1, 2. Dafida o ile a bontšha bjang gore o botegela Modimo? (Bona seswantšho se se lego ka mo godimo.)

SAULO le mašole a gagwe a 3 000 ba be ba tsoma Dafida lešokeng la Juda gore ba mmolaye. Eupša bošegong bjo bongwe, Dafida le banna ba gagwe ba ile ba hwetša lefelo leo Saulo le mašole a gagwe ba bego ba hlomile mešaša go lona. Ka moka ga bona ba be ba ile ka boroko, ka gona Dafida le Abishai ba feta gare ga mašole ao ka moka ka setu gomme ba hwetša Saulo. Abishai o ile a sebela Dafida a re: “Ntumelele ke mo hlabe ka lerumo le le phuleletše le tsene fase, ke mo hlabe gatee fela, e sego gabedi.” Eupša Dafida ga se a ka a dumelela Abishai a bolaya Saulo. O ile a re go yena: “O se ke wa mmolaya, gobane ke mang yo a kilego a otla motlotšwa wa Jehofa gomme a se be le molato?” Ke moka Dafida a re: “Jehofa a ka se ntumelele gore ke otle motlotšwa wa Jehofa!”—1 Samuele 26:8-12.

 ² Dafida o be a kwešiša seo a bego a swanetše go se dira gore a botegele Jehofa. O be a tseba gore o swanetše go hlompha Saulo, e bile ga se a ka a nagana le ka go mo gobatša. Ka baka la’ng? Ka gobane Modimo o be a kgethile Saulo gore e be kgoši ya Isiraele. Go swana le mehleng e fetilego, le lehono Jehofa o nyaka gore bahlanka ba gagwe ka moka ba mmotegele le go hlompha bao a ba dumeletšego go re laola.—Bala Mika 6:8.

3. Abishai o ile a botegela Dafida bjang?

³ Abishai o be a hlompha Dafida ka gobane o be a tseba gore Modimo o mo kgethile gore e tle e be kgoši. Eupša ka morago ga gore Dafida e be kgoši, o ile a dira dibe tše dikgolo. O ile a robala le mosadi wa Uria ke moka a botša Joaba gore a kgonthišetše gore Uria o bolawa ntweng. (2 Samuele 11:2-4, 14, 15; 1 Dikoronika 2:16) Joaba e be e le ngwanabo Abishai, ka gona go ka direga gore Abishai o ile a kwa ka seo Dafida a se dirilego, eupša o ile a tšwela pele a hlompha Dafida. Go oketša moo, Abishai e be e le molaodi wa madira, ka gona nkabe a ile a diriša matla ao go itira kgoši, eupša ga se a ka a dira bjalo. Go e na le moo, o ile a hlankela Dafida le go mo šireletša manabeng a gagwe.—2 Samuele 10:10; 20:6; 21:15-17.

4. (a) Dafida o re beetše mohlala ofe wa go botegela Modimo? (b) Ke mehlala efe e mengwe yeo re tlago go e ahlaahla?

⁴ Dafida o ile a botegela Jehofa bophelong bja gagwe ka moka. Ge e be e sa le yo monyenyane, o ile a bolaya senatla se se bitšwago Goliata, seo se bego se roga Jehofa le Baisiraele. (1 Samuele 17:23, 26, 48-51) Ge Dafida e be e le kgoši, moporofeta wa Jehofa e lego Nathane o ile a swanelwa ke go mo phošolla ka baka la dibe tšeo a di dirilego. Gateetee Dafida o ile a amogela sebe sa gagwe gomme a itshola. (2 Samuele 12:1-5, 13) Ka morago ge a šetše a tšofetše, o ile a ntšha moneelo o mogolo gore go agiwe tempele ya Jehofa. (1 Dikoronika 29:1-5) Go molaleng gore le ge Dafida a ile a dira dibe tše dikgolo bophelong bja gagwe, ga se a ka a tlogela go botegela Modimo. (Psalme 51:4, 10; 86:2) Sehlogong se, re tlo ahlaahla mohlala wa Dafida le wa batho ba bangwe ba mehleng ya gagwe gomme ra ithuta kamoo re ka botegelago Jehofa, e sego motho le ge e le ofe. Le gona re tlo ithuta ka dika tše dingwe tšeo di tlago go re thuša go dira seo.

