1-2. Ke ka baka la’ng Jehofa a ile a dira gore go kgonege gore re tle re be karolo ya lapa la gagwe, gona o dirile seo bjang?

JEHOFA o nyaka gore re be karolo ya lapa la gagwe la mo lefaseng. Ruri seo se re bontšha gore o re rata kudu! Ka moka ga rena ka lapeng le, re ineetše go Jehofa e bile re na le tumelo sehlabelong sa Morwa wa gagwe. Ka nnete re lapa leo le thabilego. Gona bjale re a tseba gore re phelela eng, e bile re fela pelo ya go tlo phela ka mo go sa felego, e ka ba legodimong goba Paradeiseng mo lefaseng.

² Jehofa o dirile gore go kgonege gore re tle re be karolo ya lapa la gagwe ka gobane a re rata kudu. O dirile seo ka go romela morwa wa gagwe mo lefaseng gore a tlo re hwela. (Joh. 3:16) O re ‘rekile ka theko e kgolo.’ (1 Bakor. 6:20) Jehofa o ile a diriša sehlabelo sa morwa gagwe gore re kgone go ba le segwera se sebotse le yena. Re na le tokelo ya go bitša Modimo yo a fetago medimo ka moka gore ke Tate. Le gona ka ge re ithutile sehlogong se se fetilego, ga go na tate yo a swanago le Jehofa.

3. Ke dipotšišo dife tšeo re ka ipotšišago tšona? (Bona le lepokisi leo le rego, “ Na Jehofa o a Ntseba?”)

³ Mongwadi yo mongwe wa Beibele o ile a ipotšiša potšišo yeo le rena re ka ipotšišago yona. O itše: “Jehofa ke tla mmušetša [goba ka mo lefa ka] eng ka ge e le mo a ntiretše dilo tše ka moka tšeo di nkhotšego?” (Ps. 116:12) Karabo ya potšišo ye ke gore re ka se tsoge re kgonne go lefa Tatago rena wa legodimong. Eupša tsela yeo a re ratago ka yona e dira gore le rena re mo rate. Moapostola Johane o ngwadile gore: “Re na le lerato  gobane o re ratile pele.” (1 Joh. 4:19) Ka gona re ka bontšha bjang Tatago rena wa legodimong gore le rena re a mo rata?

4. Go ya ka Jakobo 4:8, ke ka baka la’ng re swanetše go leka ka matla go ba le segwera se sebotse le Jehofa?

⁴ Jehofa o nyaka gore re be bagwera ba gagwe, e bile o nyaka re bolela le yena. (Bala Jakobo 4:8.) O nyaka gore re ‘phegelele thapelong,’ e bile o dula a theetša dithapelo tša rena. (Baroma 12:12) A ka se tsoge a lapišitšwe ke go theetša dithapelo tša rena. Rena re mo theetša ka go bala Beibele le dikgatišo tšeo di re thušago gore re e kwešiše gabotse. E bile re mo theetša ka gore ge re le dibokeng re theetše ka ditsebe tše pedi. Go no swana le ge bana ba e ba le segwera se sebotse le batswadi ba bona ge ba boledišana le bona ka mehla, le rena re ba le segwera se sebotse le Jehofa ge re boledišana le yena ka mehla.

5. Re ka dira’ng gore Jehofa a amogele dithapelo tša rena?

⁵ Ipotšiše gore dithapelo tša gago ke tša mohuta mang. Jehofa o nyaka gore ge re mo rapela re mo ntšhetše sa mafahleng. (Ps. 62:8) Re swanetše go ipotšiša gore: “Na ge ke rapela ke ekiša mantšu a dithapelo tša motho yo mongwe? Na ke no dula ke boeletša thapelo e tee gantši? Goba na dithapelo tša ka di tšwa pelong?’ Ga go pelaelo gore o rata Jehofa kudu, e bile o nyaka go dula o na le segwera se sebotse le yena. Eupša gore o dule o na le segwera se sebotse le yena, o swanetše go boledišana le yena ka mehla. Mmotše diphiri tša gago. Le gona mmotše dilo tšeo di go thabišago le tšeo di go nyamišago. Kgodišega gore o ka kgopela Jehofa thušo.

