1-3. (a) Ke’ng se se re kgodišago gore re ka ba bagwera ba Modimo? (b) Re tlo ahlaahla mehlala ya bomang sehlogong se?

KA Beibeleng, Aborahama o bitšwa mogwera wa Modimo ka makga a mararo. (2 Dikoronika 20:7; Jesaya 41:8; Jakobo 2:23) Ke yena a nnoši ka Beibeleng yo a bitšwago ka go lebanya gore ke mogwera wa Modimo. Na seo se ra gore Aborahama ke motho a nnoši yo e kilego ya ba mogwera wa Jehofa? Aowa. Beibele e bontšha gore ka moka ga rena re ka ba le tokelo ya go ba bagwera ba Modimo.

² Lentšu la Modimo le tletše ka dipego tša banna le basadi ba bantši ba botegago bao ba bego ba boifa Jehofa, ba na le tumelo go yena gomme ya ba bagwera ba gagwe ba kgauswi. (Bala Psalme 25:14.) Batho bao ke karolo ya ‘leru le legolo la dihlatse’ leo Paulo a boletšego ka lona. Yo mongwe le yo mongwe wa bona e be e le mogwera wa Modimo.—Baheberu 12:1.

³ Anke re ahlaahleng ba bararo ba bagwera ba Jehofa bao ba hlaloswago ka Beibeleng: (1) Ruthe, e lego mohlologadi yo a botegago wa mofsa yo a tšwago Moaba, (2) Hesekia, e lego kgoši e botegago ya Juda le (3) Maria, e lego mmago Jesu yo a nago le  boikokobetšo. Re ka ithuta’ng tseleng yeo yo mongwe le yo mongwe wa bona a bilego mogwera wa Modimo?

4, 5. Ruthe o ile a swanelwa ke go dira phetho efe e thata, gona ke ka baka la’ng go be go le thata kudu go e dira? (Bona seswantšho seo se lego mathomong a sehlogo.)

⁴ Naomi le dingwetši tša gagwe, e lego Ruthe le Oropa, ba ile ba tšea leeto le letelele la go tloga Moaba ba eya Isiraele. Ge ba le tseleng, Oropa o ile a phetha ka go boela gagabo kua Moaba. Eupša Naomi o be a ikemišeditše go boela nageng ya gabo ya Isiraele. Ruthe yena o ile a dira’ng? O ile a swanelwa ke go dira phetho e thata kudu. Na o be a tla boela gagabo kua Moaba, goba na o be a tla dula le mmatswalagwe e lego Naomi, gomme a ya le yena Betlelehema?—Ruthe 1:1-8, 14.

⁵ Ba lapa labo Ruthe ba be ba dula Moaba. O be a ka boela go bona, le gona ga go pelaelo gore ba be ba tla mo hlokomela. O be a tseba batho ba Moaba, leleme la bona le setšo sa bona. Naomi o be a ka se holofetše Ruthe gore o tla hwetša dilo tše di swanago kua Betlelehema. Le gona Naomi o be a boifa gore o be a ka se mo hweletše monna goba legae. Ka gona Naomi o ile a mmotša gore a boele gagabo Moaba. Ka ge re tseba, Oropa o ile a “[boela] bathong ba gabo le medimong ya gabo.” (Ruthe 1:9-15) Eupša Ruthe o ile a se boele bathong ba gabo le medimong ya bona ya maaka.

6. (a) Ruthe o ile a dira phetho efe e botse? (b) Boase o be a era go re’ng ge a be a re Ruthe o tšhabetše ka tlase ga diphego tša Jehofa?

⁶ Go bonagala Ruthe a ile a ithuta ka Jehofa go monna wa gagwe goba go Naomi. O ile a ithuta gore Jehofa ga a swane le medimo ya Moaba. O be a rata Jehofa e bile a tseba gore o swanetše go rata Jehofa le go mo hlankela. Ka gona Ruthe o ile a dira phetho e botse. O ile a botša Naomi gore: “Batho ba geno e tla ba ba gešo, gomme Modimo wa gago ya ba Modimo wa ka.” (Ruthe 1:16) Dipelo tša rena di a kgomega ge re nagana kamoo Ruthe a bego a rata Naomi ka gona. Eupša se se kgahlišago le go feta ke kamoo Ruthe a bego a rata Jehofa ka gona. Se se ile sa kgahla le Boase, yoo ka morago a ilego a mo reta ka ge a ile a ‘tšhabela ka tlase ga diphego tša Jehofa.’ (Bala Ruthe 2:12.) Mantšu a a Boase a re gopotša kamoo lefotwana le nyakago tšhireletšo ka tlase ga diphego tša mmago lona. (Psalme 36:7; 91:1-4) Ka tsela e swanago, Jehofa o ile a šireletša Ruthe ka tsela e lerato gomme a mo putsa ka ge a be a na le tumelo. Le ka mohla Ruthe ga se a ka a ba le lebaka la go itsholela phetho yeo a e dirilego.

