1. Mosamaria yo Jesu a ilego a mo fodiša o ile a bontšha bjang gore o a leboga?

BANNA ba itšego ba lesome ba be ba babja kudu. Ba be ba swerwe ke lephera e bile go bonala eka ba ka se tsoge ba fodile. Eupša ka letšatši le lengwe ba ile ba bona Jesu, yena Morutiši yo Mogolo, a le kgojana. Ba be ba kwele gore Jesu o kgona go fodiša mehuta ka moka ya malwetši, le gona ba be ba na le tumelo ya gore le bona a ka ba fodiša. Ka gona ba ile ba goeletša ba re: “Jesu, Morutiši, re gaugele!” Banna bao ka moka ba ile ba fola. Ga go pelaelo gore ka moka ga bona ba ile ba leboga ka pelong seo Jesu a ba diretšego sona. Eupša ke o tee feela wa bona yo a ilego a ya go Jesu gomme a mo leboga * ka go lebanya, e sego feela go no leboga ka pelong. Monna yoo wa Mosamaria o ile a tutueletšega go reta Modimo “ka lentšu le le hlabošago.”—Luka 17:12-19.

2-3. (a) Ke ka baka la’ng re ka lebala go leboga ba bangwe? (b) Re tlo ithuta’ng sehlogong se?

² Go swana le Mosamaria yo a ilego a leboga, le rena re nyaka go leboga batho bao ba re bontšhago botho. Eupša ka dinako tše dingwe re ka lebala go leboga batho ba bangwe goba go ba bontšha gore re tšeela godimo dilo tšeo ba re direlago tšona.

³ Sehlogong se re tlo ithuta gore ke ka baka la eng go le bohlokwa go botša ba bangwe gore re a ba leboga le go ba bontšha ka ditiro gore re a ba leboga. Le gona re tlo ithuta ka batho ba ka  Beibeleng bao ba ilego ba bontšha tebogo le bao ba ilego ba se e bontšhe. E bile re tlo boledišana ka dilo tše difapafapanego tšeo re ka di dirago go bontšha gore re a leboga.

4-5. Ke ka baka la’ng re swanetše go leboga?

⁴ Jehofa o re beela mohlala o mobotse kudu tabeng ya go leboga. Tsela e nngwe yeo Jehofa a bontšhago ka yona gore o a leboga ke ka go šegofatša batho bao ba mmotegelago. (2 Sam. 22:21; Ps. 13:6; Mat. 10:40, 41) Le gona Beibele e re kgothaletša gore re be “baekiši ba Modimo, [re] le bana ba ba rategago.” (Baef. 5:1) Ka gona, lebaka le legolo la gore re leboge ke gore re nyaka go ekiša Jehofa.

⁵ A re boleleng ka lebaka le lengwe leo le dirago gore re nyake go leboga ba bangwe. Re ka swantšha go leboga le dijo tše di bose. Re ipshina ka tšona ge re di ja le ba bangwe. Ka tsela e swanago, ge ba bangwe ba re leboga re thaba kudu, e bile le bona ba thaba kudu ge re ba leboga. Ge re leboga motho yo a itšego, seo se dira gore a tsebe gore seo a re diretšego sona se tloga se re hotše. Seo se dira gore segwera sa rena le motho yoo se gole le go feta.

6. Mantšu a go leboga a swana bjang le diapola tšeo di dirilwego ka gauta?

⁶ Go bontšha tebogo go bohlokwa kudu. Beibele e re: “Lentšu leo le bolelwago ka nako e swanetšego le swana le diapola tša gauta sebjaneng sa silifera.” (Die. 25:11) Nagana kamoo apola yeo e dirilwego ka gauta e lego e botse ka gona ge e le ka sebjaneng sa silifera le kamoo e lego bohlokwa ka gona. O ka ikwa bjang ge motho a ka go nea mpho ya mohuta woo? Ruri o ka thaba! Le mantšu a go leboga le ona a ka dira gore ba bangwe ba thabe kudu. Le gona nagana ka taba ye: Apola yeo e dirilwego ka gauta ya kgonthe e ka se tsoge ya senyega. Ka tsela e swanago, motho yo o ilego wa mo leboga a ka gopola mantšu a gago bophelo bja gagwe ka moka.

