1-2. (a) Ke ka baka la’ng lehono batho ba bantši ba thatafalelwa ke go tshepa bao ba ba eteletšego pele? (b) Re tlo ithuta ka’ng sehlogong se?

 BATHO ba bantši lehono ba thatafalelwa ke go tshepa bao ba ba eteletšego pele. Ba lemogile gore ba mmušo le ba molao ba hlokomela bahumi le bao ba nago le matla eupša ga ba thuše badiidi gakaalo. Beibele e boletše gabotse gore: ‘Motho o buša yo mongwe gore a mo gobatše.’ (Mmo. 8:9) Le gona baetapele ba bangwe ba bodumedi ba dira dilo tše mpe, e lego seo se dirilego gore batho ba bantši ba se sa tshepa Modimo. Ka gona ge re thoma go ruta motho yo mongwe Beibele, re swanetše go mo ruta go tshepa Jehofa le go tshepa bao ba re etelelago pele ka mokgatlong wa gagwe.

² Ke nnete gore ga se barutwana ba Beibele feela bao ba swanetšego go ithuta go tshepa Jehofa le mokgatlo wa gagwe. Le rena bao e lego kgale re hlankela Jehofa ga se ra swanela go lebala gore tsela ya Jehofa ya go dira dilo ke e kaonekaone. Ka dinako tše dingwe go tlo tšwelela maemo ao a ka dirago gore go be thata go tshepa Jehofa. Sehlogong se re tlo ithuta ka maemo a mararo ao a ka lekago tumelo ya rena: (1) Ge re bala dipego tše dingwe tša ka Beibeleng, (2) ge mokgatlo wa Jehofa o re hlahla, (3) le ge re kopana le mathata.

3. Re ka lekega bjang gore re se sa tshepa Jehofa ge re bala dipego tše dingwe tša Beibele?

 ³ Ka dinako tše dingwe ge re bala Beibele re ka ipotšiša gore ke ka baka la eng Jehofa a ile a swara batho ka ditsela  tša go se swane le gore ke ka baka la eng a ile a dira diphetho tše itšego. Ka mohlala ka pukung ya Numeri re bala gore Jehofa o ile a re Moisiraele yo mongwe a bolawe ka ge a be a topelela dikgong ka sabatha. Ka pukung ya Samuele wa Bobedi re ithuta gore mengwaga e mentši ka morago Jehofa o ile a swarela kgoši Dafida ka morago ga go robala le mosadi wa monna yo mongwe le go bolaya monna yoo. (Num. 15:32, 35; 2 Sam. 12:9, 13) Re ka ipotšiša gore ke ka baka la’ng Jehofa a ile a swarela Dafida ka morago ga go robala le mosadi wa monna yo mongwe le go bolaya monna yoo, gomme Jehofa a bolaya monna yo go bonagalago a be a se a dira sebe se segolo gakaalo? Gore re arabe potšišo ye, a re boleleng ka dilo tše tharo tšeo re swanetšego go dula re di gopola ge re bala Beibele.

4. Genesi 18:20, 21 le Doiteronomio 10:17 di re thuša bjang gore re tshepe dikahlolo tša Jehofa?

⁴ Ga se ka mehla Beibele e re botsago ditaba ka botlalo. Ka mohlala re a tseba gore Dafida o be a tloga a itsholela dilo tšeo a di dirilego. (Ps. 51:2-4) Eupša monna yoo a ilego a tshela molao wa Sabatha e be e le motho wa mohuta mang? Na o be a itsholela seo a se dirilego? Na o ile a tshela melao ya Jehofa nakong e fetilego? Na nakong e fetilego o ile a gana ge ba mo eletša? Beibele ga e re botše. Eupša re kgodišegile gore Jehofa ‘o na le toka.’ (Doit. 32:4) Ge a dira diphetho o lebelela ditaba ka moka, ga a lebelele gore batho ba bangwe ba reng goba go kgetholla goba gore batho ba bangwe ba tlo nagana gore ga se a ahlola gabotse. (Bala Genesi 18:20, 21; Doiteronomio 10:17.) Ge re tšwela pele re ithuta ka Jehofa le melao ya gagwe, re tlo tshepa dikahlolo tša gagwe. Le ge re ka ba le dipotšišo ge re bala ka pego ya ka Beibeleng, re tlo tshepa gore Jehofa o “botega ditirong tša gagwe ka moka.”—Ps. 145:17.