7. Ke’ng se se ka thušago bao ba dikadikago go neela maphelo a bona go Jehofa?

⁷ Batho ba bantši ba ithuta ka Jehofa eupša ba kgetha go se tšhabele go yena. Ba dikadika go neela maphelo a bona go yena le go kolobetšwa. Ge e ba o le yo mongwe wa bona, ipotšiše gore go re’ng o dikadika. Batho ka moka ba na le medimo. (Joshua 24:15) Phetho e bohlale e tla ba ya gore o hlankele Modimo wa therešo. Ge o ineela go Jehofa, o bontšha gore o na le tumelo ya gore e tla ba setšhabelo sa gago. Le gona o tla go thuša go dula o mo hlankela go sa šetšwe mathata ao o ka bago le ona. Ke seo Modimo a se diretšego Ruthe.

8. Hlalosa kamoo Hesekia a godišitšwego ka gona.

⁸ Tsela yeo Hesekia a gotšego ka yona e fapana kudu le ya Ruthe. Hesekia e be e le setho sa setšhaba se se bego se ineetše go Modimo.  Eupša ga se Baisiraele ka moka bao ba ilego ba dula ba botega. Tatago Hesekia, e lego Kgoši Ahasi, o be a dira dilo tše mpe kudu. O be a sa hlomphe tempele ya Modimo e bile a tutueletša batho go rapela medimo e mengwe. Ahasi o ile a ba a dira gore ba bangwe ba bana babo Hesekia ba fišwe ka mollo ba sa phela e le dihlabelo go medimo ya maaka. Hesekia o goletše ka tlase ga maemo a mabe kudu!—2 Dikgoši 16:2-4, 10-17; 2 Dikoronika 28:1-3.

9, 10. (a) Ke ka baka la’ng go ka ba go bile bonolo gore Hesekia a galefele Jehofa? (b) Ke ka baka la’ng re sa swanela go galefela Modimo? (c) Ke ka baka la’ng re sa swanela go nagana gore tsela yeo re godišitšwego ka yona e tla bopa semelo sa rena?

⁹ Mohlala o mobe wa Ahasi o ka ba o ile wa dira gore morwa wa gagwe Hesekia a galefele Jehofa. Lehono, ba bangwe ba bao ba ilego ba lebeletšana le mathata ao a nyakilego a swana le a Hesekia ba nagana gore ba na lebaka la go kwagala la go “galefela Jehofa” goba go galefela mokgatlo wa gagwe. (Diema 19:3) Ba bangwe ba nagana gore tsela e mpe yeo ba godišitšwego ka yona e ka dira gore ba tle ba phele gampe goba ba dire diphošo tšeo batswadi ba bona ba di dirilego. (Hesekiele 18:2, 3) Eupša na dikgopolo tše bjalo ke therešo?

¹⁰ Bophelo bja Hesekia bo hlatsela gore karabo ya potšišo yeo ke aowa! Go ka se tsoge go bile le lebaka le le kwagalago la go galefela Jehofa. Jehofa ga a re bakele dilo tše mpe. (Jobo 34:10) Ke therešo gore batswadi ba ka ruta bana ba bona go dira dilo tše dibotse goba tše mpe. (Diema 22:6; Bakolose 3:21) Eupša se ga se bolele gore tsela yeo re godišitšwego ka yona e tla dira gore re be le semelo se itšego. Ka baka la’ng? Ka gobane Jehofa o re neile tokologo ya go itirela diphetho, e lego seo se bolelago gore re ka ikgethela go dira dilo tše dibotse goba tše mpe. (Doiteronomio 30:19) Hesekia o ile a diriša bjang mpho yeo ya bohlokwa?

