1, 2. (a) Re tseba bjang gore batho ba ka gwerana le Modimo? (b) Re tlo ahlaahla’ng sehlogong se?

GO TLOGA nakong ya ge re belegwa go ba go fihla nakong ya ge re ehwa, re nyaka go ratwa. Batho ba nyaka segwera sa kgauswi le se lerato, e sego feela lerato la magareng ga baratani. Eupša go feta tšohle, re nyaka go ratwa ke Jehofa. Batho ba bantši ga ba dumele gore re ka kgona go ba le segwera sa kgauswi le se lerato le Modimo ka gobane re sa mmone e bile e le Ramatlaohle. Eupša rena re tseba therešo!

² Re ithutile ka Beibeleng gore batho ba ile ba kgona go gwerana le Modimo. Re swanetše go ithuta mehlaleng ya bona. Ka baka la’ng? Ka gobane go gwerana le Modimo ke selo sa bohlokwa kudu seo re ka bago le sona bophelong. Ka gona anke re ithuteng ka mohlala wa Aborahama. (Bala Jakobo 2:23.) Go tlile bjang gore e be mogwera wa Modimo? Segwera sa kgauswi sa Aborahama le Modimo se be se theilwe tumelong, le gona  Aborahama o tsebja e le “tatago bohle bao ba nago le tumelo.” (Baroma 4:11) Ge o dutše o ithuta ka mohlala wa gagwe, ipotšiše gore: ‘Nka ekiša bjang tumelo ya Aborahama le go tiiša segwera sa ka le Jehofa?’

3, 4. (a) Hlalosa seo e ka bago e bile teko e kgolo ya tumelo ya Aborahama. (b) Ke ka baka la’ng Aborahama a ile a ikemišetša go dira sehlabelo ka Isaka?

³ Nagana ka Aborahama a na le nywaga e ka bago e 125 a rotoga thaba ka go nanya. ^[1] (Bona tlhaloso.) O šetšwe morago ke morwa wa gagwe e lego Isaka, yo a bego a na le nywaga e ka bago e 25. Isaka o rwele dikgong gomme Aborahama o swere thipa le dilo tša go gotša mollo. Go ka direga gore le e bile leeto le thata kudu bophelong bja Aborahama. Eupša ga se gore le bile thata ka baka la gore a be a tšofetše. O be a sa na le matla. Leeto leo e bile le thata ka gobane Jehofa o be a mo kgopetše gore a dire sehlabelo ka morwa wa gagwe!—Genesi 22:1-8.

⁴ Se e swanetše go ba e bile teko e kgolo kudu ya tumelo ya Aborahama. Batho ba bangwe ba re Modimo o be a le sehlogo ka go kgopela Aborahama gore a dire sehlabelo ka morwa wa gagwe. Ba bangwe ba re Aborahama o be a ikemišeditše go dira seo ka ge a be a sa rate morwa wa gagwe. Batho ba bolela dilo tše bjalo ka gobane ga ba na tumelo e bile ga ba tsebe gore tumelo ya kgonthe ke eng goba gore e šoma bjang. (1 Bakorinthe 2:14-16) Eupša Aborahama ga se a fo latela seo Modimo a bego a mo laela gore a se dire, ke gore, go dira seo ntle le go nagana. O ile a kwa Modimo ka gobane o be a na le tumelo ya kgonthe. O be a tseba gore Jehofa a ka se tsoge a mo kgopetše go dira selo seo se ka mo kwešago bohloko sa ruri. Aborahama o be a tseba gore ge a ka theetša, Jehofa o be a tla šegofatša yena le morwa wa gagwe yo a rategago. Ke’ng seo Aborahama a bego a swanetše go ba le sona e le gore a be le tumelo e tiilego gakaakaa? O be a swanetše go ba le tsebo le phihlelo.

5. Ke’ng seo se ka bago se dirile gore Aborahama a tsebe Jehofa, gona seo se ile sa mo dira gore a ikwe bjang ka Jehofa?

⁵ Tsebo. Aborahama o goletše motseng wa Uri. Batho ba moo ba be ba rapela medimo ya  maaka, gaešita le tatagwe o be a e rapela. (Joshua 24:2) Bjale go tlile bjang gore Aborahama a tsebe ka Jehofa? Beibele e bontšha gore morwa wa Noa e lego Sheme o be a tswalana le Aborahama. Sheme o ile a phela go fihlela Aborahama a eba le nywaga e ka bago e 150. Sheme o be a na le tumelo e tiilego, e bile go ka direga gore o ile a botša ba leloko labo ka Jehofa. Ga re tsebe ditaba ka botlalo, eupša go ka direga gore ye ke tsela yeo Aborahama a tsebilego Jehofa ka yona. Seo Aborahama a ilego a ithuta sona se ile sa dira gore a rate Jehofa, gomme sa mo thuša go aga tumelo ya gagwe.

