, a ba nee dijo le go ba ruta ka dilo tšeo bona ba bego ba nyaka go di kwa. Eupša gore motho e be molatedi wa Jesu, o be a se a swanelwa ke go no kgahlwa ke dilo tšeo feela. Jesu ga se a no tlela mo lefaseng feela gore a nee batho dilo tšeo ba di hlokago. O be a tletše le go ba ruta dilo tša bohlokwa gore ba tle ba kgone go ba balatedi ba gagwe.​—Joh. 5:40; 6:44.

14. Re swanetše go dira’ng gore re holwe ke sehlabelo sa Jesu?

¹⁴ Jesu o ile a gatelela gore o tlo neela ka  nama ya gagwe le madi a gagwe e le sehlabelo gore batho ba tle ba kgone go phela ka mo go sa felego. Eupša lešaba leo le be le swanetše go dumela seo Jesu a bego a se bolela. (Joh. 6:40) Le rena lehono, re swanetše go dumela seo Jesu a ilego a se bolela go Johane 6:53 gore re tle re kgone go phela ka mo go sa felego. Batho ba bantšhi ba ka kgona go hwetša bophelo bjo bo sa felego.​—Baef. 1:7.

15-16.Ke dilo dife tše bohlokwa tšeo re ithutilego tšona lengwalong la Johane kgaolo 6?

¹⁵ Mantšu ao a lego go Johane kgaolo 6 a bohlokwa ebile a re kgothatša kudu. A re bontšha gore Jesu o na le taba le batho ba bangwe. O ile a fodiša bao ba bego ba babja, a ruta ka Mmušo wa Modimo ebile a nea le batho bao ba bego ba hloka dijo. (Luka 9:11; Joh. 6:2, 11, 12) Selo sa bohlokwa kudu seo a ilego a ba ruta sona ke gore ke yena “senkgwa sa bophelo.”​—Joh. 6:35, 48.

¹⁶ Bao e lego ba “dinku tše dingwe” ga se ba swanela go ja senkgwa le go nwa beine ge ba le segopotšong sa lehu la Jesu. (Joh. 10:16) Eupša sehlabelo sa Jesu Kriste se a ba hola le ge ba sa je. Ba tlo hwetša bophelo bjo bo sa felego ge feela ba dumela go seo Jesu a ilego a se ruta. (Joh. 6:53) Bao ba jago senkgwa le go nwa beine ba bontšha gore ke karolo ya kgwerano e mpsha ebile ba tlo buša le Jesu kua legodimong. Lengwalo la Johane kgaolo 6 le bohlokwa kudu go rena ka moka go sa šetšwe gore re batlotšwa goba re ba dinku tše dingwe. Kgaolo ye, e re ruta gore re swanetše go ba le tumelo e tiilego go sehlabelo sa Jesu gore re tle re hwetše bophelo bjo bo sa felego.