1-2. Ngwanabo rena yo mongwe o ile a ithuta’ng ka go nea keletšo?

 MENGWAGA e mentši e fetilego, bagolo ba babedi ba ile ba etela kgaetšedi yo a tšerego nako e telele a sa tle dibokeng. Mogolo yo mongwe o ile a balela kgaetšedi yoo mangwalo a go bontšha bohlokwa bja go ba gona dibokeng. O be a nagana gore ba kgothaditše kgaetšedi yoo, eupša ge yena le motho yoo a bego a tlile le yena ba sepela, kgaetšedi yoo o ile a re: “Lena bana bešo ga le kwešiše gore ke na le mathata a mohuta mang.” Bana babo rena bao ba ile ba nea kgaetšedi yoo keletšo ka ntle le go mmotšiša gore o na le mathata a mohuta mang. Se se ile sa dira gore kgaetšedi yoo a se ke a bona bohlokwa bja keletšo yeo ba mo filego yona.

² Mogolo yo a baletšego kgaetšedi yoo mangwalo o re: “Ka nako yeo ke be ke nagana gore kgaetšedi yoo o be a sa leboge keletšo yeo re mo filego yona. Ge ke dutše ke nagana ka taba yeo ke ile ka lemoga gore ke ile ka no balela kgaetšedi yoo mangwalo go ena le gore ke mmotšiše dipotšišo tša go swana le gore: ‘Go direga’ng ka bophelo bja gago?’ ‘Nka go thuša bjang?’” Ngwanabo rena yoo o ile a ithuta thuto e bohlokwa. Lehono ke mogolo yo a naganelago batho ba bangwe le go ba kwela bohloko.

3. Ke bomang bao ba ka neago keletšo ka phuthegong?

 ³ Bagolo ba na le boikarabelo bja go eletša ba bangwe ge go hlokagala. Eupša ka dinako tše dingwe go ka hlokagala gore ba bangwe ka phuthegong ba eletše ba bangwe. Ka mohlala ngwanabo rena goba kgaetšedi a ka nea mogwera wa gagwe keletšo yeo e theilwego ka Beibeleng.  (Ps. 141:5; Die. 25:12) Goba kgaetšedi yo a godilego a ka eletša ‘kgaetšedi wa mofsa’ ka tsela yeo go bolelwago ka yona go Tito 2:3-5. Le gona batswadi ba swanetše go dula ba phošolla le go eletša bana ba bona. Le ge sehlogo se se ngwaletšwe bagolo, eupša le rena se ka re hola ka go bona gore re ka nea keletšo bjang ka tsela e bonolo, yeo ba tlago go e theetša le yeo e tlago go ba ‘thabiša,’—Die. 27:9.

4. Re tlo boledišana ka’ng sehlogong se?

⁴ Sehlogong se re tlo boledišana ka dipotšišo tše nne tša ge re nea keletšo: (1) Ke ka baka la’ng re nea keletšo? (2) Na go a hlokagala? (3) Ke bo mang bao ba swanetšego go nea keletšo? 4) Re ka eletša motho bjang ka tsela yeo e tlago go mo hola?

5. Ge mogolo a nea keletšo ka lerato, ke ka baka la’ng batho ba tla e amogela gabonolo? (1 Bakorinthe 13:4, 7)

⁵ Bagolo ba rata bana babo bona le dikgaetšedi. Ka dinako tše dingwe ba bontšha lerato leo ka go eletša motho yo a lego kgauswi le go dira sebe. (Bagal. 6:1) Pele ba ka eletša motho yo mongwe, ke mo gobotse gore bagolo ba nagane ka seo Paulo a ilego a se bolela ka lerato. “Lerato le botho. . . . Le tiišetša tšohle, le dumela tšohle, le holofela tšohle, le kgotlelela tšohle.” (Bala 1 Bakorinthe 13:4, 7.) Ge mogolo a naganišiša ka ditemana tše re boletšego ka tšona, o tlo nea keletšo ka tsela e lerato. Ge motho yo a eletšwago a ka bona gore mogolo o a mo rata, se se tla dira gore a amogele keletšo yeo.—Baroma 12:10.