6. Re swanetše go dira’ng gore re dule re le bagwera ba Tatago rena wa legodimong?

⁶ E le gore re dule re le bagwera ba Tatago rena wa legodimong, re swanetše go leboga. Re dumelelana le mopsalme yo a ilego a ngwala gore: “Wena Jehofa Modimo wa ka, o dirile dilo tše dintši, o re diretše dilo tše dintši tše di makatšago, gomme tšeo o re naganetšego tšona ke tše dintši; ga go yo a ka bapišwago le wena. Ge nka re ke botša ba bangwe ka tšona le go bolela ka tšona, e ba tše dintši kudu moo ke palelwago ke go di anega.” (Ps. 40:5) Ga re no leboga Jehofa ka pelong, eupša re mo leboga ka mantšu le ka ditiro. Se se bontšha gore re fapane le batho ba bantši. Lehono batho ba bantši ga ba leboge dilo tšeo Jehofa a ba direlago tšona. E bile se ke se sengwe sa dilo tšeo di bontšhago gore re phela “mehleng ya bofelo,” ka gobane Beibele e re batho e tlo ba ba go se leboge. (2 Tim. 3:1, 2) Ga re nyake go swana le batho bao!

7. Jehofa o nyaka gore re dire’ng, gona ka baka la’ng?

⁷ Batswadi ga ba nyake gore bana ba bona ba dule ba elwa, eupša ba nyaka gore e be bagwera. Ka mo go swanago, Jehofa o nyaka gore bahlanka ba gagwe ka moka e be bagwera. Ge e le gabotse, ge re ratana re bontšha gore re Bakriste ba nnete. (Joh. 13:35) Re dumelelana le mopsalme yo a ilego a ngwala gore: “Ke mo gobotse le mo go kgahlišago gakaakang ge bana ba motho ba dudišana ka botee!” (Ps. 133:1) Ge re rata bana babo rena le dikgaetšedi, re bontšha Jehofa gore re a mo rata. (1 Joh. 4:20) Ruri go a thabiša go ba karolo ya lapa la bana babo rena le dikgaetšedi bao ba ‘bontšhanago botho le go šokelana.’—Baef. 4:32.

8. Go ya ka Johane wa Pele 5:3, ke ka baka la’ng re ekwa Jehofa?

⁸ Jehofa o nyaka gore bana ba kwe batswadi ba bona, e bile o nyaka gore le rena re mo  kwe. (Baef. 6:1) Re swanetše go mo kwa ka gobane o re bopile, le ka gobane o a re hlokomela. Le gona ga go na motswadi yo a swanago le yena ka bohlale. Eupša gabotsebotse re kwa Jehofa ka gobane re mo rata. (Bala 1 Johane 5:3.) Le ge re na le mabaka a mantši a gore re kwe Jehofa, ga a re gapeletše gore re mo kwe. Jehofa o re file tokologo ya go ikgethela, ka gona o a thaba ge re mo kwa ka gobane re mo rata.

9-10. Ke ka baka la’ng go le bohlokwa gore re tsebe melao ya Jehofa le go phela ka yona?

⁹ Batswadi ba nyaka gore bana ba bona ba šireletšege. Ke ka baka leo ba ba beelago melao gore e ba šireletše. Ge bana ba ekwa melao yeo, ba bontšha gore ba tshepa batswadi ba bona le go ba hlompha. Ruri go bohlokwa kudu gore le rena re tsebe melao ya Tatago rena le go ekwa. Ge re ekwa melao yeo, re bontšha Jehofa gore re a mo rata le gore re a mo hlompha, le gona seo se a re hola. (Jes. 48:17, 18) Eupša bao ba sa kwego melao ya Jehofa, ba ipakela mathata a mantši.—Bagal. 6:7, 8.

¹⁰ Ge re phela ka melao ya Jehofa, re šireletšega mmeleng le maikwelong. E bile re dula re na le segwera se sebotse le yena. Jehofa o tseba seo se ka re holago. Aurora yoo a dulago kua United States o re: “Ke a tseba gore go kwa melao ya Jehofa go dira gore re ipshine ka bophelo.” Ke nnete gore ka moka ga rena re holwa ke go kwa melao ya Jehofa.

11. Thapelo e re thuša bjang?

¹¹ Thapelo e re thuša gore re kwe Jehofa, gaešita le ge ka dinako tše dingwe go le boima go  mo kwa. Ka dinako tše dingwe go ka ba thata go kwa Jehofa ka ge re le batho ba sebe, eupša re swanetše go leka ka matla go phela ka melao ya gagwe. Mopsalme yo mongwe o ile a kgopela Jehofa gore: “[Ntire] gore ke be le moya wa go rata go go kwa.” (Ps. 51:12) Denise yo e lego mmulamadibogo wa ka mehla o re: “Ge ke thatafalelwa ke go kwa molao wa Jehofa, ke a mo rapela gomme ka mo kgopela gore a nthuše.” Re ka kgodišega gore Jehofa o tla araba dithapelo tša mohuta woo.—Luka 11:9-13.