6, 7. Dilo tšeo di diragetšego bophelong bja Aborahama di tiišitše bjang tumelo ya gagwe?

⁶ Phihlelo. Go tlile bjang gore Aborahama a be le phihlelo yeo e matlafaditšego tumelo ya gagwe go Jehofa? Ba bangwe ba re seo a bego a se nagana se ile sa dira gore a ikwe ka tsela e itšego gomme tsela yeo a bego a ikwa ka yona ya mo tutueletša go tšea kgato. Seo Aborahama a ilego a ithuta sona ka Modimo se ile sa mo kgoma pelo, gomme sa mo dira gore a hlomphe Jehofa ka mo go tseneletšego, yena ‘Modimo Yo Godimodimo, Modiri wa legodimo le lefase.’ (Genesi 14:22) Beibele e bitša tlhompho e bjalo e tseneletšego gore ke go “boifa Modimo.” (Baheberu 5:7) E le gore re be le segwera sa kgauswi le Modimo, re swanetše go boifa Modimo. (Psalme 25:14) Seka se ke sona se tutueleditšego Aborahama gore a kwe Jehofa.

⁷ Modimo o ile a laela Aborahama le Sara gore ba tloge legaeng la bona kua Uri gomme ba hudugele nageng e šele. Ba be ba šetše ba tšofetše, gomme ba be ba swanetše go yo dula ditenteng bophelo bja bona ka moka. Le ge Aborahama a be a tseba gore ba tlo lebeletšana le dikotsi tše dintši, o be a ikemišeditše go kwa Jehofa. Ka baka la go kwa ga gagwe, Modimo o ile a mo šegofatša le go mo šireletša. Ka mohlala, ge mosadi yo mobotse wa Aborahama e lego Sara a be a tšerwe ke Abimeleke, gomme Aborahama a le kotsing ya go bolawa, ka mohlolo Jehofa o ile a šireletša Aborahama le Sara ka makga a mmalwa. (Genesi 12:10-20; 20:2-7, 10-12, 17, 18) Diphihlelo tšeo di ile tša tiiša tumelo ya Aborahama.

8. Re ka hwetša bjang tsebo le phihlelo tšeo di ka tiišago segwera sa rena le Jehofa?

⁸ Na go a kgonega gore re be le segwera sa kgauswi le Jehofa? Ee, go a kgonega! Go swana le Aborahama, re swanetše go ithuta ka Jehofa. Le rena re ka ba le tsebo yeo re e hlokago le phihlelo. Lehono, re na le dilo tše dintši tšeo di ka matlafatšago tumelo ya rena go feta Aborahama. (Daniele 12:4; Baroma 11:33) Beibele e re ruta dilo tše dintši ka  “Modiri wa legodimo le lefase.” Seo re ithutago sona se dira gore re rate Jehofa le go re thuša go mo hlompha ka mo go tseneletšego. Go mo rata moo le go mo hlompha go re tutueletša go mo kwa. Ge re mo kwa, re bona kamoo a re šireletšago le go re šegofatša, gomme seo se re nea phihlelo yeo e matlafatšago tumelo ya rena. Ge re hlankela Jehofa ka mo go feletšego, re tla ba le kgotsofalo, khutšo le lethabo. (Psalme 34:8; Diema 10:22) Ge re tšwela pele re eba le tsebo le phihlelo, segwera sa rena le yena se tla tia.

9, 10. (a) Ke’ng seo se nyakegago gore segwera se tie? (b) Ke’ng seo se bontšhago gore Aborahama o ile a tšeela godimo segwera sa gagwe le Jehofa le go se tiiša?

⁹ Segwera sa kgonthe se ka swantšhwa le lehumo le bohlokwa kudu. (Bala Diema 17:17.) Ga se swane le sebjana sa go tura seo se kgabišitšego feela. Segwera sa kgonthe se swana le letšoba le lebotse leo le nyakago go nošetšwa le go hlokomelwa gore le gole gabotse. Aborahama o ile a tšeela segwera sa gagwe le Jehofa godimo gomme a se kgomarela. O ile a dira seo bjang?