6. Moapostola Paulo o beile mohlala ofe o mobotse?

⁶ Moapostola Paulo o beile mohlala o mobotse bjalo ka mogolo. Ka mohlala ge bana babo ba Thesalonika ba be ba hloka keletšo o ile a ba eletša. Eupša ge a be a ba ngwalela mangwalo, o ile a thoma pele ka go ba reta ka mošomo o mobotse wo ba o dirago, lerato leo ba le bontšhago, le kgotlelelo ya bona. O ile a nagana le ka maemo a bona a ba botša gore o a tseba gore bophelo bja bona ga bo bonolo le gore ba kgotleletše le ge ba tlaišwa. (1 Bathes. 1:3; 2 Bathes. 1:4) O ile a ba botša le gore ba bea mohlala o mobotse go Bakriste ba bangwe. (1 Bathes. 1:8, 9) Ba ile ba thaba kudu ge ba bona Paulo a ba reta! Re a bona gore Paulo o be a rata bana babo kudu. Ka gona o ile a kgona go nea Bathesalonika keletšo mangwalong a mabedi ao a ilego a ba ngwalela ona.—1 Bathes. 4:1, 3-5, 11; 2 Bathes. 3:11, 12.

7. Ke ka baka la’ng ba bangwe ba ka se amogele keletšo?

⁷ Go ka direga’ng ge re nea keletšo re sa bontšhe lerato? Mogolo yo mongwe o re: “Batho ba bangwe ga ba amogele keletšo ka gobane ga se ba e newa ka lerato, e sego ka gobane go na le phošo ka yona.” Re ka ithuta’ng go se? Go bonolo gore re amogele keletšo ge re e newa ka lerato.

8. Mogolo o swanetše go ipotšiša’ng ge a nyaka go nea motho yo mongwe keletšo?

⁸ Bagolo ga se ba swanela go kitimela go nea keletšo. Pele mogolo a ka nea motho yo mongwe keletšo o swanetše go ipotšiša gore: ‘Na go a hlokagala? Na ke kgodišegile gore motho yoo o dira phošo? Na seo a se dirago se ganetšana le melao ya Beibele? Goba na mohlomongwe o no ba a dira dilo go fapana le  tsela yeo ke di dirago ka yona?’ Bagolo ga se ba swanela go ‘akgofela go bolela’ (Die. 29:20). Ge mogolo a sa tsebe ge e ba a swanetše go eletša motho yo mongwe, o swanetše go yo botšiša mogolo yo mongwe ge e ba a bona ngwanabo rena yoo ka tsela yeo a mmonago ka yona.—2 Tim. 3:16, 17.

9. Re ithuta’ng go Paulo ka go apara le go ikgabiša? (1 Timotheo 2:9, 10)

⁹ Nagana ka mohlala wo. A re re mogolo o tshwenyegile ka tsela yeo ngwanabo rena goba kgaetšedi a aparago ka yona. A ka ipotšiša ge e ba go na le lengwalo la Beibele leo a ka le šomišago go mo eletša? Ka ge a sa nyake go bolela ka seo a se naganago, a ka botšiša mogolo yo mongwe goba Mokriste yo a godilego moyeng gore o nagana eng. Ba ka boledišana ka keletšo yeo Paulo a ilego a e nea ya moaparo le boikgabišo. (Bala 1 Timotheo 2:9, 10.) Paulo o ile a bontšha gore Mokriste o swanetše go apara ka tsela e hlomphegago. Eupša Paulo ga se a bontšha gore ba swanetše go apara eng goba ga se ba swanela go apara eng. O be a tseba gore bana babo ba ka apara diaparo tšeo ba di ratago ge feela di sa ganetšane le melao ya Beibele. Pele bagolo ba ka eletša motho yo mongwe ba swanetše go lebelela ge e ba tsela yeo a aparago ka yona e bontšha gore o a itlhompha.