7. Go ya ka Psalme 27:4, Dafida gotee le bangwadi ba bangwe ba dipsalme ba ile ba bontšha bjang gore ba leboga Jehofa?

⁷ Bahlanka ba bantši ba Modimo ba mehleng ya kgale ba ile ba bontšha tebogo. Yo mongwe wa bona e be e le Dafida. (Bala Psalme 27:4.) O ile a bontšha ka ditiro gore o tšeela godimo borapedi bja therešo. O ile a neela ka tšhelete e ntši le mahumo a gagwe gore tempele e tle e agwe. Bana ba Asafa le bona ba ile ba bontšha tebogo ka go ngwala dipsalme goba dikopelo tša go tumiša Modimo. Kopelong e nngwe, ba ile ba leboga Modimo le go mo reta ka “mediro ya [gagwe] e makatšago.” (Ps. 75:1) Ruri Dafida le bana ba Asafa ba be nyaka go bontšha Jehofa gore ba tloga ba mo leboga ka dilo tše di kgahlišago tšeo a ba diretšego tšona. Wena o ka ekiša banna bao bjang?

8-9. Moapostola Paulo o ile a bontšha bjang gore o tšeela godimo bana babo le dikgaetšedi, gona seo se bile le mafelelo afe?

⁸ Moapostola Paulo o be a tšeela godimo bana babo le dikgaetšedi. O ile a bontšha seo ka tsela yeo a bego a bolela ka bona. Ge a be a rapela a nnoši o ile a dula a leboga Modimo gore o mo neile bana babo le dikgaetšedi. Le gona ge a be a ba ngwalela mangwalo o be a ba botša kamoo ba lego bohlokwa ka gona go yena. Ditemaneng tše 15 tša mathomo go Baroma kgaolo 16, Paulo o bolela ka Bakristegotee le yena ba 27 e bile o ba bitša ka maina. Paulo o ile a bolela ka go lebanya gore Perisika le Akhwila ba ile “ba ipea kotsing ya go kgaolwa melala” bakeng sa gagwe. Le gona o ile a ngwala gore Foibe “o ile a lwela bana babo rena ba bantši,” go akaretša le yena Paulo. Paulo o ile a reta banna le basadi ba bao ba bego ba šoma ka thata ka phuthegong.—Baroma 16:1-15.

⁹ Paulo o be a tseba gore bana babo le dikgaetšedi ba Baroma ba be ba sa phethagala, eupša ge a be a phetha lengwalo leo a bego a ba ngwalela lona o ile a bolela kudu ka dika tša bona tše dibotse. Nagana kamoo Bakriste bao ba ilego ba kgothatšega ka gona ge lengwalo leo le be le balwa ka phuthegong! Ga go pelaelo gore seo se ile sa dira gore segwera sa bona le Paulo se tie le go feta. Na le wena o dula o leboga dilo tše dibotse tšeo bana beno le dikgaetšedi bao o kopanelago le bona ba di dirago le go di bolela?

10. Re ithuta’ng go Jesu tseleng yeo a ilego a bontšha gore o leboga balatedi ba gagwe?

¹⁰ Ge Jesu a be a nea diphuthego tše itšego tša Asia Minor melaetša, o ile a reta Bakriste ba diphuthegong tšeo. Ka mohlala, ge a be a bolela ka phuthego ya Thiathira o ile a thoma ka gore: “Ke tseba ditiro tša gago, lerato la gago le tumelo le bodiredi le kgotlelelo, le gore ditiro tša gago tša gona bjale ke tše dikgolo go feta tša pele.” (Kut. 2:19) Jesu ga se a ka a no reta Bakriste bao feela gore ba dira dilo tše dibotse eupša o ile a ba reta gore ba na le dika tše dibotse tšeo di ba hlohleleditšego go dira dilo tšeo. Le ge Jesu a be a nyaka go kgalema ba bangwe phuthegong yeo ya Thiathira, o ile a thoma pele ka go ba kgothatša, gomme ge a fetša a ba kgothatša gape. (Kut. 2:25-28) Ka ge Jesu e le hlogo ya diphuthego ka moka, nagana feela ka matla ao a nago le wona. Ga se gore o gapeletšega go re leboga bakeng sa dilo tšeo re mo direlago tšona, eupša o dula a re leboga. Ruri o beela bagolo mohlala o mobotse kudu!

11. Go ya ka Baheberu 12:16, Esau o be a lebelela dilo tše kgethwa bjang?

¹¹ Ka manyami, batho ba bangwe ba ka Beibeleng ba ile ba hloka tebogo. Ka mohlala, le ge Esau a godišitšwe ke batswadi bao ba bego ba rata Jehofa e bile ba mo hlompha, ga se a ka a tšeela dilo tše kgethwa godimo. (Bala Baheberu 12:16.) O ile a bontšha bjang gore ga a leboge? Esau o ile a rekišetša Jakobo tshwanelo ya gagwe ya go ba leitšibulo ka sopo ya dihlodi.  (Gen. 25:30-34) Ka morago, Esau o ile a itshola kudu ka phetho yeo a e dirilego. Ka ge a ile a se tšeele godimo tshwanelo ya gagwe ya go ba leitšibulo, o be a se na lebaka la go ngongorega ge tshwanelo yeo e be e newa Jakobo.

