NAGANA ka letšatši leo o kilego wa thaba kudu ka lona bophelong bja gago. Na e bile letšatšing la gago la lenyalo goba ge ngwana wa gago wa pele a be a belegwa? Goba na e bile ge o be o kolobetšwa? Leo e ka ba e bile letšatši le bohlokwahlokwa le leo le thabišago kudu bophelong bja gago. Le gona letšatšing leo, bana beno le dikgaetšedi ba swanetše go ba ba ile ba thaba kudu ge ba go bona o bontšha gore o rata Modimo ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka!—Mareka 12:30.

Ga go pelaelo gore o bile le lethabo le legolo tirelong ya Jehofa ga e sa le o kolobetšwa. Lega go le bjalo, bagoeledi ba bantši ba lahlegetšwe ke lethabo leo ba kilego ba ba le lona. Go senyegile kae? Re na le mabaka afe a gore re tšwele pele re hlankela Jehofa ka lethabo?

Molaetša wa Mmušo o re tlišetša lethabo le legolo. Ka baka la’ng? Ka gobane Jehofa o holofeditše gore kgauswinyane Mmušo wa gagwe o tla fediša lefase le le kgopo gomme wa tliša lefase le lefsa. Tsefanya 1:14 e re botša gore: “Letšatši le legolo la Jehofa le kgauswi! Le kgauswi e bile le akgofile kudu!” Eupša ge e ba re ikwa okare ke kgale re letile, re ka lahlegelwa ke lethabo leo re kilego ra ba le lona. Se se ka dira gore re fokole tirelong ya Modimo.—Diema 13:12.

Ge re fetša nako re na le bana babo rena le dikgaetšedi, re kgothatšega go tšwela pele re hlankela Jehofa ka lethabo. Boitshwaro bjo bobotse bja batho ba Jehofa bo ka ba bo re gogetše borapeding bja therešo gomme bja re thuša go hlankela Modimo ka lethabo. (1 Petro 2:12) Lega go le bjalo, go ka direga’ng ge e ba ngwanabo rena goba kgaetšedi a neilwe tayo ka ge a paletšwe ke go kwa ditaelo tša Modimo? Se se ka nyamiša ba bangwe ka phuthegong gomme sa dira gore ba lahlegelwe ke lethabo.

Dilo tše di bonagalago le tšona di ka dira gore re lahlegelwe ke lethabo. Bjang? Lefase la Sathane le ka dira gore re ikwe re gapeletšega go reka dilo tšeo re sa di hlokego. Ka gona anke re gopoleng mantšu a Jesu ao a rego: “Ga go yo a ka bago lekgoba la marena a mabedi, gobane o tla hloya yo mongwe a rata yo mongwe goba o tla kgomarela yo mongwe a nyatša yo mongwe. Le ka se be makgoba a Modimo le a Mahumo.” (Mateo 6:24) Ga go kgonege gore re hlankele Jehofa ka lethabo mola ka lehlakoreng le lengwe re nyaka dilo tša lefase le.

Bao ba ratago Jehofa ga ba imelwe ke go mo hlankela. (1 Johane 5:3) Gopola gore Jesu o itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo. Gobane joko ya ka e botho, morwalo wa ka o bohwefo.” (Mateo 11:28-30) Go ba Mokriste wa kgonthe go a lapološa e bile go tliša lethabo. Ruri re  na le mabaka a kwagalago a go thaba tirelong ya Jehofa. Anke ga bjale re ahlaahleng a mararo a ona.—Habakuku 3:18.

Re hlankela Monei wa Bophelo, yena Modimo yo a thabilego. (Ditiro 17:28; 1 Timotheo 1:11) Re a tseba gore re kolota Mmopi wa rena maphelo a rena. Ka gona anke re tšweleng pele re mo hlankela ka lethabo, go sa šetšwe gore go šetše go fetile nywaga e mekae re kolobeditšwe.

Nagana ka Héctor, yo a hlanketšego Jehofa e le molebeledi wa mosepedi ka nywaga e 40. Gaešita le “nakong ya bohlogoputswa,” o sa dutše a thabela go hlankela Jehofa. (Psalme 92:12-14) Bolwetši bja mosadi wa gagwe bo dirile gore a se sa kgona go hlankela Modimo ka botlalo, eupša Héctor ga se a lahlegelwa ke lethabo. O re: “Le ge go nkweša bohloko go bona bolwetši bja mosadi wa ka bo mpefala e bile go le thata go mo hlokomela, ga se ka dumelela seo se nkamoga lethabo la go hlankela Modimo wa therešo. Go tseba gore ke kolota Jehofa bophelo bja ka, yena yo a bopilego motho ka morero, ke lebaka le legolo la go mo rata ka mo go tseneletšego le go mo hlankela ka pelo ka moka. Ke katanela go dula ke le mafolofolo modirong wa boboledi, le gona ke leka go dula ke nagana ka kholofelo ya Mmušo e le gore ke se lahlegelwe ke lethabo.”