11. Ke’ng se se dirilego gore Hesekia e be yo mongwe wa dikgoši tše dibotse kudu tša Juda?

¹¹ Gaešita le ge tatagwe e be e le yo mongwe wa dikgoši tše mpe kudu tša Juda, Hesekia o ile a ba yo mongwe wa dikgoši tše dibotse kudu. (Bala 2 Dikgoši 18:5, 6.) O ile a kgetha go se latele mohlala o mobe wa tatagwe. Go e na le moo, o ile a kgetha go theetša baporofeta ba Jehofa ka kelohloko, ba bjalo ka Jesaya, Mika le Hosea. O ile a ba theetša ge ba be ba mo eletša le go mo phošolla. Se  se ile sa mo tutueletša go rarolla mathata a mantši ao a bakilwego ke tatagwe. O ile a hlwekiša tempele, a kgopela Modimo gore a lebalele setšhaba dibe tša sona gomme a fediša medingwana nageng ka moka. (2 Dikoronika 29:1-11, 18-24; 31:1) Ka morago, ge kgoši ya Asiria e lego Sanheribe e be e nyaka go hlasela Jerusalema, Hesekia o ile a bontšha sebete se segolo le tumelo e matla. O ile a bota gore Jehofa o tla ba šireletša, ke moka a matlafatša setšhaba. (2 Dikoronika 32:7, 8) Nakong e nngwe Hesekia o ile a ikgogomoša, eupša ge Jehofa a mo phošolla, o ile a ikokobetša. (2 Dikoronika 32:24-26) Ruri Hesekia ke mohlala o mobotse kudu woo re ka o ekišago. Ga se a ka a dumelela tsela yeo a godišitšwego ka yona e mo senyetša bophelo. Go e na le moo, o ile a bontšha gore ke mogwera wa Jehofa.

12. Go swana le Hesekia, ba bantši lehono ba bontšhitše bjang gore go a kgonega go ba mogwera wa Jehofa?

¹² Lehono batho ba lefase le ba sehlogo e bile ga ba na lerato, le gona bana ba bantši ba gola ba se na batswadi ba lerato le bao ba nago le taba le bona. (2 Timotheo 3:1-5) Gaešita le ge Bakriste ba bantši lehono ba se ba godišwa gabotse, ba kgethile go ba le segwera le Jehofa. Go swana le Hesekia, ba bontšha gore tsela yeo ba godišitšwego ka yona ga e laole seo ba nyakago go ba sona. Modimo o re neile tokologo ya go itirela diphetho, le gona re ka kgetha go mo hlankela le go mo godiša, go etša ge Hesekia a dirile.

13, 14. Ke ka baka la’ng kabelo ya Maria e be e bonagala e le thata kudu, eupša o ile a arabela bjang mantšung a Gabariele?

¹³ Nywaga e mentši ka morago ga mehla ya Hesekia, kgarebe e ikokobeditšego yeo e bitšwago Maria e ile ya ba le segwera se se kgethegilego le Jehofa le kabelo ya moswananoši. E be e tlo ima gomme ya belega Morwa wa Modimo le go mo godiša! Jehofa o swanetše go ba a be a rata Maria le go mmota gore a ka mo nea tokelo ye e kgolo kudu. Eupša Maria o ile a arabela bjang ge a thoma go kwa ka kabelo yeo?

¹⁴ Re fela re bolela gore Maria o neilwe tokelo e kgolo. Eupša ke dilo dife tšeo a ka bago a be a di boifa? Ka mohlala, morongwa Gabariele o ile a mmotša gore o be a tla ima ntle le go robala le monna. Eupša Gabariele ga se a ka a holofetša Maria gore o tla hlalosetša lapa labo le baagišani kamoo a bego a tlo ima ka gona. Ba be ba tla re’ng ge ba mmona a imile? Ka ge a be a tlo nyalana le Josefa, o be a tla mo kgodiša bjang gore ga se a robala le monna yo mongwe? Go oketša moo, o be a na le boikarabelo bjo bogolo bja go godiša Morwa wa Modimo! Ga re tsebe dilo ka moka tšeo Maria a bego a tshwenyegile ka tšona,  eupša re tseba seo a se dirilego ka morago ga gore Gabariele a bolele le yena. O itše: “Bona, nna lekgoba la Jehofa! A go ntiragalele go ya ka mantšu a gago.”—Luka 1:26-38.