5. Go se phethagale go dira gore re sware batho ba bangwe bjang? (Bona lepokisi leo le rego: “ Ka ge re se ra phethagala re ka se dule re kwešiša dilo gabotse.”)

⁵ Ka ge re se ra phethagala re ka se dule re ahlola batho ka toka. Modimo o re bopile re ena le dika tša go swana le tša  gagwe, ka gona re nyaka go bona batho ba swarwa gabotse. (Gen. 1:26) Ka dinako tše dingwe re ka no se ahlole gabotse le ge re nagana gore re tseba ditaba ka moka. Ka mohlala, gopola gore Jona o be a se a thaba ge Jehofa a kgetha go bontšha batho ba Ninife kgaogelo. (Jona 3:10–4:1) Ditlamorago e bile dife? Batho bao ba fetago ba 120,000 bao ba dulago Ninife ba ile ba phološwa. Mafelelong Jona e be e le yena a swanetšego go phošollwa e sego Jehofa.

6. Ke ka baka la’ng go sa hlokagale gore Jehofa a re hlalosetše gore ke ka baka la’ng a dira diphetho tše itšego?

⁶ Ga go hlokagale gore Jehofa a hlalosetše batho gore ke ka baka la eng a dira diphetho tše itšego. Ke nnete gore nakong e fetilego Jehofa o ile a dumelela bahlanka ba gagwe go bolela ka moo ba ikwago ka gona ka diphetho tšeo a di dirilego goba tšeo a tlago go di dira. (Gen. 18:25; Jona 4:2, 3) Ka dinako tše dingwe o be a hlalosa gore ke ka baka la eng a dirile diphetho tše itšego. (Jona 4:10, 11) Eupša ga go hlokagale gore Jehofa a re botše gore ke ka baka la eng a dira diphetho ka tsela ya gagwe. Ka ge e le Mmopi wa rena, ga a hloke tumelelo ya rena pele a dira diphetho.—Jes. 40:13, 14; 55:9.

7. Re ka kopana le bothata bo fe, gona ka baka la’ng?

⁷ Ka moka ga rena re a dumela gore Jehofa o dula a dira dilo tšeo di lokilego. Eupša re ka thatafalelwa ke go tshepa batho bao a ba kgethilego gore ba re etelele pele. Re ka ipotšiša ge e ba batho bao Jehofa a ba kgethilego go re etelela pele ba itšeela diphetho goba ba latela tlhahlo yeo a ba neago yona. Se se ka ba se ile sa nagana ke batho bao ba ilego ba phela mehleng ya Beibele. Nagana ka mehlala yeo re boletšego ka yona go  serapa 3. Motho yo a tswalanego le monna yo a tshetšego molao wa sabatha a ka ba a ile a ipotšiša ge e ba Moshe a ka ba a ile a bolela le Jehofa pele monna yoo a ka ahlolelwa lehu. Mogwera wa Uria wa Mohethe a ka ba a ile a phetha ka gore Dafida o dirišitše boemo bja gagwe bja go ba kgoši go tšhabela kotlo yeo e bego e mo swanetše. Nnete ke gore re ka se re re tshepa Jehofa mola re sa tshepe banna bao a ba kgethilego bao a ba tshepago.

