KE GO tloga kgale baswayadiphošo ba Beibele ba bolela gore Kgoši Belshatsara yoo go bolelwago ka yena ka pukung ya Daniele ga se a ka a phela. (Dan. 5:1) Ba be ba nagana bjalo ka gobane baepi ba mašope ba be ba se ba tšwa ba hwetša bohlatse bja gore Kgoši Belshatsara o kile a phela. Eupša ka 1854, dilo di ile tša fetoga. Go ile gwa direga’ng?

Ka 1854, J. G. Taylor wa Brithania o ile a epolla mašope ao a bego a le motseng wa bogologolo wa Uri, woo ga bjale e lego tikologo ya ka borwa bja Iraq. Motseng woo, o ile a hwetša dikgapetla tše mmalwa tša letsopa mašopeng a tora e kgolo. Kgapetla e nngwe le e nngwe e be e le ya botelele bja disentimithara tše lesome, gomme di na le mongwalokgwaro go tšona. Go e nngwe ya dikgapetla tšeo, go be go ngwadilwe thapelo ya gore Kgoši Nabonidus wa kua Babilona gotee le morwa wa gagwe yo mogolo e lego Belshatsara ba phele nako e telele. Ka gona baswayadiphošo bao le bona ba ile ba swanelwa ke go dumela gore kgapetlana yeo e hlatsela gore Belshatsara o kile a phela.

Eupša Beibele ga e no bolela feela gore Belshatsara o kile a phela. E bolela le gore e be e le kgoši. Le yona taba yeo ya gore Belshatsara e be e le kgoši, baswayadiphošo ba be ba e belaela goba ba sa kgodišege ka yona. Ka mohlala, moo e ka bago ka ngwaga wa 1875, William Talbot, e lego ramahlale yo mongwe wa Moisemane o ngwadile gore batho ba bangwe ba re: “Belshatsara o bušitše ka nako e tee le tatagwe e lego Nabonidus. Eupša ga go na bohlatse le ge e ka ba bjo bonyenyane tabeng ye.”

Ngangišano ye e ile a ya fela ge go hwetšwa kgapetla e nngwe yeo e bego e ngwadilwe gore Kgoši Nabonidus, e lego tatago Belshatsara, o ile a fetša mengwaga e mentšinyana a sa dule motseng wa Babilona. Go ile gwa direga’ng ge a be a se sa dula Babilona? Puku e nngwe ya Encyclopaedia Britannica e re: “Ge Nabonidus a be a tšhabetše nageng e nngwe, o ile a botša Belshatsara gore a šale a buša gomme a mo nea a mantši a mašole a gagwe a ntwa.” Ka gona, ge e le gabotse re ka re ka nako yeo Belshatsara o be a buša gotee le tatagwe. Ke ka baka leo Alan Millard, e lego moepi wa marope e bile e le setsebi sa polelo, a boletšego gore e be e le mo go swanetšego gore “Puku ya Daniele e re Belshatsara ke ‘kgoši.’”

Ke nnete gore seo se dirago gore bahlanka ba Modimo ba dumele gore puku ya Daniele e a botega e bile e buduletšwe ke Modimo ke gore ba tshepa Beibele.—2 Tim. 3:16.