5. Re ithuta’ng phošong ya Abishai?

⁵ Ge Abishai a be a nyaka go bolaya Saulo, o be a re o botegela Dafida. Eupša ka ge Dafida a be a tseba gore go fošagetše go gobatša “motlotšwa wa Jehofa,” ga se a ka a dumelela Abishai a bolaya kgoši Saulo. (1 Samuele 26:8-11) Se se re ruta thuto ya bohlokwa ya gore ge re nyaka go tseba yo re swanetšego go mmotegela, re swanetše go nagana ka melao ya motheo ya Beibele yeo e ka re thušago boemong bjo re tla bego re le go bjona.

6. Le ge e le ga tlhago go botegela ditho tša lapa goba bagwera, ke ka baka la’ng re swanetše go itlhokomela tabeng yeo?

⁶ Ke ga tlhago go botegela motho yo re mo ratago, go swana le mogwera wa rena goba setho sa lapa. Eupša ka ge re sa phethagala,  maikwelo a rena a ka re lahletša. (Jeremia 17:9) Ka gona ge motho yo re mo ratago a ka dira sebe gomme a tlogela therešo, re swanetše go gopola gore go botegela Jehofa go bohlokwa kudu go feta go botegela motho.—Bala Mateo 22:37.

7. Kgaetšedi yo mongwe o ile a dula a botegela Modimo bjang boemong bjo thata?

⁷ Ge e ba yo mongwe ka lapeng la geno a kgaotšwe ka phuthegong, o ka bontšha Jehofa gore o A mmotegela. Ka mohlala, ka letšatši le lengwe mmago Anne, yo a bego a kgaotšwe, o ile a founela Anne gomme a mmotša gore o nyaka go mo etela. ^[1] (Bona tlhaloso.) Mmago Anne o ile a mmotša gore ga se a thaba ka gobane lapa la gagwe ga le nyake go mmolediša. Se se ile sa nyamiša Anne, gomme a botša mmagwe gore o tla mo araba ka lengwalo. Pele ga ge Anne a ka ngwala lengwalo leo, o ile a naganišiša ka melao e itšego ya motheo ya Beibele. (1 Bakorinthe 5:11; 2 Johane 9-11) Ke moka ka lengwalong leo, o ile a hlalosetša mmagwe ka botho gore ke yena a tlogetšego lapa ge a be a dira sebe gomme a gana go itshola. Anne o ile a botša mmagwe gore tsela e nnoši ya gore a boele a thabe ke ge a ka boela go Jehofa.—Jakobo 4:8.

8. Ke dika dife tšeo di tlago go re thuša go botegela Modimo?

⁸ Mehleng ya Dafida, bahlanka ba botegago ba Modimo ba be ba bile ba ikokobeditše, ba le botho e bile ba na le sebete. Anke re boneng kamoo dika tše di ka re thušago go botegela Jehofa.

9. Ke ka baka la’ng Abenere a ile a leka go bolaya Dafida?

⁹ Jonathane morwa wa Saulo le Abenere molaodi wa madira a Isiraele ba ile ba bona Dafida ge a be a tliša hlogo ya Goliata go Kgoši Saulo. Jonathane e ile ya ba mogwera wa Dafida gomme a dula a mmotegela. (1 Samuele 17:57–18:3) Eupša Abenere ga se a ka a dira bjalo. Ge e le gabotse, ka morago o ile a ba a thuša Saulo, yo a bego a nyaka go bolaya Dafida. (1 Samuele 26:1-5; Psalme 54:3) Jonathane le Abenere ba be ba tseba gore Modimo o be a nyaka gore Dafida e be kgoši e latelago ya Isiraele. Eupša ka morago ga gore Saulo a hwe, Abenere ga se a ka a thekga Dafida. Go e na le moo, o ile a leka go dira  gore morwa wa Saulo e lego Ishi-boshethe e be kgoši. Ka morago, Abenere a ka ba a ile a nyaka go itira kgoši, mohlomongwe ke ka baka leo a ilego a robala le yo mongwe wa basadi ba Kgoši Saulo. (2 Samuele 2:8-10; 3:6-11) Ke ka baka la’ng Jonathane le Abenere ba be ba sa sware Dafida ka go swana? Lebaka ke gore Jonathane o be a botegela Jehofa e bile a ikokobeditše, eupša go be go se bjalo ka Abenere.

