Moapostola Paulo o ile a ngwalela mogologotee le yena e lego Timotheo gore: “Ke go laela ka matla pele ga Modimo le Kriste Jesu le barongwa ba ba kgethilwego gore o latele ditaelo tše ka ntle le go beba sefahlego goba go kgetholla.”​—1 Tim. 5:21.

A re thomeng pele ka go bolela ka barongwa bao temana ye e sa bolelego ka bona gore re tle re kgone go kwešiša gore ke bomang barongwa ba ba kgethilwego. Go molaleng gore ba 144 000 ga se karolo ya barongwa bao. Ge Paulo a ngwalela Timotheo lengwalo, go be go se na batlotšwa bao ba šetšego ba ile legodimong. Baapostola le batlotšwa ba bangwe ba be ba se ba hlwa ba e ba dibopiwa tša moya, ka gona go ka se kgonege gore e be “barongwa ba ba kgethilwego.”​—1 Bakor. 15:50-54; 1 Bathes. 4:13-17; 1 Joh. 3:2.

“Barongwa ba ba kgethilwego” e ka se be bao ba ilego ba se kwe Modimo mehleng ya meetsefula. Barongwa bao ba ile ba kwa Sathane gomme ba ba manaba a Jesu ka ge ba ile ba fetoga batemona. (Gen. 6:2; Luka 8:30, 31; 2 Pet. 2:4) Nakong e tlago, ba tlo lahlelwa sekoting ka mengwaga e 1 000 ke moka ka morago ba tla ba fedišwa le Diabolo.​—Juda 6; Kut. 20:1-3, 10.

“Barongwa ba ba kgethilwego” bao Paulo a bolelago ka bona, e swanetše go ba e be e le bao ba bego ba le legodimong ba thekga “Modimo le Kriste Jesu,” bao Paulo a boletšego ka bona temaneng ye.

Kua legodimong go na le barongwa ba diketekete bao ba botegago. (Baheb. 12:22, 23) Ga go bonagale Jehofa a nea barongwa bao dikabelo tša go swana ka nako e tee. (Kut. 14:17, 18) Gopola gore ka nako e nngwe morongwa o tee o ile a abelwa gore a fediše madira a 185 000 a Baasiria. (2 Dikg. 19:35) Barongwa ba bangwe ba ka ba ba ile ba abelwa go “ntšha mmušong wa [Jesu] dilo tšohle tšeo di bakago kgopišo le batho ba go hloka molao.” (Mat. 13:39-41) Ba bangwe ba ka ba ba ile ba abelwa go “kgoboketša bakgethwa ba gagwe” legodimong. (Mat. 24:31) Ebile ba bangwe ba abelwa go re ‘šireletša ditseleng tša rena ka moka.’​—Ps. 91:11; Mat. 18:10; bapiša le Mateo 4:11; Luka 22:43.

“Barongwa ba ba kgethilwego” bao go bolelwago ka bona go 1 Timotheo 5:21, go ka direga gore ke bao ba abetšwego dikabelo tše di kgethegilego tšeo di sepedišanago le bahlanka ba Modimo. Paulo o boletše gore bagolo ba swanetše go phetha maikarabelo a bona ka phuthegong le gore bao ba lego ka phuthegong ba swanetše go hlompha bagolo. Bagolo ba swanetše gore ba phethe dikabelo tša bona “ntle le go beba sefahlego goba go kgetholla.” Le gona, ba swanetše gore ge ba dira diphetho ba naganišiše pele. Lebaka le legolo la gore Paulo a nee Timotheo keletšo yeo ke gore bagolo ba šoma “pele ga Modimo le Kriste Jesu le barongwa ba ba kgethilwego.” Go molaleng gore barongwa ba bangwe ba neilwe dikabelo tšeo di sepedišanago le phuthego ya Modimo tše bjalo ka go šireletša batho ba Jehofa, go hlokomela modiro wa go bolela ditaba tše dibotse le go botša Jehofa ka seo ba se bonago.​—Mat. 18:10; Kut. 14:6.