10. Re swanetše go dula re nagana ka’ng ge re dira diphetho?

¹⁰ Go bohlokwa go gopola gore bana babo rena ba ka dira diphetho tša go se swane, eupša seo ga se bolele gore yo mongwe o phošo. Ga se ra swanela go gapeletša bana babo rena gore ba dire dilo tšeo re naganago gore di lokile.—Baroma 14:10.

11-12. Ge go hlokagala gore mogolo a eletše motho ke dipotšišo di fe tšeo a swanetšego go ipotšiša tšona, gona ka baka la’ng?

¹¹ Ge go hlokagala gore re nee motho keletšo re ka ipotšiša gore ke mang a swanetšego go nea keletšo? Pele mogolo a ka eletša kgaetšedi yo a nyetšwego goba ngwana, a ka boledišana le hlogo ya lapa yeo mohlomongwe e ka ikgethelago go lokiša bothata bjoo. * Goba a ka nyaka go ba gona ge mogolo yoo a nea keletšo. Le gona ka ge re bone go  serapa 3, ka dinako tše dingwe kgaetšedi yo a godilego a ka swanelwa ke go eletša kgaetšedi wa mofsa.

¹² Go na le se sengwe seo mogolo a swanetšego go naganišiša ka sona. A ka ipotšiša ge e ba e le motho wa maleba wa go  nea keletšo goba go na le motho yoo a ka e neago. Ka mohlala go ka ba bonolo gore motho yo a nago le bothata bja go ipona a se na mohola a boledišane le mogolo yo a ilego a ba le bothata bja go swana le bjoo peleng. Mogolo yo a ilego a ikwa ka tsela yeo o tlo kwešiša motho yoo gabotse, le go bolela dilo tšeo motho yoo a tlago go di amogela. Bagolo ka moka ka phuthegong ba na le boikarabelo bja go kgothatša bana babo rena le dikgaetšedi le go ba thuša go diriša seo Beibele e se bolelago. Go bohlokwa gore go newe keletšo le ge mogolo a se a ka a ba boemong bja go swana le bja motho yoo.

13-14. Ke ka baka la’ng go le bohlokwa gore mogolo a theetše?

¹³ Theetša. Ge mogolo a eya go eletša motho yo mongwe o swanetše go ipotšiša gore: Na ke tseba’ng ka mathata a ngwanešo? Go direga’ng ka bophelo bja gagwe? Na a ka ba a na le mathata a mangwe ao ke sa a tsebego? O hloka gore ke mo thuše bjang gona bjale?’

¹⁴ Molao motheo wo o lego go Jakobo 1:19 o bolela le batho bao ba neago keletšo. Jakobo o ngwadile gore: “Motho yo mongwe le yo mongwe a akgofele go kwa, a diege go bolela a be a diege go galefa.” Mogolo a ka nagana gore o tseba ditaba ka moka, eupša na ke nnete? Diema 18:13 e re gopotša gore: “Ge motho a fetola taba pele a ka ekwa, o bontšha bošilo gomme o a inyatšiša.” E tla ba ga bohlale gore motho yo a newago keletšo a bolele gore go direga eng. Ka gona mogolo o swanetše go theetša pele a bolela. Na o sa gopola seo re ithutilego sona ka mogolo yeo re boletšego ka yena mathomong a sehlogo se? O ile a bona gore go e na le gore a thome pele ka go nea kgaetšedi yoo keletšo, a ka ba a ile a thoma pele ka go mmotšiša gore: “Go direga’ng ka bophelo bja gago? Nka go thuša bjang?” Ge bagolo ba nyakišiša ditaba ka moka ba tlo kgona go thuša le go kgothatša bana babo rena le dikgaetšedi.

15. Bagolo ba ka diriša bjang molao motheo wo o lego go Diema 27:23?

¹⁵ Tseba bana beno le dikgaetšedi. Ka ge re boletše peleng, go nea keletšo ga se feela go bala mangwalo le go bolela seo re se naganago. Bana babo rena le dikgaetšedi, ba nyaka go bona gore re a ba kwešiša, re a ba rata le gore re nyaka go ba thuša. (Bala Diema 27:23.) Bagolo ba swanetše go dira sohle seo ba ka se kgonago gore e be bagwera ba bana babo rena le dikgaetšedi.