10. Ke ka baka la’ng Abesalomo a be a sa botegele Modimo?

¹⁰ Morwa wa Kgoši Dafida e lego Abesalomo o be a sa botegele Modimo ka gobane o be a se na boikokobetšo. O be a nyaka go ba kgoši, ka gona o ile “a itirela koloi, a ba le dipere le banna ba masomehlano bao ba bego ba kitima pele ga gagwe.” (2 Samuele 15:1) Le gona o ile a kgodiša Baisiraele ba bantši gore ba mo thekge. O ile a ba a leka go bolaya tatagwe, gaešita le ge a be a tseba gore Jehofa ke yena a kgethilego Dafida gore e be kgoši ya Isiraele.—2 Samuele 15:13, 14; 17:1-4.

11. Re ka holwa bjang ke dipego tša ka Beibeleng tša mabapi le Abenere, Abesalomo le Baruke?

¹¹ Ge motho a se na boikokobetšo e bile a nyaka maemo, go thata gore a dule a botegela Modimo. Ke therešo gore re rata Jehofa, e bile ga re nyake go ba le boithati le dipelo tše mpe go swana le Abenere le Abesalomo. Eupša re swanetše go itlhokomela gore ga re thome go kganyoga go ba le tšhelete e ntši goba mošomo wo o dirago gore re ikwe re le ba bohlokwa go feta batho ba bangwe. Seo se tla senya tswalano ya rena le Jehofa. Ka nako e itšego, mongwaledi wa Jeremia e lego Baruke, o ile a nyaka selo seo a bego a se na sona, gomme a se sa thabela go hlankela Modimo. Ke moka Jehofa o ile a re go Baruke: “Tseba gore seo ke se agilego, ke a se phušola gomme seo ke se bjetšego, ke a se tumola nageng ka moka. Eupša ge e le wena, o duletše go itsomela dilo tše dikgolo. O se ke wa di tsoma.” (Jeremia 45:4, 5) Baruke o ile a kwa Jehofa. Le rena re swanetše go mo kwa, ka gobane kgauswinyane o tlo fediša lefase le le kgopo.

12. Bontšha kamoo re ka se kgonego go botegela Modimo ge re na le boithati.

¹² Ngwanabo rena Daniel wa kua Mexico, o ile a swanelwa ke go dira phetho ya gore o tla botegela mang. O be a nyaka go nyala kgarebe  e nngwe ya lefase. Daniel o re: “Ke ile ka tšwela pele ke ngwalelana le yona mangwalo le ka morago ga gore ke tšee bobulamadibogo.” Eupša Daniel o ile a lemoga gore o be a dira seo se ratwago ke pelo ya gagwe ka boithati. O be a sa botegele Jehofa, ka gona o be a swanetše go ikokobetša. Ka go re’alo o ile a botša mogolo yo a nago le phihlelo ka kgarebe yeo. Daniel o re: “Mogolo yoo o ile a nthuša go bona gore ge e ba ke nyaka go botegela Modimo, ke swanetše go kgaogana le kgarebe yeo. Ka morago ga go rapela gantši le go lla, ke ile ka dira sona seo. Go se go ye kae, ke ile ka thoma go thaba kudu bodireding.” Gona bjale Daniel o nyetše mosadi yo a ratago Jehofa gomme o hlankela e le molebeledi wa tikologo.

13. Nathane o ile a dula a botegela Modimo le Dafida bjang ge Dafida a be a dirile sebe?

¹³ Ge re botegela Jehofa, re ka kgona le go botegela ba bangwe le go ba thuša ka mo re ka kgonago. Moporofeta Nathane o ile a dula a botegela Jehofa le go botegela Dafida. Ka morago ga gore Dafida a iphe mosadi wa monna yo mongwe le go bolaya monna yoo, Jehofa o ile a romela Nathane gore a yo mo laya. Nathane o ile a bontšha sebete gomme a kwa Jehofa. Eupša gape o ile a dira dilo ka bohlale le go bolela le Dafida ka botho. O be a nyaka go thuša Dafida go kwešiša bogolo bja dibe tšeo a di dirilego. Ka gona o ile a mo anegela ka monna yo a itšego wa mohumi yo a ilego a utswa kwana ya mathomo le ya mafelelo ya modiidi. Ge Dafida a ekwa seo, o ile a galefišwa o šoro ke seo monna yoo wa mohumi a se dirilego. Ke moka Nathane a re: “Monna yoo ke wena!” Dafida o ile a lemoga gore o senyeditše Jehofa.—2 Samuele 12:1-7, 13.