12-13. Baisiraele ba ile ba bontšha bjang gore ga ba na tebogo, gona mafelelo e bile afe?

¹² Baisiraele ba be ba na le dilo tše dintši tšeo ba bego ba ka bontšha gore ba a di leboga. Jehofa o ile a ba lokolla Egipita ka morago ga go otla Baegipita ka Dikotlo tše Lesome. Ke moka o ile a ba phološa ka go fediša madira a Baegipita ka moka kua Lewatleng le Lehwibidu. Baisiraele ba be ba thabile kudu moo ba ilego ba opela kopelo ya phenyo ya go tumiša Jehofa. Eupša na ba ile ba dula ba leboga Jehofa?

¹³ Ge Baisiraele ba be ba lebeletšane le mathata a mangwe, kapejana ba ile ba lebala dilo ka moka tše dibotse tšeo Jehofa a bego a ba diretše tšona. Ba ile ba bontšha gore ga ba na tebogo. (Ps. 106:7) Bjang? Beibele e re: “Setšhaba ka moka sa bana ba Isiraele [se ile] sa ngongoregela Moshe le Arone lešokeng.” (Ek. 16:2, 8) Ge e le gabotse ba be ba ngongoregela Jehofa. Jehofa o ile a nyamišwa ke go bona Baisiraele ba sa leboge dilo tšeo a ba diretšego tšona. Ka morago o ile a bolela gore moloko woo ka moka wa Baisiraele ka ntle le Joshua le Kalebe, o be o ka se tsene Nageng ya Kholofetšo. (Num. 14:22-24; 26:65) Ga bjale a re boleleng kamoo re ka phemago go ekiša batho bao ba go se leboge gomme re ekiše bao ba beilego mohlala o mobotse.

14-15. (a) Banyalani ba ka bontšha bjang gore ba tšeelana godimo? (b) Batswadi ba ka ruta bana ba bona bjang go leboga?

¹⁴ Ka lapeng. Lapa ka moka le a holega ge ditho ka moka ka lapeng di bontšha tebogo. Ge banyalani ba bontšha gore ba tšeelana godimo, seo se dira gore ba ratane le go feta. E bile go ba bonolo kudu gore ba lebalelane ge ba dirile diphošo. Monna yo a tšeelago mosadi wa gagwe godimo ga a no šetša dilo tše dibotse tšeo mosadi yo a di dirago goba a di bolelago, eupša “o a ema gomme a mo reta.” (Die. 31:10, 28) Mosadi yo bohlale yena o botša monna wa gagwe seo a se ratago goba a se tšeelago godimo ka yena.

¹⁵ Batswadi, le ka ruta bjang bana ba lena go leboga? Le se ke la lebala gore bana ba lena ba ekiša seo le se bolelago le seo le se dirago. Ka gona, ba beeleng mohlala o mobotse ka go ba leboga ge ba le diretše dilo tše dibotse. Le gona ba ruteng gore ba leboge batho ba bangwe ge ba ba direla dilo tše dibotse. Rutang bana ba lena gore ba swanetše go leboga go tšwa pelong  le gore mantšu a bona a ka kgothatša ba bangwe kudu. Ka mohlala, kgaetšedi yo a bitšwago Clary o re: “Ge mma a be a na le mengwaga e 32, o ile a swanelwa ke go godiša bana ba bararo a nnoši. Ge ke be ke na le mengwaga e 32, ke ile ka thoma go kwešiša gabotse gore go be go le boima gore a godiše bana a nnoši a na le mengwaga yeo. Ka gona, ke ile ka mmotša gore ruri ke leboga gore o ile a šoma ka thata go godiša nna le dikgaetšedi tša ka. Ga se kgale a mpoditše gore mantšu a ka a ile a mo kgothatša kudu e bile o dula a nagana ka ona. Le gona o re ge a nagana ka ona a mo thabiša kudu.”

16. Nea mohlala wa kamoo go leboga go ka kgothatšago ba bangwe ka gona.

¹⁶ Ka phuthegong. Bana babo rena le dikgaetšedi ba kgothatšega kudu ge re ba leboga. Ka mohlala, Jorge e lego mogolo yo a nago le mengwaga e 28, o ile a thoma go babja kudu. O ile a fetša kgwedi ka moka a sa kgone go ya dibokeng. Le ka morago ga gore a kgone go ya dibokeng, o be a sa kgone go nea dipolelo. Jorge o re: “Ke be ke ikwa ke se na mohola ka ge ke be ke se sa kgona go dira dilo tše dingwe le go phetha dikabelo tša ka ka phuthegong. Eupša ka letšatši le lengwe ka morago ga diboka, ngwanešo yo a itšego o ile a mpotša gore: ‘Ke rata go leboga mohlala o mobotse wo o o beetšego lapa la ka. Ga o tsebe kamoo dipolelo tša gago di ilego tša re hola ka gona mengwageng e fetilego. Di re thušitše go gola moyeng.’ Ke ile ka kgomega kudu gomme ka thoma go lla. Ke be ke tloga ke hloka go kwa mantšu ao.”