¹⁰ Aborahama o ile a tšwela pele a boifa Modimo le go mo kwa. Ka mohlala, ge a be a le leetong la go ya Kanana a na le lapa la gagwe le bahlanka ba gagwe, o ile a tšwela pele a dumelela Jehofa gore a mo hlahle diphethong tše dinyenyane le tše dikgolo tšeo a bego a di dira. Ngwaga pele Isaka a ka belegwa, ge Aborahama a be a na le nywaga e 99, Jehofa o ile a mmotša gore a bolotše banna ka moka ba ntlong ya gagwe. Na Aborahama o ile a belaela seo Jehofa a bego a mmotša sona goba a leka go ipha mabaka a go se dire seo a bego a laetšwe go se dira? Aowa, o ile a bota Jehofa le go mo kwa “ka lona letšatši leo.”—Genesi 17:10-14, 23.

11. Ke ka baka la’ng Aborahama a be a tshwenyegile ka Sodoma le Gomora, gona Jehofa o ile a mo thuša bjang?

¹¹ Ka ge Aborahama a ile a dula a ekwa Jehofa le dilong tše dinyenyane, segwera sa bona se ile sa tia. O be a ikwa gore a ka bolela le Jehofa ka selo se sengwe le se sengwe, gaešita le go mo kgopela thušo ge a be a sa kwešiše dilo tše itšego. Ka mohlala, ge Jehofa a be a re o tlo fediša metse ya Sodoma le Gomora, Aborahama o ile a tshwenyega. Ka baka la’ng? O be a tshwentšwe ke gore batho bao ba lokilego ba tlo bolawa le bao ba sa lokago. Go ka direga gore o be a tshwenyegile ka morwa wa ngwanabo e lego Lota le lapa la gagwe, bao ba bego ba dula Sodoma. Aborahama o ile a bota Jehofa, yena “Moahlodi wa lefase ka moka,” gomme ka boikokobetšo a botša Jehofa dilo tšeo di mo tshwenyago. Jehofa ga se a ka a felela mogwera yo wa gagwe pelo e bile o ile a mmontšha gore O a gaugela. Jehofa o ile a hlalosetša Aborahama gore le ge a tliša kotlo, o tsoma bao ba lokilego gomme a ba phološa.—Genesi 18:22-33.

12, 13. (a) Tsebo le phihlelo di ile tša thuša Aborahama bjang ka morago? (b) Ke’ng seo se bontšhago gore Aborahama o be a bota Jehofa?

 ¹² Go molaleng gore tsebo yeo Aborahama a bego a na le yona le phihlelo di ile tša mo thuša go boloka segwera sa gagwe le Jehofa se tiile. Ke moka ka morago ge Jehofa a be a kgopela Aborahama gore a dire sehlabelo ka morwa wa gagwe, Aborahama o be a tseba gore Jehofa ka mehla ga a felele batho pelo, o a gaugela, o a botega e bile o a šireletša. Aborahama o be a tloga a kgodišegile gore Jehofa ga se a fetoga a ba yo sehlogo goba yo bogale! Ke ka baka la’ng re re’alo?

¹³ Pele Aborahama a ka tlogela bahlokomedi ba gagwe, o itše: “Lena šalang mo le pokolo ye, eupša nna le mošemane yo re nyaka go ya kua pejana go yo rapela, gomme re tla boa go lena.” (Genesi 22:5) Aborahama o be a era go re’ng? Na o be a bolela maaka ge a be a re o tla boa le Isaka, mola a be a tseba gore o yo dira sehlabelo ka yena? Aowa. Beibele e bolela gore Aborahama o be a tseba gore Jehofa o be a ka kgona go tsoša Isaka bahung. (Bala Baheberu 11:19.) Aborahama o be a tseba gore Jehofa o be a mo file matla a go ba le morwa gaešita le ge yena le Sara ba be ba tšofetše kudu. (Baheberu 11:11, 12, 18) Ka gona o be a tseba gore ga go na selo seo se ka palelago Jehofa. Aborahama o be a sa tsebe seo se bego se tlo direga letšatšing leo. Eupša o be a na le tumelo ya gore ge e ba go hlokagala, Jehofa o be a tla tsoša morwa wa gagwe e le gore dikholofetšo tša Modimo ka moka di phethagale. Ke ka baka leo Aborahama a bitšwago “tatago bohle bao ba nago le tumelo.”