14. O ka botegela bjang Jehofa, bagwera le ba leloko?

¹⁴ Le wena o ka botegela Jehofa pele gomme ka morago wa botegela ba bangwe ka go ba bontšha botho. Ka mohlala, o ka ba o na le bohlatse bja gore ngwanabo rena yo a itšego o dirile sebe se segolo. O ka ba o nyaka go botegela ngwanabo rena yoo, kudukudu ge e ba e le mogwera wa gago yo mogolo goba setho sa lapa. Eupša o bile o a tseba gore yo re swanetšego go mmotegela pele ke Jehofa. Ka gona go swana le Nathane, ekwa Jehofa eupša o bontšhe ngwaneno botho. Mmotše gore a kgopele thušo go bagolo le gore a ye go bona kapelapela. Ge e ba a sa dire bjalo, gona wena o swanetše go ba botša. Ge o dira bjalo, o botegela Jehofa. Ka nako e swanago, o bontšha ngwaneno botho ka gobane bagolo ba ka mo thuša gore a boele a be le tswalano e botse le Jehofa. Ba tla mo phošolla ka boleta le ka lerato.—Bala Lefitiko 5:1; Bagalatia 6:1.

15, 16. Ke ka baka la’ng Hushai a be a swanetše go ba le sebete gore a botegele Modimo?

¹⁵ Hushai e be e le yo mongwe wa bagwera ba ba botegago ba Kgoši Dafida. Ge setšhaba se be se nyaka go dira Abesalomo kgoši,  Hushai o be a swanetše go ba le sebete gore a dule a botegela Dafida le Modimo. O be a tseba gore Abesalomo o tlile Jerusalema le madira a gagwe le gore Dafida o be a tšhabile. (2 Samuele 15:13; 16:15) Eupša Hushai o ile a dira’ng? Na o ile a hlanogela Dafida gomme a thekga Abesalomo? Aowa. Gaešita le ge Dafida a be a tšofetše gomme batho ba bantši ba nyaka go mmolaya, Hushai o ile a dula a mmotegela ka gobane Jehofa o be a mo kgethile gore e be kgoši. Ka gona Hushai o ile a ya Thabeng ya Mehlware go yo gahlanetša Dafida.—2 Samuele 15:30, 32.

¹⁶ Dafida o ile a kgopela Hushai gore a boele Jerusalema gomme a itire mogwera wa Abesalomo e le gore a kgone go kgodiša Abesalomo gore a theetše keletšo ya gagwe go e na le go theetša ya Ahithofele. Hushai o ile a bontšha sebete gomme a ipea kotsing ka go theetša Dafida le go dula a botegela Jehofa. Dafida o ile a rapela Jehofa gore a thuše Hushai, gomme gwa direga sona seo. Abesalomo o ile a theetša keletšo ya Hushai go e na le go theetša ya Ahithofele.—2 Samuele 15:31; 17:14.

17. Ke ka baka la’ng re swanetše go ba le sebete gore re botege?

¹⁷ Re swanetše go ba le sebete gore re botegele Jehofa le go mo kwa go e na le go dira seo ditho tša lapa, bašomigotee, goba babuši ba rego re se dire. Ka mohlala, Taro wa kua Japane o ile a dira sohle se a ka se kgonago go thabiša batswadi ba gagwe go tloga e sa le mošemanyana. O be a ba kwa e bile a ba botegela, e sego feela ka gobane a be a gapeletšega, eupša ka gobane a be a ba rata. Eupša ge a be a thoma go ithuta Beibele le Dihlatse tša Jehofa, batswadi ba gagwe ba ile ba mo ganetša. Se se ile sa mo nyamiša, gomme gwa ba thata kudu gore a ba botše gore o dirile phetho ya go ya dibokeng. Taro o re: “Ba be ba galefile o šoro moo go ilego gwa feta nywaga e mentši ba sa nyake ke ba etela. Ke ile ka rapela Jehofa gore a nthuše go kgomarela phetho ya ka. Gona bjale ba kaone, gomme ke kgona go ba etela ka mehla.”—Bala Diema 29:25.

18. Sehlogo se se go hotše bjang?

¹⁸ Go swana le Dafida, Jonathane, Nathane le Hushai, eka le rena re ka latswa lethabo leo le tlišwago ke go botegela Jehofa. Ga re nyake go swana le Abenere le Abesalomo bao ba bego ba sa botege. Ke therešo gore ga se ra phethagala le gore re dira diphošo. Eupša anke re bontšheng Jehofa gore go mmotegela ke selo seo se tlago pele maphelong a rena.