15. Ke ka baka la’ng tumelo ya Maria e makatša?

¹⁵ Ruri tumelo ya Maria e be e le e makatšago! O be a ikemišeditše go dira selo le ge e le sefe seo a kgopelwago go se dira go etša lekgoba. O be a bota gore Jehofa o tla mo hlokomela le go mo šireletša. Go tlile bjang gore Maria a be le tumelo yeo e matla? Ga re belegwe re na le tumelo. Eupša re ka ba le tumelo ge e ba re e hlagolela gomme re kgopela Modimo gore a šegofatše maiteko a rena. (Bagalatia 5:22; Baefeso 2:8) Maria o ile a šoma ka thata go matlafatša tumelo ya gagwe. Re tseba seo bjang? Anke re ahlaahleng kamoo a bego a theetša ka gona le seo a bego a bolela ka sona.

16. Ke’ng se se bontšhago gore Maria o be a theetša ka kelohloko?

¹⁶ Kamoo Maria a bego a theetša ka gona. Beibele e re re ‘swanetše go akgofela go kwa gomme re diege go bolela.’ (Jakobo 1:19) Maria o be a theetša ka kelohloko. Beibele e bontšha gore o be a theetša ka kelohloko dilo ka moka tšeo a bego a di kwa, kudukudu tšeo a bego a ithuta tšona ka Jehofa. O be a ipha nako ya go naganišiša ka dilo tše bjalo tše bohlokwa. Mohlala o mongwe wa se ke nakong ya ge Jesu a belegwa, ge badiši ba itšego ba be ba botša Maria ka molaetša wo ba o kwelego go morongwa. Ka morago, ge Jesu a na le nywaga e 12, o ile a bolela selo seo se ilego sa makatša Maria. Mabakeng ao ka bobedi, Maria o ile a theetša, a boloka seo a se kwelego gomme a naganišiša ka sona.—Bala Luka 2:16-19, 49, 51.

17. Re ka ithuta’ng go seo Maria a se boletšego?

¹⁷ Seo Maria a bego a bolela ka sona. Beibele ga e re botše mo gontši ka dilo tšeo Maria a bego a bolela ka tšona. Pego yeo a boletšego kudu go yona e begilwe go Luka 1:46-55. Mantšu ao a bontšha gore Maria o be a tseba Mangwalo a Seheberu gabotse. Ke ka baka la’ng re re’alo? Mantšu a gagwe a swana le mantšu a thapelo ya Hanna, e lego mmago Samuele. (1 Samuele 2:1-10) Go bonagala Maria a ile a tsopola Mangwalo mo e ka bago ka makga a 20 ge a be a bolela mantšu ao. Go molaleng gore o be a rata go bolela ka ditherešo tšeo a ithutilego tšona go Mogwera wa gagwe yo mogolo e lego Jehofa.

18. Re ka ekiša tumelo ya Maria ka ditsela dife?

¹⁸ Go swana le Maria, ka dinako tše dingwe Jehofa a ka re nea dikabelo tšeo re naganago gore re ka se di kgone. Anke re ekišeng mohlala wa Maria, re amogele kabelo le ge e le efe ka boikokobetšo gomme re bote gore Jehofa o tla re thuša. Le gona re ka ekiša tumelo ya Maria ka go theetša Jehofa ka kelohloko le go naganišiša ka seo re ithutilego sona ka yena le merero ya gagwe. Ka go re’alo, ka lethabo re tla kgona go botša ba bangwe seo re ithutilego sona.—Psalme 77:11, 12; Luka 8:18; Baroma 10:15.

19. Re ka kgodišega ka’ng ge re dutše re ekiša batho ba ka Beibeleng bao ba bego ba na le tumelo e tiilego?

¹⁹ Go molaleng gore Ruthe, Hesekia le Maria e be e le bagwera ba Jehofa, go etša Aborahama. E be e le karolo ya ‘leru le legolo la dihlatse’ tšeo le tšona di bilego le tokelo ya go ba bagwera ba Modimo. Eka re ka tšwela pele re ekiša mehlala e bjalo e kgahlišago ya tumelo. (Baheberu 6:11, 12) Ge re ka dira seo, re ka lebelela pele go tlo ba bagwera ba Jehofa ka mo go sa felego!