17. Go ya ka Bakolose 3:15, re ka bontšha bjang gore re leboga Jehofa bakeng sa dilo tšeo a re neago tšona?

¹⁷ Leboga Modimo wa rena. Jehofa o re nea dijo tše dintši tša moya. Ka mohlala, re ithuta dilo tše bohlokwa kudu dibokeng, ka dimakasineng tša rena le wepesaeteng ya rena. Na o kile wa re o theeditše polelo, o bala sehlogo se itšego goba o bogetše bidio e itšego ke moka wa re, ‘Se ke seo ke bego ke se hloka’? Re ka bontšha bjang gore re leboga Jehofa? (Bala Bakolose 3:15.) Tsela e nngwe ke ka go mo leboga ka mehla ka thapelo bakeng sa dilo tše dibotse tšeo a re direlago tšona.—Jak. 1:17.

18. Re ka bontšha bjang gore re tšeela godimo Holo ya rena ya Mmušo?

¹⁸ Tsela e nngwe yeo re ka lebogago Jehofa ke ka go hlokomela Holo ya rena ya Mmušo le go kgonthišetša gore e dula e hlwekile. Ka mehla re swanetše go ba gona ge Holo ya Mmušo e hlwekišwa le ge e lokišwa. Le gona bao ba šomago go hlokomela didirišwa tša go godiša modumo le tša go bogela dibidio dibokeng, ba swanetše go di swara gabotse gore di se ke tša senyega ka pela. Ge re hlokomela Diholo tša rena tša Mmušo di ka se senyege ka pela e bile go ka se nyakege  gore di lokišwe gantši. Seo se tla dira gore meneelo e dirišetšwe go kaonefatša le go aga Diholo tše difsa lefaseng ka moka.

19. O ithutile’ng phihlelong ya molebeledi yo a itšego wa tikologo le mosadi wa gagwe?

¹⁹ Leboga bao ba šomago ka thata go re hola. Ge re leboga motho yo a itšego, seo se ka dira gore a se sa imelwa ke mathata ao a nago le ona. Nagana ka phihlelo ya molebeledi yo mongwe wa tikologo le mosadi wa gagwe. Ka letšatši le lengwe ka morago ga gore ba fetše mosegare ka moka ba le tšhemong e le marega, ba ile ba boela moo ba dulago gona ba lapile kudu. Go be go tonya kudu moo mosadi yoo a ilego a robala ka jase ya gagwe. Mesong ya letšatši le le latelago, o ile a botša monna wa gagwe gore ga a sa kgona go tšwela pele ka kabelo ya bona. Ka moragonyana mesong yeo, ba ile ba hwetša lengwalo la go tšwa ofising ya lekala. Le be le ngwaletšwe kgaetšedi yoo ka go lebanya. Lengwalong leo mokgatlo o ile wa reta kgaetšedi yo ka tsela yeo a šomago gabotse tšhemong le gore o kgotleletše. Mokgatlo o ile wa bolela gore ruri ga go bonolo go dula mafelong a fapafapanego beke e nngwe le e nngwe. Monna wa gagwe o itše: “Lengwalo leo le ile la kgothatša mosadi wa ka kudu moo a ilego a se sa bolela selo ka go tlogela kabelo yeo re bego re e neilwe. Ge e le gabotse, gantši e be e le yena a nkgothaletšago gore ke kgotlelele ge ke be ke nagana go tlogela modiro wo.” Banyalani bao ba ile ba fetša mengwaga e ka bago e 40 modirong wa tikologo.

20. Re swanetše go leka go dira’ng letšatši le letšatši, gona ka baka la’ng?

²⁰ Anke letšatši le letšatši re direng sohle seo re ka se kgonago go bontšha tebogo ka mantšu le ka ditiro. Mantšu le ditiro tša rena di ka kgothatša motho yo a itšego le go mo thuša go kgotlelela mathata a gagwe lefaseng le leo le tletšego ka batho ba go se leboge. Le gona ge re leboga ba bangwe, seo se ka dira gore segwera sa rena le bona se gole le go feta. Sa bohlokwa le go feta ke gore ge re leboga ba bangwe re tla ba re ekiša Tatago rena yo a ratago go nea, yena Modimo yo a lebogago.