8. Seo se ngwadilwego go Ditiro 16:4, 5 se swana bjang le tsela yeo phuthego ya Bokriste e dirago dilo ka yona lehono?

⁸ Lehono Jehofa o etelela pele mokgatlo wa gagwe wa mo lefaseng a diriša “mohlanka yo a botegago le wa temogo.” (Mat. 24:45) Go swana le sehlopha se bušago sa Bakriste ba mehleng ya pele, lehono mohlanka yo a botegago o hlokomela bahlanka ba Modimo lefaseng ka moka le go hlahla bagolo ka phuthegong. (Bala Ditiro 16:4, 5.) Bagolo ba latela tlhahlo yeo ba e hwetšago. Re bontšha gore re tshepa tsela ya Jehofa ya go dira dilo ka go latela tlhahlo yeo re e hwetšago go mokgatlo le go bagolo.

9. Ke neng mo re ka hwetšago go le thata go latela ditaelo tšeo bagolo ba di dirago, gona ka baka la’ng?

⁹ Ka dinako tše dingwe re ka hwetša go le thata go thekga diphetho tšeo bagolo ba di dirago. Ka mohlala lehono diphuthego tše dingwe le ditikologo di ile tša swanelwa ke go fetošwa. Mafelong a mangwe bagolo ba ile ba swanelwa ke go kgopela bagoeledi gore ba ye diphuthegong tše dingwe moo go se nago bagoeledi ba bantši. Ge e ba re ka kgopelwa go ya phuthegong  e nngwe, na re tlo hwetša go le thata go tlogela ba gabo rena le bagwera ba rena. Na bagolo ba hwetša taelo ya gore ba kgethe bomang ka phuthegong? Aowa. Ka gona se se ka dira gore re thatafalelwe ke go latela ditaelo tšeo ba re neago tšona. Eupša Jehofa o tshepa bagolo ge ba dira diphetho tše, le rena re swanetše go ba tshepa. *

10. Go ya ka Baheberu 13:17, ke ka baka la’ng re swanetše go dirišana le bagolo? (Baheberu 13:17)

¹⁰ Ke ka baka la’ng re swanetše go thekga diphetho tšeo bagolo ba di dirago le ge re sa di kwešiše? Ke ka gobane re thuša gore batho ba Modimo ba dule ba na le khutšo ka phuthegong. (Baef. 4:2, 3) Diphuthego di a atlega ge bagoeledi ba dumelelana le diphetho tšeo bagolo ba di dirago. (Bala Baheberu 13:17.) Sa bohlokwa le go feta, re bontšha Jehofa gore re a mo tshepa ge re dirišana le bao a ba kgethilego gore ba re hlokomele.—Dit. 20:28.

11. Re ka thušwa ke’ng gore re tshepe tlhahlo yeo bagolo ba re neago yona?

¹¹ Re ka tiiša tumelo ya rena ka go tshepa tlhahlo yeo bagolo ba re neago yona ka gobane ba rapelela moya o mokgethwa ge ba ahlola mathata ka phuthegong. Ba lebelela le melao ya motheo ya ka Beibeleng le dikgatišo tšeo di tšwago mokgatlong wa Jehofa. Ba nyaka go thabiša Jehofa le go thuša batho ba gagwe. Banna ba ba botegago ba a tseba gore ba ikarabelela go Jehofa ka tsela yeo ba swarago batho ka yona. (1 Pet. 5:2, 3) Nagana ka se, re phela lefaseng leo le tletšego ka merafo ya go se swane, ditšo tša go se swane le dipolotiki. Eupša bahlanka ba Jehofa ke batee ebile ba rapela Modimo wa therešo. Le gona se se kgonega ka gobane Jehofa a thekga mokgatlo wa gagwe!