Jehofa o re neile sehlabelo sa topollo e le gore re kgone go thabela bophelo. Ka kgonthe, “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Ee, re ka lebalelwa dibe tša rena gomme ra hwetša bophelo bjo bo sa felego ge feela re bontšha tumelo go mpho e lerato ya Modimo ya topollo. Ruri le ke lebaka le lebotse kudu la go leboga! Le gona go leboga ga rena topollo go tla re tutueletša go hlankela Jehofa ka lethabo.

Ngwanabo rena Jesús yo a bego a dula Mexico, o itše: “Ke be ke le lekgoba la mošomo wa ka, ka dinako tše dingwe ke šoma le mašego beke ka moka le ge ke be ke sa gapeletšege go dira bjalo. Ke be ke dira bjalo go no re ke hwetše tšhelete e oketšegilego. Ke moka ke ile ka ithuta ka Jehofa le kamoo a ilego a re nea Morwa wa gagwe yo a rategago gore a re hwele. Ke ile ka ba le kganyogo e tseneletšego ya go mo hlankela. Ka gona ke ile ka neela bophelo bja ka go Jehofa, gomme ka morago ga go šomela khamphani yeo ka nywaga e 28, ke ile ka tlogela mošomo gomme ka tsenela tirelo ya nako e tletšego.” Ke kamoo Jesús a ilego a thoma go hlankela Jehofa ka lethabo.

Re hlwekile boitshwarong, e lego seo se re tlišetšago lethabo. Na o sa gopola kamoo bophelo bja gago bo bego bo le ka gona pele o ka tseba Jehofa? Moapostola Paulo o ile a gopotša Bakriste ba Roma gore “e be e le bahlanka ba sebe” eupša ba fetogile  “bahlanka ba toko.” Ka ge ga bjale ba be ba phela bophelo bjo bo hlwekilego, ba be ba ka lebelela pele go tlo hwetša bophelo bjo bo sa felego. (Baroma 6:17-22) Le rena re phela ka ditekanyetšo tša Jehofa, ka gona ga re kwe bohloko bjo bo bakwago ke go phela bophelo bjo bo sa hlwekago goba bjo šoro. Ruri se se a thabiša!

Nagana ka Jaime, yo a bego a gana gore Modimo o gona, a dumela thutong ya gore dilo di itirile e bile e le ramatswele. Jaime o ile a thoma go ya dibokeng tša Bokriste gomme o ile a kgongwa ke go bona lerato leo le bego le bontšhwa moo. E le gore Jaime a kgone go lahla bophelo bja gagwe bja kgale, o ile a swanelwa ke go kgopela Jehofa gore a mo thuše go dumela go Yena. Jaime o re: “Ganyenyane ganyenyane, ke ile ka lemoga gore go na le Tate yo lerato le Modimo wa dikgaugelo. Go phela ka ditekanyetšo tše di lokilego tša Modimo go ntšhireleditše kudu. Ge nkabe ke se ka fetoga, nkabe ke hwile go swana le bagwera ba bangwe ba ka ba kgale bao ba bego ba bapala matswele. Nywaga yeo ke e thabetšego kudu bophelong bja ka ke yeo ke e feditšego ke hlankela Jehofa.”

Re swanetše go ikwa bjang ge re dutše re letetše go fedišwa ga lefase le le kgopo? Gopola gore re dira thato ya Modimo e bile re lebeletše pele bophelong bjo bo sa felego. “Ka gona anke re se ke ra lapa go dira botse, gobane re tla buna ka nako e swanetšego ge e ba re sa lape.” (Bagalatia 6:8, 9) Anke re kgopeleng Jehofa gore a re thuše go kgotlelela, re šomeng ka thata go hlagolela dika tšeo re di hlokago go phologa ‘masetlapelo a magolo,’ le go tšwela pele re hlankela Jehofa ka lethabo.—Kutollo 7:9, 13, 14; Jakobo 1:2-4.

Re ka kgodišega gore Jehofa o tla re putsa ka baka la kgotlelelo ya rena ka gobane o tseba modiro wa rena le gore re a mo rata le go rata leina la gagwe. Ge re ka tšwela pele re mo hlankela ka lethabo, re tla swana le mopsalme Dafida, yo a itšego: “Ke beile Jehofa pele ga ka ka mehla. Ka gobane o ka letsogong la ka la le letona, nka se šišinywe. Ka gona pelo ya ka e a thaba, e bile ke rata go thaba. Le gona, mmele wa ka o tla dula ka polokego.”—Psalme 16:8, 9.