14. Ke ditlhohlo dife tšeo o lebeletšanego le tšona ge o dutše o hlankela Jehofa, gona mohlala wa Aborahama o ka go thuša bjang?

¹⁴ Eupša lehono Jehofa ga a re kgopele gore re dire dihlabelo ka bana ba rena, go e na le moo o re kgopela gore re kwe ditaelo tša gagwe. Ka dinako tše dingwe re ka no se kwešiše lebaka leo ditaelo tšeo di newago ka lona goba ra hwetša go le thata go di latela. Na o fela o ikwa ka tsela yeo? Go ba bangwe, go ya tšhemong ke bothata. Mohlomongwe ba na le dihlong gomme ba hwetša go le thata go bolela le batho bao ba sa ba tsebego. Ba bangwe ba tšhaba go ba bao ba fapanego le ba bangwe ge ba le sekolong goba mošomong. (Ekisodo 23:2; 1 Bathesalonika 2:2) Ge o kgopelwa go dira selo se itšego se thata, nagana ka mohlala o kgahlišago wa Aborahama wa go ba le tumelo le sebete. Ge re naganišiša ka mehlala ya banna le basadi ba botegago, e ka re tutueletša go ba ekiša le go batamela kgauswi le Mogwera wa rena, Jehofa.—Baheberu 12:1, 2.

15. Ke ka baka la’ng re ka kgodišega gore Aborahama ga se a ka a itsholela go botegela Jehofa?

¹⁵ Na Aborahama o ile a itsholela go kwa ditaelo tša Jehofa? Beibele e re Aborahama o “[hwile] a tšofetše, e le mokgalabje e bile a khoše bophelo.” (Genesi 25:8) Ge a be a na  le nywaga e 175, Aborahama o be a ka nagana ka bophelo bja gagwe bjo botelele gomme a ikwa a kgotsofetše. Ka baka la’ng? Ka gobane ka mehla segwera sa gagwe le Jehofa e be e le selo sa bohlokwa kudu go yena. Lega go le bjalo, taba ya gore Aborahama e be “e le mokgalabje e bile a khoše bophelo,” ga e re gore o be a se sa nyaka go tlo phela nakong e tlago.

16. Ke dilo dife tšeo Aborahama a tlo di thabelago Paradeiseng?

¹⁶ Beibele e re Aborahama “o be a letetše motse wo o nago le metheo ya kgonthe, woo mohlami le moagi wa wona e lego Modimo.” (Baheberu 11:10) Aborahama o be a dumela gore ka letšatši le lengwe o be a tla bona motse woo, e lego Mmušo wa Modimo, o buša godimo ga lefase. Ruri o tla o bona! Nagana kamoo Aborahama a tla thabago ka gona ge a tla be a phela lefaseng la paradeise le go tšwela pele a tiiša segwera sa gagwe le Modimo. O tla thabela go tseba gore mohlala wa gagwe wa tumelo o thušitše bahlanka ba Modimo ka nywaga e dikete! Ge a le Paradeiseng, o tla tseba gore sehlabelo seo a bego a laetšwe go se dira Thabeng ya Moria se be se swantšhetša selo se itšego se segolo kudu. (Baheberu 11:19) Le gona o tla ithuta kamoo bohloko bjo a bego a bo kwa ge a be a itokišeletša go dira sehlabelo ka morwa wa gagwe Isaka, bo thušitšego batho bao ba botegago ba dimilione go kwešiša bohloko bjo Jehofa a bo kwelego ge a be a neela ka morwa wa gagwe Jesu Kriste go ba topollo ya batho ka moka. (Johane 3:16) Mohlala wa Aborahama o re thušitše go tšeela topollo godimo kudu, e lego pontšho e kgolo kudu ya lerato la Modimo!

17. O ikemišeditše go dira’ng, gona re tlo ahlaahla’ng sehlogong se se latelago?

¹⁷ Eka ka moka ga rena re ka ikemišetša go ekiša tumelo ya Aborahama. Go swana le yena, re swanetše go ba le tsebo le phihlelo. Ge re tšwela pele re ithuta ka Jehofa le go mo kwa, re tla bona kamoo a re šegofatšago ka gona le go re šireletša. (Bala Baheberu 6:10-12.) Eka Jehofa e ka ba Mogwera wa rena ka mo go sa felego! Sehlogong se se latelago, re tlo ahlaahla mehlala e mengwe e meraro ya batho ba botegago bao e bilego bagwera ba kgauswi ba Modimo.