12. Bagolo ba swanetše go nagana ka’ng go bona ge e ba motho yo a dirilego sebe a tloga a itshola ka nnete?

¹² Jehofa o neile bagolo boikarabelo bjo bohlokwa bja gore phuthego e dule e hlwekile. Ge e ba Mokriste a dirile sebe se segolo, Jehofa o letetše gore bagolo ba dire phetho ya ge e ba motho yoo a tla dula a le ka phuthegong goba aowa. Le gona bagolo ba swanetše go tseba ge e ba motho yoo a tloga a itsholela seo a se dirilego. Motho yoo a ka bolela gore o a itshola, eupša na ka nnete motho yoo o hloile seo a se dirilego? Na o ikemišeditše go se sa bušeletša sebe seo gape? Ge e ba a dirile sebe ka baka la bagwera ba gagwe, na o ikemišeditše go kgaotša go ba mogwera wa batho bao? Ke moka bagolo ba a rapela ba lebelela gore Beibele e reng, ba lebelela le gore o ikwa bjang ka sebe seo a se dirilego. Ke moka ba dira phetho ya ge e ba motho yoo a swanetše go dula ka phuthegong. Ka dinako tše dingwe a ka kgaolwa.—1 Bakor. 5:11-13.

13. Re ka belaela ka’ng ge e ba motho yo a kgaotšwego e le mogwera wa rena goba wa gabo rena?

¹³ Tsela yeo re tshepago bagolo ka yona e ka lekwa bjang? Ge motho yo a kgaotšwego e se mogwera wa rena go ba wa gabo rena, re ka amogela diphetho tšeo bagolo ba di dirilego. Eupša a re re motho yo a kgaotšwego ke mogwera wa gago. Re ka tshwenyega ka gore bagolo ga se ba lebelela dilo ka moka, goba gore Jehofa o be a ka se ahlole ka tsela yeo bagolo ba ahlotšego ka yona. Ke’ng seo se ka  re thušago gore re be le tekatekano tabeng ye?

14. Re ka thušwa ke’ng ge e ba mogwera wa rena goba yo mongwe wa gabo rena a kgaolwa?

¹⁴ Re swanetše go gopola gore go kgaolwa ke tokišetšo yeo e tšwago go Jehofa le gore go thuša phuthego le motho yo a dirilego sebe. Ge e ba motho yo a sa itsholego yo a dirilego sebe a ka dumelelwa go dula ka phuthegong a ka dira gore batho ba bangwe le bona ba dire sebe. (Bagal. 5:9) Motho yoo a ka no se bone gore o dirile sebe se segolo, e bile a ka palelwa ke go fetoša tsela yeo a dirago dilo le yeo a naganago ka yona gore a tle a be le segwera se sebotse le Jehofa. (Mmo. 8:11) Bagolo ba tšeela boikarabelo bja bona godimo ge ba dira phetho ya ge e ba motho a swanetše go kgaolwa. Ba a tseba gore go swana le baahlodi ba mehleng ya Isiraele, ga ba ahlolele batho ‘eupša ba ahlolela Jehofa.’—2 Dikor. 19:6, 7.

15. Ke ka baka la’ng re swanetše go tshepa tlhahlo ya Jehofa gona bjale go feta le ge e le neng pele?

¹⁵ Ka ge bofelo bo le kgauswi re swanetše go tshepa Jehofa go feta le ge e le neng pele. Ka baka la’ng? Nakong ya masetlapelo a magolo, re ka newa ditaelo tšeo go ka bonagalago di le thata gore re di kwešiše goba re di dire. Ke nnete gore Jehofa a ka se tle a bolela le rena ka go lebanya. A ka re nea ditaelo a diriša batho bao a ba kgethilego. Ka nako yeo ga se ra swanela go belaela tlhahlo yeo re e hwetšago, ra ipotšiša ge e ba e e tšwa go Jehofa. Na o tlo tshepa Jehofa le mokgatlo wa gagwe ka nako yeo? Karabo ya gago e tlo ithekga ka gore o lebelela bjang tlhahlo yeo Modimo a re neago yona a diriša banna bao a ba kgethilego gona bjale. Ge e ba o tshepa tlhahlo yeo re e hwetšago gona bjale, o ka tla wa kgona go latela tlhahlo yeo re tlago go e hwetša nakong ya masetlapelo a magolo.—Luka 16:10.