12. Go ya ka Baefeso 5:1, re swanetše go dira’ng?

¹² Bala Baefeso 5:1. Ka ge re le “bana ba ba rategago” ba Jehofa, re swanetše go leka ka matla gore re mo ekiše. Re mo ekiša ka go rata batho ba bangwe, go ba bontšha botho le go ba lebalela. Ge batho bao ba sa tsebego Jehofa ba bona re itshwere gabotse, ba ka kwa ba duma go ithuta ka yena. (1 Pet. 2:12) Batswadi ba Bakriste ba swanetše go leka ka matla go swara bana ba bona ka tsela yeo Jehofa a re swarago ka yona. Ge batswadi ba ekiša Jehofa, bana ba bona le bona ba ka nyaka go ba bagwera ba Jehofa.

13. Re swanetše go dira’ng gore re be le sebete?

¹³ Gantši ngwana o rata go ikgantšha ka tatagwe le go botša batho ba bangwe ka yena. Ka mo go swanago, le rena re ikgantšha ka Tatago rena wa legodimong e lego Jehofa, e bile re nyaka gore batho ba bangwe ba mo  tsebe. Le gona, re ikwa go swana le Kgoši Dafida yoo a ngwadilego gore: “Moya wa ka o tla ikgantšha ka Jehofa.” (Ps. 34:2) Eupša ka dinako tše dingwe re ka ba le dihlong tša go botša batho ba bangwe ka Jehofa. Re ka dira’ng gore re be le sebete sa go dira bjalo? Re ka nagana kamoo re tlago go thabiša Jehofa ka gona, le kamoo ba bangwe ba tlago go holwa ke go ithuta ka yena. Jehofa o tla re thuša go ba le sebete. Ka ge a ile a thuša bahlanka ba gagwe ba kgale gore ba be le sebete, le rena o tla re thuša.—1 Bathes. 2:2.

14. Ke ka baka la’ng go le bohlokwa gore re botše batho ditaba tše dibotse?

¹⁴ Jehofa ga a kgetholle batho, ka gona o a thaba ge a bona re rata batho ba bangwe go sa šetšwe gore maemo a bona ke afe le gore ba tšwa kae. (Dit. 10:34, 35) Tsela e nngwe yeo re ka bontšhago gore re rata batho ke ka go ba botša ditaba tše dibotse tša Mmušo wa Modimo. (Mat. 28:19, 20) Ditaba tše tše dibotse di ka thuša batho bjang? Batho bao ba re theetšago ba ka phela bophelo bjo bobotse gona bjale gomme ba tla ba phela ka mo go sa felego Paradeiseng.—1 Tim. 4:16.

15-16. Ke dilo dife tšeo di ka dirago gore re thabe?

¹⁵ Jehofa ke Tate yo lerato, gomme o nyaka gore lapa la gagwe le thabe. (Jes. 65:14) Le ge gona bjale re na le mathata, go na le dilo tše dintši tšeo di ka dirago gore re thabe. Ka mohlala, re kgodišegile gore Tatago rena wa legodimong o re rata kudu. Re kwešiša Lentšu la Modimo gabotse. (Jer. 15:16) E bile re karolo ya lapa la batho bao ba ratago Jehofa, bao ba ratago melao ya gagwe le bao ba ratanago.—Ps. 106:4, 5.

¹⁶ Re ka dula re thabile ka gobane re a tseba gore nakong e tlago bophelo bo tlo thabiša le go feta. Re a tseba gore kgauswinyane Jehofa o tlo fediša batho ba babe ka moka gomme a fetoša lefase Paradeise. E bile re na le kholofelo ya gore nakong e tlago Modimo o tlo tsoša bahu gomme a dira gore ba phele le batho ba gabo bona gape. (Joh. 5:28, 29) Ruri yeo e tla ba nako e thabišago kudu! Le gona sa bohlokwa kudu ke gore ka nako yeo batho ka moka, go sa šetšwe gore ba phela legodimong goba mo lefaseng, ba tla be ba tumiša Tatago rena yo lerato, ba mo godiša gomme ba mo hlankela ka tsela yeo a nyakago.