16. Bagolo ba ka eletša Bakristegotee le bona bjang ka tsela yeo e tlago go ba hola?

¹⁶ Bagolo ga ba nyake gore bana babo rena le dikgaetšedi ba nagane gore ba tla go bona feela ge ba nyaka go ba eletša. Eupša ba dula ba bolela le bana babo  bona le dikgaetšedi, ba bontšha gore ba tshwenyegile ka bona le ge ba na le mathata. Mogolo yo mongwe o re: “Ge bagolo ba ka dira bjalo, ba tlo ba bagwera ba “Bakristegotee le bona. Ke moka ge ba tlo eletša Bakristegotee le bona, go tlo ba bonolo gore ba dire bjalo.” Le bao ba newago keletšo go tlo ba bonolo gore ba e amogele.

17. Ke neng moo mogolo a swanetšego go se fele pelo le go ba botho?

¹⁷ Bontšha botho e bile o se ke wa fela pelo. O swanetše go bontšha botho le go se fele pelo ge motho yo o mo neago keletšo a sa e diriše. Mogolo ga se a swanela go kwata ge ngwanabo rena a sa amogele keletšo ka nako yeo. Beibele e bolela ka Jesu gore: “Ga go lehlaka le le thinyegilego le a tlago go le robaganya, gomme ga go thapo ya lebone yeo e kunyelelago ye a tlago go e tima.” (Mat. 12:20) Ka gona ge mogolo a rapela a nnoši, a ka kgopela Jehofa gore a thuše ngwanabo rena yoo gore a kwešiše le go diriša keletšo yeo a e newago. Ngwanabo rena yo a newago keletšo a ka tšea nako a nagana ka seo se boletšwego. Ge mogolo a sa fele pelo e bile a le botho, o tlo thuša motho yo a newago keletšo gore a theetše. Go bohlokwa gore ge mogolo a nea keletšo a diriše Beibele.

18. (a) Re swanetše go dula re gopola’ng ge re nea motho keletšo? Batswadi bao ba lego seswantšhong seo se sepedišanago le lepokisi ba boledišana ka eng?

¹⁸ Ithute go diphošo tša gago. Ka ge re se ra phethagala re ka se kgone go diriša dilo ka moka tšeo re ithutilego tšona sehlogong se. (Jak. 3:2) Ka dinako tše dingwe re tlo dira diphošo, eupša ge re di dira re swanetše go ithuta go tšona. Ge bana babo rena le dikgaetšedi ba bona gore re a ba rata go tlo ba bonolo gore ba re swarele ka ge re ba kgopiša ka dilo tšeo re di dirago goba re di bolelago.—Bona lepokisi leo le rego “ Keletšo go Batswadi.”

19. Re ka thabiša pelo ya bana babo rena le dikgaetšedi bjang?

¹⁹ Ka ge re bone, ga go bonolo go nea keletšo ka tsela yeo motho a tlago go e amogela. Ga se ra phethagala, le batho bao ba neago keletšo ga se ba phethagala. Dula o gopola melao ya metheo yeo re boletšego ka yona sehlogong se. Kgonthišetša gore go na le lebaka le le kwagalago la go nea motho keletšo. O be o kgonthišetše go bona ge e ba go hlokagala gore motho yoo a newe keletšo le gore ke wena motho wa maleba wa go nea motho yoo keletšo. Pele o nea motho yoo keletšo mmotšiše dipotšišo ke moka o mo theetše go kwešiša mathata ao a nago le ona. Leka go bona dilo ka tsela yeo a di bonago ka yona. E ba botho gomme o be mogwera wa bana beno le dikgaetšedi. Re nyaka gore batho bao ba newago keletšo ba e amogele e be ‘e ba thabiše.’—Die. 27:9.