16. Tsela yeo re tshepago ditaelo tša Jehofa ka yona gona bjale e tlo lekwa bjang?

¹⁶ Re swanetše go nagana gape gore re tlo ikwa bjang ka diphetho tšeo Jehofa a tlago go di tšea mafelelong a tshepedišo ye ya dilo. Gona bjale re swanetše go holofela gore bao e sego dihlatse tša Jehofa go akaretša le ba gabo rena ba tlo kgetha go mo hlankela pele bofelo bo fihla. Eupša ka Haramagedone Jehofa o tlo diriša Jesu go tšea phetho ya mafelelo ya gore ke mang a tlago go phologa. (Mat. 25:31-33; 2 Bathes. 1:7-9) Ga se rena re tlago go kgetha gore ke mang Jehofa a  tlago go mo phološa goba a ka se mo phološego. (Mat. 25:34, 41, 46) Na re tlo kgona go thekga diphetho tša Jehofa goba na re ka se di thekge? Re swanetše go tshepa Jehofa gona bjale gore re tle re kgone go mo tshepa ka mo go feletšego nakong e tlago.

17. Diphetho tšeo Jehofa a di dirago di tlo re hola bjang mafelelong a tshepedišo ye ya dilo?

¹⁷ Nagana gore re tlo ikwa bjang lefaseng le lefsa ge re bona seo se diregago ka baka la diphetho tšeo Jehofa a di dirilego. Bodumedi bja maaka, mebušo le dikgwebo tšeo di inyakelago tšhelete tšeo di ilego tša tlaiša batho ka nako e telele di tla be di fedišitšwe. Malwetši, botšofadi le lehu di tla be di se sa le gona. Sathane le batemona ba gagwe ba tlo golegwa ka mengwaga e sekete. Dilo tše mpe tšeo di diregilego ka baka la Sathane di tla be di se sa le gona. (Kut. 20:2, 3) Re tlo leboga kudu gore re ile ra tshepa tsela ya Jehofa ya go dira dilo!

18. Re ka ithuta’ng mohlaleng wa Baisiraele wo o lego go Numeri 11:4-6 le 21:5?

¹⁸ Na lefaseng le lefsa go tlo ba le dilo tšeo di ka dirago gore re se sa tshepa tsela ya Jehofa ya go dira dilo? Nagana ka seo se ilego sa direga ka morago ga gore Baisiraele ba tšwe Egipita mo e bego e le makgoba. Ba bangwe ba ile ba thoma go belaela ka ge ba be ba gopotše dijo tše dibose tšeo ba bego ba dija moo, ba thoma go nyatša tokišetšo ya Jehofa ya manna. (Bala Numeri 11:4-6; 21:5.) Na re tlo nagana go swana le bona ka morago ga masetlapelo a magolo? Ga re tsebe gore go tlo ba le mošomo o mo kaakang wa go tloša dilo tšeo di bakilwego ke Sathane le go dira lefase le gore e be paradeise. Eupša mathomong go bonagala go tlo ba le mošomo o montši. Na re tlo belaela ka gore Jehofa o re nea eng ka nako yeo? Re swanetše go kgodišega gore: Ge re leboga tsela ya Jehofa ya go dira dilo gona bjale, re tlo e leboga le go feta nakong e tlago.

19. O ka akaretša bjang dintlha tše bohlokwa sehlogong se?

¹⁹ Tsela ya Jehofa ya go dira dilo e di phala ka moka, re swanetše go kgodišega ka seo. Re swanetše go tshepa le batho bao Jehofa a ba kgethilego gore ba re nee ditaelo. Ga se ra swanela go lebala mantšu ao Jehofa a a boletšego ka moporofeta Jesaya ao a rego: “Le tla ba le matla ge le dula le sa tshwenyege gomme le botega.”—Jes. 30:15.